1. E teianei, te tuatua nei au no te aronga kare e irinaki ana i te Mesia.

2. I na, ka akarongo ainei kotou i te ra e akautungaiaʼi kotou, i na, me aere mai te Atu, ae, i taua ra maata ra e pokaikaiiaʼi te enua ki te ngai okotai, mei te pokaikai tuatua ra, e ka tae oki te au mea ravarai i te vera maata, ae, i taua ra maata ra, e tu ei kotou ki mua i te aroaro o te Punua Mamoe a te Atua ra, ei reira ka karanga ainei kotou e, kare e Atua?

3. I reira, ka uuna ainei kotou i te Mesia, me kore ra, ka kite ainei kotou i te Punua Mamoe a te Atua? Te manako ainei kotou e, ka noo kotou ma ïa katoa, i roto i ta kotou au ara? Te manako ra kotou e, ka rekareka kotou kia noo kapiti ki taua Mea Tapu ra, mei te mea e ka mamae toou vaerua i toou akamanako anga e, kare rava kotou i akaea ana i te akaapa i tana ra au ture?

4. I na, te karanga atu nei au kia kotou, ka maata atu to kotou mamae i te noo anga ki te pae i te Atua tapu e te tuatua tika, i te akamanakoanga i to kotou tu viivii i mua iaia, e i te noo anga ma te au vaerua i akaapaia ki ade.

5. E i na, kia aratakiia kotou kia kite i to kotou vai taaka anga i mua i te aroaro o te Atua, e te kaka oki o te Atua, e te tapunui o Iesu Mesia, ei reira e tutungiia mai ei te ai mura mate kore ki runga ia kotou.

6. E kotou e te aronga akarongo kore e, ariu mai ki to kotou Atu, e kapiki nui atu ki to kotou Metua na roto i te ingoa o Iesu, penei ake, ka tae atu kotou kiaia i taua ra openga ra ma te titoutou kore, te ma te taurekareka te teatea ma te tamaia ki te toto o te Punua Mamoe.

7. E te tuatua akaou atu nei au kia kotou tei akakore i te au eeuanga a te Atua, e tei karanga e, kua oti takere ïa, e kare e orama akaou, kare e totou, kare e orongaanga kare e akaoraanga maki, kare e tuatua ke ke, e te akaurianga tuatua.

8. I na, te tuatua atu nei au kia kotou ko tei patoi i teia nei au mea, kare aia i kite i te evangelia o te Mesia, e tika, kare oki kotou i tatau ana i te tuatua tapu, me kua tatau kotou, kare kotou i marama.

9. Kare ainei kotou i tatau ana e, okotai rai o te Atua tu i nanai, i teia ra, e tuatau ua atu, e kare rava e ekoko i roto iaia e kare rava ona tukeanga e ngai iti ake.

10. E teianei, me te manako ra kotou i tetai Atua te ka tuke, e tei roto iaia te akatuke anga, i reira kua akamanako kotou e Atua e kare aia i te Atua i te semeio.

11. Ina ra, ka akakite atu au kia kotou i te Atua o te au semeio, koia, te Atua o Aberahama, te Atua o Isaaka, te Atua o Iakoba, e ko taua Atua okotai rai tei anga i te rangi e te enua nei, e te au mea ravarai i roto ra.

12. I na, nana i anga ia Adamu, e mei ia Adamu mai oki te ingaanga o te tangata. E no te ingaanga o te tangata i tae mai ei a Iesu Mesia, koia oki te Metua e te Tamaiti, e no Iesu Mesia oki, i tae mai ei te ora o te tangata.

13. E no te akaoraangaia o te tangata, e Iesu Mesia, kua akaokiia ratou ki mua i te aroaro o te Atua, e ka akaoraia te au tangata ravarai, no te mea, kua riro te mateanga o te Mesia, ei apai mai i te tuakaouanga, ko tei apai katoa mai i te ora ki te moe openga kore, e ko taua moe ra, te ka akaaraia te tangata e te mana o te Atua, me tangi te pu, ka aere mai ratou ki vao, te mearikiriki, e te mea mamaata, e ka tu pouroa ki mua i tona ngai akavaanga, ko tei akaoraia, e tei tataraia mei te tapekaanga mutu kore, koia taua tapekaanga, ko te mate kopapa ïa.

14. Ei reira e raveiaʼi te akavaanga a Tei Tapu ki rungao ia ratou, e ei reira oki, ko te aronga viivii, ka viivii rai, e te aronga tuatua tika, ka tuatua tika rai, e ko te rekareka, ka rekareka rai. Ko tei taitaia, ka taitaia rai.

15. E teianei, e kotou katoatoa tei manakonako i roto ia kotou uaorai e, e Atua semeio kore to kotou, te ui atu nei au kia kotou, kua ope pouroa ainei teia au mea taku e tuatua atu nei i te topa ki muri? Kua tae mai ainei te openga o te reira? I na, te karanga atu nei au e, kare. Te vai rai te Atua, ei Atua o te semeio.

16. I na, kare ainei te au mea ta te Atua i rave, ei mea umere ki to kotou na mata? E koai te ka kite i te au angaanga vavaria a te Atua?

17. Koai te ka tuatua e, kare ïa i te semio no tei angaia te rangi e te enua na roto i te mana o tana tuatua, e no tei angaia te tangata mei roto i te one pueu o te enua nei, e no tei raveia te au semeio mamaata na roto i tana ra tuatua?

18. Koai oki te ka tuatua e, kare a Iesu Mesia i rave i te au semeio e maata? E manganui oki te au semeio tei raveia e te au aposetolo.

19. E mei te mea, e maata te au semeio tei raveia ana, eaa kotou e karangaʼi e, kua akaoti te Atua i te rave anga i te semeio? I na, kare tona tu e tuke. Te karanga atu nei au kia kotou, kare aia e tuke, naringa ka tuke aia, kare aia i te Atua akaou, Kare ra, ko te Atua rai aia, e e Atua oki aia o te semeio.

20. E ko te tumu i akamutu ei aia i te rave i te au semeio i rotopu i te au tamariki a te tangata nei, no to ratou tu akarongo kore, ma te aere ke mei te ara tika, no tei kore ratou i kite i te Atua ta ratou ka irinaki nei.

21. I na, te tuatua atu nei au, e ko tei irinaki i te Mesia, ma te ekoko kore, e ko tana e pati ki te Metua na roto i te ingoa o Iesu, ka oronga uaia mai ïa, e no te katoatoa rava teia taputou, e tae ua atu ki te openga o te enua nei.

22. E i na, te tuatua maira a Iesu Mesia, te tamaiti a te Atua ki tana au pipi te ka noo mai, e te katoatoa anga o te au pipi e kua rongo te au tangata e manganui, ka aere kotou ki to te ao katoa, ka ako atu ei i te evangelia ki te au tangata ravarai.

23. E ko tei akarongo e kua bapetizoia ka ora ïa, e ko tei kore i akarongo ra ka akaapaia ïa.

24. E ka aru oki teia akairo i te aronga tei akarongo, ei toku nei ingoa ka tuaru ratou i te tiaporo ki vao, ka tuatua oki ratou i te reo ou, ka rave ua ratou i te au ovi, e me inu ratou i tetai apinga mate, kare ratou e kino, ka tuku oki to ratou rima ki runga i te maki ka ora ïa.

25. E ko tei akarongo i toku nei ingoa, ma te ekoko kore, ka oronga au kiaia i taku nei au tuatua, e tae atu ki te openga o te enua nei.

26. E teianei, i na, koai te ka tika kia patoi i te angaanga a te Atua? Koai te ka patoi i tana ra tuatua? Koai te ka tu mai e patoi i te mana ririnui o te Atua? Koai tei akavaavaa i te angaanga a te Auta? Koai te ka akavaavaa i te tamariki a te Mesia? I na, ko kotou katoatoa e te aronga akavaavaa i te angaanga a te Atua e, ka umeremere ua kotou, e mate atu.

27. E teianei, auraka e akakino, auraka e umere, e akarongo ra i te tuatua a te Atua, ma te pati ki te Metua na roto i te ingoa o Iesu i te au mea taau i inangaro. Auraka e ekoko, e akarongo ra, e akamata ra mei tei te tuatau taito ra, e aere mai ki te Atu ma to ngakau katoa e ma te rave i te angaanga o toou uaorai oraanga ma te mataku, e te ruketekete i mua iaia.

28. Kia pakari ra kotou i roto i te au ra o to kotou nei oraanga, e kokoti ke atu i to kotou viivii, auraka e pati kia akamaata i ta kotou inangaro tau kore, e pati ra, ma te ngaueue kore, kia kore ei kotou e timataia, mari ra, kia akono kotou i te Atua ora e te tuatua tika.

29. E akara oki kotou e, auraka to kotou bapetizo anga kia riro ei mea tau kore, akara oki, auraka oki to kotou kai anga i te oroa a te Mesia, ei mea tau kore, e akara ra kia raveia te au mea katoa ma te tau tikai e na roto oki i te ingoa o Iesu Mesia te tamaiti a te Atua ora, e me rave kotou i teia, e ma te tapu marie e tae ua atu ki te openga, kare rava kotou e uriia ki vao i reira.

30. I na, te tuatua nei au kia kotou, mei te mea te tuatua nei au mei te mate mai, kua kite oki au e, ka akarongo maira kotou ki taku tuatua.

31. Auraka kotou e akaapa mai iaku no toku tarevake, auraka toku metua, no tona tarevake, auraka oki ratou tei tata i mua ake iaia, kia akaoki ra i te akameitakianga ki te Atua, no tei akakite mai i to matou tarevake kia kotou, kia pakari atu kotou ia matou nei.

32. E teianei, kua tata matou i teia au akapapaanga, mei te kite i rauka ia matou, i te au kotikotianga tei tuatuaia e matou i te reo Aiphiti i akatukeia ra, tei orongaia mai kia matou, e kua akatukeia e matou kia tano ki ta matou tuatua anga.

33. E naringa ta matou au papa e mamaata ana, kua tata matou i te reo Ebera, ina ra, kua akatuke katoa matou i te reo Ebera, e naringa matou i tata ki te reo Ebera, i na, kare rava kotou e kite i te tarevake i roto i ta matou akapapaanga.

34. Kareka ra kua kite te Atua i te au mea ravarai tei tataia e matou, e tera oki tetai, kare e au tangata ke atu i kite i to matou reo, no reira, kua teateamamao aia i tetai mea no te akaurianga i te reira.

35. Kua tataia teia nei au mea, kia ma ei to matou kakau i te toto o to matou ai taeake, tei noo ma te akarongo kore.

36. E Tenana, ko teia au mea tei manakoia e matou no runga i to matou ai taeake, koia te akaokianga mai i to ratou kite i te Mesia, kua tau ïa ko te pure ïa a te aronga tapu tei noo ki te enua nei,

37. Kia tika oki i te Atu ia Iesu Mesia kia oronga atu i te pauanga ki ta ratou pure kia tau ki to ratou akarongo, e kia tika i te Atua te Metua kia akamaara i te koreromotu tana i papau ki te ngutuare o Iseraela e kia akameitaki mai aia ia ratou e tuatau ua atu, na roto i te akarongo i te ingoa o Iesu Mesia. Amene.