1. E tae akera ki te toru anere e ono ngauru ma toru o te mataiti kua aere atura te nuku o te ngati Niphai kia tamaki ki te ngati Lamana ki vao mai i te enua ko Desolationa.

2. E i na, kua akaoki akaouia atu te nuku o te ngati Niphai ki to ratou enua ko Desolationa. E te roiroi ua ra ratou, kua tae mai tetai nuku ou o te ngati Lamana ki runga ia ratou, e tamaki anga pakari rava te reira, e kua peke te oire Desolationa ia ratou, e manganui to te ngati Niphai i taiaia, e manganui oki tei mou auri.

3. E te toenga, kua oro atu ïa, kua piri ki te aronga e noo i te oire ko Teanekuma. I na, ko teia oire Teanekuma, tei te pae tai ïa e vaitata atu ki te oire ko Desolationa.

4. E no tei aere atu oki te nuku o te ngati Niphai kia tamaki ki te ngati Lamana, i akamataʼi ratou i te papaia, e naringa kare ratou i akapera, kare rai te ngati Lamana e autu ki rungao ia ratou.

5. Ina ra, ka akautungaia te aronga kino e te Atua, e na roto oki i te aronga kikino, e akautungaiaʼi te aronga kino, no te mea, na te aronga kino oki i tauriuri i te ngakau o te tamariki a te tangata, kia akamaringi toto.

6. Kua teateamamao akera te ngati Lamana kia tamaki i te oire ia Teanekuma.

7. E tae akera ki te toru anere e ono ngauru ma a o te mataiti, kua aere maira te ngati Lamana e tamaki i te oire o Teanekuma kia riro ia ratou te reira oire.

8. Ina ra, kua akaokiia akera ratou e te ngati Niphai. E kia kite te ngati Niphai e kua autu ratou ki rungao i te ngati Lamana, kua akapaapaa akera ratou i to ratou uaorai maroiroi, e kua aere atura ratou ma te mataku kore e kua rave akaou i to ratou oire ia Desolationa.

9. Ko te au mea teia tei tupu, e kua tauasani oki tei mate i nga tua e rua, to te ngati Niphai, e to te ngati Lamana.

10. E ope akera te toru anere e ono ngauru ma ono o te mataiti, kua oki akaou mai te ngati Lamana kia tamaki ki te ngati Nihpai, e kare rava oki te ngati Niphai i tataraara i te au mea viivii ta ratou i rave ana, kua rave tamou atu rai ratou i te kino.

11. Kare takiri e rauka i te arero kia tuatua, me kore ra, i tetai ua atu tangata kia tata i te tu rikarika o te akamaringianga toto, e te mate maata i rotopu i te au tangata o te ngati Niphai, e te ngati Lamana. kua maro ketaketa tikai to ratou ngakau, no reira, kua mataora ratou i te akamaringianga toto.

12. E kare rava i kitea ana tetai kino maata i roto i te tamariki a Lihai, me kore ra, i te ngutuare katoatoa o Iseraela, mei tei tupu ki teia au tangata, ko ta te Atua ïa i akakite mai.

13. E kua peke te oire ko Desolationa ki te ngati Lamana, no te mea e maata atu ratou i to te ngati Niphai.

14. E kua aere atu ratou ki te oire ki Teanekuma, e kua arumaki atu i te aronga i noo ki reira, e kua arataki mou auri i te au vaine e te au tamariki e manganui e kua orongaia ratou ei atinga karakaratio na to ratou au atua idolo.

15. E kia tae ki te toru anere e ono ngauru ma itu o te mataiti, kua riri te ngati Niphai ki te ngati Lamana no tei i akaatinga ta ratou au vaine e ta ratou au tamariki, kua aere atura ratou ki te ngati Lamana ma te riri otooto, e kua ta akaou i te ngati Lamana, e arumaki ia ratou ki vao i to ratou enua.

16. E kare atura te ngati Lamana i oki akaou mai kia tamaki i te ngati Niphai, e tae ua atu ki te toru anere e itu ngauru ma rima o te mataiti.

17. E i taua mataiti nei rai, kua oki akaou mai ratou ki te ngati Niphai ma to ratou ririnui katoa, kare e rauka i te tatau no te maata.

18. E mei teia taime e aere ua atu ki mua, kare rava te ngati Niphai i rauka akaou i te mana ki rungao i te ngati Lamana, mari ra, kua kore ratou, mei te upe i mua i te ra ra.

19. Kua aere maira te ngati Lamana ki raro nei i te oire ko Desolationa e tamaki anga rikarika tei raveia ana ki reira, e kua autu oki ratou ki runga i te ngati Niphai.

20. E kua oro ke atu ratou e tae atura ki te oire ko Boaza, i reira kua tu akaou ratou ki mua i te ngati Lamana ma te mataku kore, e kare te ngati Lamana i vi ia ratou, mari ra, kia tae atu ki te oki rua anga mai.

21. E kia oki rua mai ratou, kua arumakiia te ngati Niphai e kua taiaia ratou, e e tainga maata tikai, e kua akaatinga akaouia ta ratou au vaine e ta ratou au tamariki na to ratou au idolo.

22. Kua oro ke akaou atu te ngati Niphai mei mua mai ia ratou, e kua apai ratou i te tangata katoatoa, to te au oire e to te au vira.

23. E teianei, kua kite au, ko Momoni, e ka akavi te ngati Lamana i te enua katoa, no reira, kua aere atu au ki te tuaivi ki Simi, e kua rave mai i te au papa ta Amarona i uuna ki te Atua ra.