1. Kua akamata akera te tupu anga o taumaa ki runga i te enua katoatoa, no te angaanga kino a te iti tangata, e no te reira, kia tuku tetai tangata i tana apinga angaanga e tana koke ki runga i te vairanga, e i te ngai, i tukuiaʼi te reira, i na, i te popongi, kare ïa i kitea e ïa no te maata o taua taumaa ra.

2. No reira kua mou te au tangata katoa i tana uaorai apinga i tona rima e kare aia e pati apinga, e kare katoa e oronga atu, e te mou ra te au tangata katoa i te mouranga o tana koke i tona rima katau, kia paruru i tana ra au apinga, e i tona uaorai ora, e tana au vaine e te au tamariki.

3. E e rua akera mataiti, e i muri ake i te mateanga o Sareta, i na, kua tu maira te taeake o Sareta, e kua tamaki maira kia Korianetuma, kua topa akera aia ia Korianetuma, e arumakiia oki aia e kia tae ki te metepara i Akiti.

4. Kua aru maira te taeake o Sareta iaia ki te metepara i Akiti ra, kua tupu akera te tamaki ki te maata ra, e kua tamateia iora te tangata e tausani ua atu ki te koke.

5. E kua noo akera a Korianetuma i te metepara ra, e i te po i tae mai ei te taeake o Sareta ki vao mei roto mai i te metepara, e kua tamate iora aia i tetai papaki o te nuku o Korianetuma tei kona i te kava.

6. Tae akera aia ki te enua ra ko Morona, e tuku iora aia iaia uaorai ki runga i te terono o Korianetuma.

7. Kua noo iora a Korianenuma e tona nugu katoatoa i te metepara e rua mataiti, e kua tupu iora tona nuku ki te maata.

8. Kua tupu akera oki te nuku o te taeake o Sareta (ko Kiriata tona ingoa) ki te maata, no te au pupu muna ra.

9. Kua tamate iora te taunga teitei iaia i noo ei ki runga i tona ra terono.

10. E kua tamateia iora aia e tetai o te pupu muna i roto i tetai ngai muna ra, e rauka iora iaia te basileia, e ko tona ingoa ko Liba, e tangata maata e te roa a Liba i te au tangata katoatoa.

11. E i te mataiti mua o Liba, i tae mai ei a Korianetuma ki te enua ra ko Morona, tamaki maira kia Liba.

12. Tamaki maira aia kia Liba, e kua rutu iora aia ia Liba ki tona rima, e kua puta iora, kua tamaki maira te nuku o Korianetuma ia Liba, e kua oro atura aia ki te pae i te kotinga ki taatai.

13. Kua arumaki atura a Korianetuma iaia, e kua tamaki maria a Liba iaia i taatai.

14. Kua tamaki iora a Liba i te nuku o Korianetuma, e kua oro akaou ratou ki te metepara ra ko Akiti.

15. Kua arumaki atura a Liba iaia e kia tae ki te enua paraaraa ko Akota. Kua arataki a Korianetuma i te au tanagta katoa e tona nuku katoa e kua oro atu aia mei ia Liba ki te ngai tana i oro ra.

16. E tae atura aia ki te au enua paraaraa ko Agota ra, kua tamaki iora ia Liba, rutu iora iaia, e mate iora aia, kua tu mai ra te taeake o Liba, ko te mono iaia, kia Korianetuma, e kua tupu akera te tamaki ki te maata, e oro akaou atura a Korianetuma mei te nuku o te taeake o Liba.

17. Ko te ingoa o te taeake o Liba ko Siza ïa. Kua arumaki atura iaia e kua rauka akera iaia te au oire e manganui, tamate iora i te au vaine e te au tamariki, e kua tutungi iora aia i te au oire ki te ai.

18. Tupu akera te mataku ia Siza i rotopu i te enua katoa. Ae, kua tuatua aereia i rotopu i te enua katoa, koai te ka rauka kia tu ki mua i te nuku o Siza? I na, te pou ra to te enua i mua iaia.

19. E te akaputuputu ra te au tangata tei noo ki runga i te enua, e riro akera ei nuku vaeau maata.

20. E kua mavete akera ratou, e kua oro tetai papaki ki te nuku o Siza, e kua oro akera tetai papaki ki te nuku o Korianetuma.

21. E no te maata e te roa o taua tamaki ra, e no te roa o te akamaringianga toto e te ta tangata, kua kako rava te enua i te kopapa o tei mate ra.

22. E no te viviki o taua tamaki ra, kare oki e tangata toe kia tanu i tei mate ra, kua aere atu ra ratou mei te akamaringianga toto ki te akamaringianga toto i te akarukeanga i te au kopapa mate, ko te tane, e te vaine e te tamariki ki runga i te enua, kia riro to ratou kiko ei kai na te iro.

23. Tae akera te aunga kino ki runga i te enua katoatoa, e no taua aunga kino ra kua manamanata te iti tangata i te po e i te ao.

24. Kare rai a Siza i akaoti i te arumaki ia Korianetuma, kua taputou oki aia kia akaoko i te toto o tona taeake i tamateia ra, ki runga ia Korianetuma, e kia akaapa oki i te tuatua a te Atu i tae mai kia Etera ra, i te na ko anga mai e, kare a Korianetuma e mate i te koke.

25. E no teia nei au mea te kite nei tatou e, kua tae mai te Atu i rotopu ia ratou ma te ki o tona ra riri, e kua akateateamamao ta ratou tuatua kino e ta ratou ara maata i to ratou mate mutu kore ra.

26. Arumaki atura a Siza ia Korianetuma ki te pae i te itinga o te ra, e tae ua atu ki te pae taatai, e i reira kua tamaki maira aia kia Siza e nga ra e toru ra.

27. E no te rikarika i te pou anga i te au nuku o Siza kua tupu te mataku o te au tangata, e kua oro ra ratou mei mua atu i te au nuku o Korianetuma, e oro atura ki te enua ra ko Korihora, e kua takore iora ratou i te au tangata katoa ko tei kore i piri mai kia ratou ra.

28. Kua patia iora ratou i to ratou au puakapa i te ō ra ko Korihora. E kua patia akera a Korianetuma i tona au puakapa i te ō ra ko Suri. Ko te ō ra ko Suri, kua vaitata ïa ki te tuaivi ra ko Komenora; no reira kua akaputuputu maira a Korianetuma i tona ra au nuku ki runga i te tuaivi ra Komenora, e kua akatangi akera aia i te pu ki te au nuku o Siza, kia aere mai ratou e tamaki.

29. Kua tae maira ratou, e kua tuaruia ra ratou, e i te rua o to ratou tae anga mai, kua tuaru akaouia ratou. E tae akaou maira ratou e ko te toru ïa o te tae anga mai, e kua riro iroa te tamaki ei mea pakari rava.

30. E kua rutu iora a Siza ia Korianetuma, e rauka iora iaia te au puta oonu e manganui, e no te maringianga o tona toto kua matapoiriia aia, e kua apaina keia mei te mea kua mate aia.

31. E no te maata o tei mate, te tane, e te vaine, e te tamariki oki i nga pupu e rua, kua akaue a Siza i tona ra au tangata, auraka ratou e arumaki i te au nuku o Korianetuma, no reira kua oki mai ratou ki to ratou au puakapa.