1. E i te au ra o Koma, kua tae maira te au peroveta e manganui, e kua totou maira i te akakoreanga o teia iti tangata maata ra, kia kore ratou e tataraara, e e ariu ki te Atu, e e ngaropoina i ta ratou ta tangata, e te tuatua kino.

2. E kua akavaavaaia te au peroveta e te au tangata, e kua oro maira ratou kia Koma kia ora, kua inangaro te tangata kia takore ia ratou.

3. Kua totou akera ratou i te au mea e manganui kia Koma, e kua akameitakiia aia i te toenga o tona ra au ra.

4. E ora akera aia kia ruaine roa, ei reira i anau ei aia ia Sibiloma, e tutara akera a Sibiloma ei mono iaia. E kua orureau te taeake o Sibiloma iaia, kua tupu tetai tamaki maata i te enua.

5. Akaue atura te taeake o Sibiloma kia tamateia te au peroveta katoa tei totou no runga i te akakoreanga o taua iti tangata ra.

6. Kua tupu iora tetai manamanata i te enua ra, i akakite oki ratou e, ka tae mai tetai taumaa maata e te kino ki runga i te enua, e ki runga i te au tangata katoa oki, e ka tupu tetai tumatetenga i rotopu ia ratou, e tumatetenga maata mei tei kore i kiteaia i te enua, e ka riro oki to ratou ivi mei te au tuaivi one ki runga i te enua, kia kore ratou e tataraara i ta ratou angaanga kino.

7. No ta ratou au pupu kino i kore ei ratou i akarongo ki te tuatua a te Atu, kua tupu oki te tamaki, e te manamanata, e te onge, e te maki i te enua, i na, kua tupu te tumatetenga maata mei tei kore i kitea ki runga i te enua, kua tupu oki teia au mea katoa i te au ra o Sibiloma.

8. E kua tataraara te au tangata i ta ratou angaanga kino, e kia tataraara ratou, kua aroa mai te Atu ia ratou.

9. E kua tamateia iora a Sibiloma, e kua akatuikaaia akera a Seta, e noo iora aia i te tuikaaanga kia pou tona ra au ra.

10. E kua peke iora te basileia ki tana tamaiti ra, kia Eiha, e kua tutara akera aia ki runga i te iti tangtat ra e ope ua ake tona au ra. E rave iora aia i te au tu angaanga kino katoa i tona au ra, e kua tupu te akamaringi anga toto ki te maata e kare i maata tona au ra.

11. E kua peke te basileia kia Etema, ko te uanga na Eiha, e kua rave i te kino i tona au ra.

12. E i te au ra o Etema ra, kua tae akaou maira te au peroveta e manganui, e kua totou akaou mai ratou ki te au tangata, ae, te totou maira ratou e, ka akapou te Atu ia ratou i te enua nei, me kore ratou e tataraara i ta ratou au angaanga kino.

13. Kua akaketaketa atura taua iti tangata ra i to ratou ngakau, e kare ratou i akarongo ki ta ratou tuatua, mii iora te au peroveta e kua akaruke atura i taua iti tangata ra.

14. Kua rave akera a Etema i te angaanga ma te kino e ope ua ake tona au ra, e kua anau aia ia Morona, e kua tutara akera a Morona ei mono iaia, e kua rave atura a Morona i te angaanga kino ki mua i te Atu.

15. Tupu akera tetai tamaki i rotopu i te au tangata, no te pupu muna tei akamouia kia rauka mai te mana e te puapinga. Kua tupu akera tetai tangata ririnui i te rave i te angaanga kino i rotopu ia ratou, e kua tamaki atura aia kia Morona, e kua akavi aia i tetai apa o te basileia, e kua mou aia i taua pae o te basileia no te tai au mataiti e manganui.

16. Kua akaviia akera aia e Morona, e kua noo akaou te basileia kiaia.

17. Tupu akaou akera tetai tangata ririnui, e e uanga aia no te taeake o Iareta ra.

18. E kua akavi aia ia Morona, e kua peke akera te basileia kiaia, e kua noo iora a Morona ei tuikaa i te toenga o tona au ra, e i anau iora aia ia Korianetora.

19. Kua noo iora a Korianetora ei tuikaa e ope ua ake tona au ra.

20. E tei te au ra o Korianetora i tae akaou mai ei tetai au peroveta e manganui, e kua totou maira i tetai au mea maata e te umere ra, e kua kapiki atura ratou kia tataraara te au tangata, e kua na ko maira ratou, me kore ratou e tataraara, ka akautungaia ratou e te Atu e kia pou rava.

21. E ka tono mai, me kore ra, ka arataki mai te Atu, na roto i tona ra mana, i tetai iti tangata ke, mei tana i arataki i to ratou ai tupuna, kia noo kia runga i te enua.

22. Kua akaruke atura ratou i te tuatua a te au peroveta ra, no to ratou au pupu muna e te tuatua kino.

23. E anau akera a Korianetora ia Etera, e mate atura. I noo ana aia ki roto te tuikaaanga e ope ua ake tona au ra.