1 ’E i muri a’era, i te pae ’ahuru ’e ma maha o te matahiti ’ua tupu te mau ’āmahamahara’a e rave rahi i roto i te ’ēkālesia, ’e ’ua tupu ato’a te mārōra’a i rotopū i te mau ta’ata, ’e nō reira ho’i ’ua tupu te ha’amani’ira’a rahi i te toto.

2 ’E ’ua taparahihia ’e ’ua ti’avaruhia te mau ta’ata ’ōrurehau i rāpae i te fenua, ’e ’ua haere atu rātou i te ari’i o te mau ’āti Lamana.

3 ’E i muri a’era, ’ua tāmata a’era rātou ’ia fa’ati’arepu i te mau ’āti Lamana ’ia ’aro atu i te mau ’āti Nephi ; inaha rā, ’ua mata’u roa te mau ’āti Lamana, ’e nō reira ho’i ’aita roa rātou i fa’aro’o i te mau parau a taua feiā ’ōrurehau ra.

4 ’Āre’a rā, i muri a’era, i te pae ’ahuru ’e ma ono o te matahiti nō te fa’aterera’a a te mau ha’avā, ’ua haere atu ra te tahi mau ta’ata ’ōrurehau nō roto mai i te mau ’āti Nephi i te mau ’āti Lamana ; ’e ’ua manuia ihora rātou ’e tō rātou mau hoa ato’a i te fa’atupura’a i tō rātou riri i te mau ’āti Nephi ; ’e tē fa’aineine ra rātou pā’āto’a i taua matahiti ra nō te ’aro atu.

5 ’E i te pae ’ahuru ’e ma hitu o te matahiti, ’ua haere mai ra rātou e ’aro i te mau ’āti Nephi, ’e ’ua ha’amata rātou i te ’ohipa nō te pohe ; ’oia ïa, ’e nō reira ho’i i te pae ’ahuru ’e ma va’u o te matahiti nō te fa’aterera’a a te mau ha’avā, ’ua roa’a ia rātou te fenua ra nō Zarahemela ; ’oia ïa, ’e te mau fenua ato’a ē tae noa atu i te fenua i fātata i te fenua ra nō ’Auhune.

6 ’E ’ua tīahihia atu te mau ’āti Nephi ’e te mau nu’u fa’ehau o Moroniha ē tae roa atu i te fenua ra nō ’Auhune.

7 ’E i taua vāhi ra ’ua ha’apa’ari rātou nō te ’aro atu i te mau ’āti Lamana, mai te moana i te tō’o’a o te rā ē tae noa atu i te moana i te hiti’a o te rā ; e hō’ē mahana tā’āto’a nō te hō’ē ta’ata ’āti Nephi ’ia haere atu i reira, i te vāhi tā rātou i ha’apa’ari ’e i ha’aputuputu i tō rātou mau nu’u fa’ehau nō te pāruru i tō rātou fenua i te pae apato’erau.

8 ’E nō reira ’ua roa’a i te mau ta’ata ’ōrurehau o te mau ’āti Nephi, nā roto i te tauturura’a a te hō’ē nu’u fa’ehau rahi o te mau ’Āti Lamana fenua ato’a o te mau ’āti Nephi i te pae apato’a. ’E ’ua tupu teie mau mea i te pae ’ahuru ’e ma va’u ’e i te pae ’ahuru ’e ma iva o te matahiti nō te fa’aterera’a a te mau ha’avā.

9 ’E i muri a’era i te ono ’ahuru o te matahiti nō te fa’aterera’a a te mau ha’avā, ’ua manuia o Moroniha ma te tauturuhia e tōna mau nu’u fa’ehau ’ia rave mai i te mau tufa’a e rave rahi o te fenua ; ’oia ïa, ’ua roa’a fa’ahou ia rātou te mau ’oire e rave rahi i ma’iri i roto i te rima o te mau ’āti Lamana.

10 ’E i muri a’era, i te ono ’ahuru ’e ma hō’ē o te matahiti nō te fa’aterera’a a te mau ha’avā, ’ua manuia rātou ’ia fāri’i fa’ahou mai i te ’āfara’a o tō rātou mau fenua.

11 I teienei, teie pau rahi o te mau ’āti Nephi, ’e te rahi ho’i o te mau ta’ata i taparahihia i rotopū ia rātou, e’ita roa ïa te reira e tupu ’āhiri ē ’aita te parauti’a ’ore ’e te mau ’ohipa vi’ivi’i i vai na i rotopū ia rātou ; ’oia ïa, ’e tei rotopū ato’a ho’i te reira ia rātou ’o tei parau ē, nō roto rātou i te ’ēkālesia a te Atua.

12 ’E nō te te’ote’o o tō rātou ’ā’au, nō tā rātou mau tao’a rahi, ’oia ïa, nō tā rātou hāmani-’ino-ra’a i te feiā veve, nō tā rātou tāpe’ara’a i tā rātou mā’a i tei po’ia, nō tā rātou tāpe’ara’a i tō rātou ’ahu i tei taha’a noa, ’e nō tā rātou motora’a i tō rātou mau taea’e ha’eha’a i te pāpāri’a, nō tō rātou tahitohitora’a i tei mo’a ra, nō tā rātou hunara’a i te Vārua nō te tohu ’e te heheura’a, nō te taparahira’a i te ta’ata, te harura’a i te tao’a, te ha’avarera’a, te ’eiāra’a, te fa’aturi, te fa’atupura’a i te mau mārōra’a rahi, ’e nō te fa’aru’era’a nō te haere atu i te fenua ra nō Nephi, i rotopū i te mau ’āti Lamana—

13 ’E nō tō rātou parauti’a ’ore rahi, ’e tā rātou fa’aahaahara’a i tō rātou iho pūai, i vaiihohia ai rātou i tō rātou iho pūai ; nō reira ’aita rātou i manuia, ’ua ro’ohia rā rātou i te ’ati ’e ’ua tā’irihia, ’e ’ua tīahi ’ē-hia atu i mua i te mau ’āti Lamana, ē tae noa atu ’ua riro ’ē atu te pae rahi o tō rātou mau fenua.

14 Inaha rā, ’ua a’o atu Moroniha i te mau mea e rave rahi i te mau ta’ata nō tā rātou mau ’ohipa ’ī’ino ; ’e ’ua a’o ato’a atu ’o Nephi rāua ’o Lehi, nā tamaiti a Helamana, i te mau mea e rave rahi i te mau ta’ata, ’oia ïa, ’e ’ua tohu atu rāua i te mau mea e rave rahi ia rātou nō ni’a i tā rātou mau ’ohipa ’ī’ino, ’e i te mau mea e tupu i ni’a ia rātou mai te mea ’aita rātou e tātarahapa i tā rātou mau hara.

15 ’E i muri a’era, ’ua tātarahapa rātou, e mai te au i tā rātou tātarahapara’a, ’ua ha’amata rātou i te manuia.

16 Nō te mea i tō Moroniha ’itera’a ē ’ua tātarahapa rātou, ’ua tāmata ’oia i te arata’i atu ia rātou i terā vāhi ’e i terā vāhi, ’e i terā ’oire ’e i terā ’oire, ē tae noa atu ’ua roa’a fa’ahou ia rātou te hō’ē ’āfara’a nō tā rātou mau tao’a ’e te hō’ē ’āfara’a nō tō rātou mau fenua.

17 ’E ’o te hope’a te reira nō te ono ’ahuru ’e ma hō’ē matahiti nō te fa’aterera’a a te mau ha’avā.

18 ’E i muri a’era, i te ono ’ahuru ’e ma piti o te matahiti nō te fa’aterera’a a te mau ha’avā, ’aita a’era i roa’a fa’ahou mai ia Moroniha te mau vāhi i riro na i te mau ’āti Lamana.

19 Nō reira ’ua fa’a’ore rātou i tā rātou ’ōpuara’a ’ia rave mai i te toe’a o tō rātou mau fenua, nō te rahi ho’i o te mau ’āti Lamana ’aita atu ra i ti’a i te mau ’āti Nephi ’ia fāri’i i te mana i ni’a ia rātou ; nō reira ’ua fa’a’ohipa Moroniha i tōna mau nu’u fa’ehau ato’a nō te pāruru i te mau vāhi i roa’a mai iāna ra.

20 ’E i muri a’era, nō te rahi o te mau ’āti Lamana, ’ua tupu ihora tō te mau ’āti Nephi mata’u rahi, ’o te ha’avīhia rātou, ’e ’o te ta’ata’ahihia i raro, ’e ’o te taparahihia, ’e ’o te ha’amouhia.

21 ’Oia ïa, ’ua ha’amana’o ihora rātou i te mau parau tohu a Alama, ’e te mau parau ato’a a Mosia ; ’e ’ua ’ite a’era rātou ē, e feiā ’ā’au ’eta’eta rātou, ’e ’ua ha’afaufa’a ’ore rātou i te mau fa’auera’a a te Atua.

22 ’E ’ua fa’ahuru ’ē ’e ’ua ta’ata’ahi rātou i raro a’e i tō rātou ’āvae i te mau ture a Mosia, ’e ’aore rā i tā te Fatu i fa’aue atu iāna ’ia hōro’a atu i te mau ta’ata ; ’e ’ua ’ite rātou ē, ’ua ha’avi’ivi’ihia tā rātou mau ture, ’e ’ua riro rātou ’ei feiā parauti’a ’ore, ’e nō reira ho’i ’ua riro rātou ’ei mea parauti’a ’ore mai te mau ’āti Lamana ra.

23 ’E nō tā rātou mau ’ohipa ’ī’ino ’ua ha’amata te ’ēkālesia i te paruparu ; ’e ’ua ha’amata rātou i te ti’aturi ’ore i te vārua nō te tohu ’e te vārua nō te heheura’a, ’e tei mua ti’a atu te mau ha’avāra’a a te Atua i tō rātou aro.

24 ’E ’ua ’ite rātou ē, ’ua paruparu rātou mai tō rātou ra mau taea’e, i te mau ’āti Lamana, ’e ’aita atu ra te Vārua o te Fatu i fa’aherehere ia rātou ; ’oia ïa, ’ua fa’aātea ’ē atu te reira ia rātou nō te mea e ’ore roa te Vārua o te Fatu e pārahi i roto i te mau hiero vi’ivi’i—

25 Nō reira ’ua fa’aea te Fatu i te fa’aherehere ia rātou nā roto i tōna mana semeio ’e te mana fāito ’ore ; nō te mea ’ua riro rātou ’ei feiā ti’aturi ’ore ’e te parauti’a ’ore rahi ; ’e ’ua ’ite ato’a rātou ē, ’ua rahi roa atu te mau ’āti Lamana ia rātou, ’e ’ia ’ore rātou ’ia ’ati māite atu i te Fatu tō rātou Atua, e pau roa ïa rātou i te pohe e ti’a ai.

26 Inaha ho’i, ’ua ’ite rātou ē, ’ua au tō te mau ’āti Lamana pūai i tō rātou, tō te hō’ē ta’ata i tō te hō’ē ta’ata. ’E nō reira ’ua topa rātou i roto i teie nei hara rahi ; ’oia ïa, nō reira ’ua riro rātou ’ei feiā paruparu, nō tā rātou hara, ’e ’aita ho’i te mau matahiti i pau ’a hope ai teie nei mau mea i te tupu.