1 Ac na tukun ma inge ke Moroni el tuh eis lwacta se inge insiacl tuh puhlaikyak, ac tuh sesseslah ke engan yohk ke srihpen inse pwacye lal Pahoran, lah oacyacpac el tiacna sie mwet forlah lain sukohsohk ac srihpac luhn acn lal.

2 Tuhsruhk el oacyacpac ahsor upac ke srihpen ma koluk lalos suc tuh luhsuhlwack Pahoran liki siyah in nuhnuhnkuh, ahok, in ahkkahlwemye ke srihpaclos suc lain acn lalos ac oacyacpac God lalos.

3 Ac tukun ma inge Moroni el us sie un mwet puh, in fal nuh ke kena lal Pahoran, ac sang nuh sel Lehi ac Teancum in kol un mwet mweun luhlah, ac fahsr som nuh fin acn lal Gideon.

4 Ac el tuh kohlwack ohiyac luhn moul sukohsohk ke acn nuhkwewa ma el tuh ilyak nuh we, ac eis un mwet mweun nuhkwewa suc el kuh in oracni ke fahsr nuhkwewa lal nuh fin acn lal Gideon.

5 Ac tukun ma inge tausin mwet tuh toweni nuh ke ohiyac se inge, ac tuh sruhkwack katlas nahtuhlos in karuhnguhnwacng sukohsohk lalos, tuh elos in tiac srohoh.

6 Ac ohinge, ke Moroni el oracni nuh sie mwet nuhkwewa ma el kuh in oracni ke fahsr nuhkwewa lal, el tuhkuh nuh fin acn lal Gideon; ac oracni un mwet mweun lal in weacng un mwet mweun lal Pahoran, elos arulacna fokokoi, finne in fokoko liki na mwet lal Pachus, suc pa tohkohsrah luhn mwet lain suc tuh luhswack mwet sukohsohk liki acn lal Zarahemla ac tuh eislah acn ah.

7 Ac tukun ma inge Moroni ac Pahoran elos som wi un mwet mweun lalos nuh fin acn lal Zarahemla, ac tuh som lain siti sac, ac tuh ohsun nuh sin mwet lal Pachus, yohkna oruh elos tuh tuhkuh in mweun.

8 Ac liye, Pachus el acnwucki ac mwet lal elos tuh utucklac srohoh, ac Pahoran el fohlohkyang nuh ke siyah in nuhnuhnkuh lal.

9 Ac mwet lal Pachus elos eis srihkeyuck lalos, in fal nuh ke masap, ac oacyacpac mwet lal tohkohsrah suc tuh usyucklac ac tolyuckyang nuh ke nien srohoh; ac elos tuh acnwucki in fal nuh ke masap; ahok, mwet lal Pachus ac mwet lal tohkohsrah, kuhtwena mwet suc tiacna sruhkwack kuhfwen mwe mweun in karuhnguhnwacng acn selos, tuhsruhk tuh laini, elos acnwucki.

10 Ac ohinge enenuh se na tuh masap se inge enenuh na in liyeyuckyang na pwacye nuh ke karihngihnyen acn selos; ahok, ac kuhtwena mwet suc sukokyak in lahfwekihn sukohsohk lalos elos sa na acnwucki in fal nuh ke masap uh.

11 Ac ohinge sahflah yac ahktolngoul ke kohkoh luhn mwet nuhnuhnkuh fin mwet lal Nephi; Moroni ac Pahoran elos fohlohkohnma mislac nuh fin acn lal Zarahemla, inmahsrlon mwet lalos sifacna, uniyac elos nuhkwewa suc tiacna inse pwacye nuh ke srihpac luhn sukohsohk.

12 Ac tukun ma inge ke muhtwacwacackiyacn yac ahktolngoul ac sie ke kolyuck luhn mwet nuhnuhnkuh fin mwet lal Nephi, Moroni el sa na oruh tuh mwe kahsruh in suhpweyucklac, ac oacyacpac sie un mwet mweun sun mwet tausin ohnkohsr in suhpweyucklac nuh yohrohl Helaman, in kahsrwel in sruokyacna ipin acn sac.

13 Ac el oacyacpac oruh tuh sie un mwet mweun sun tausin ohnkohsr, weacng sie un mongo, in suhpweyucklac nuh yurun un mwet mweun lal Lehi ac Teancum. Ac tukun ma inge ma inge tuh oreklac in ahkkweye acn uh in lain mwet Laman.

14 Ac tukun ma inge Moroni ac Pahoran, elos likiyac sie u luhlahp fin acn lal Zarahemla, elos fahsr wi u luhlahp se nuh fin acn lal Nephihah, elos insacnweacng in kuhtanglah mwet Laman ke siti sac.

15 Ac tukun ma inge ke elos tuh fahsr som nuh we, elos us u luhlahp se ke mwet luhn mwet Laman, ac uniyac puhs selos, ac us mwe kahsruh nwaclos ac kuhfwen mwe mweun lalos.

16 Ac tukun ma inge tukun elos eisaclos, elos oruh tuh elos in ilyak nuh ke sie wuhlweacng tuh elos in tiacna sifil sruhkwack kuhfwen mwe mweun nahtuhlos in mweun laini mwet Nephi.

17 Ac ke elos tuh ilyak nuh ke wuhlweacng se inge elos suhpwacloslac in muhta yurun mwet lal Ammon, ac elos tuh oeyucklac sun tausin ahkosr suc tuh tiacna acnwucki.

18 Ac tukun ma inge ke elos tuh suhpwacloslac elos tahfwelah in fahsr som nuh fin acn lal Nephihah. Ac tukun ma inge ke elos tuh tuhkuh nuh ke siti lal Nephihah, elos tuh tulohkohnwack lohm nuknuk selos ke acn tuhpahsrpahsr fin acn Nephihah, ma oan fototo nuh ke siti lal Nephihah.

19 Inge Moroni el kena tuh mwet Laman elos in tufoki mweun lainuhlos, fin acn tuhpahsrpahsr uh, tuhsruhk mwet Laman, elos etuh ke puhlaik yohk na upac lalos, ac elos liye puhsiyaclos, ke ma inge elos tiacna ke tufoklac lainuhlos; ke ma inge elos tiacna tuhkuh in mweun ke lwen sac.

20 Ac ke fongweni, Moroni el som ke lohsr luhn fong uh, ac tuhkuh nuh fin pot uh in lohlngohk in lukmac lah piyac kac ipin acn ke siti uh ma mwet Laman elos muhta we wi un mwet mweun lalos.

21 Ac tukun ma inge elos oasr ke lacfahl kuhtuhlacp, sisken motonoac; ac elos nuhkwewa mutul. Ac inge Moroni el fohlohklac nuh yurun un mwet mweun lal, ac el oruh tuh elos in silahklahk ahkoe mwe kapihr fokoko ac mwe fan, in fanyak ke pot uh ac fani nuh loac ke pot uh.

22 Ac tukun ma inge Moroni el oruh tuh mwet lal in fahsr som ac tuhkuh nuh ke fin pot uh, ac elos sifacna fani nuh ke ipin acn sac ke siti uh, ahok, finne ke lacfahl nuh rohtoh, ma mwet Laman elos tiacna muhta we wi un mwet mweun lalos.

23 Ac tukun ma inge elos nuhkwewa fani nuh ke siti uh ke fong ah, ke orekmakihnyen mwe kapihr fokoko lalos ac mwe fan lalos; ohinge ke litutacng uh tuhkuh elos nuhkwewa oasr lun pot ke siti uh.

24 Ac inge, ke mwet Laman elos muhtwaclihk ac liye lah un mwet mweun lal Moroni elos oasr lun pot uh, elos arulacna sahngweng, yohkna oruh elos tuh kahing tufoklac ke muhtuhn pot uh.

25 Ac inge ke Moroni el liye lah elos kahing luhkwel, el oruh tuh mwet lal in fahsr som in lainuhlos, ac uniyac mwet pucspucs, ac raunweack mwet pucspucs sahyac, ac usaclos in mwet srohoh; ac mwet luhlah selos elos kahinglac nuh ke acn lal Moroni, ma oan ke inmahsrol sisken pe acn uh.

26 Ohinge Moroni ac Pahoran elos eislah sruokyac siti lal Nephihah ac tiac sie mwet misac; ac puhs mwet Laman acnwucki.

27 Na tukun ma inge puhs sin mwet Laman suc tuh srohoh ah elos kena weacng mwet lal Ammon ac eklac sie un mwet sukohsohk.

28 Ac tukun ma inge elos nuhkwewa suc kena, fihliyuckyang nuh selos in fal nuh ke kena lalos.

29 Ke ma inge, mwet srohoh nuhkwewa luhn mwet Laman elos weacng mwet lal Ammon, ac muhtwacwacack in orekma upac, pihkihn infohk uh, yukwiyac kain in grain nuhkwewa, ac un sip ac kain in kosro nuhkwewa; ac ohinge mwet Nephi ah elos ahkmuhlahlahyeyucklac liki ma toasr; ahok, yohkna oruh elos taltallah liki nien srohoh nuhkwewa luhn mwet Laman.

30 Na tukun ma inge Moroni, tukun el sruokyac siti lal Nephihah, us mwet srohoh pucspucs, suc ahksrihkyelah na pwacye luhpan un mwet mweun luhn mwet Laman, ac fohlohkohnma mwet Nephi pucspucs suc tuh utucklac srohoh, suc ahkfokokoyelah na pwacye un mwet mweun lal Moroni; ke ma inge Moroni el som liki acn lal Nephihah nuh ke acn lal Lehi.

31 Ac tukun ma inge ke mwet Laman elos liye lah Moroni el tuhkuh in lainuhlos, elos sahngweng ac kaihng liki un mwet mweun lal Moroni.

32 Ac tukun ma inge ke Moroni ac un mwet mweun lal ukwaclos liki siti nuh ke siti, ne ke na elos ohsun nuh sel Lehi ac Teancum; ac mwet Laman ah kahing luhkwel Lehi ac Teancum, finne nuh ke inmahsrol sisken pe acn ah, ne ke na elos tuhkuh nuh fin acn lal Moroni.

33 Ac un mwet mweun lal Laman elos toweni nuh sie, yohkna tuh elos ueni nuh sie ke acn lal Moroni. Inge Ammoron, tohkohsrah luhn mwet Laman, el oacyacpac weluhlos.

34 Ac tukun ma inge Moroni ac Lehi ac Teancum elos monglac wi un mwet mweun lalos raunweack inmahsrol ke acn lal Moroni, yohkna oruh mwet Laman ah elos rauniyucklac ke inmahsrol sisken innimac ke lacfahl nuh epang, ac ke inmahsrol sisken innimac ke lacfahl nuh kuhtuhlacp.

35 Ac ohinge elos tuh monglac ke fong ah. Tuh liye, mwet Nephi ac mwet Laman elos oacyacpac tohtohlah ke srihpen fahsr loeloes; ke ma inge elos tiacna otwelah kuhtwena plwacn ke fong ah, sahyacl Teancum; tuh el arulacna kasrkuhsrak sel Ammoron, yohkna oruh el motko tuh Ammoron, ac Amalickiah suc tamuhlwel wiyacl, lah elos pa srihpen mweun yohk ac loeloes se inmahsrlolos ac mwet Laman, suc pa srihpen mweun upac ac ahkmas, ahok, ac srwacl in mongo na upac.

36 Ac tukun ma inge Teancum el kasrkuhsrak na som nuh ke acn in monglac luhn mwet Laman, ac sifacna fani ke pot ke siti uh. Ac el som us mwe kapihr soko, liki acn nuh ke acn, yohkna oruh el konwaclwack tohkohsrah; ac tohlwacng osra fakfuhk soko nuh kacl, ma fakihsilyac sisken art lal ah. Tuhsruhk liye, tohkohsrah el okaswack mwet kuhlwacnsap lal met liki el misac, yohkna oruh elos tuh ukwacl Teancum, ac unilyac.

37 Na tukun ma inge ke Lehi ac Moroni etwacack lah Teancum el misac elos arulacna ahsor; tuh liye, el sie mwet suc acnwuck puhlaiklacna ke acn lal, ahok, sie kawuck pwacye luhn moul sukohsohk; ac el tuh kweoklacna ke ongaiyac yohk pucspucs. Tuhsruhk liye, el misac, ac som liki facluh.

38 Na tukun ma inge ke Moroni el fahsr som ke lwen tok ah, ac tuhkuh sun mwet Laman, yohkna oruh elos tuh onweloslac ke sie ahkmas na upac; ac elos tuh ukwaclosyak liki acn uh; ac elos kahinglac, oruh elos tiacna fohlohk ke pacl sac in lain mwet Nephi.

39 Ac ohinge sahflah yac ahktolngoul ac sie ke kolyuck luhn mwet nuhnuhnkuh fin mwet lal Nephi; ac ohinge elos tuh puhlakihn mweun, ac ahkmas, ac srwacl in mongo, ac ongaiyac, ke lusen yac pucspucs.

40 Ac tuh oasr ahkmas, ac fohs, ac amacin, ac kain in ma koluk nuhkwewa inmahsrlon mwet lal Nephi; ne ohinge ke srihpen mwet suwohswohs, ahok, ke srihpen pruhe luhn mwet suwohswohs, elos painmoullac.

41 Tuhsruhk liye, ke srihpen arulacna loes puhlan pacl in mweun inmahsrlon mwet Nephi ac mwet Laman puhslac mwet upaclah, ke srihpen arulacna loes puhlan pacl in mweun; ac puhslac mwet fihsrwacsrlah ke srihpen ongaiyac lalos, yohkna oruh elos tuh ahkpuhsisaclyelos sifacna ye muhtuhn God, finne in inse puhsisacl yohk.

42 Ac tukun ma inge tukun Moroni el ahkfokokoyelah ipin acn ingacn ma ikack emet nuh sin mwet Laman, ne ke na elos fokokoi, el fohlohk nuh ke siti lal Zarahemla; ac oacyacpac Helaman el fohlohklac nuh ke acn in usru lal; ac sifilpac oasr mislac akwucki inmahsrlon mwet lal Nephi.

43 Ac Moroni el sang kolyuck luhn un mwet mweun lal nuh in poun wen nahtuhl, suc inel pa Moronihah; ac el fohlohklac nuh ke lohm sel sifacna tuh elan kuh in muhta in mislac ke pacl luhlah ke lusen moul lal.

44 Ac Pahoran el fohlohkyang nuh ke siyah in nuhnuhnkuh lal; ac Helaman el sifilpac eis nuh facl in luti nuh sin mwet uh kahs luhn God; tuh ke srihpen mweun ac fohs pucspucs arulacna enenweyuck tuh sie akwuck in sifilpac oreklac ke alu uh.

45 Ke ma inge, Helaman ac tamuhlwel wiyacl elos som, ac tuh fahkwelihk kahs luhn God ke kuh yohk in ahkkweyelah mwet pucspucs ke muhnahs lalos, ma tuh oruh elos in auliyak ke ma koluk lalos ac in pacptaislac nuh sin Leum God lalos.

46 Ac tukun ma inge elos tuh sifilpac oakiyac alu luhn God, fin acn nuhkwewa.

47 Ahok, ac akwuck uh tuh oreklac ke masap uh. Ac mwet nuhnuhnkuh lalos, ac mwet nuhnuhnkuh fuhlwact lalos elos suleyucklac.

48 Ac mwet lal Nephi elos muhtwacwacack in sifilpac kapkapwack fin acn uh, ac muhtwacwacack in puhseni ac in sifilpac arulacna fokokoi fin acn uh. Ac elos muhtwacwacack in kahsruhpi na upac.

49 Tuhsruhk finne elos kahsruhp, kuh elos fokoko, kuh elos kapkapwack, elos tiacna fuhlwactwack ke sengseng luhn muhtahlos; elos tiac pac kohlohkihn in esam Leum God lalos; tuhsruhk elos arulacna ahkpuhsisaclyelos sifacna ye muhtahl.

50 Ahok, elos tuh esam ma wolacna ma Leum El tuh oruh nuh selos, lah El tuh molweloslac liki misac, ac liki srohoh, ac liki nien srohoh, ac liki kain in ma ongaiyac nuhkwewa, ac El tuh molweloslac liki poun mwet lokoalok lalos.

51 Ac elos tuh pruhe nuh sin Leum God lalos pacl nuhkwewa, yohkna oruh Leum El tuh ahkinsewowoyelos, in fal nuh ke kahs Lal, oruh elos tuh fokokoi ac kapkapwack fin acn uh.

52 Ac tukun ma inge ma inge nuhkwewa oreklac. Ac Helaman el misac, ke yac ahktolngoul ac limekohsr ke kolyuck luhn mwet nuhnuhnkuh fin mwet lal Nephi.