1. Kua anau akera aia tana tamaiti ko Omera, e kua tutara akera a Omera ei mono iaia. E kua anau iora a Omera ia Iareta, e anau akera a Iareta i te au tamariki tamaroa e te au tamariki tamaine.

2. E kua akaruke a Iareta i tona metua, aere atura aia ki te enua ra ko Eta e noo ei. E kua taparu akera aia i te au tangata e manganui i tana tuatua karape e tae roa atu kia noo kiaia tetai apa o te basileia ra.

3. E kia noo kiaia te apa o te basileia ra, kua tamaki aia i tona metua, e kua apai tuikaa atura aia i tona metua, e kua akariro aia iaia ei tavini i tona tuikaaanga.

4. Noo iora a Omera ei tuikaa i te apa o tona ra au ra. Kua anau iora tana puke tamariki tamaroa e te tamariki tamaine, ko Eseroma tetai e ko Korianetumera tetai.

5. Kua riri akera raua no te au mea ta Iareta, to raua tuakana i rave ana. E kua akaputuputu akera raua i tetai nuku, e kua tamaki atura ia Iareta. E i te po ratou i tamaki ei iaia ra.

6. E kia tamate to raua nuku i te nuku o Iareta, kua vaitata raua i te ta katoa oki iaia. Kua pati maira aia kia kore raua e tamate iaia katoa ra. E kua tuatua katoa mai e, ka tuku aia i te basileia ki tona metua. Ei reira i akaoraʼi raua iaia.

7. Maromaroa akera a Iareta no te mea, kua peke atu tona basileia, i tuku ana oki aia i tona ngakau ki runga i te basileia ki runga oki i te kaka o teianei ao.

8. E mea karape te tamaine a Iareta, e kia kite aia i te tu maromaroa o tona metua, kua kimi iora i te ravenga e peke akaou ei te basileia ki tona metua.

9. E mata purotu to te tamaine a Iareta. Kua tuatua maira aia ki tona ra metua, na ko maira kiaia, eaa ra te tumu no toou maromaroa? Kare ainei koe i tatau i te papaanga tuatua ta to tatou ai tupuna i apai mai na runga i te moana? Kare ainei tei roto i te reira te tuatua no te tuatau taito ra, no te au ravenga ngaro i peke ei kia ratou i te basileia e te kaka maata ra?

10. E teianei, kia tiki toku metua ia Akiti, te tamaiti a Kiminora. I na, e mata purotu toku, e ka ura au ki mua iaia ra, e ka akamareka au iaia, e e inangaro ei aia iaku ei vaine nana. No reira kia pati atu aia kia koe kia oronga koe iaku ei vaine nana, ei reira e tuatua atu koe kiaia e, kia apai mai koe i te upoko o toku metua ra, ko te ariki, kiaku nei, ei reira au e oronga iaia naau.

11. E oa oki a Omera no Akiti. Kua tiki atu a Iareta ia Akiti, na te tamaine a Iareta i ura ki mua iaia, mareka akera aia iaia e kua inangaro atura kia riro aia ei vaine nana ra. E kua na ko maira aia kia Iareta, E oronga mai koe iaia ei vaine naku.

12. Kua na ko atura a Iareta kiaia, e apai mai koe i te upoko o toku metua ra ko te ariki kiaku, ei reira au e oronga atu iaia naau.

13. Kua akaputuputu maira a Akiti i tona iti tangata ki roto i te are o Iareta ra, e kua tuatua atura kia ratou, na ko atura, e taputou ainei kotou iaku e, ka akarongo meitaki kotou i tetai mea taku ka inangaro ia kotou na?

14. Kua taputou iora ratou katoa kiaia i te Atua no te rangi, e i te rangi katoa, e i te enua katoa oki, e i to ratou au upoko ra e, e ko tei akaruke i te tauturu atu ia Akiti i te mea tana i inangaro ra, ka ngaro iaia tona upoko, e ko tei akakite atu te tu i tetai mea ta Akiti e akakite mai kia ratou ra, e tamateia iaia.

15. Kua akapera ratou i te akatika i te tuatua a Akiti. E kua oronga maira a Akiti i te au taputou tei orongaia atu e te aronga taito ra ia ratou, ko tei anoano i te mana, e tei tukuia mai mei te tuatau i Kaina maira. Koia te ta tangata mei te muatangana ra.

16. E te vai rai te reira au taputou no te mana o te tiaporo kia papau maira teia au taputou ki te au tangata, kia noo ratou i te poiri, kia tauturu i tei anoano i te mana kia rauka mai te mana, e kia ta ratou i te tangata, e kia keia, e kia pikikaa e kia rave i te au tu tuatua kino katoa ra e te akaturi.

17. E ko te tamaine a Iareta tei tuku i te reira ki roto i tona ngakau kia kimi aia i te reira au mea taito ra, e na Iareta i tuku i te reira ki roto i te ngakau o Akiti, e kua oronga maira a Akiti i te reira ki tona iti tangata e tona au oa, e kua arataki atura aia ia ratou ma te tuatua taparu kia rave i tana i inangaro ra.

18. Akatupu akera ratou i tetai pupu muna, mei i te tuatau taito ra, ko te pupu ïa tei kino roa atu i te au mea kino katoa ra i te mata o te Atua.

19. Kare ra te Atua i rave i te angaanga na roto i te pupu muna, kare katoa aia i inangaro kia akamaringi te tangata i te toto, ina ra, kua arai aia i te reira mei muatangana o te tangata ra.

20. E teianei, ko au nei ko Moronai, kare au e tata i te tu o to ratou au taputou e to ratou au pupu muna, kua akakiteia mai kiaku e, tei rotopu te reira au mea i te au iti tangata katoatoa, e tei roto katoa i te ngati Lamana ra.

21. E no te reira au mea i pou ei teia nei iti tangata taku e tuatua nei, e i pou katoaʼi te iti tangata o Niphai.

22. E ko te enua tei akatika i te pupu muna e mei te reira te tu, kia rauka mai te mana e te puapinga, e kia takako roa atu ratou ki runga te tangata katoa e te enua, i na ka akakoreia ratou. Kare oki te Atu e akatika kia kapiki roa mai te toto o te aronga tapu, tei akamaringiia e ratou, mei te one maira e tuatau ua atu kia akaokoia e ïa, e kare aia i akaoko ia ratou.

23. No reira, e te Etene e, e mea tau i te pakari o te Atua kia akakiteia teia au mea kia kotou, kia tataraara kotou i ta kotou au ara, kia kore e akatika kia tae teia nei aronga ta tangata, tei akatuia kia rauka mai i te mana e te puapinga, kia noo ki runga ia kotou, e me akatika kotou kia vai rai i teia nei au mea, ka tae mai te tumatetenga ki runga ia kotou e, ka topa mai oki te koke o te tuatua tika a te Atua mutu kore ra ki runga ia kotou, e mate ei kotou, me ka akatika i taua au mea kia tupu.

24. No reira, te akaue atu nei te Atu kia kotou e, kia kite kotou i teia au mea i te tomo anga i rotopu ia kotou na, kia ara mai oki kotou kia kite i to kotou turanga rikarika no teia pupu muna tei noo i rotopu ia kotou. Aue kotou no te toto o tei tamateia ra, te kapiki maira oki ratou mei te one maira kia akaoko te reira, e ko tei akatika katoa i taua au pupu muna ra.

25. Ko te ka akatupu i te reira, te kimi ra aia kia akakoreia te au tika o to te enua katoa e to te au basileia katoa, e te akatupu ra i te reira i te mate no te au tangata katoa, kua patuia oki ia ki runga i te tiaporo, ko te metua ïa o te au pikikaa, ko taua tangata pikikaa tei pikikaa i to tatou nga metua mua ra, Ae, ko taua tangata pikikaa tei akakoko i te tangata kia ta tangata mei te muatangana maira, ko tei akamarokiakia i te ngakau o te tangata ra, i tamate ei ratou i te au peroveta, e i pei atu ei ia ratou ki te toka, e e tuaru ke atu ei ia ratou, mei muatangana maira.

26. No reira, kua akaueia au ko Moronai kia tata i teia nei au mea, kia akakoreia te kino e kia akatae mai te tuatau, kare o Satani mana ki rungao i te ngakau o te tamariki a te tangata nei, kia akoia ra te tangata kia rave i te mea meitaki ma te kore e akamutu, e tae roa atu te tangata ki te vai puipui ra o te au tuatua tika katoa e oraʼi.