1. E uanga a Seiti na Eta, i mate oki a Eta i taua onge ra e tona ngutuare katoa, mari ra ko Seiti, e te akamata a Seiti kia akatupu akaou i taua iti tangata apikepike ra.

2. Te akamaara ra a Seiti i te mateanga o tona au tupuna ra, e kua akatupu aia i tetai basileia tuatua tika, kua akamaara oki aia i ta te Atu i rave ra i te arataki anga ia Iareta e tona taeake na runga i te moana ra, kua aere rai aia i te aerenga o te Atu, e kua anau aia i te tamariki tamaroa e te tamariki tamaine.

3. Kua kai tamaki tana mataipo iaia, ko Seiti tona ingoa, kua mate a Seiti i te rima o tetai tangata keia, no tona apinga nui maata, e kua tupu akaou te au o tona metua.

4. Autu akera i tona metua i te au oire e manganui ki runga i te enua e tupu akaou akera te au tangata ki runga i te enua. E kua ora akera a Seiti e tae roa atu kia ruau roa aia, e kua anau iora aia ia Ripirakiti, e kua mate akera aia. Kua tutara iora a Ripirakiti ei mono iaia.

5. Kare akera a Ripirakiti i rave i te mea meitaki ki mua i te Atu, kua rave oki aia i te au vaine e manganui e te au vaine akaturi e kua tuku aia i te apainga teimaa ki runga i te au tangata. Ae, kua tero moni aia ia ratou ki te tero teimaa e mei roto mai i teia tero nei i akatu ei aia i te au are atea e te mamaata.

6. Kua maani iora aia i te terono manea tikai nona ra, e kua patu iora i te au are tapekaanga e manganui, e ko tei kore i akatika kia tutaki mai i taua tero moni ra, kua tapekaia aia ki roto i te are tapekaanga ra, e ko tei kore e rauka kia tutaki i taua tero moni ra, kua tapekaia aia ki roto i te are tapekaanga ra. Kua akaue aia ia ratou ki rave i te angaanga pakari no to ratou oraanga, e ko tei kore i inangaro kia rave i te angaanga, kua tamateia aia.

7. No reira kua rauka iaia te au apinga meitaki tikai, ae, ko te auro meitaki tana i akaue kia tamaia i roto i te au are tapekaanga ra, e kua akaue aia kia raveia te au tu angaanga meitaki katoa i roto i te are tapekaanga ra. E kua takinga kino aia i te iti tangata i tana ra akaturi e te au tuatua kino.

8. E tae akera ki te a ngauru ma rua o te mataiti i tona tutaraanga, kua orureau akera te iti tangata iaia, tupu akaou akera te tamaki i te enua, kua mate iora a Ripirakiti, e kua tuaruia akera tona uanga ki vao i te enua ra.

9. E kia pou akera te au mataiti e manganui, kua akaputuputu iora a Morianetona (e uanga na Ripirakiti) i tetai no roto mai i taua iti tangata tei tuaruia ra. E kua aere maira aia e kua tamaki mai ki te au tangata, e kua peke akera iaia i te mana ki runga i te au oire e manganui, tupu akera te tamaki kino, e kua pou te au mataiti e manganui i te tamaki, e kua peke iaia te mana ki runga i te enua katoa, e kua akariro aia iaia uaorai ei ariki ki runga i te enua katoa ra.

10. E i tona tutaraanga, kua akamāmā akera i te apainga a te au tangata ra, e no reira kua rekareka te au tangata iaia, e kua akatinamou akera ratou iaia ei ariki no ratou.

11. E kua tutara akera aia ma te tuatua tika ki runga i te tangata ra. Kareka ra iaia uaorai, e maata oki tana akaturi, no reira i araiiaʼi aia mei te aroaro o te Atu ra.

12. Akatu iora a Morianetona i te au oire e manganui, e i tona tutaraanga kua tupu tona iti tangata ei iti tangata apinga nui i te au are e te auro, e te ario, e i te akatupuanga i te sitona, e i te au anana mamoe, e te au anana puakatoro, e i te au mea tei akaoki akaouia na ratou ra.

13. E noo akera a Morianetona e tae roa atu kia ruau aia, ei reira i anau aia ia Kimi, kua tutara akera a Kimi, ei mono i tona metua, e i te mataiti varu o tona tutaraanga, kua mate tona metua. Kare akera a Kimi i tutara ma te tuatua tika, no reira kare aia i akaperepereia e te Atu ra.

14. Kua akaorureau tona taeake iaia, e kua riro atura aia ei tuikaa e te noo ra aia i te tuikaa anga kia pou tona ra au ra, kua anau iora aia i tana tamariki tamaroa e te tamariki tamaine i tona tuikaaanga. I tona ruaineanga i anau ei aia ia Levi, e mate atura aia.

15. E i muri ake te mateanga o tona metua, kua tavini atura a Levi e a ngauru ma rua mataiti. Ei reira i tamaki ei aia ki te ariki o te enua e kua peke akera iaia te basileia.

16. E kia peke mai iaia te basileia, kua rave aia i te au mea tau ki mua i te mata o te Atu, e kua meitaki atura te iti tangata i te enua, e kua ora aia e tae roa atu ki tona ruaine anga, e anau iora aia i tana tamariki tamaroa e te tamariki tamaine e anau katoa akera aia ia Koroma ko tei akatinamouia ei ariki ei mono iaia.

17. E kua rave a Koroma i te au mea tau ki mua i te mata o te Atua i tona au ra katoa, kua anau iora i tana au tamariki tamaroa e te au tamariki tamaine e manganui. E e ope tona au ra e manganui, mate atura aia. Kua tutara akera a Kiti ei mono iaia.

18. Mate atura aia, e kua tutara iora a Liba ei mono iaia.

19. Rave katoa a Liba i te au mea tau ki mua i te Atu ra, e kua akakoreia taua au ovi poitini ra, no reira kua aere atura ratou ki te enua ki te pae tonga e kimi aere i te kai na te tangata o te enua, kua ki oki te enua i te au manu taetaevao, e kua riro katoa a Liba ei tangata maata i te kimi manu.

20. Patu iora ratou i tetai oire ki te enua kokota ra, i rotopu i te nga tai mamaata.

21. E kua akataka ke iora ratou i te enua ki te pae tonga kia noo mai te au manu taetaevao. E i te enua ki apatokerau ra, kua ki ïa e te tangata.

22. Kua pakari ratou i te rave angaanga, e te oko atu e te oko mai kia rauka mai ia ratou i te puapinga.

23. E kua angaanga ratou i te au tu auri e kua rauka mai ia ratou i te auro, e te ario, e te veo, e te au tu auri katoatoa, kua ko ratou ki roto i te enua, e kua akaputu mai i te one auri ki tetai au putunga mamaata ki runga i te enua kia rauka mai i te one auri, tei roto ïa te auro, e te ario, e te auri, e te kapa. E kua rave ratou i te au tu angaanga memeitaki.

24. E e tirika to ratou e te au kakau meitaki, e kua maani ratou i te au tu kakau katoa kia kore ratou e taaka.

25. E kua maani ratou i te au tu apinga angaanga kia tanu te enua, kia ruru i te ua, kia akaputuputu, kia kenu, e kia kokoti oki.

26. E kua maani ratou i te au tu apinga angaanga, kia taangaanga i ta ratou au manu.

27. E kua maani ratou i te au tu apinga tamaki. E kua rave ratou i te au tu angaanga manea.

28. E kare e iti tangata i akameitakiia mei ia ratou rai te tu e i akapuapingaia e te rima o te Atu ra. E te noo ra i te enua tei meitaki roa atu e te au enua katoa, na te Atu oki i tuatua mai i te reira.

29. E kua ora a Liba i te au mataiti e manganui, e kua anau iora aia i tana tamariki tamaroa e te tamariki tamaine. E kua anau iora aia ia Ātama.

30. Kua tutara akera a Ātama ei mono i tona metua. E kua tutara akera a Ātama e rua ngauru ma a mataiti. Ei reira, i na, i raveia te basileia iaia. Kua tavini iora aia i te au mataiti e manganui i te tuikaaanga ra. Ae, kia ope roa tona ra au ra.

31. E anau akera aia ia Eta, e kua pou to Eta au ra i te tuikaaanga ra. E anau akera a Eta ia Aarona, e kua pou to Aarona au ra i te tuikaaanga ra. E anau iora aia ia Aminikāta, e i ope katoa akera i tona au ra i te tuikaaanga ra. E anau iora aia ia Korianetuma, e i ope katoa akera tona au ra i te tuikaaanga ra, e anau iora aia ia Koma.

32. Kua taparu akera a Koma i tetai apa o te basileia kia aru iaia. E kua tutara akera aia ki runga i taua apa o te basileia e a ngauru ma rua mataiti, e aere akera aia i te tamaki ki te ariki ra ko Amakita, e kua pou te au mataiti e manganui i taua tamaki ra, e kua tupu akera to Koma mana ki runga i te toeanga o te basileia.

33. E i te au ra o Koma, kua tupu akaou iora i te au tangata keia i te enua e kua rave ratou i te au ravenga taito ra, e kua taputou atura i te au taputou i ta te aronga taito i taputou ra, e kua inangaro akaou akera kia pou te basileia ia ratou.

34. Kua tamaki maata a Koma ia ratou, kare ra aia i autu ana.