1. E teianei, te akaoti nei au i taku akapapaanga no runga i te akapouangaia o toku ra iti tangata te ngati Niphai. E kua aere atura matou ki mua i te ngati Lamana.

2. E kua tata atu au ko Momoni i tetai episetole ki te ariki o te ngati Lamana, i te pati atu kiaia, e me ka tika iaia, kia akaputuputu matou i to matou au tangata ki te enua ko Kamora, ki te pae i tetai tuaivi ko Kamora, e ei reira matou ka tamaki atu ei.

3. E i na kua katika mai te riki o te ngati Lamana i te mea taku i anoano.

4. Ku aere tika atura matou ki te enua ko Kamora, e kua patia iora i to matou puakapa ki te pae i te tuaivi o Kamora, tei te enua oki e manganui to reira vai, te au kauvai, e te vai pupui, e i ko nei oki kua manako iora au e, ka autu matou ki rungao i te ngati Lamana.

5. E kia ope te toru anere e varu ngauru ma a o te mataiti, kua akaputuputu pouroa mai te toenga o to matou tangata ki te enua ko Kamora.

6. E kia oti to matou akaputuputu anga mai i to matou au tangata ki te ngai okotai ki te enua ko Kamora, i na, kua pakari oki au ko Momoni, e kua kite au e, ko te tautaanga openga teia o toku iti tangata, e mei tei akaueia mai e te Atua, e auraka au e oronga i te au akapapaanga tei orongaia mai e to matou ai metua, e e tapu oki, kia riro ki te rima o te ngati Lamana (ka takinga kinoia oki e te ngati Lamana) no reira, kua maani au i teia akapapaanga mei roto mai i te au papa a Niphai, e kua uuna au i te reira, ki roto i te tuaivi ko Kamora, pouroa te au papa tei tukunaia mai ki toku rima e te Atu, mari ra, ko teia nga papa, ko taku ïa e oronga atu ki taku tamaiti kia Moronai.

7. E kite atura toku au tangata e ta ratou au vaine e ta ratou au tamariki i te aereanga mai o te nuku o te ngati Lamana kia ratou, e kua ki ratou i te mataku rikarika o te mate, tei akaki i te umauma o te au tangata kikino, kua tiaki ratou kia ariki mai ia ratou.

8. E kua aere maira ratou e tamaki ia matou, kua ki akera te au tangata tataki tai i te mataku rikarika, no te maata rava ia ratou.

9. E kua aere maira ratou i te ta i toku iti tangata, ma te koke, e te ana, te kakao, te toki, ma te au tu apinga tamaki ravarai.

10. E kua inga toku au tangata ki raro, ae toku ngauru tauasani i raro ake iaku, e kua puta iora au i rotopu ia ratou, e kua akaruke ra ratou iaku, e kare oki i akaoti i toku nei oraanga.

11. E pou akera toku au tangata i te taiaia e ratou, mari ra, e rua ngauru ma a ua matou tei toe mai, (ko taku tamaiti ko Moronai tetai), e ko matou anake ua tei ora mai, mei roto i te mate o toku au tangata, e i na, i tera mai ra, kia oki atu te ngati Lamana ki to ratou puakapa, kua akara matou mei te take o te tuaivi ko Kamora, i te ngauru tausani o toku au tangata tei taiaia, ko au a mua i te arataki ia ratou.

12. E kua akara katoa matou i te ngauru tauasani o toku au tangata, ta taku tamaiti ta Moronai i arataki.

13. E kua kite oki matou i te ngauru tauasani ta Kititona i arataki, kua mate ratou e koia rai tei rotopu ia ratou.

14. E kua inga katoa Lama e tona ngauru tauasani, ko Kirikara, e tona ngauru tauasani, ko Limiā e tona ngauru tauasani, ko Ionema e tona ngauru tauasani, to Kameniha to Moroniha, to Anetionamu, to Sibiloma, to Sema, to Iosa, kua inga pouroa ratou ma te ngauru o te tauasani i te tangata okotai.

15. E tai ngauru toe tei inga i te koke ma te ngauru o te tausani i te tangata okotai, ae, pouroa toku au tangata, mari ua, ko taua rua ngauru ma a iaku nei, e tetai toko iti ua tei ora atu ki te enua ki tonga, e tetai pae iti tei piri atu ki te ngati Lamana, kua taia ratou, ko to ratou kiko, te ivi, e te toto tei runga ïa i te one, ko tei akarukeia ïa e te aronga tei ta ia ratou, kia ututua ua i runga i te enua, e kia pe, e kia oki atu ki te one no reira mai ratou.

16. E kua mamae iora toku vaerua i te tangi i toku au tangata tei tairipotiia, e kua aue iora au.

17. E kotou e te au tangata manea e, i akapeea kotou i taka ke vave atu ei te arataa o te Atu. E kotou e te au tangata manea e, Eaa kotou i akaruke ei i te Atu tei akatika ua i tona rima e mou mai ia kotou?

18. I na, naringa kare kotou i rave i teia, kare kotou e inga, ina ra, kua inga kotou, e te mamae nei au no to kotou mate.

19. E kotou e te au tamaroa e te au tamaine manea e, e kotou e te au metua tane, e te au metua vaine, e kotou e te au tane, e te au vaine, e kotou te aronga mata manea, eaa kotou i ingaʼi.

20. E teianei, kua taka ke kotou, e kare e rauka i toku tumatetenga kia akaoki mai ia kotou.

21. Te tae maira te ra, e riro ei to kotou kopapa mate ei kopapa mate kore, e ko teia au kopapa pe e ututua ua nei, ka riro ïa ei kopapa pe kore, ei reira kotou e tu ei ki mua i te akavaanga a te Mesia, e akavaiaʼi kia tau ki ta kotou angaanga, e mei te mea e aronga tuatua tika kotou, ka akameitakiia kotou ma to kotou au metua tei aere na mua ia kotou.

22. Aue, naringa ua ake kotou i tataraara na mua ake i teia akapouanga maata rava tei tae mai ki runga ia kotou. Ina ra, kua aere kotou, e te Metua, ae, ko te Metua mutu kore i te rangi tei kite i to kotou turanga, ka akavaia kotou, kia tau ki te tuatua tika e te aroa ua nana.