1. Kia maroiroi mai a Korianetuma i tona au puta, te akamaara ra aia i te au tuatua ta Etera i tuatua kiaia ra.

2. Kua kite aia e, kua mate te au tangata e rua mirioni i te koke, e te mii ra i tona ngakau, ae, kua mate rava nga tangata e rua mirioni e ta ratou au vaine, e ta ratou au tamariki katoa oki.

3. E kua akamata akera aia i te tataraara i te kino tana i rave ra, e te akamaara ra aia i te tuatua a te vaa o te au peroveta, e kua kite e, kua tupu te reira au mea e tae mai ki taua taime ra, e kua mii akera tona vaerua, e kare aia i akapumaanaia.

4. E kua tata iora aia i tetai episetole kia Siza ma te inangaro kia akaora aia i te iti tangata, e ka tuku aia i te basileia kia ora te tangata.

5. Kia kite a Siza i taua episetole, kua tata iora i tetai episetole kia Korianetuma, i te na ko anga atu e, kia tuku aia iaia uaorai kia tamate aia iaia ki tana uaorai koke, ei reira e akaoraʼi aia i te iti tangata.

6. Kare atura te iti tangata i tataraara i ta ratou tuatua kino, e tupu akera to te tangata riri maata ki te au tangata o Korianetuma, no reira kua tamaki maira te tangata o Siza ki te tangata o Korianetuma.

7. E kite akera a Korianetuma e, kua vaitata aia i te inga, e oro ke atura aia mei mua atu i te tangata o Siza.

8. E tae akera aia ki te vai ra ko Ripirianakuma, tei akauriia e, e maata roa atu, e kia tae ratou ki taua vai ra, patia iora ratou i to ratou au puakapa, e patia katoa iora a Siza i tona ra au puakapa kia vaitata, e ao akera, kua tamaki iora ratou.

9. Tamaki iora ratou i te tamaki anga pakari, puta akaou iora a Koriane tuma, e kua matapoiri no tei maringi tona toto ra.

10. Kua tae atura te nuku o Korianetuma ki runga i te nuku o Siza, e kua pueurikiriki akera ratou, kua oro ke akera ratou ki te pae tonga, e kua patia iora i to ratou au puakapa ki tetai ngai i tuatuaia ko Okata.

11. E patia katoa iora te nuku o Korianetuma i to ratou puakapa ki te pae o te tuaivi ra ko Rama, koia te tuaivi ta toku metua ra, ta Momoni i uuna i te au akapapaanga tapu ki te Atu.

12. E kua akaputuputu maira ratou i te tangata no te enua katoatoa, ko tei kore i tamateia ra, mari ra ko Etera anake.

13. E kua akara a Etera i te au mea i raveia e te iti tangata ra, e kua kite aia e, ko te iti tangata i inangaro ia Korianetuma, kua akaputuputuia ratou ki te nuku o Korianetuma, e ko tei piri atu kia Siza, kua akaputuputuia ratou ki te nuku o Siza.

14. E kua pou e a mataiti i te akaputuputuanga mai i te au tangata, kia rauka mai kia ratou i te au tangata katoatoa i runga i te enua ra, e kia rauka mai te ririnui maata kia ratou.

15. E kia akaputuputuia akera ratou katoatoa, e ta ratou au vaine e te au tamariki katoa oki ki te nuku tana i inangaro, e tei te rima o te au tane, e te au vaine, e te au tamariki katoa oki te apinga tamaki, te paruru, e te paruru umauma, e te paruru upoko, e kua akakakauia ratou ki te apinga no te tamaki, e i reira kua aere atu tetai ki tetai i te tamaki, e kua tamaki atura ratou, e kia pou te ra, kare akera tetai nuku i autu.

16. E po iora, kua roiroi ratou, e kua oki ratou ki to ratou au puakapa ra, e kia tae akera ratou ki to ratou au puakapa, kua akamata te aue e te mii no tei mate to ratou ra au tangata, e no te maata o to ratou aue, e te mii, kua ki rava te mareva i te reira.

17. E ao akera, kua aere akaou atura ki te tamaki, e e ra maata e te rikarika te reira, kare rai ratou i autu, e po iora, kua akamata akaou ratou i te aue e te mii, i te mii anga i tei mate i to ratou iti tangata.

18. E kua tata akaou iora a Korianetuma i tetai episetole kia Siza, ma te inangaro e, auraka aia e aere akaou mai e tamaki kia rave ra aia i te basileia e kia akaora i te iti tangata.

19. Ina ra, kua akaatea te Vaerua o te Atu ia ratou, e kua peke ia Satani te mana ki runga i te ngakau o te au tangata, kua vaioia te iti tangata i te ketaketa o to ratou ngakau e i te poiri o to ratou manako, no reira, kua aere akaou ratou kua tamaki.

20. E kua ope akera taua ra ra i te tamaki, e po iora, kua takoto iora ratou ki runga i ta ratou au koke.

21. E ao akera, kua tamaki atura e tae roa atu ki te po ra.

22. E po iora, kua kona ratou i te riri, mei te tangata e kona i te kava ra, kua takoto akaou ratou ki runga i ta ratou au koke.

23. E ao akera, kua tamaki akaou atura ratou, e po iora, kua pou roa ratou katoatoa mari ra e nga tangata o Korianetuma e rima ngauru ma rua, e nga tangata o Siza e ono ngauru ma iva.

24. Takoto iora ratou ki runga i ta ratou au koke i taua po ra, e ao akera, kua tamaki akaou atura ratou, e i tamaki atu ratou ma ta ratou au koke e ta ratou au paruru e ma to ratou ririnui po uatu te ra.

25. E po iora, kua toe nga tangata o Siza e toru ngauru ma rua, e kua toe nga tangata o Korianetuma e rua ngauru ma itu.

26. E kai iora ratou e takoto iora, e te akateateamamao ia ratou uaorai no te mateanga kia ao ake, e au tangata maata ratou e te ririnui i te ririnui o te tangata nei.

27. E kua tamaki atura ratou i nga ora e toru, e i reira, kua matapoiriia ratou no tei pou te toto ra.

28. E kia rauka i te tangata o Korianetuma maroiroi kia aere, vaitata kua rava ratou i te oro ke kia ora, ina ra, kua tu akera a Siza e tona ra au tangata katoatoa, e kua taputou iora aia i tona riri e, ka tamate aia ia Korinetuma, me kare ra, ka mate aia ki te koke.

29. No reira kua arumaki aia ia ratou, e ao akera, kua rokoia iora ratou e ïa kua tamaki akaou iora ratou E pou akera ratou katoatoa ki te koke, mari ra ko Korianetuma raua ko Siza ko raua anake, e i na, kua paruparu pou a Siza no tei ngiia tona toto ra.

30. E kua irinaki iora a Korianetuma ki runga i tana koke kia akangaroi, e i reira, kua tipu ke iora aia i te upoko o Siza.

31. E oti akera iaia i te tipu ke i te upoko o Siza, tu akera a Siza ki runga i tona rima e topa iora, kua tauta i tetai iora ao, e kua mate akera.

32. Inga iora a Korianetuma ki runga i te one, mei te mea, kua mate aia.

33. E kua tuatua maira te Atu kia Etera na ko maira kiaia, e aere atu. Aere atura aia e kite akera aia e, kua tupu ta te Atu au tuatua katoatoa, e akaoti akera aia i tana akapapaanga, (e kare au i tata i anereanga) kua uuna iora aia i taua papaanga ra i te ngai i kiteaiaʼi e te au tangata o Limhi ra.

34. E te tuatua openga tei tataia e Etera ra, ko teia ïa, me ka inangaro rai te Atu kia akatuke mai iaku nei, me te inangaro ra aia kia mate au i te kopapa nei, kare aku tuatua i te reira, kia ora ra au i te basileia o te Atua. Amene.