1. Kare atura te ngati Lamana i kai tamaki akou mai, e ope ua atu e tai ngauru mataiti. E i na, kua akaue akera au i toku iti tangata te ngati Niphai, kia teateamamao i to ratou enua e ta ratou apinga tamaki no te tuatau tamaki.

2. I reira, kua tuatua mai te Atu kiaku, Ka kapiki atu i teianei au tangata, E tataraara ratou e aere mai kiaku nei, e kia bapetizoia ratou, e kia akatu akaouia taku Akonoanga, ei reira kotou e oraʼi.

3. E kua kapiki atura au ki teia au tangata, ina ra, e puapinga kore ua rai, kare rava ratou i maara ana e, na te Atua i akaora ia ratou, e kua oronga i tetai taime no ratou kia tataraara, E i na, kua akaketaketa i to ratou ngakau ki to ratou Atua.

4. E kia ope akera te tai ngauru o te mataiti, ka toru anere e ono ngauru mataiti i reira mei te tae anga mai o te Mesia, kua unga maira te ariki o te ngati Lamana i tetai episetole kiaku, ko tei akakite mai kiaku e, te teateamamao nei ratou no te aere mai kia tamaki kia matou.

5. E kua tono atura au i te karere, ei akaputuputu mai i toku iti tangata ki te ngai okotai ki te enua ko Desolationa, ki te oire i vaitata atu ki te kotinga i te mataara kokota ra e tae atu ei ki te enua ki apatonga.

6. E i reira te akanoo anga o to matou vaeau, kia raukaʼi ia matou kia arai i te nuku o te ngati Lamana, penei ake kare ratou e rave i to matou au mekameka, no reira, kua arai atu ia ratou i to matou maroiroi katoa.

7. E tae akera ki te toru anere e ono ngauru ma tai o te mataiti, kua aere mai te ngati Lamana ki te oire ko Desolationa kia tamaki kia matou, e i taua mataiti rai kua taiaia ratou e matou, e kua oki akaou atu ki to ratou au enua.

8. E kia tae akera ki te toru anere e ono ngauru ma ono te mataiti kua oki akaou mai ratou kia tamaki, e kua taia akaouia e matou, e e maata tikai to ratou i mate, e kua uriia e matou ki roto i te tai.

9. E teianei, no teia mea mamaata tei tupu ki toku iti tangata ki te ngati Niphai, kua akamata ratou i te akapaapaa i to ratou uaorai maroiroi e kua akamata ratou i te taputou ki mua i te rangi e, ka akaoko ratou i te toto o to ratou au taeake tei akamaringiia e to ratou au enemi.

10. E kua taputou tikai ratou ki te rangi, e ki te terono o te Atua, e ka aere ratou ka tamaki i to ratou enemi, e ka tipu ia ratou mei runga i te enua nei.

11. E no to ratou kino, e ta ratou angaanga viivii e rave nei, kore atu nei au ko Momoni e inangaro akaou e kia riro au ei akaaere, e ei arataki no teia iti tangata.

12. I na, naku oki ratou i arataki ana, no atu oki te kino ia ratou, e manganui ra toku arataki anga ia ratou ki te tamaki ma te akaperepere ia ratou, kia tau ki te inangaro o te Atua tei vai ki roto iaku, e ki toku ngakau katoa, e kua riringi au i toku vaerua ki te pure ki te Atua i te roa anga o te ra no ratou, ma te akarongo koreia mai te reira, no te maro ketaketa o to ratou ngakau.

13. E toru akera oku akaora anga ia ratou mei roto i te rima o to ratou au enemi, e kare rai ratou i tataraara i ta ratou au ara.

14. E kia oti ta ratou taputou anga mei tei araiia mai e to tatou Akaora e Iesu Mesia, e ka aere ratou ki to ratou enemi ka tamaki, e ka akaokoia ratou uaorai no te toto o to ratou au taeake, i na, kua tae maira te tuatua a te Atua kiaku i te na ko anga mai e,

15. Tei iaku te riri, e naku rai e tutaki atu, e no te mea, kare teia au tangata i tataraara i toku akaora anga ia ratou, i na, ka tipu keia ratou mei runga i te aro o te enua nei.

16. Kua patoi akera au, e kare au e aere e tamaki i toku ra enemi, e kua pera rai au, mei tei akaueia mai e te Atu kiaku, e te tu au mei tetai kite noo ua, kia akakite atu ki to te ao nei i te au mea taku i akara e tei akarongoia e au, mei ta te vaerua i akakite mai kiaku e kua akapapu mai i te au mea te ka tupu.

17. No reira, te tata atu nei au kia kotou e te au Etene, e te ngutuare katoa o Iseraela, Me akamata ake te angaanga, kua vaitata ia kotou i te teateamamao kia oki atu ki te enua o to kotou ipukarea.

18. Ae, te tata nei au ki te au openga o te enua nei, ae, kia kotou e nga kopu tino ngauru ma rua o Iseraela, te ka akavaia kia tau ki ta kotou angaanga, e te tino ngauru ma rua tei ikiia e Iesu i Ierusalema ei au pipi nana.

19. E te tata katoa nei au ki te toenga o teia au tangata, te ka akava katoaia e te tino ngauru ma rua ta Iesu i iki i teia enua, e ka akavaia ratou e te tino ngauru ma rua tei ikiia e Iesu i Ierusalema ei au pipi nana.

20. Ko te au mea teia ta te Vaerua i akakite mai kiaku, no reira te tata nei au kia kotou e, ka tu pouroa kotou ki mua i te akava anga a te Mesia, i na, te tangata katoatoa no roto mai i te uanga o Adamu, e ka tu oki kia akavaia i ta kotou angaanga, me e meitaki me e kino.

21. E kia irinaki katoa oki kotou i te evangelia a Iesu Mesia tei tae mai ki rotopu ia kotou; e kia rauka katoa te ngati Iuda, te iti tangata koreromotu na te Atua, i tetai kite ke i tei akaraia e tei rongoia e ratou, kia kite ratou e, ko taua Iesu ta ratou i ta ana, ko te Mesia e te Atua oki aia.

22. Te inangaro nei au, e kia ariu mai to te au openga o teianei ao, e kia tataraara, e kia akapapa no te tu anga atu ki te akavaanga te Mesia.