Te Puka a Etera

1. E teianei, e tata au, ko Moronai, i te akapapaanga no te au tangata taito i takoreia e te rima o te Atua i te enua i apatokerau ra.

2. E te kiriti nei au i te tuatua no roto mai i te rua ngauru ma a papa tei kiteaia e te au tangata o Limihai ra tei tuatuaia e, ko te Puka a Etera.

3. E te manako nei au e, tei te ngati Iuda i te pae mua o taua akapapaanga ra, tei tuatua i te angaia anga o teianei ao, e ia Adamu oki, e no runga i te au mea i tupu i rotopu i te tamariki a te tangata nei e tae roa mai ki te tuatau o taua are teitei ra.

4. No reira, kare au e tata i te au mea tei tupu mei te tuatau o Adamu e tae roa mai ki taua tuatau ra; kua tataia ra ki runga i taua au papa ra, e ko te ka kite i taua au mea ra, tei iaia te mana e raukaʼi iaia te tuatua katoatoa.

5. Ina ra, kare au e tata i te au tuatua katoatoa no runga i te au mea i tupu mei te tuatau o taua are teitei ra e tae roa mai ki te tuatau i takoreiaʼi ratou. Ko tetai pae anake ua taku ka tata.

6. E ko teia taku e tata ra, koia tei tata i teia akapapaanga ra, ko Etera ïa, e e uanga aia na Korianetora.

7. E e tamaiti a Korianetora na Morona,

8. E e tamaiti a Morona na Etema,

9. E e tamaiti a Etema na Eiha,

10. E e tamaiti a Eiha na Seta,

11. E e tamaiti a Seta na Sibiloni,

12. E e tamaiti a Sibiloni na Koma,

13. E e tamaiti a Koma na Korianetuma,

14. E e tamaiti a Korianetuma na Aminikātā,

15. E e tamaiti a Aminikātā na Aarona;

16. E e uanga a Aarona na Eta, ko te tamaiti ïa na Ātama,

17. E e tamaiti a Ātama na Liba,

18. E e tamaiti a Liba na Kiti,

19. E e tamaiti a Kiti na Koroma,

20. E e tamaiti a Koroma na Levi,

21. E e tamaiti a Levi na Kimi,

22. E e tamaiti a Kimi na Morianetona,

23. E e uanga a Morianetona na Ripirakiti,

24. E e tamaiti a Ripirakiti na Sieti,

25. E e tamaiti a Sieti na Eta,

26. E e tamaiti a Eta na Koma,

27. E e tamaiti a Koma na Korianetuma,

28. E e tamaiti a Korianetuma na Emera,

29. E e tamaiti a Emera na Omera,

30. E e tamaiti a Omera na Sura,

31. E e tamaiti a Sura na Kebi,

32. E e tamaiti a Kebi na Oriha, ko te tamaiti ïa na Iareta,

33. Kua aere mai a Iareta e tona taeake katoa, e to raua kopu tangata, e tetai au tangata, e to ratou au kopu tangata katoa, mei te are teitei, i te tuatau i akatuke ei e Atua i te reo o te tangata e i taputou oki i tona riri e, ka akapueurikirikiia ratou ki te au enua katoa o teianei ao, e mei ta te Atua i tuatua, kua pueurikiriki atura te tangata.

34. E tangata maata e te ririnui te taeake o Iareta ra, e tangata oki i akaperepereia e te Atu, kua tuatua mai oki tona taeake ko Iareta kiaia e, E kapiki atu ki te Atu kia kore aia e akatuke i to tatou reo kia kore tatou e marama i ta tatou tuatua.

35. Kua kapiki te taeake a Iareta ki te Atu, e kua aroa mai te Atu ia Iareta, no reira kare aia i akatuke i te reo o Iareta; e kare te reo o Iareta e tona taeake i akatukeia.

36. E i muri ake i te reira, kua tuatua akaou maira a Iareta ki tona taeake, na ko e E kapiki akaou atu ki te Atu, penei ake e ariu ke i tona riri i to taua au oa nei, kia kore aia e akatuke i to ratou reo.

37. Kua kapiki akera te taeake o Iareta ki te Atu, e kua aroa mai te Atu i to ratou au oa e to ratou au kopu tangata katoa, kare atura to ratou reo i akatukeia.

38. Kua tuatua akaou maira a Iareta ki tona taeake, na ko maira, E aere koe ui atu ki te Atu, me ka tuaru aia ia tatou ki vao i te enua nei, e mei te mea, ka tuaru aia ia tatou ki vao i te enua nei, e ui atu kiaia e, ka aere tatou kiea? E koai tei kite e ka apai paa te Atu ia tatou ki tetai enua tau roa atu i te au enua o te ao nei i te meitaki. E me ka akapera aia, kia akono meitaki tatou ki te Atu, kia ariki tatou i te reira ei enua ipukarea no tatou.

39. Kua kapiki atura te taeake o Iareta ki te Atu mei tei tuatuaia e te vaa o Iareta ra.

40. Kua akarongo maira te Atu ki te tuatua a te taeake o Iareta, e kua aroa maira iaia i te na ko anga mai e,

41. E aere kotou e e akaputuputu i ta kotou au manu, ko te toa e te uā i te au tu manu katoatoa, e te au tu ua katoatoa o te enua nei, e toou ngutuare katoa, e toou taeake e tona ngutuare katoa, e toou au oa katoa e to ratou au ngutuare, e te au oa o Iareta e to ratou au ngutuare katoa ra.

42. E kia oti kotou i te akaputuputu, e aere atu koe e arataki ia ratou ki te ō i te pae i apatokerau ra. Ei reira e aravei au ia koe, e ka na mua au ia kotou i te aere ki tetai enua tau roa atu i te au enua o te ao nei i te meitaki.

43. Ei reira ka akameitaki au ia koe e toou uanga katoa, e ka akatupu au i te aronga maata noku no roto mai i toou uanga, e te uanga oki o toou taeake, e no roto oki te uanga o ratou tei piri atu kia koe ra. E kare oki tetai aronga i roto te ao nei e maata atu i te aronga taku e akatupu no roto mai i toou uanga. E ka akapera au kia koe no te roa i toou kapiki anga mai kiaku nei.