1. E teianei, te tuatua nei au ki te toenga o teia au tangata tei ora mai, me ka tika oki i te Atua kia oronga atu i taku nei tuatua kia ratou, kia kite ei ratou i te au mea a to ratou ai metua, ae, te tuatua atu nei au kia kotou, kotou te toenga o te ngutuare o Iseraela, e teia te au tuatua taku ka tuatua atu.

2. Kia kite ra kotou, e no te ngutuare o Iseraela kotou.

3. Kia kite ra kotou e, ka tataraara kotou, me kore ra, kare kotou e ora.

4. Kia kite ra kotou e ka akamoe ta kotou apinga tamaki e tikai, e ma te inangaro kore i te akamaringi i te toto, e ma te kore e rave akaou, mari ua ra, kia akaue mai te Atua ia kotou.

5. Kia kite ra kotou e, kia taea e kotou te kite o to kotou ai metua e kia tataraara i ta kotou au ara, e te kino, ma te akarongo ia Iesu Mesia, koia oki te tamaiti a te Atua, tei taiaia e te ngati Iuda, e na roto i te mana o te Atua i akatu akaouiaʼi aia, e kua autu aia ki runga i te mate, e kua apukuia e ïa te tara o te mate.

6. E nana i akatupu i te tuakaouanga o tei mate ra, kia tu akaou te tangata ki mua i tana ra akavaanga.

7. E kua akatupu oki i te akaoraanga ki teianei ao, e ko tei apa kore i taua ra akavaanga nana ra, ka noo aia ki mua i te aroaro o te Atua i roto i tona basileia, ka imene uaʼi ma te akangateitei, ki te Metua ma te au pupu imene, e ki te tamaiti oki, e ki te Vaerua Tapu, okotai ïa Atua ratou i te noo anga rekareka, e tuatau ua atu.

8. No reira, e tataraara, e kia bapetizoia kotou na roto i te ingoa o Iesu, e ka mou i te evangelia a te Mesia te ka orongaia atu kia kotou, auraka i teia akapapaanga ua, mari ra ki te au akapapaanga te ka tae mai ki te au Etene mei te ngati Iuda mai e ka tae mai oki te reira akapapaanga mei te au Etene kia kotou.

9. E i na, kua tataia teia kia irinaki ei kotou, e me ka irinaki kotou i tera, ka akarongo katoa kotou i teia, e me akarongo oki kotou i teia ka kite katoa kotou i ta to kotou au metua, e te au angaanga umere tei raveia e te mana o te Atua i rotopu ia ratou.

10. Ei reira katoa kotou e kite ei e, e toenga kotou no te uanga o Iakoba, no reira, kua tatauia kotou ki roto i te au tangata o te koreromotu mua, e me ka akaronga kotou i te Mesia, ma te bapetizo na mua ki te vai, e ki te ai e te Vaerua Tapu, kia aru atu te akaraanga a to tatou Akaora, mei tana rai i akaue mai ia tatou, ka meitaki koe i te ra o te akavaanga. Amene.