1. Te ora ra a Etera i te au ra o Korianetuma, ko Korianetuma te ariki i runga i te au enua katoa ki reira.

2. E peroveta a Etera, no te Atua i te au ra o Korianetuma i tae mai ei a Etera, e te totou ra aia ki te iti tangata, e kare e rauka kia tāpūia aia, no te Vaerua o te Atu tei noo ki roto iaia.

3. E kua kapiki atura aia mei te popongi e tae roa atu ki te opunga o te ra i te akoanga mai ki taua iti tangata ra kia irinaki ratou ki te Atua ra, e kia tataraara ko te akakoreia aea ratou, e i te na ko anga mai kia ratou e, na roto i te akarongo e akatupuiaʼi te au mea katoatoa.

4. No reira, ko tei irinaki ki te Atua e tatari kia papu ia ratou tetai ao meitaki roa atu, ae, e tetai ngai ki te rima katau o te Atua, no roto mai oki i te akarongo oki i rauka mai ei teia tatari, ei tutau oki no te vaerua o te tangata nei, kia papu ia ratou e kia tamou i te au angaanga meitaki, kia aratakiia ki te akakaka i te Atua.

5. Kua totou akera a Etera i te au mea mamaata e te umere ki te iti tangata, ko tei kore ratou i irinaki, no te mea, kare ratou i kite mata i te reira.

6. E teianei, e tuatua meangiti taku, ta Moronai, no runga i teia nei au mea, e akakite atu au ki to te ao, e ko te akarongo nei, ko te tatari ïa i te au mea tei kore i akaraia, no reira, auraka kotou e patoi i te mea tei kore i akaraia e kotou, e kare o kotou kite e rauka mai mari ra, kia oti te timata anga i to kotou akarongo.

7. No te akarongo oki i akakite mai ei te Mesia iaia uaorai ki to tatou ai tupuna i muri ake i tona tuakaouanga mei te mate maira, kare oki aia i akakite mai iaia uaorai kia ratou kia tupu to ratou akarongo kiaia, no reira e akarongo to tetai au tangata ra e tikai, no te mea, kare oki aia i akakite mai iaia uaorai ki to te ao katoa nei.

8. No te akarongo o te tangata i akakite mai ei aia iaia uaorai ki to te ao, e kua akakaka aia i te ingoa o te Metua, e kua akateateamamao i te mataara no tetai kia rauka mai taua meitaki ra, kia tatari ei ratou i te au mea tei kore i kiteaia e ratou.

9. No reira, kia akarongo oki kotou, e raukaʼi ia kotou kia tatari, kia rauka mai taua apinga meitaki ra.

10. I na, no te akarongo i kapikiiaʼi te aronga taito ra i te akaaereanga tapu o te Atua.

11. E no reira, no te akarongo i orongaia mai ei te ture a Mose. I te aroa o tana Tamaiti ra, kua akateateamamao te Atua i tetai mataara meitaki ake, e na roto i te akarongo i akatikaiaʼi te reira.

12. E me kore e akarongo i rotopu i te tamariki a te tangata nei, kare katoa e rauka i te Atua kia rave i tetai angaanga umere rotopu ia ratou, no reira i kore ei aia i akakite mai iaia uaorai kia ratou, kia tupu na mua to ratou akarongo kiaia.

13. I na, no te akarongo o Alama e no Amuleka ra, i ingaʼi te are tapekaanga.

14. I na, no te akarongo o Niphai e Lihai i akatukeiaʼi te ngati Lamana, e i bapetizoiaʼi ratou ki te ai e te Vaerua Tapu.

15. I na, no te akarongo o Amona e tona au taeake i tupu ei taua semeio maata ra i rotopu i te ngati Lamana.

16. Ae, ko ratou katoa tei rave i te semeio, kua raveia te reira na roto i te akarongo, to mua e to muri katoa i te Mesia.

17. E no te akarongo i rauka mai ei tetai taputou e ki nga pipi toko toru kare ratou e mate, kare i rauka mai ia ratou te taputou naringa kare o ratou akarongo.

18. E i te au tuatau katoa kare te tangata i rave i te semeio mari ra, kia tupu na mua te akarongo, no reira i akarongo ei ratou ki te Tamaiti a te Atua.

19. E i mua ake i te Mesia ka tae mai ei, e manganui ratou te aronga akarongo tikai e kare e tika kia tāpūia ratou kia kore e tae ki roto i te arai, e kua kite to ratou mata i te au mea tei akaraia e te mata o te akarongo ra, e kua rekareka atura.

20. E i na, kua kite tatou i roto i teia nei papaanga tuatua e, ko tetai o ratou, ko te taeake o Iareta ïa, no te maata o tona akarongo ki te Atua, kua tuku maira te Atua i tona mangamanga rima, kare i rauka kia uuna aia i te reira mei te akara anga o te taeake o Iareta, no tana tuatua oki i tuatuaia e ïa ra, e taua tuatua ra i rauka mai iaia no te akarongo.

21. E kia kite te taeake o Iareta i te mangamanga rima o te Atu ra, no te taputou tei rauka i te taeake o Iareta no tona akarongo, kare e rauka i te Atu kia arai iaia kia kore aia e kite i te au mea katoatoa, no reira, kua akaari aia kiaia i te au mea katoa no te mea, kare e rauka kia arai iaia kia kore aia e tae ki roto i te arai.

22. E na roto i te akarongo i rauka mai ei to matou ui tupuna i te taputou e, ka tae teia nei au mea ki to ratou au taeake na roto i te Etene, no reira i akaue mai ei te Atu ra ko Iesu Mesia iaku.

23. E kua na ko atura au kiaia, e te Atu, ka aviri mai te Etene i teia nei au mea no to matou paruparu i te tata, kua akariro koe ia matou ei aronga ririnui i te tuatua no te akarongo, kare i te tata i te tuatua, kua akariro oki koe i teia nei iti tangata katoa kia maata ta ratou tuatua vaa, no te Vaerua Tapu taau i oronga mai kia ratou ra.

24. Kua akariro koe ia matou kia kore matou e tata i te tuatua e manganui, no te mako kore i to matou rima. I na, kare koe i akariro ia matou ei iti tangata maata i te tata mei te taeake o Iareta ra, kua akariro oki koe i te mea tana i tata ei mea ririnui maata mei ia koe rai oki, e paruparu ei te tangata i te tatauanga.

25. Kua akariro katoa oki koe i ta matou tuatua ei mea ririnui e te maata oki e kare e rauka ia matou i te tata i te reira, no reira kia tata ra matou, kua kite matou i to matou paruparu, tarevake atura i te tukuanga i ta matou tuatua, e te mataku nei au ko te aviri aea mai te Etene i ta matou au tuatua.

26. E kia tuatua akera au i te reira ra, kua na ko maira te Atu kiaku. Te aviri ra te neneva, ka mii ra ratou, ka rava toku aroa ki to tei akaaka, e kore ei ratou e akaapa i to kotou tu paruparu.

27. E me aere mai te tangata kiaku nei, ka akakite atu au kia ratou i to ratou tu paruparu. Te oronga atu ra au i te tu paruparu ki te tangata, kia tupu to ratou akaaka e kua rava meitaki toku aroa ki te au tangata katoa te ka taakaaka ia ratou uaorai ki mua iaku nei, e kia taakaaka ratou ia ratou uaorai ki mua iaku, e kia akarongo mai iaku, ei reira au e akariro ei i te au mea paruparu ei mea pakari no ratou.

28. I na, e akakite atu au ki te Etene i to ratou tu paruparu, e e akakite katoa au kia ratou e, na te akarongo, te tatari, e te aroa e akatae mai i te tangata kiaku, te vai puipui o te tuatua tika katoa.

29. E kua akapumaanaia au ko Moronai i te akarongo anga ki taua au tuatua ra, e kua na ko atura au, e te Atu, kia tupu toou au akakoroanga tika, kua kite oki au e, te rave nei koe ki te tamariki a te tangata mei te tu i to ratou akarongo.

30. Kua tuatua atura oki te taeake o Iareta ki te maunga ra ko Zerena, E aere ke atu, e kua aere ke atura ïa, no reira e naringa kare ona akarongo, kare ïa aere, no reira, te angaanga nei koe kia tau i to ratou akarongo.

31. Kua na reira koe i te akakite mai ia koe uaorai ki taau ra au pipi. Kia akarongo oki ratou ra, e kia tuatua atu ratou i toou ingoa, ei reira koe i akakite mai ei ia koe uaorai kia ratou ma te mana maata.

32. E te maara katoa nei au i taau i tuatua e, kua akapapa koe i tetai are no te tangata, ae, i rotopu i te au are o toou Metua, kia tupu to te tangata tatari maata, no reira, kia tatari te tangata e tikai, kia rauka mai tetai ngai i akapapaia e koe ra.

33. E te maara nei au i taau i tuatua, no toou aroa maata ki to te ao, i te tukuanga atu i toou ora ki to te ao, kia rave akaou koe i te reira, kia akapapa i tetai ngai no te tamariki a te tangata nei.

34. E te kite nei au e, ko toou aroa no te tamariki a te tangata nei, ko te aroa tikai ïa, no reira, kia kore te tangata e rauka i te aroa, e kare katoa ratou e noo i taua are ra taau i akapapa i rotopu i te au are o toou Metua ra.

35. No reira, kua kite au i taau i tuatua ra, koia oki, kia kore o te Etene aroa no to matou paruparu, ka timata koe ia ratou, e ka rave keia ta ratou taleni, ae, ko tei rauka ia ratou, e ka orongaia ïa kia ratou e maata tana.

36. E kua pure atura au ki te Atu kia oronga mai i te aroa ua ki te Etene, kia rauka mai ia ratou te aroa.

37. E kua na ko maira te Atu kiaku nei. Me kare o ratou aroa, auraka koe e manamanata, kua akarongo meitaki koe e kua ma toou kakau. E no te mea kua kite koe i toou paruparu, ka riro koe ei mea pakari, e ka noo oki koe i te ngai taku i akapapa i roto i te au are o toku Metua ra.

38. E teianei, te tuatua nei au ko Moronai ki te Etene, kia orana, ae, e ki toku au taeake oki taku i aroa, e kia aravei akaou tatou ki mua i te akavaanga o te Mesia, ei reira e kite ei te au tangata katoatoa e, e kare toku kakau i tou i to ratou toto.

39. Ei reira e kite ei kotou e, kua kite a Iesu iaku e kua tuatua aia kiaku te mata ki te mata, e kua akakite maira aia ma te akaaka roa, mei tetai tangata e akakite ki tetai, i toku uaorai reo, i teia nei au mea.

40. E ko tetai pae ua taku i tata, no toku paruparu i te tataanga.

41. E te tuatua atu nei au kia kotou, kia kimi kotou ia Iesu, ta te au peroveta e te au aposetolo i tata ra, kia vai rai te aroa ua o te Atua ko te Metua e no te Atu ra ko Iesu Mesia, e no te Vaerua Tapu, tei akakite mai ia raua katoa, i roto ia kotou e tuatau ua atu. Amene.