1. Kua tutara a Oriha ma te tuatua tika i tona puke ra katoa, e kua roa oki tona tuatau.

2. E kua anau iora tana au tamariki tamaroa e tana au tamariki tamaine e toru ngauru ma tai. E tana au tamariki tamaroa, e rua ngauru ma toru ratou.

3. E kua anau iora aia ia Kebi i tona ruaineanga. Kua riro akera a Kebi ei mono iaia, anau akera a Kebi ia Korihora.

4. E tae akera a Korihora ki te mataiti e toru ngauru ma rua, kua patoi akera aia i tona metua, e kua aere atura ki te enua ra ko Nihora e noo ei, e kua anau iora tana au tamariki tamaroa e tana au tamariki tamaine, kua riro akera ratou ei au tamariki purotu, no reira kua arataki ke atu a Korihora i te au tangata e manganui.

5. E kua akaputuputu akera aia i te nuku vaeau. Kua aere aia ki te enua ra ko Morona, tei reira te ngai i noo ei te ariki, e kua arataki atura aia i te ariki ei tuikaa. Kua tupu akera te tuatua a te taeake o Iareta ra ko tei na ko ei e, ka arataki tuikaaia ratou.

6. Ko te enua ra ko Morona ko te ngai i noo ei te ariki ra, e mea vaitata ïa ki te enua i tuatuaia e te ngati Niphai, ko Desolationa.

7. E kua noo akera a Kebi e tona ra iti tangata i te tuikaaanga i raro ake ia Korihora, ko tana tamaiti. E kia ruau roa aia, kua anau iora a Kebi ia Sura i tona ruaine anga ka noo ei aia ei tuikaa.

8. Kua riri akera a Sura ki tona tuakana, tupu akera aia ki te maata e riro atura ei tangata ririnui i te ririnui o te tangata nei, e i te kite katoa.

9. No reira, kua aere mai aia ki te tuaivi ra ko Epheraima, e kua maani iora aia i te au koke i te auri no roto mai i taua tuaivi ra no te aronga tana i arataki atura, kua mou akera ratou i te au koke, e kua oki atura ratou ki te oire ra ko Nihora, e tamaki atura i tona tuakana ra ko Korihora, e kua riro akera te basileia kiaia, e kua akaokiia te reira ki tona metua ko Kebi.

10. E no taua mea ta Sura i rave ra kua oronga tona metua i te basileia nona, no reira kua tutara aia ei mono i tona metua.

11. Kua rave akera aia i te angaanga ma te tuatua tika. E kua akatupu i tona basileia ki runga i te enua, e kua riro oki tona iti tangata ei iti tangata maata.

12. E anau katoa iora a Sura i te au tamariki tamaroa e i te au tamariki tamaine, e manganui.

13. Kua tataraara iora a Korihora i te au mea kino tana i rave ana, no reira kua oronga a Sura tetai mana kiaia i roto i taua basileia ra.

14. E maata te tamariki tamaroa e te tamariki tamaine a Korihora. E ko tetai i rotopu i tana au tamariki tamaroa ko Noa tona ingoa.

15. E patoi akera a Noa ki te ariki ia Sura, e kua rave akera aia i te ariki ra ia Sura, e i tona metua katoa ra ko Korihora, e kua arataki ke aia i tona ra taeake ko Kohora, e tona au taeake katoa ra, e tetai au tangata e manganui kia aru rai iaia.

16. Kua tamaki atura ratou ki te ariki ra ia Sura, e kua rauka mai iaia i to ratou enua ipukarea mua ra, e kua riro iora aia ei ariki ki runga i taua tuanga enua ra.

17. E kua tamaki akaou aia ki te ariki ia Sura, e kua apaina tuikaaia te ariki ra ko Sura ki Morona.

18. E te vaitata akera aia i te tamate iaia, kua totoro maira te au tamariki tamaroa a Sura ki roto i te are o Noa i te po, e kua tamate iora iaia, e kua vai akera ratou i te pa o te are tapekaanga, e kua tiki atura i to ratou metua, e kua tuku akera ratou iaia ki runga i te terono o tona basileia.

19. No reira, kua riro iora te tamaiti a Noa ei mono nona e kua akatupu aia i tona basileia, kare ra ratou i rauka i te mana ki runga i te ariki ra ia Sura, e te iti tangata i raro ake i te ariki ra ko Sura, kua puapinga atura ratou e kua tupu atura ki te maata.

20. E taka ke iora to te enua, e e nga basileia e rua i reira, ko te basileia o Sura tetai, e ko te basileia o Kohora tetai, ko te tamaiti ïa a Noa.

21. Kua akakoko iora Kohora, te tamaiti a Noa, i tona iti tangata kia tamaki atu kia Sura, e i taua tamaki ra, kua autu a Sura kua tamate aia ia Kohora.

22. E tamaiti a Kohora ko tei karangaia ko Nimerota, e kua tuku akera a Nimerota i te basileia o Kohora kia Sura. E kua akaperepereia akera aia e Sura, no reira, kua rave atura aia i tona inangaro i roto i te basileia o Sura.

23. I te tutaraanga o Sura, kua tae maira te au peroveta ki rotopu i taua au tangata ra, i tonokia mai oki ratou e te Atu i te akoanga e, ka taumaaia te enua no te tuatua kino e te akamori idolo a teia iti tangata, e kia kore ratou e tataraara ka takoreia ratou.

24. E kua akakino atura taua iti tangata i te au peroveta ra e kua aviri atura ratou ia ratou. Kua akautunga iora a Sura ia ratou katoa tei akakino i te au peroveta ra.

25. Tuku akera aia i tetai ture no te enua, e no te reira ture kua akatikaia e te au peroveta no atu te tu, kia aere roa ratou ki te ngai ta ratou ka inangaro, e no reira kua tataraara taua iti tangata ra.

26. E no te mea kua tataraara ratou i ta ratou tuatua kino e ta ratou akamori idolo, kua akaora te Atu ia ratou, e kua puapinga akaou ratou i te enua. E anau akera a Sura i tona ruaine anga i te au tamariki tamaroa e te au tamariki tamaine.

27. E kare ratou i tamaki ana i te au ra o Sura, e kua akamaara aia i te au mea maata ta te Atu i rave no tona ai tupuna ra, kua arataki mai aia ia ratou na runga i te moana maata ki te enua taputou. No reira, kua tutara aia ma te tuatua tika kia ope i tona puke ra.