Quimsa Ircatirin Ircatäwipa

Qhitinacarutejj aca kellkatajj purcani take uca marcanacas wila masinacas lajjranacas jakenacas acjj yatipjjpan: Dios Awquimpin Jesucristo Tatitusampin qhuyapayäwipata, cuna tʼalpha lekʼetanacjjarutejj aca kellkäwejj kellkatäcäna, ucanacjja nanacajj uñjapjjta. Ucasti Nefin jakenacapampita jupanacan Laman jake sat jilanacapampita, ucat arsutäqui uca saytʼu pucarat jutiri Jaredan jakenacapampita kellkatawa. Nanacajj uca kellkäwinacan Diosan chʼamapamp wajjtʼäwipamp yatit aruru jakoquipatätapjj yatipjjaractwa, cunalaycutejj jupan arupajj uc nanacar yatiyapjjetu. Ucat chekpachajj aca kellkäwin chekätapjj yatipjjta. Uqhamaraqui nanacan tʼalpha lekʼetanacanquir kellkantatanac uñjatajjata ircatapjjaracta; ucanacasti jak lanti Diosan chʼamapana nanacaru uñstayatänwa. Nanacasti suma amuyun arunacampiw sas yatiyapjjta, Diosan qhitapajj alajjpachat sarakanisa, nanacan uñjañanacajjatac uca tʼalpha lekʼetanacamp ucanacjjar kellkantatanacamp apanis nanacar uñachayapjjetu. Nanacasti yatipjjta, Dios Awquimpin Jesucristo Tatitusampin qhuyapayäwipanwa ucanac uñjapjjta, ucanacan chekätapat ircatapjjaracta. Ucajj musphcañjamawa nancan amuyatajjarjama. Ucampis Tatitun arupajj ucat ircatañanacajjatac camachit churapjjetu. Ucat Diosan camachitanacapar phokhañataqui acanacat ircatapjjta. Nanacajj yatipjjta, nanacatejj Cristoru iyawsas arcapcäjja, take jakenacan wilapa isinacajjat apakapjjäwa, Criston taripäw konuñ nayrakatan jan kʼañuni jicjjatasipjjaraquëjja, wiñay jupampi alajjpachan utjapjjä. Wakaychañasti Awquiru, Yokaru, Kollan Ajayurojj churatäpan; jupanacasti maya Diosawa. Uqhamäpan.