1 ’E i teienei, i muri a’era, ’ua tohu Samuela, te ’āti Lamana, i te tahi atu ā mau mea e rave rahi ’o tē ’ore e ti’a ’ia pāpa’ihia.

2 ’E inaha, ’ua nā ’ō atu ra ’oia ia rātou : Inaha, e fa’a’ite atu vau i te hō’ē tāpa’o ia ’outou na ; i roto e pae matahiti toe, ’e inaha, ’ei reira te Tamaiti a te Atua e tae mai ai nō te fa’aora i te mau ta’ata ato’a ’o tē ti’aturi i tōna ra i’oa.

3 ’E inaha, ’o teie te tāpa’o tā’u e fa’a’ite atu ia ’outou nō te taime nō tōna taera’a mai ; inaha ho’i, e ’itehia te mau māramarama rahi i ni’a i te ra’i, ’e nō reira ho’i i te ru’i nā mua ’oia e tae mai ai ’aita roa ïa e pōiri, ’e nō reira ho’i ’ua riro te reira i te ta’ata nei mai te mea ra ē, tē vai noa ra te mahana.

4 Nō reira, e ’itehia te hō’ē mahana ’e te hō’ē pō ’e te hō’ē mahana, mai te mea ra ē, e ’itehia te hō’ē mahana ’e ’aita e pō ; ’e e riro ïa teie ’ei tāpa’o nā ’outou ; ’e e ’ite ho’i ’outou i te hitira’a mai o te mahana ’e tōna ato’a ma’irira’a i raro ; nō reira e ’ite pāpū ai rātou ē, tē vai ra e piti mahana e hō’ē pō ; ’āre’a rā e’ita te pō e ha’apōirihia ; ’e ’o te pō ho’i ïa nā mua ’oia e fānauhia mai ai.

5 ’E inaha, e hiti mai te hō’ē feti’a ’āpī, ’e ’aita ā ho’i ’outou i ’ite atu ra i te hō’ē mai te reira te huru ; e riro ato’a teie ’ei tāpa’o nā ’outou.

6 ’E inaha, e ’ere ’o teie ana’e iho, tē vai atu ra e rave rahi atu ā mau tāpa’o ’e mau ’ohipa ’ūmerehia tē ’itea i ni’a i te ra’i.

7 ’E i muri a’era, e māere ’outou, ’e e ’ūmere ho’i, ’e nō reira ho’i e ma’iri ’outou i raro i te repo.

8 ’E i muri a’era, ’o rātou ’o tē ti’aturi i te Tamaiti a te Atua ra, ’o rātou ato’a ïa ’o tē fāri’i i te ora mure ’ore.

9 ’E inaha, ’ua nā reira mai te Fatu i te fa’aue mai iā’u nā roto i te vaha o tāna ra melahi, ’ia haere mai au ’e ’ia fa’a’ite atu i teie mea ia ’outou na ; ’oia ïa, ’ua fa’aue mai ’oia iā’u ’ia tohu atu vau i teie mau mea ia ’outou na ; ’oia ïa, ’ua nā ’ō mai ’oia iā’u ē : ’A ti’aoro atu i teie mau ta’ata, ’a tātarahapa ’e ’a fa’aineine i te ’ē’a o te Fatu.

10 ’E i teienei, nō te mea e ’āti Lamana vau, ’e ’ua fa’a’ite atu vau ia ’outou i te mau parau tā te Fatu i fa’aue mai iā’u ra, ’e nō te mea ho’i e fa’ahapara’a pūai te reira ia ’outou, ’ua riri ’outou iā’u ’e ’ua tītau ’ia taparahi iā’u, ’e ’ua tīahi ’ē atu iā’u mai rotopū atu ia ’outou na.

11 ’E e fa’aro’o mai ’outou i tā’u nei mau parau, ’e ’o teie ho’i te tumu vau i tae mai ai i ni’a i te mau patu nō teie nei ’oire, ’ia fa’aro’o ’outou ’e ’ia ’ite ho’i ’outou i te mau ha’avāra’a a te Atua ’o tē tīa’i nei ia ’outou nō tā ’outou mau ’ohipa ’ī’ino, ’e ’ia ’ite ato’a ’outou i te mau tītaura’a nō te tātarahapara’a.

12 ’E ’ia ’ite ato’a ’outou i te taera’a mai o Iesu Mesia, te Tamaiti a te Atua, te Metua nō te ra’i ’e nō te fenua nei, ’o Tei Hamani i te mau mea ato’a ra mai te mātāmua mai ā ; ’e ’ia ’ite ’outou i te mau tāpa’o nō tōna taera’a mai, ’e ’ia ti’a ia ’outou ’ia ti’aturi i tōna ra i’oa.

13 ’E mai te mea e ti’aturi ’outou i tōna ra i’oa, e tātarahapa ïa ’outou i tā ’outou mau hara ato’a, ’ia ti’a ia ’outou ’ia fāri’i i te ha’amatarara’a nō te reira nā roto i tōna ra mau maita’i rahi.

14 ’E inaha, e fa’a’ite fa’ahou atu vau i te tahi atu ā tāpa’o ia ’outou ; ’oia ïa, te tāpa’o nō tōna pohera’a.

15 Inaha ho’i, e mea ti’a roa iāna ’ia pohe ’ia ti’a i te fa’aorara’a ’ia tae mai ; ’oia ïa, e mea ti’a roa ’e ’ua tītauhia iāna ’ia pohe nō te fa’atupu i te ti’afa’ahoura’a o te feiā pohe ra, ’e nā roto ho’i i te reira e ti’a ai i te mau ta’ata ’ia ’āfa’ihia atu i mua i te aro o te Fatu.

16 ’Oia ïa, inaha, nā teie pohe e fa’atupu i te ti’afa’ahoura’a, ’e e fa’aora i te mau ta’ata ato’a i te pohe mātāmua—i taua pohe pae vārua ra ; nō te mea ’ua tāpū-’ē-hia te mau ta’ata ato’a mai mua atu i te aro o te Fatu, nā roto i te hi’ara’a o Adamu, ’e ’ua fa’arirohia rātou ’ei feiā pohe i te mau mea pae tino nei ’e i te mau mea pae vārua ho’i.

17 Inaha rā, nā te ti’afa’ahoura’a o te Mesia e fa’aora i te ta’ata nei, ’oia ïa i tō te ao ato’a nei, ’e nā te reira ho’i e fa’aho’i atu ia rātou i mua i te aro o te Fatu.

18 ’Oia ïa, ’e e fa’atupu te reira i te tītaura’a nō te tātarahapara’a, terā ïa, ’o ’oia ’o tē tātarahapa ra, e ’ore roa ïa ’oia e tāpūhia i raro ’e e hurihia i roto i te auahi ; ’āre’a rā ’o ’oia ’o tē ’ore e tātarahapa ra, e tāpūhia ïa ’oia i raro ’e e hurihia i roto i te auahi ; ’e e tae fa’ahou mai te pohe pae vārua i ni’a iho ia rātou, ’oia ïa, te pohe piti, ’e e tāpū-’ē-fa’ahou-hia ho’i rātou i te mau mea nō te parauti’a ra.

19 Nō reira, ’a tātarahapa ’outou, ’a tātarahapa ’outou, ’o te fa’ahapahia ’outou, ’a ro’ohia ai i taua pohe piti ra, ’o ’outou i ’ite i taua mau mea ra ’e ’aita i ha’apa’o.

20 Inaha rā, mai tā’u i parau na ia ’outou nō ni’a i te tahi atu tāpa’o, ’oia ho’i te tāpa’o nō tōna pohera’a, inaha, i taua mahana ra ’a pohe ai ’oia ra, e riro te mahana i te ha’apōirihia, ’e e ’ore te reira e ha’amāramarama mai ia ’outou na ; ’e mai te reira ato’a te ’āva’e ’e te mau feti’a ; ’e ’aita roa te māramarama e tae mai i ni’a i te fenua nei nō te ārea e toru mahana te maoro, mai te taime ’oia e pohe ai ē tae noa atu i te mahana ’oia e ti’a fa’ahou mai ai mai te pohe mai.

21 ’Oia ïa, i te taime ’oia e pohe ai e ’itehia te mau pātiri ’e te mau uira nō te ārea e rave rahi hora te maoro, e ’āueue ’e e rurutaina te fenua ; ’e te mau mato i ni’a i te fenua, tō ni’a iho ’e tō raro a’e i te fenua, ’o tei ’itea ia ’outou na i teie taime e mea pa’ari, ’e ’aore rā te pae rahi a’e nō te reira ’o te hō’ē ïa mea pa’ari, e vāvāhihia ïa.

22 ’Oia ïa, e pararī te reira nā te ’āfara’a, ’e e ’itea te reira i roto i te mau vāhi ’afā ’e i roto i te mau ārea, ’e i roto i te mau hu’ahu’a i ni’a i te fenua tā’āto’a, ’oia ïa, i ni’a iho ’e i raro a’e i te fenua.

23 ’E inaha, e tupu te mau vero rarahi, ’e e fa’aha’eha’ahia te mau mou’a e rave rahi mai te peho ra te huru, e rave rahi te mau vāhi e parauhia nei i teienei e mau peho, e riro ïa ’ei mau mou’a teitei roa.

24 E rave rahi te mau purūmu ’o tē vāvāhihia, ’e e fa’aanohia te mau ’oire e rave rahi.

25 ’E e ’īritihia te mau mēnema e rave rahi, ’e e tu’u mai te reira i tō rātou feiā pohe e rave rahi ; e rave rahi te feiā mo’a ’o tē fā mai i te mau ta’ata e rave rahi.

26 ’E inaha, ’ua nā reira te melahi i te parau mai iā’u ; ’e ’ua nā ’ō mai ho’i ’oia iā’u ē, e ’itehia te mau pātiri ’e te mau uira nō te ārea e rave rahi hora te maoro.

27 ’E ’ua nā ’ō mai ’oia iā’u ē, ’a vai noa ai te pātiri ’e te uira, ’e te vero, e tupu teie nei mau mea, ’e e tāpo’i noa te pōiri i te fenua tā’āto’a nō te ārea e toru mahana te maoro.

28 ’E ’ua nā ’ō mai ra ho’i te melahi iā’u ē, e rave rahi ’o tē ’ite atu i te mau mea rahi a’e i teie, ’ia ti’a ia rātou ’ia ti’aturi ē e tupu mau iho ā teie mau tāpa’o ’e teie mau ’ohipa ’ūmerehia i ni’a i te fenua nei, ’ia ’ore roa te tumu nō te ti’aturi ’ore i rotopū i te mau tamari’i a te ta’ata nei—

29 ’E teie te tumu nō te reira, ’ia fa’aorahia te mau ta’ata ato’a ’o tē ti’aturi, ’e ’o rātou ato’a ’o tē ’ore e ti’aturi, ’ia fa’ataehia mai ïa te ha’avāra’a parauti’a i ni’a iho ia rātou ; ’e ’oia ato’a mai te mea e fa’ahapahia rātou ra, nā rātou iho ïa e fa’atae mai i tō rātou iho fa’ahapara’a i ni’a iho ia rātou iho.

30 ’E i teienei, ’a ha’amana’o, ’a ha’amana’o, e tō’u mau taea’e, ’o ’oia ’o tē pohe ra, e pohe ïa iāna iho, ’e ’o ’oia ’o tē rave i te mau ’ohipa ’ī’ino ra, tē rave ra ïa ’oia i te reira iāna iho ; inaha ho’i, e feiā ti’amā ’outou ; ’ua ti’a ia ’outou ’ia mā’iti nō ’outou iho ; inaha ho’i, ’ua hōro’a mai te Atua i te ’ite ia ’outou, ’e ’ua fa’ati’amā ho’i ia ’outou.

31 ’E ’ua hōro’a mai ’oia i te ’ite ia ’outou ’ia ti’a ia ’outou ’ia ’ite i te maita’i ’e te ’ino, ’e ’ua hōro’a mai ho’i ’oia i te ti’amāra’a ia ’outou ’ia ti’a ia ’outou ’ia mā’iti i te ora ’e ’aore rā i te pohe ; ’e e ti’a ia ’outou i te rave i te maita’i ’ia fa’aho’ihia i te mea maita’i, ’e ’aore rā ’ia fa’aho’ihia mai te mea maita’i ia ’outou na ; ’e ’aore rā, e ti’a ia ’outou ’ia rave i te ’ino, ’e ’ia fa’aho’ihia mai te mea ’ino ia ’outou na.