1 ’E i teienei, i muri a’era, i te maha ’ahuru ’e ma toru o te matahiti nō te fa’aterera’a a te mau ha’avā, ’aita roa e mārōra’a i rotopū i te mau ’āti Nephi, maori rā ’o te te’ote’o ri’i i roto i tō te ’ēkālesia, i tupu ai te tahi mau ’āmahamahara’a ri’i i rotopū i te mau ta’ata, ’e ’ua fa’a’āfarohia taua mau ’ohipa ra i te hope’a nō te maha ’ahuru ’e ma toru o te matahiti.

2 ’E ’aita roa e mārōra’a i rotopū i te mau ta’ata i te maha ’ahuru ’e ma maha o te matahiti ; ’aita ato’a i rahi te mārōra’a i te maha ’ahuru ’e ma pae o te matahiti.

3 ’E i muri a’era, i te maha ’ahuru ’e ma ono o te matahiti, ’oia ïa, ’ua tupu te mārōra’a rahi ’e te ’āmahamahara’a e rave rahi ; ’e nā roto i te reira ’ua reva atu ra te mau ta’ata e rave rahi i rāpae i te fenua ra nō Zarahemela, ’e ’ua haere atu ra rātou i te fenua i te pae apato’erau nō te pārahi i taua fenua ra.

4 ’E ’ua haere atu rātou i te vāhi ātea roa, ’e nō reira ho’i ’ua tae atu ra i te vāhi pape rahi roa ’e te mau ’ānāvai pape e rave rahi.

5 ’Oia ïa, ’ua ha’apurara atu ra rātou nā ni’a i te mau vāhi ato’a o te fenua, i te mau vāhi ato’a i ’ore i fa’aanohia, ’e i ’ore i pau te rā’au i te ta’ata i pārahi i te fenua i muta’a ihora.

6 ’E i teienei, ’aita roa te hō’ē a’e vāhi o te fenua i ano roa, maori rā nō te rā’au ; ’e nō te rahi ho’i o te pau o te feiā i pārahi na i ni’a te fenua i muta’a ihora i parauhia ai te fenua e fenua ano.

7 ’E e mea iti roa te mau rā’au i ni’a i te fenua, nō reira ’ua riro atu ra te feiā i haere i reira ’ei feiā ’aravihi i te hāmani i te tīmā ; nō reira, ’ua patu rātou i te mau fare tīmā ’ei fare fa’aeara’a nō rātou.

8 ’E i muri a’era, ’ua fānau rahi rātou, ’e ’ua purara a’era i ni’a te fenua, ’e ’ua haere atu rātou mai te fenua i te pae apato’a ē tae atu i te fenua i te pae apato’erau, ’e ’ua purara noa a’era ’e ’ua ha’amata rātou i te tae atu i te mau vāhi o te fenua tā’āto’a, mai te moana i te pae apato’a ē tae atu i te moana i te pae apato’erau, ’e mai te moana i te pae tō’o’a o te rā ē tae atu i te moana i te hiti’a o te rā.

9 ’E te feiā i haere atu i te fenua i te pae apato’erau ’ua pārahi rātou i roto i te mau ti’ahapa ’e i roto i te mau fare tīmā, ’e ’ua vaiiho noa rātou i te mau rā’au e ’ōteo mai i ni’a i te fenua ’ia tupu noa, ’ia roa’a ia rātou a muri atu te mau rā’au nō te hāmani i tō rātou mau fare, ’oia ïa, tō rātou mau ’oire, ’e tō rātou mau hiero, tō rātou mau sunago, ’e tō rātou mau fare mo’a, ’e te mau huru fare ato’a ho’i.

10 ’E i muri a’era, nō te iti o te rā’au i te fenua i te pae apato’erau, ’ua ani atu rātou ’ia fa’autahia mai te mau rā’au e rave rahi nā ni’a i te pahī.

11 ’E nō reira i ti’a ai i te feiā i te fenua i te pae apato’erau ’ia patu i te mau ’oire e rave rahi i te rā’au ’e i te tīmā ato’a ho’i.

12 ’E i muri a’era, e rave rahi mau ta’ata o Amona, e mau ’āti Lamana rātou i te fānaura’a, tei haere atu i taua fenua ra.

13 ’E i teienei, e rave rahi te mau pāpa’a parau i pāpa’ihia e teie nei mau ta’ata e rave rahi, ’e nō ni’a te reira i te mau mea i ravehia e teie nei feiā, ’e e mau mea ta’a ’ē roa ’e te rahi nō ni’a iho ia rātou.

14 Inaha rā ’aita roa e ti’a ’ia pāpa’ihia i roto i teie nei buka te hō’ē tufa’a nō te hānerera’a o te mau mea i ravehia e teie nei feiā, ’oia ïa, te ’ā’amu nō te mau ’āti Lamana ’e te mau ’āti Nephi, ’e tā rātou mau ’arora’a, ’e tā rātou mau mārōra’a, ’e tā rātou mau tāivara’a, ’e tā rātou a’ora’a, ’e tā rātou mau tohura’a, ’e tā rātou mau fa’autara’a tao’a nā ni’a i te pahī, ’e tā rātou hāmanira’a i te mau pahī, ’e tā rātou patura’a i te mau hiero, ’e te mau sunago, ’e te mau fare mo’a, ’e nō tō rātou parauti’a, ’e nō tō rātou parauti’a ’ore, ’e tā rātou mau taparahira’a ta’ata, ’e tā rātou mau ’eiāra’a tao’a, ’e tā rātou haru-noa-ra’a i te tao’a, ’e nō te mau huru ’ohipa huna ’e te vi’ivi’i ato’a, ’e te mau ’ohipa tai’ata.

15 Inaha rā, tē vai ra e rave rahi mau buka e mau huru pāpa’a parau ato’a, ’e ’ua pāpa’ihia te pae rahi o te reira ’e te mau ’āti Nephi.

16 ’E ’ua hōro’ahia te reira e te mau ’āti Nephi mai te hō’ē u’i i te tahi, ē tae noa mai ’ua ma’iri rātou i roto i te hara ’e ’ua taparahi-pohe-roa-hia rātou, ’e ’ua haru-noa-hia tā rātou tao’a, ’e ’ua a’ua’uhia, ’e ’ua tīahi-’ē-hia, ’e ’ua tā’irihia, ’e ’ua ha’apurarahia i ni’a i te fenua nei, ’e ’ua ’āno’i-noa-hia rātou i te mau ’āti Lamana ē tae noa atu ’aita rātou i parau-fa’ahou-hia e mau ’āti Nephi ; ’ua riro rā rātou ’ei feiā parauti’a ’ore, ’e te ’ōviri, ’e te taehae ho’i, ’oia ïa, ’ua riro rātou ’ei mau ’āti Lamana.

17 ’E i teienei, e pāpa’i fa’ahou vau i tā’u ’ā’amu ; nō reira, te mau mea i parauhia na e au ’ua tupu ïa i muri a’e i te mau mārōra’a e rave rahi, ’e te mau fifi, ’e te mau tama’i, ’e te mau tāivara’a ho’i, i rotopū i te mau ta’ata o Nephi.

18 ’E ’o te hope’a ïa nō te maha ’ahuru ’e ma ono o te matahiti nō te fa’aterera’a a te mau ha’avā.

19 ’E i muri a’era, tē vai noa ra ā te mārōra’a rahi i ni’a i te fenua, ’oia ïa, ē tae noa atu i te maha ’ahuru ’e ma hitu o te matahiti, ’e ’oia ato’a i te maha ’ahuru ’e ma va’u o te matahiti.

20 ’Āre’a rā ’ua pārahi noa Helamana i ni’a i te pārahira’a ha’avāra’a ma te parauti’a ’e te fāito ti’a ; ’oia ïa, ’ua ha’apa’o maita’i ’oia i te mau ture, ’e te mau parau, ’e te mau fa’auera’a a te Atua ; ’e ’ua rave tāmau noa ’oia i te mea au i mua i te aro o te Atua ; ’e ’ua pe’e māite ’oia i te mau haere’a o tōna ra metua tāne, ’e nō reira ho’i ’ua manuia ’oia i ni’a i te fenua.

21 ’E i muri a’era, e to’opiti āna tamari’i tamāroa. ’Ua topa ’oia i tō te matahiapo i’oa o Nephi, ’e tō te hope’a i’oa o Lehi. ’E ’ua ha’amata a’era rāua i te tupu māite i mua i te Fatu.

22 ’E i muri a’era, ’ua fa’aea ri’i ihora te mau tama’i ’e te mau mārōra’a i rotopū i te mau ta’ata o Nephi, i te pae hope’a nō te maha ’ahuru ’e ma va’u o te matahiti nō te fa’aterera’a a te mau ha’avā i ni’a i te mau ta’ata o Nephi.

23 ’E i muri a’era, i te maha ’ahuru ’e ma iva o te matahiti nō te fa’aterera’a a te mau ha’avā, ’ua vai tāmau noa te hau i ni’a i te fenua, maori rā nō te mau pupu ’ohipa huna i fa’ati’ahia e Gadianetona te ta’ata ’eiā tao’a, i te mau vāhi ta’ata rahi o te fenua ; ’e i taua tau ra, ’aita roa rātou i ’itehia e te feiā fa’atere o te hau fenua ; nō reira ’aita rātou i ha’amouhia i ni’a i te fenua.

24 ’E i muri a’era, i taua iho matahiti ra ’ua manuia rahi roa tō te ’ēkālesia, ’e nō reira ho’i e rave rahi tauatini i ’āmui ia rātou iho i roto i te ’ēkālesia, ’e ’ua bāpetizohia nō te tātarahapara’a.

25 ’E nō te manuia rahi o te ’ēkālesia, ’e nō te rahi o te mau ha’amaita’ira’a i nīni’ihia mai i ni’a iho i te mau ta’ata, i māere roa atu ai te mau tahu’a rahi ’e te mau ’orometua.

26 ’E i muri a’era, ’ua manuia maita’i te ’ohipa a te Fatu i te bāpetizora’a ’e te tāhō’ēra’a mai i te mau vārua e rave rahi ’ahuru tauatini i te ’ēkālesia a te Atua.

27 Nō reira tē ’ite nei tātou ē, tē vai nei tō te Fatu aroha i te mau ta’ata ato’a ’o tē ti’aoro atu i tōna ra i’oa mo’a ma te ’ā’au hina’aro mau.

28 ’Oia ïa, nō reira tē ’ite ato’a nei tātou ē, tē vai-’īriti-noa-hia nei te ’ūputa o te ao ra i te mau ta’ata ato’a, ’e ’ia rātou ato’a ’o tē ti’aturi i te i’oa o Iesu Mesia, te Tamaiti a te Atua.

29 ’Oia ïa, tē ’ite ato’a nei tātou ē, ’o rātou ’o tē hina’aro, e ti’a ia rātou ’ia tāpe’a mai i te parau a te Atua, ’o tei riro ’ei mea ora ’e te pūai rahi, ’e ’o tē fa’ata’a ’ē i te mau mea ha’avare ato’a ’e te mau mārei ato’a ’e te mau ’ōpuara’a ’ino ato’a a te diabolo, ’e ’o tē arata’i i te ta’ata o te Mesia nā ni’a i te ’ē’a piriha’o ’e te oaoa e tae ai i terā pae mai o taua ’ābuso mure ’ore nō te mamae, ’o tei fa’aineinehia nō te horomi’i i te feiā parauti’a ’ore—

30 ’E e tāpae tō rātou vārua, ’oia ïa, tō rātou vārua tāhuti ’ore, i te rima ’atau o te Atua, i te bāsileia o te ao ra, nō te pārahi i raro i pīha’i iho ia Aberahama, ’e Isaaka, ’e Iakoba, ’e i pīha’i iho i tō tātou mau metua mo’a ato’a ra, ’e e ’ore roa e haere fa’ahou i rāpae.

31 ’E i taua matahiti nei ’ua vai tāmau noa te ’oa’oa i ni’a i te fenua nō Zarahemela, ’e i roto i te mau retioni ato’a ē ’ati noa a’e, ’e i roto i te mau fenua ato’a i pārahihia e te mau ’āti Nephi.

32 ’E i muri a’era, ’ua vai noa te hau ’e te ’oa’oa rahi i roto i te toe’a nō te maha ’ahuru ’e ma iva o te matahiti ; ’oia ïa, ’e ’ua vai noa ato’a te hau ’e te ’oa’oa rahi i te pae ’ahuru o te matahiti nō te fa’aterera’a a te mau ha’avā.

33 ’E i te pae ’ahuru ’e ma hō’ē o te matahiti nō te fa’aterera’a a te mau ha’avā, ’ua vai noa te hau, maori rā nō te te’ote’o tei ha’amata i te tae ri’i mai i roto i te ’ēkālesia—’eiaha i roto i te ’ēkālesia a te Atua, i roto rā i te ’ā’au o te feiā i fa’ahua melo nō te ’ēkālesia a te Atua—

34 ’E ’ua fa’ateiteihia rātou i roto i te te’ote’o ē tae noa atu i te hāmani-’ino-ra’a i tō rātou mau taea’e e rave rahi. I teienei e ’ino rahi teie, i ro’ohia ai te pae rahi o te feiā ha’eha’a i te mau hāmani-’ino-ra’a rahi, ’e i haere ai rātou nā roto i te mau ’ati e rave rahi.

35 ’Āre’a rā ’ua ha’apae pinepine ’e ’ua pure pinepine rātou, ’e ’ua tupu pūai roa a’era tō rātou ha’eha’a, ’e ’ua pa’ari roa a’era tō rātou fa’aro’o i te Mesia, ē tae noa atu ’ua ’ī tō rātou vārua i te ’oa’oa ’e te hau, ’oia ïa, ē tae noa atu ’ua mā roa ’e ’ua mo’a tō rātou ’ā’au, ’e ’ua noa’a mai taua mo’ara’a ra nō te mea ’ua hōro’a rātou i tō rātou ’ā’au i te Atua.

36 ’E i muri a’era, ’ua hope ato’a te pae ’ahuru ’e ma piti o te matahiti i roto i te hau, maori rā ’o te te’ote’o rahi tei ō i roto i te ’ā’au o te mau ta’ata ; ’e nō tā rātou mau tao’a rahi roa ’e tō rātou manuia i ni’a i te fenua i tupu ai te reira ; ’e ’ua tupu noa te reira i ni’a iho ia rātou i terā mahana ’e i terā mahana.

37 ’E i muri a’era, i te pae ’ahuru ’e ma toru o te matahiti nō te fa’aterera’a a te mau ha’avā, ’ua pohe ihora Helamana, ’e ’ua ha’amata ihora tāna tamaiti matahiapo ra ’o Nephi i te fa’atere ’ei mono nōna. ’E i muri a’era, ’ua ti’a atu ’oia i ni’a i te pārahira’a ha’avāra’a ma te parauti’a ’e te fāito tia ; ’oia ïa, ’ua ha’apa’o maita’i ’oia i te mau fa’auera’a a te Atua, ’e ’ua haere ’oia i te mau haere’a o tōna ra metua tāne.