1. E teianei, ko au ko Moronai, e tata i te tuatua no Iareta e no tona ra taeake.

2. E oti akera te Atu i te akapapa i taua au toka ta te taeake o Iareta i apai ki runga i te maunga ra, e kua tae maira te taeake o Iareta ki raro mei runga mai i te maunga, kua tuku atura aia i taua au toka ra ki roto i te au pai ra, tataki rua, tetai ki te pae mua e tetai ki te pae muri, e i na, kua akamarama te reira i te au pai.

3. E kua na reira te Atu i te akariro anga i taua au toka ra ei mea kia marama mai i te poiri ra, kia turama te au tane, e te au vaine, e te au tamariki, kia kore ratou e aere na runga i te moana i te poiri.

4. E kua akapapa iora ratou i te au tu kai katoa kia ora ratou ki runga i te moana, e te kai katoa na ta ratou au anana, e ta ratou au puakatoro, e te au puaka, e te au manu, e te au manu rere ta ratou e apai ki roto i te au pai ra. E oti akera teia au mea i te rave, kake ratou ki runga i taua au pai ra, e tere iora ratou ki runga i te moana. E kua tuku akera ratou ia ratou uaorai ki te Atu i to ratou Atua.

5. Kua tuku maira te Atu te Atua i te matangi maata ki runga i te tai ki te enua taputou, e kua tere e kua tauriuriia atura ratou ki runga i te ngaru i mua i te matangi.

6. E kua kiia ratou i te tai, no te ākā ngaru tei aatu mai ki runga ia ratou, e te uriia maata e te rikarika oki tei tupu no te ririnui o taua matangi ra.

7. E te tomo ra ratou ki raro i te moana, kare rai ratou i kino i te moana, no te mea kua piri meitaki to ratou au pai mei te mereki rai te tu, e e mea piri oki taua au pai ra mei te pai o Noa ra, no reira, ia ratou i tomo ki raro i te tai, kua kapiki atura ratou ki te Atu e nana e arataki akaou ia ratou ki runga i te moana ra.

8. E te aere ra ratou na runga i te moana, kare te matangi i akamutu i te araara ki te enua taputou, e na reira ratou i te aere na mua i te matangi ra.

9. E kua imene ratou i te akapaapaa i te Atu. Ae, kua imene te taeake o Iareta i te imene akapaapaa i te Atu ra, e kua akameitaki atura aia i te Atu e kia pou te ra; e kia tae mai i te po ra, kare ratou e akamutu i te akameitaki te Atu ra.

10. E kua na reira ratou i te aere, e kare e rauka te manu tuputupua o te tai kia takino ia ratou. E kare e rauka te toora kia takino ia ratou. E e marama to ratou me ki raro e me ki runga i te tai ra.

11. E kua na reira ratou i te aere atu, e toru anere a ngauru ma a ra ki runga i te moana.

12. E kua tae atura ratou ki te enua taputou. E kia tae akera to ratou vaevae ki runga i te enua taputou, kua tuturi iora ratou ki runga i te one, e kua taakaaka ratou ia ratou uaorai ki mua i te Atu, e kua tae iora to ratou roimata no te rekareka maata ki mua i te Atu, no te maata o tona aroa mai ia ratou.

13. E kua aere atura ratou ki runga i te enua ra, e kua akamata akera i te tanu i te enua.

14. E toko a tamariki tamaroa a Iareta, e kua topaia to ratou au ingoa ko Iakoma, e ko Kirika, e ko Maa e ko Oriha.

15. E kua anau katoa te taeake o Iareta i te au tamariki tamaroa e te au tamariki tamaine.

16. E rua ngauru ma rua tangata oa o Iareta. E kua anau katoa ta ratou au tamariki tamaroa e te au tamariki tamaine i mua i to ratou tae anga mai ki te enua i tuatuaia ra, e no reira e manganui oki ratou.

17. E kua apiiia ratou kia aere ratou ma te akaaka ki mua i te Atu, e kua apii katoaia ratou mei runga mai.

18. E oora akera ratou ki runga i te enua. E tupu akera ratou i te maata, e kua tanu ratou i te enua, tupu akera ratou ei iti tangata maroiroi ki runga i te enua.

19. E tae atura te taeake o Iareta ki tona ruaineanga, kua kite akera aia e, kua vaitata aia i te aere ki raro i te menema, no reira kua tuatua atu aia kia Iareta, na ko atura, kia akaputuputu mai taua i to taua au tangata kia tarē, e kia kite ta ratou i inangaro ia taua i mua ake taua e tae atu ei ki raro i to taua menema.

20. No reira, kua akaputuputuia maira te au tangata. E ko te maata o te tamariki tamaroa e te tamariki tamaine a te taeake o Iareta e rua ngauru ma rua ia, e te maata o te tamariki tamaroa e te tamariki tamaine a Iareta e tai ngauru ma rua ia, E toko a ana tamariki tamaroa.

21. E tarē akera raua i ta raua au tangata, oti akera ia raua i te tarē, kua ui atura raua i te mea ta raua ka rave no ratou i mua ake ka mate ei raua.

22. E kua inangaro maira taua iti tangata ra kia akatinamouia tetai o ta raua tamariki ei ariki ki runga ia ratou ra.

23. E i na, e mea tumatetenga teia kia raua. E kua tuatua atura te taeake o Iareta kia ratou. koia tikai te mea e arataki ki te tuikaaanga.

24. Kua tuatua maira a Iareta ki tona taeake, na ko maira, E akatika ua taua kia iki ratou i te ariki no ratou. No reira, kua tuatua atu aia kia ratou, i te na ko atu ei, E iki kotou i tetai ariki mei rotopu i ta maua au tamariki tamaroa, tei ia kotou i to kotou inangaro.

25. Kua iki iora ratou i te mataiapo o te tamariki a te taeake o Iareta, e tona ingoa ko Pakaka ïa. Kare ra aia i inangaro kia riro aia ei ariki no ratou. Kua inangaro maira te iti tangata ki tona metua kia akaue iaia kia riro ei ariki no ratou; kare akera tona metua i akatika i te reira, e kua akaue atura aia kia kore ratou e taumaro i tetai tangata kia riro aia ei ariki no ratou.

26. E kua iki akera ratou i te au teina katoa o Pakaka. E kare ratou i inangaro.

27. Kare katoa te au tamariki a Iareta i inangaro, mari ra ko tetai anake, e kua akatinamouia akera Oriha ei ariki ki runga i te au tangata ra.

28. E kua akamata aia i te tutara e kua meitaki atura i te au tangata, e riro akera ratou ei iti tangata apinga nui.

29. Mate iora a Iareta e tona taeake katoa oki.

30. Kua aere a Oriha ma te akaaka ki mua i te Atu, e kua akamaara meitaki oki aia i te au mea maata ta te Atu i rave no tona ra metua, e kua apii atura oki aia i te au mea maata ta te Atu i rave no to ratou au metua ra.