1. I na, ko au, ko Moronai, te akaoti nei au i te akapapaanga a toku metua a Momoni. I na, e meangiti ua taku ka tata, te au mea ta toku metua i akaue mai kia tata au.

2. E teianei, kia oti taua tamakianga rikarika i raveia i Kamora, e ko te au tangata o Niphai tei oro atu ki te enua ki apatonga, kua arumakiia e te ngati Lamana e kua takore pouroaia.

3. E kua taia katoaia toku metua e ratou, e ko au ua tei toe mai ei tata i te tua tumatetenga o te takoreangaia o toku au tangata. Ina ra, kua aere ratou, e ka akono au i te akaueanga a toku metua. E me ka ta ratou iaku, kare au i kite.

4. E tenana, te tata nei au, e kia oti, ka uuna au i teia au akapapaanga ki raro i te one e ka aere au kiea, kare e manata.

5. I na oki, na toku metua i maani i teia akapapaanga, e kua tata i te akakoroanga. E tenana, e tata katoa au, me e ngai tetai i runga i te au papa, ina ra, kare aku, kare oki e one maani auri, ko au anake ua. Kua mate oki toku metua ki roto i te tamaki, e toku au oa, e kare rava oku taeake, e kare e ngai kia aere ei, e eaa ra te roa i to te Atua akaora ua anga iaku, kare au i kite.

6. E tenana ka a anere mataiti i topa mei te taeanga mai o to tatou Atu to tatou Akaora.

7. I na, kua kimi te ngati Lamana i toku iti tangata, mei tera oire, ki tera oire, e mei tera ngai ki tera ngai, e pou takiri, e topa anga maata rava teia, e mea umere tikai te akapouangaia o toku ra iti tangata te ngati Niphai.

8. E tenana, na te rima oki te reira o te Atua i rave, e i na oki, te noo tamaki nei te ngati Lamana tetai ki tetai, e kua ki takiri teia enua i te ta tangata e te akamaringianga toto e kare rava tetai i kite i te openga o te tamaki.

9. E teianei, kare au e tuatua akaou no ratou, kare atu oki e toe, mari ra, ko te ngati Lamana e te au keikeia te noo nei ki runga i te enua.

10. Kare rava oki tetai i kite i te Atua tika, mari ra, ko te au pipi a Iesu, tei noo ki runga i te enua e tae ua atu ki te tupuanga te kino o te au tangata ki te maata, e kare atura te Atu e inangaro kia noo akaou ratou ki rotopu i teia au tangata, e me tei runga rai ratou i te enua me kare, kare ua e tangata i kite.

11. Ina ra, kua kite ana maua ko toku metua ia ratou, kua aere mai ana ratou kia aravei ia maua.

12. E ko te ka kite i teia akapapaanga, e kare aia e akaapa i te reira, no te au mea tarevake o te reira, ka kite aia i te au mea e maata atu i teia. I na, ko au ko Moronai, naringa ka rauka, ka akakite atu au i te au mea ravarai kia kotou.

13. I na, te akaoti nei au i te tuatua i teia au tangata nei. E tamaiti oki au na Momoni, e uanga oki toku metua no Niphai.

14. Ko au rai oki teia tei uuna i teia akapapaanga ki te Atua ra, ko te au papa kare ïa e puapinga ra no te akaueanga a te Atua. Kua akakite mai tikai aia e, auraka rava tetai e rave te reira ei kimi puapinga nona, kareka te akapapaanga i runga, e puapinga maata rava atu ïa, e ko te ka eeu mai i te reira koia ta te Atua e akameitaki.

15. Kare rava e tika i tetai kia eeu mai i te reira, mari ra, na te Atua e oronga mai i te reira kiaia, ko to te Atua anoano, kia raveia tana angaanga ma te akakoroanga okotai kia akakaka iaia me kore ra, no te meitaki o te aronga taito, koia te iti tangata koreromotu o te Atua, tei pueurikirikiia ana.

16. E ao tikai tona te ka eeu mai i teia apinga ki te marama, ka riro mai te reira mei te poiri tangotango ki te marama mei ta te Atua i tuatua mai, ka riro mai te reira mei roto mai i te one, e ka kaka mai aia mei roto mai i te poiri, e ka tae mai tona kite ki te au tangata, na te mana te reira o te Atua e rave.

17. Me e au tarevake tetai, e tarevake ïa no te tangata nei, ina ra, kua kite matou e kare e tarevake, kua kite oki te Atua i te au mea ravarai, no reira, ko te ka akaapa, kia matakite aia, ko te topa aia ki roto i te ai o ade.

18. E ko te ka tuatua e, ka akaari mai kiaku, me kore ra, ka papaia kotou, kia matakite aia, ko te akaue aea aia i tei araiia e te Atua.

19. E i na, ko tei tuatua atu ma te akaapa, ka akaapa katoaia mai aia, kia tau oki ki tana angaanga, e tana tutaki, no reira ko tei moto atu, e moto katoaia mai aia e te Atua.

20. I na, i ta te tuatua tapu i tuatua mai, auraka rava e tangata e moto, auraka oki e akaapa atu, tei iaku te akaapa atu, te tuatua maira te Atua, e tei iaku katoa te riri, naku rai e tutaki atu.

21. E ko tei riri e tei taumaro ki te au angaanga a te Atua, e ki te au tangata koreromotu a te Atua, koia te ngutuare o Iseraela, i te na ko anga e, ka takore matou i te angaanga a te Atua e kare te Atua e akamaara i tana koreromotu tana i papau ki te ngutuare o Iseraela, ka uriia aia ki raro e ka tiriaia ki roto i te ai.

22. Ka tupu ua atu rai te akakoroanga mutu kore o te Atua, e tae ua atu ki te akakianga o te au taputou ravarai.

23. Ka kimi ana i te au totou a Isaia, i na, kare e rauka iaku kia tata i te reira, i na oki, te karanga atu nei au kia kotou, e ko te aronga tapu tei aere na mua iaku nei, tei noo ana ki teia enua, ka kapiki mai, e mei roto mai i te one pueu to ratou kapiki anga i te Atu, e te ora ra te Atu, ka akamaara rai aia i te koreromotu tana i papau kia ratou.

24. Kua kite oki aia i ta ratou pure, no runga oki ïa i to ratou ai taeake. Kua kite oki aia i to ratou akarongo, e na roto oki i tona ingoa e raukaʼi ia ratou kia apai ke atu i te au maunga, e na roto i tona ingoa e ngaue ei te enua, e na roto i te mana o tana ra tuatua, i pururu ei te are tapekaanga ki raro, e kare katoa ratou i pakapaka i te ai. E kare oki te manu taae e te ovi poitini e rauka kia takinga kino ia ratou no te mana o tana tuatua.

25. E i na, ko ta ratou au pure, no runga ïa iaia, ta te Atu ka akatika kia eeu mai i teia au mea nei.

26. Kare rava e tangata e karanga e, kare e tupu mai, kua papu tikai oki e, ka tupu mai, kua tuatua mai oki te Atu i te reira, e mei raro mai oki i te one te riro anga mai, na te rima o te Atu, e kare rava e tika i tetai kia akakore, ka tae rai tikai te reira i te ra e karangaiaʼi e, kua oti te tupuanga o te au semeio, ka tae mai tikai te reira, mei te mea ra e, te tuatua maira tetai mei te mate mai.

27. E ka tae mai te reira i te ra e kapiki mai ei te toto o te aronga tapu ki te Atua, no te au pupu kino e te au angaanga a te poiri.

28. Ae, ka tae mai te reira i te ra, e akakoreiaʼi te mana o te Atua, e e viivii ei te au akonoanga, e akateiteiiaʼi ratou i te parau o to ratou ngakau, ae, i te au ra e parau ei te ngakau o te au arataki o te au akonoanga, e te au puapii e vareae ei ia ratou tei piri mai ki ta ratou akonoanga.

29. Ae, ka tae mai te reira i te ra, e rongoiaʼi te ai, te uriia, te pou auai i te au enua.

30. E ka akarongoia oki te tamakianga, e te rongo tamaki e te ngaueue enua i tera ngai e tera ngai.

31. Ae, ka tae mai oki te reira i te ra, e tupu ei te au mea viivii ravarai ki runga i te enua, te ta tangata, te keia, te pikikaa, te akavare, te akaturi e tetai atu au mea viivii, ei reira oki te maataanga e karangaʼi e, e rave i teia, e rave i tera, kare e kino e tupu, ka akatika ua te Atua kia tae ki te ra openga, aue tei akapera e, tei roto tikai ratou i te mamae kavangu, e te tapeka o te ara.

32. Ae, e ka tae mai te reira i te ra e akatuiaʼi te au akonoanga te ka na ko atu e, ka aere ua mai kiaku, na taau moni e akakore i taau au ara.

33. E kotou e te aronga kino e, e tei ariu ke e te au tangata kaki marokiakia, eaa kotou i patu ei i tetai akonoanga na kotou uaorai ei kimi puapinga? Eaa kotou i akatuke ei i te tuatua tapu a te Atua, te ka apai mai i te akaapaanga ki runga i to kotou au vaerua? I na, ka akara ana ki roto i te eeuanga a te Atua, e i na, te aere maira te tuatau, a taua ra ra, ka tupu teia au mea ravarai.

34. I na, kua akaari mai ana te Atu kiaku i teia au mea mamaata e te umere te ka tae vave mai, a taua ra ra, me riro mai taua au mea ra ki rotopu ia kotou.

35. I na, te tuatua nei au kia kotou, e mei te mea ra e, tei ko nei rai kotou, kare ake rai, ina ra, kua akaari mai a Iesu Mesia ia kotou kiaku, no reira au i kite ei i ta kotou angaanga.

36. E kua kite oki au e, te aaere ua ra kotou i roto i te parau o to kotou ngakau, e e toko iti ua, tei kore i akateitei ia ratou uaorai i te parau o to ratou ngakau, i te aao anga i te au kakau memeitaki, te noinoi, te maro, te manako kino, te tamamae e tetai atu au ara e manganui, e ta kotou au akonoanga, ae, ta kotou au akonoanga katoatoa, kua viivii no te parau o to kotou ngakau.

37. I na oki, e maata atu to kotou inangaro i te moni, e to kotou au apinga e to kotou au kakau manea, e te mekameka o to kotou are pure, i te aroa i te putaua, e te ngere, te aronga maki, e tei tumatetenga.

38. E kotou e te aronga viivii e, te aronga pikikaa, e kotou e te au puapii, tei oko ia kotou uaorai ki te au mea e pe ei, eaa kotou i akaviivii ei te akonoanga tapu a te Atua? Eaa kotou e akamaʼi i te rave ki runga ia kotou i te ingoa o te Mesia? Eaa i kore ei kotou e manako e, e maata atu te puapinga o te rekarekaanga openga kore, i te mamae te ka kore rava e mate, no te akangateitei a to teianei ao.

39. Eaa kotou i akamekamekaʼi ia kotou uaorai ki te au mea kare e ora o roto, e i na, te aue maira te pongi e te ngere, e te taakaua e te maki, e tei tumatetenga, i te na mua anga ia kotou e kare rava kotou i kite ua atu ia ratou?

40. Ae, eaa oki kotou i akatu ei i te au angaanga ngaro e te rikarika, kia rauka to kotou puapinga, ma te akara ua i te au takaua, e aue ra ki te Atua e te au tamariki metua kore i te aue anga ki mua i te Atua, e te toto oki o to ratou au metua e ta ratou au tane i te aue ua anga ki te Atua mei roto mai i te one i te akaokoanga ki runga i to kotou upoko?

41. I na, te tautau ua nei te koke o te akaokoanga ki rungao ia kotou, e tutaki oki aia i te toto o te aronga tapu ki rungao ia kotou, kare oki aia e akakoromaki akaou i ta ratou aue.