1 Ac na tukun ma inge Alma el fohlohk liki acn Gideon, tukun el luti mwet Gideon ma pucspucs ma tiacna kuh in sihmihsyucklac, oakiyac akwuck luhn alu uh, oacna ke el tuh oruh met fin acn Zarahemla, ahok, el fohlohklac nuh lohm sel sifacna fin acn Zarahemla elan monglac liki orekma ma el oraclah.

2 Ac ohinge sahflah yac ahkyuc ke kolyuck luhn mwet nuhnuhnkuh fin mwet lal Nephi.

3 Ac tukun ma inge ke muhtwacwacackiyacn yac ahksingucul ke kolyuck luhn mwet nuhnuhnkuh fin mwet lal Nephi, Alma el som liki acn we ac eis fuhfahsryucsr lal nuh fin acn Melek, suc oasr ke lacfahl rohtoh ke infacl Sidon, ke lacfahl rohtoh sisken mahsrol ke innimac.

4 Ac el muhtwacwacack in luti mwet fin acn Melek in fal nuh ke akwuck muhtahl luhn God, suc el pahngyak kac; ac el muhtwacwacack in luti mwet uh fin acn Melek nohfohn.

5 Ac tukun ma inge mwet uh tuhkuh nuh yohrohl ke mahsrol nuhkwewa fin acn ma oan sisken lacfahl nuh ke innimac. Ac elos pacptaislac fin acn ah nohfohn;

6 Tuh ke el ahksahfyelah orekma lal fin acn Melek el som, ac fuhfahsryucsr lusen lwen tolu ke lacfahl nuh acir fin acn Melek; ac el tuhkuh nuh ke sie siti ma pahngpahng Ammonihah.

7 Inge facsin luhn mwet Nephi in pahngon acn selos, ac siti lalos, ac mura lalos, ahok, finne mura srihsrihk lalos, tukun inel suc muhta we emet ah; ac tuh ohinge pac fin acn lal Ammonihah.

8 Ac tukun ma inge ke Alma el tuhkuh nuh ke siti lal Ammonihah el muhtwacwacack in luti kahs luhn God nuh selos.

9 Inge Setuhn el sruokyac yohk insiacn mwet ke siti lal Ammonihah; ke ma inge elos tiacna porongo kahs lal Alma.

10 Ne ohinge Alma el orekma yohk ke nguhn, kwacfe sin God ke pruhe fokoko, tuh elan kuh in okwaclah Nguhn Lal nuh fin mwet suc oasr in siti sac; tuh oacyacpac Elan kuh in lwelah tuh elan kuh in pacptaiseloslac nuh ke auliyak.

11 Ne ohinge, elos ahkkwekweyelah insiaclos, fahk nuh sel: Liye, kuht etuh lah kom pa Alma; ac kuht etuh lah kom sie mwet tol fuhlwact luhn alu suc kom oakiyac fin acn pucspucs fin acn uh; in fal nuh ke facsin lom an; ac kuht tiac wi alu lom an, ac kuht tiacna luhlahlfongi ke facsin lahlfon ingacn.

12 Ac inge kuht etuh lah ke srihpen kuht tiac wi alu lom an kuht etuh lah wacngihn kuh lom facsr; ac kom sang siyah in nuhnuhnkuh nuh sel Nephihah; ke ma inge tiac kom pa mwet nuhnuhnkuh fuhlwact lasr uh.

13 Inge ke mwet uh fahk ma se inge, ac tiac porongo nohfohn kahs lal, ac lainuhl, ac acni nuh kacl, ac oruh tuh elan lihsyucklac liki siti lalos, na el som ac oruh fuhfahsryucsr lal nuh ke siti se ma pahngpahng Aaron.

14 Ac tukun ma inge ke el fuhfahsryucsr nuh we, toasrlacna ke ahsor, puhlakihn ongaiyac yohk ac kweok in nguhn, ke srihpen ma koluk luhn mwet suc oasr ke siti lal Ammonihah, tukun ma inge ke Alma el tuh toasrlacna ke ahsor, liye sie lipufacn luhn Leum ikme nuh sel, fahk:

15 Alma, kom ahkinsewowoyeyuck; ke ma inge, kweyak ac enganwack, tuh oasr srihpac yohk lom kom in engan; tuh kom oaru in liyacacng masap luhn God e ke na pacl se kom eis sap soko emet Sel. Liye, nga pa el suc tuh usot sap soko ah nuh sum ah.

16 Ac liye, nga suhpweyuckme in sapkihn kom tuh kom in fohlohk nuh ke siti lal Ammonihah, ac sifilpac luti nuh sin mwet ke siti sac; ahok, lotwelos. Ahok, fahk nuh selos, elos fin tiac auliyak Leum God El fah kuhnaosuhloslac.

17 Tuh liye, elos lutlut ke pacl se inge tuh elos in kuh in kuhnahoslah moul sukohsohk luhn mwet lom, (tuh ohinge Leum El fahk) suc ma inge lain ma loh, nuhnuhnkuh, ac masap ma El sang nuh sin mwet Lal.

18 Na tukun ma inge tukun Alma el eis pweng se lal sin lipufacn luhn Leum el silahklahk fohlohk nuh fin acn lal Ammonihah. Ac el ilyak nuh in siti uh ke siena inkacnek, ahok, ke inkacnek se ma oan nuh epang ke siti lal Ammonihah.

19 Ac ke el ilyak nuh in siti sac el masrinsrwacl, ac el fahk nuh sin sie mwet: Yac kom fah sang nuh sin sie mwet kuhlwacnsap puhsisacl luhn God mongo elan kang?

20 Ac mwet sac fahk nuh sel: Nga sie mwet Nephi, ac nga etuh lah kom sie mwet pahluh muhtahl luhn God, tuh kom pa mwet se suc sie lipufacn el fahk ke sie aruhruhma: Kom fah eis. Ke ma inge, wiyuc som nuh in lohm sihk ac nga fah usot nuh sum mongo nak; ac nga etuh lah kom fah sie mwe insewowo nuh sihk ac lohm sihk.

21 Ac tukun ma inge mwet sac eisacl nuh in lohm sel; ac mwet sac pahngpahng Amulek; ac el us puhret ac ikoac ac likiyac ye muhtahl Alma.

22 Ac tukun ma inge Alma el kanglah puhret ac kihpi; ac el ahkinsewowoyacl Amulek ac lohm sel, ac el sang kuloh nuh sin God.

23 Ac tukun el mongoi ac kihpi el fahk nuh sel Amulek: Nga pa Alma, ac nga pa mwet tol fuhlwact ke alu luhn God fin acn nuhkwewa inge.

24 Ac liye, nga pahngyak in luti kahs luhn God inmahsrlon mwet inge nuhkwewa, in fal nuh ke nguhn in fwackyuck ac pahluh; ac nga tuh tuhkuh nuh ke acn se inge ac elos tiac eisyuc, tuhsruhk elos lihsyuclac ac nga kuhracnna forlah liki acn se inge ne tok ma pahtpaht.

25 Tuhsruhk liye, nga sapkihnyuck tuh nga enenuh in sifilpac fohlohk ac palye nuh sin mwet inge, ahok, ac in fahkwack in lainuhlos ke ma koluk lalos.

26 Ac inge, Amulek, ke srihpen kom kihteyuc ac eisyuc, kom ahkinsewowoyeyuck; tuh nga masrinsrwacl, tuh nga lalo ke lusen lwen pucspucs.

27 Ac Alma el muhta lwen pucspucs yohrohl Amulek met liki el muhtwacwacack in luti nuh sin mwet uh.

28 Ac tukun ma inge mwet uh koluklac liki na met ah ke ma koluk lalos.

29 Ac kahs se tuhkuh nuh yohrohl Alma, fahk: Som, ac oacyacpac fahk nuh sin mwet kuhlwacnsap Luhk Amulek, som ac palye nuh sin mwet inge, fahk—Kowos auliyak, tuh ohinge Leum El fahk, kowos fin tiac auliyak Nga fah fahsri mwet inge ke kasrkuhsrak Luhk; ahok, ac Nga fah tiac furohklah kasrkuhsrak yohk Luhk.

30 Ac Alma el som, ac oacyacpac Amulek, nuh inmahsrlon mwet uh, in fahkwack kahs luhn God nuh selos; ac elos sesseslah ke Nguhn Muhtahl.

31 Ac oasr kuh ituckyang nuh selos, yohkna oruh elos tiac kuh in sruokyucki ke nien srohoh; kuh kuhtwena mwet tiacna kuh in onweltahluh; ne ohinge elos tiacna orekmakihn kuh lalos ne ke na elos kapriyucki ke mwe kapihr ac totoyang nuh ke nien srohoh. Inge, ma inge oreklac tuh Leum Elan kuh in ahkkahlwemye kuh Lal kaclos.

32 Ac tukun ma inge ke elos som ac muhtwacwacack in luti ac in pahluh nuh sin mwet uh, in fal nuh ke nguhn ac kuh suc Leum El sang nuh selos.