1. Kua aere atura au ki rotopu i te ngati Niphai ma te tataraara kia ratou no te koreromotu taku i papau, e kare au e tauturu akaou ia ratou, e kua oronga akaou mai ratou e naku e arataki i to ratou nuku, kua akara mai ratou kiaku e mei te mea e ka rauka iaku kia akaora ia ratou mei roto i to ratou tumatetenga ra.

2. Ina ra, kare oku manakonako anga, no te mea kua kite oki au e, ka tae mai te akautungaanga a te Atua ki runga ia ratou, no tei kore ratou e tataraara i ta ratou au ara, kua tauta ra ratou i to ratou uaorai ora ma te kapiki atu ki tei anga ia ratou.

3. E kua aere mai te ngati Lamana e tamaki mai ia matou ki te oire o Ioridana, ina ra, kua tuaruia ra ratou ki vao, kare atura i rauka ia ratou i taua oire ra i taua taime.

4. E kua oki akaou mai ratou ko te rua ïa, e kua mou rai ia matou taua oire ra. Te vai katoa ra tetai au oire ta te ngati Niphai e tāpū ana, e no te au ngai ketaketa, i kore ei ratou i tae ki roto i te au enua i mua ia matou kia takinga kino i tei noo ki to matou au enua.

5. E te au enua ta matou i aere, tei kore te tangata i reira e akaputuputuia mai, kua akapouia e te ngati Lamana, e to ratou tapere, te vira, e te au oire, kua taunaia ki te ai, e ope iora te toru anere e itu ngauru ma iva o te mataiti.

6. E tae akera ki te toru anere e varu ngauru o te mataiti, kua oki akaou maira te ngati Lamana e tamaki ia matou, e kua tamata rai matou kia paruru ma te maroiroi, ina ra, kare i puapingaia e maata rava ratou e kua takatakai uaia te au tangata o te ngati Niphai ki raro i to ratou vaevae.

7. Kua oro akaou matou, e ko tei kore i rokoia e te ngati Lamana ra, kua ora ïa, e ko tei rokoia e te ngati Lamana, kua mate ïa.

8. E teianei, kare atura au, ko Momoni, e inangaro i te patia i te ngakau o te tangata i te akakite anga atu kia ratou i te tutu o te akamaringi anga toto rikarika e te ta anga tangata tei mua i toku nei mata, ina ra, kua kite ana au e, ka tupu tikai teia au mea nei, e ko te au mea oki i uunaia ra, ka eeuia mai te reira ki rungao i te are.

9. E kua kite katoa au e, ka tae mai te kite o teia au mea nei, ki te toenga o teia au tangata nei, e ki te au Etene, ta te Atu oki i tuatua ana e, kia akapueurikiriki i teia nei au tangata, e ka manakoia teia au tangata i te mea puapinga kore, no reira, ka tata au i tetai akapotoanga iti ua, ma te mataku i te akakite atu i te au mea tei kiteaia e au, no te akaueanga tei rauka iaku, e kia kore oki kotou e taitaia maata, no te kino maata o teia au tangata.

10. E teianei, teia taku tuatua ki to ratou uanga, e ki te Etene oki tei akono i te ngutuare o Iseraela, ko tei kite papu i te ngai i aere mai ei to ratou akameitaki anga.

11. Kua kite oki au e, e taitaia maata to ratou no te mate maata o te ngutuare o Iseraela, ae, ka taitaia ratou no te mate o teia iti tangata, ka taitaia katoa ratou no tei kore teia au tangata e tataraara, kia takaveia mai e te rima o Iesu.

12. Te tataia nei teia au mea, ki te toenga o te ngutuare o Iakoba, e kua na reira te tata anga, no te mea, kua kite oki te Atua e, e kare rava e na te tuatua kino e apai mai i te reira kia ratou, e ka uunaia te reira ki te Atu, e kia eeuia mai i tona ra tuatau tikai.

13. Ko teia oki te akaueanga tei rauka iaku, e i na, ka riro mai te reira mei tei akaueia mai e te Atu i tona tuatau tau, e kia tau ki tona pakari.

14. E ka riro mai te reira ki te aronga akarongo kore o te ngati Iuda, ko te tumu ïa e aere atu ei, kia kite ei ratou e, ko Iesu te Mesia te tamaiti a te Atua ora, e kia rauka i te Metua kia tuku mai, na roto i tana Akaperepere maata, i tona akakoroanga mutu kore, i te akaoki anga mai i te ngati Iuda, me kore ra, te ngutuare katoatoa o Iseraela ki te enua ipukarea, mei ta te Atua i oronga atu kia ratou, ei akatupu i tana koreromotu.

15. E kia mou oki te uang o teia au tangata nei i tana evangelia te ka tae atu kia ratou, na roto atu i te au Etene, ka akapueurikirikiia oki teia au tangata, e ka kerekere oki ratou, e te viivii, e au tangata akakinoia, e kino roa atu ïa i te au mea tei vai ana ki rotopu ia matou, ae, e tei vai ana ki rotopu i te ngati Lamana, no to ratou akarongo kore oki, e te akamori idolo.

16. E i na, kua akamutu takere te Vaerua o te Atua i te noo ki to ratou au Metua, e te noo ua ra ratou kare e Mesia, kare oki e Atua i teianei ao, e kua puia aerei ratou e te matangi ra mei te uru manu.

17. E aronga manea oki ratou i mua ana, e ko te Mesia to ratou tiaki, e na te Metua Atua ratou i arataki ana.

18. Kareka i teianei, na Satani ratou e arataki aere ana, mei te uru manu puia e te matangi ra, mei te pai e papanu ua i runga i te kiriatai, ma te kore e kie, me kore ra, e tutau, me kore ra, i tetai ua atu apinga ei akatika iaia, e mei taua pai nei oki, koia katoa ia ratou.

19. I na, kua akono te Atua i to rtou au akameitakianga te ka rauka mai ia ratou i te enua, nei, no te au Etene oki te ka noo ki te enua.

20. Ina ra, ka arumakiia oki ratou, e ka akapueurikiriki keia ratou, e te au Etene, e kia oti to ratou arumakiangaia, e te akapueurikiriki angaia e te au Etene, ei reira te Atua e akamaaraʼi i te koreromotu tana i papau kia Aberahama, e ki te ngutuare katoa o Iseraela.

21. Ei reira katoa te Atua e akamaaraʼi i te pure a te aronga tuatua tika te pati mai kiaia no rotou.

22. E no reira e te au Etene, ka naea kotou i te anga ki mua i te mana o te Atua, kia kore ra kotou e tataraara, e e ariu ke mai mei to kotou aerenga kino?

23. Kare ina kotou i kite e, tei roto kotou i te rima o te Atua? Kare ainei kotou i kite e, tei iaia te mana katoatoa kia akaue i te enua kia pokaiia ki te ngai okotai, mei te pokai tuatua r?

24. E tenana, e tataraara kotou, ma te taakaaka ia kotou uaorai ki mua iaia, ko te akaapa mai aea aia ia kotou i te tuatua tika, e ko te riro mai aea te toenga o te uanga a Iakoba, ki mua ia kotou mei te liona ra, e ko te koveruveru i kotou, e kare rava e tangata ei akaora.