Kalltaña
Mormonan Kellkatapajj Bibljamawa. Ucasti kollanaraquiwa. Mormonan Kellkatapajj nayra America sat marcanquiri jakenacat khanañchiwa. Uca nayra jakenacan Diosamp sarnakatanacapat khanañcharaquiwa. Bibljamanwa, Tatitun phokha yatichäwinacapajj aca kellkatanquiwa.
Walja nayra Diosat arjirinacaw aca kellkat kellkatapjje. Diosan jupanacar churat yatiyäwinacaparjamaw kellkapjjaraquïna. Uca arjirinacasti kori tʼalpha lekʼetanacaru kellkapjjänwa. Ucatsti yakha Mormon sat arjirejja jupanacan walja arunacapat mä kawkhanaca yakha kellkataru kellkänwa. Aca kellkatajj pä jachʼa marcanacat yatiyi. Mayajj jerusalen sat marcat america sat marcaru juti, 600 mara janir Jesucristojj yurcän ucajja. Uca jakenacajj pä marcaru tucuraquiwa, mayasti Nefi jakenaca sata, yakhajja Laman jakenaca sataraquiwa. Aca kellkatajja yakha jakenacat khanañcharaquiwa. Jupanacasti Babel sat pucarat jutapjjewa. Jupanacasti Jared jakenaca sataraquiwa. Take aca jakenacajja tʼunjatänwa.
Aca Mormonan Kellkatajja Jesucristot yatichi. Jupajj aca orakeru juti, jacatatatap khepatjja, siw kellkatajja. Kellkatajj yaticharaquiwa, jakenacan sumancañamp utjasiñapataqui, wiñay khespiyatäñapataqui.
Mormonajj kellkañ tucuycän uca khepatjja, kellkatanac Moroni sat yokaparu churänwa. Moronisti mä kawkhs kellkaraquiwa. Ucatsti Moronejj uca kellkatanac Cumora sat kolluna imantänwa. Ucatsti Septiembre phajjsina, pä tunca mayanïri urupa, 1823 marana, uca pachpa Moronejja, jacatatat jakësa Jose Smith sat Diosan arjiriparu uñstänwa.
Ucapachatjja, uca kellkatanacajj Jose Smitharu churatänwa. Jupasti Diosan churäwipampi chʼamapampi ucanac ingles aruru jakoquipänwa. Aca kellkatanacasti Jesucristot ircatapjjewa, Bibljamawa. Jupajja Jaquiri Diosan Yokapawa siw kellkatajja. Take qhitinacatejj jupan yatichäwinacap phokhasa juparu jutapquejja, ucanacajj khespiyatapjjaniwa.
Jose Smith sat arjirejja siwa–nayajj sistwa, take yakha acanquiri kellkatanacat sipans aca kellkatajj jucʼamp chekawa. Iyawsañajjan kalltäwiparaquiwa. Jakenacatejj Diosaru jucʼampi jacʼachasipjjaspa aca kellkatar phokhasa, take yakha cunanacat sipana.
Uqhämaraqui, tunca mayani yakha chachanacajj kori tʼalpha lekʼetanac uñjapjjaraquïnwa. Jupanacan ircatäwinacap aca kellkatancaraquiwa, “Quimsa Ircatirin Ircatäwipa” satasa, “Quimsakallk Ircatirin Ircatäwipa” satasaraqui.
Takeniru aca kellkat leyipjjam satapjjtwa. Ucatsti Diosata mayisipjjam, acanacajj chekat janich sasa. Qhitinacatejj jupata Criston sutipjjaru, juparu iyawsas mayisipcanejja, jupanacaru jupajj arsuniwa, Kollan Ajay toke.
Qhitinacatejj ucanac yatiñaru puripquejja, jupanacajj Jesucriston Khespiyirïtapjj yatipjjaraquiniwa. Jose Smithan cheka arjirïtapjj yatipjjaraquiniwa. Jesucriston Khep Khepüruñnacanquiri Kollananac Tamapan chekatapjj yatipjjaraquiniwa, ucasti jakenacaru waquichayañataquiwa Jesucriston payïri jutañapataquiwa.