Jose Smith sat Arjirin Ircatäwipa
Jose Smithajja Mormonan Kellkatapan uñstayatapat aqham kellkänwa:
“Septiembre phajjsin 21ri arumajj 1823 maranjja, nayajj take chuymamp Tatit mayisis thaktwa.
“Nayajj Diosat uqham mayisiscäyät uqhajja, nayajj mä khan utajj mankhan uñstir uñjäyäta. Uca khanasti jucʼampiptäna, uta mankhan chicürut jucʼamp khanañapcama. Ucspachaw mä chachajj iquiñajj maysan laka chekan saytʼas uñstäna. Jupan cayunacapajj janiraquiw oraker tactʼcänti.
“Jupajj mä taketsipan jucʼamp jankʼo allmillan isitäna. Ucasti take nayan uñjat acapachanquir cunatsa jucʼamp jankʼöna. Janiraquiw cuna orakenquir cunan uqham jankʼötaps lliphipquirïtaps iyawsquiristti. Jupan amparanacapajj niyapun mujllit aynachcam kʼara janchïpjjäna. Jupan cayunacapasti niyapun konkorit aynachcam kʼara janchïpjjaraquïna. Pʼekepamp cuncapampejj kʼara janchiraquïna. Chuymacam janjtatat uñjatajjata jupan allmillat jucʼamp isimp jan isthapitätap uñjaraquïyäta.
“Janiraquiw uca allmillaquit jankʼöcänjja, antisas jupa pachpajj jan yatiycay khapakäna. Uyñakapasti chekpach llijullij-jamäna. Uta mankhäjjajj wali lliphipquirïna, ucampis jupa jacʼajj jucʼampïnwa. Nayrakat jupar uñtcäyät uqhajj ajjsaräyäta, ucampis mäquiw ajjsarañajjajj chhaktitu.
“Jupajj sutejjat sasina, nayajj Diosan nayrakatapat jumar qhitanit qhitätwa sasaw situ. Nayajj Moroni satätwa sasaw situ. Diosajj juman mä cun lurañamjj muni sasaw saraquitu. Juman sutimajj take marcanac wila masinac lajjranac taypin asquitaquis ñankhataquis utjani, jan ucajja, ucajj asquïnis ñankhänis take jakenac taypin parlatäni sasaw situ.
“Jupajj situwa: Mä kellkajj tʼalpha kori lekʼetanacjjar kellkatäs imantatawa. Ucajj acsa oraken nayra utjirinacata, jupanacan cawqhat jutatapata yatiyi saraquitu. Phokha wiñay asqui yatiyäwejj ucanquiwa, Khespiyirin aca oraken nayra utjirinacar churataparjama sasaw situ.
“Uqhamaraqui kʼewita kollke lawanacanquir pä kalajj uca tʼalpha lekʼetanacamp chic imantataw sasaw saraquitojja. Uca kalanacajj mä chuymatac jarqʼirir lipʼis lipʼitäs Urimamp Tumimampi satawa. Uca kalanacanïrinacamp ucanacamp luririnacampejj nayrapachajj uñjirinaca satäpjjäna. Uca kellkjja yatit aruru jakoquipañataqui Diosajj ucanac waquichi situwa.…
“Jupasti saraquitu: ucat arscsma uca tʼalpha lekʼetanac catcät uqhajja, janiw cawquïr jakerus ucanac uñstayañamäquiti sasa. (Janiraw ucanac catuñatac urojj purcänti.) Janiraquiw nayajj uca chuymatac jarqʼirjja Urimamp Tumimampi qhiturus uñachayañajjäcaraquïnti, jan ucajja, mä kawkhanir ucanacjj camachit catokañajjarjam uñachayañajjäna. Yakhanacar ucanac uñachayiriscäyätjja, tucjatïriscäyätwa. Jupajj uca tʼalpha lekʼetanacat nayar parlquitän uqhajja, cawqhantejj uca tʼalpha lekʼetanacajj imantatäcänjja, uca chekaru uñjañajjataqui amuyojjajj jistʼaratäna. Uqhamaraqui wali khan uñjatajjatjja, ucar sarcäyät uqhajja uca chek uñtʼäyäta.
“Uc parlatapatjja, uca utanquir khanjja qhititejj nayar parlquitän jupa jacʼaruc muycatjjeri uñjäyäta. Utan chʼamactʼañapcamucajj muytcatascaquïnwa, khanan jupa muytatanaqui utjañapcama. Ucatsti acatjamat mä jistʼartäwïcaspas uqham alajjpachcamar jistʼartʼir uñjäyäta. Jupasti chhaktañapcam ucanjam maqhataraquïna. Janira uca alajjpach khanajj uñstcäna, cunjamäcäntejja uqhamaw uta mankhäjjajja wastat jicjjatasïna.
“Nayajj uca camachäwin mayjätapat amuyasis uca muspharcañ qhitan nayar yatiyat cunanacat wal muspharas iquiñan jipisïyäta. Ucat nayajj amuyasiscäyät uqhajja nayajj uta mankhajjan wastat khanartatap uñjäyäta. Ucat ucspachäcaspas uqhamjj uca quipca alajjpach qhitajj wastat iquiñajj maysancäna.
“Jupajj kalltasa nayrïr jutäwipan arscäna uca quipca cunanac wastat jan cun ajlliquipas yatiyitäna. Uc luratapatjja, jupajj wali jachʼa machʼats espadats jachʼa usuts chʼusaptayäwinacampejj oraker jutcani uca jachʼa taripäwinacat yatiyitu. Uca tʼakhesiyiri taripäwinacajj aca mitar jutaniw sasaw saraquitu. Ucanac yatiyatapatjja jupajj nayr maqhatcän uqham maqhataraquïna.
“Jichhajja, ucanac amuyojjar wal uscutapatjja, nayrajjan iquejj janiw purquitänti. Nayasti istʼcta añjcta, ucanacata chʼam thayjtayasiñcam musphasawa iquiñajjan jipïyäta. Ucampis uca quipca qhitaru wastat iquiñajj maysan uñjasa quipca yatiyäwinac nayar yatiyir istʼcäyät uqhajja, jucʼamppun musphäyäta. Uqhamaraqui aqham saraquitu: Satanasajj uca tʼalpha lekʼetanacjj kamiriptañamatac catokañamataqui yantʼätam. (Ucajj tatajjan familiapan jucʼa kollken utjatap laycünwa.) Ucat jupajj jan ucjj luramti, Diosar jachʼar aptañataquiquiw uca tʼalpha lekʼetanac catokañ munañamaw situwa. Uqhamaraqui jupan marcap marcachañataquiquiw ucanacjj munät sasaw saraquitu. Jan uqhamäcasapänjja, janiw ucanac catokquiriscäyätti.
“Uca quimsïr jutatapata, jupajj wastat nayrjam alajjpachar maqhatäna. Camachquitojj ucan mayjätapat lupʼiñatac nayajj wastat jaytjatäyätwa. Uca alajjpach qhitajj nayat quimsïr cut maqhatcän ucspachaw cʼancʼajj artʼäna, niy uröjjatayna. Nanacan parläwinacajjajj arum pakarïpachänwa.
“Jucʼ pacharojj nayajj iquiñajjat sartas waquisi sapür luräwinacajj lurir saräyäta. Ucampis sapürjam lurir chʼamtʼasajja nayajj jan cuns lurirjamäñajjcam chʼama lakʼaw jicjjatasïyäta. Tatajjajj nayamp irnakcasa nayan jan lurirjamätajj uñjasa utar sarjjam situ. Nayajj utar sarañ kalltäyäta, ucampis nanacajj ucan irnakapcäyät uca yapu jarcʼat mistusa, chʼam thayjtayasïyäta. Nayajj oraker jan cun lurirjamäs liwisïyäta. Mä kawkha pachatac janiw cuns amtascaraquïyätti.
“Ucat mä ar sutejjat sas nayar parlir amuyasïyäta. Nayajj alayar uñtasa uca quipca qhitjj pʼeke patäjjar saytʼiri nayrjam khanamp muytat uñjäyäta. Ucat cuntejj jupajj ucärmjj nayar yatiyquitänjja, take ucanac wastat nayar yatiyitäna. Tataman uc saram, catokcta uca uñjäwits camachitanacats yatiyam situwa.
“Nayasti jupar yäkäyäta. Nayajj tatajjar yapuru sarasa take ucanacat jupar yatiyta. Jupasti nayaru situ: Ucajj Diosat juti, qhitan camachitaparjam lurir saram sasa. Nayajj yaput mistusa, tʼalpha lekʼetanacajj alajjpach qhitan yatiyataparjam imantatäpcäna uca chek saräyäta. Nayan uca chekat khana uñjäwinïtajj laycu ucar purcäyät ucspach ucar uñtʼäyäta.
“Nueva York estadon Ontario condadonquir Manchester sat marca jacʼana, mä kollojj utji. Ucajj ucsanquir kollunacats jucʼamp jachʼawa. Uca kollur inti jalant tokena, pata jacʼana mä jackʼa kala aynachanjj kala cajonan uca tʼalpha lekʼetanacajj imantatätayna. Uca kalajj morokʼ chuwan cʼumpjatatjamätaynawa. Chuwa lacanacapajj kʼala lakʼan imantatänwa. Mä jiscʼaquiw uñstäna.
“Lakʼ allekas mä law jicjjatasa, nayajj chʼamtʼas uca cʼumpjatat kal wanktäyäta. Nayajj ucar uñantas chekpachaw uca qhitan arsutaparjam uca tʼalpha lekʼetanacamp Urimamp Tumimamp chuymatac jarqʼirimp uñjäyäta. Cunantejj ucanacajj imantatäcäna uca kala cajonajj cementjam cementoru uchat kalanacat luratäna. Uca cajon chʼinanjja pä kalaw wisqhullur uchatäna. Uca pä kaljjaru uca tʼalph lekʼetanacamp yakha cunanacamp apjjatatätayna.
“Nayajj ucanac apsuñ chʼamtʼäyäta ucampis qhitajj jarcʼaketu. Ucanac uñstayañatac urojj janiraw purquit wastat sasaw saraquitu. (Ucapachatsti pusi mararojja urojj purïna.) Ucampis maran mä jichhürjamaw acar jutäta, nayajj jumamp jiquisir acancaraquïw sasaw situ. Uca tʼalpha lekʼetanac catokañatac urucamajj sapa maraw uqham luraraquït sasaw saraquitu.
“Nayar camachit churataparjam sapa mara tucuyar saräyäta. Sapa cutiraquiw uca quipca alajjpach quitamp jiquisiraquïyäta. Cuntejj Tatitojj Iurañapäcän ucata uqhamaraqui aca khep khepürunacan Jupan marcapar sarayañapata amuyjj yatiyäwjj jupat catokäyäta sapa parläwejjana.…
“Ucatsti tʼalpha lekʼetanac Urimamp Tumimamp chuymatac jarqʼir catokañatac urojj purïna. Pä tunc payan uru septiembre phajjsina, warank quimsakallk patac pä tunc pakallkon maranjja, imantatäcän uca chekaru sapa marjamaw nayajj saräyäta. Ucat uca quipca qhitajj aqham eojjas ucanac nayar catuyitu: Acanac catuñajj jumjjaruwa. Jan amuyas acanac antutätajja, jan ucajj jan sum uñjatamat chhakayätajja, jakonucutäyatawa. Ucampis nayan ucanac catoker jutañajjcam take chʼamamamp ucanac imañ chʼamtʼätajja, ucanacajj imatäniw situ.
“Jucʼa pacharojj nayajj ucanac imañajjatac chʼama yitiyäwinacjj catokatajjan cunatapats yatjjatäyäta. Uqhamaraqui qhitan nayaru juman lurañamatac waquisquejj ucajj luratäcani ucapachajj ucanac nayajj catokä sat arunacapan cunatapat yatjjataraquïyäta. Cunalaycutejj nayan ucanac catokatajjajj yatitäcän ucspachawa jakenacajj ucanac nayat aparañ walpin chʼamtʼapjjäna. Uc lurañataqui jupanacajj take cunayman sallkja luräwinac lurapjjäna. Arcanakañajj nayrat jucʼampi khoru jucʼampi jachʼa tucuraquïna. Uca waltʼat jakenacasti lurañäcaspas uqham ucanac nayat sapa cut aparañ chʼamtʼapjjäna. Ucampis Diosan amuyupampi nayajj ucanac amparajjan catuscaquïyäta, nayajj ucanacamp lurañajjäcän uc luratajjcama. Ucat uca qhitajj arsüwirjam ucanac catoker jutcän uqhajja, nayajj ucanac jupar cuttayjjta. Jichhürojj jupajj ucanac catuwa. Jichhürusti mayo phajjsin payïr uruwa, warank quimsakallk patac quimsa tunc quimsakallk marana.”
Phokha yatiyäwitac Perla de Gran Precio uca kellkatanjj uñjam. Uqhamaraqui History of The Church of Jesus Christ of Latter-day Saints 1 tomo, 1–6 jalja uñjaraquim.
Mä marcajj lakʼat parlcaspas uqham oraket mistuyatacänjj uca nayrapach kellkäwejj Diosan chʼamapamp wajjtʼäwipamp jichhür parlat arur jakoquipatäna. Diosasti uca kellkatata chekaw saraquïna. Mormonan Kellkatapa satäs orakenquir jakenacar mistuyataraquïna 1830 marana.