1 Nokwar, mese hom dɛ, ɔfa hom nuanom a wohu amandze, na wɔtseetsee hɔn, na wɔapam hɔn efi hɔn egyapadze asaase do no—

2 Emi, Ewuradze, na mama kwan dɛ dɛm amandzehu no mbra hɔn do, osian hɔn mbrato ntsi na wohu amandze;

3 Naaso, mebɛfa hɔn, na wɔbɛyɛ medze wɔ da no a mebɛba abɛyɛ m’egudze no.

4 Dɛm ntsi, ɔsɛ dɛ wɔtsẽa hɔn na wɔsɔ hɔn hwɛ, tse dɛ Abraham a wɔsee no dɛ ɔmfa ne ba kortonoo mbɔ afɔr no.

5 Na hɔn a wonnkotum asɔw asotwe, na wɔpow me no wonnkotum atsew hɔnho.

6 Hwɛ, mese hom dɛ, epintampintan na wentwiwentwi, na enyitan, na aperdzi, na akɔndɔ bɔn, na enyiber apɛdze a ɔwɔ hɔn mu ntsi wɔama woegu hɔn egyapadze ho fĩ.

7 Wɔyɛ nyaa dɛ wɔbɛyɛ aso Ewuradze hɔn Nyankopɔn ne ndze; dɛm ntsi, Ewuradze hɔn Nyankopɔn so yɛ nyaa dɛ obetsie hɔn mpaabɔ wɔ hɔn ɔhaw da mu.

8 Hɔn asomdwee da mu no wobuu m’afotu tootooba; mbom hɔn ɔhaw da mu no wɔhwehwɛɛ m’ekyir kwan.

9 Nokwar, mese hom dɛ ɔmmfa ho dɛ wɔayɛ bɔn, ayamuhyehye ahyɛ m’abadaa mu mã wɔ hom ho. Mirinnyi hɔn tokyen koraa; na m’ebufuhyew da no mu no, mebɛkaa ehumbɔbɔr.

10 Makã ntam, na ɔmom no akɔ osian mbrasɛm a medze maa hɔn ahyɛse no a ɔkyerɛ dɛ mebɛma m’ebufuhyew nkrantsee no atɔ hɔn do, osian mo nkorɔfo ntsi no; na dɛ mbrɛ maka no mpo, ɔbɛyɛ hɔ.

11 M’ebufuhyew bohue egu aman nyina do a orunnsusu koraa; na dɛm na sɛ hɔn bɔn kɔɔpow no yɛ mã a mebɛyɛ.

12 Na da no, hɔn a wɔwɔ abantsentsen do, mekyerɛ mankasa me Israelfo no nyinara benya nkwagye.

13 Na hɔn a wɔabɔ hɔn apetse no wɔbɔboaboa hɔn ano.

14 Na hɔn a hɔn werɛ ahow nyina wɔbɛkyekye hɔn werɛ.

15 Na hɔn a wɔdze hɔn nkwa ama wɔ me dzin ntsi no, wɔbɛhyɛ hɔn ahenkyɛw.

16 Dɛm ntsi, hom mma hom akoma ntɔ hom yamu wɔ Zion ho; osiandɛ honam nyinara hyɛ me nsamu; hom nyɛ komm na hom nhu dɛ meyɛ Nyame.

17 Worunntu Zion mmfi n’ananmu, ɔmmfa ho dɛ wɔabɔ ne mba apetse.

18 Hɔn a wɔaka, na hɔn akoma mu tsew no bɛsan hɔn ekyir, na wɔaba hɔn egyapadze do, hɔn nye hɔn mba, wɔdze daapem enyigye ndwom bɛkyekyer Zion, me bea a ayeyɛ afõ no—

19 Na dɛm ndzɛmba yinom nyina bɛba ama nkɔnhyɛfo no nsɛm ahyɛ mã.

20 Na, hwɛ, bea biara nnyi hɔ a wɔakyerɛ kã dza emi makyerɛ no ho; nna bea biara so nnyi hɔ a wɔbɛkyerɛ akã dza emi makyerɛ no, aama m’Ahotseweefo no hɔn ano mboaboa dwumadzi no ho—

21 Kesi dɛ da bi bɛba a wobohu dɛ kwan nnyi hɔ bio ma hɔn; na afei, mowɔ mbea bi so wɔ hɔ a medze bɛma hɔn, na wɔbɛfrɛ dɛm mbea no stake horow, dze abɛyɛ Zion ne ntwamutam anaa n’ahoɔdzen.

22 Hwɛ, ɔyɛ me pɛ dɛ hɔn a wɔbɔ me dzin nyinara, na wɔsom me dɛ mbrɛ m’asɛmpa a ɔwɔ hɔ daapem kyerɛ no boa hɔn ano na wogyina mbea krɔnkrɔn do;

23 Na wɔnyɛ ahoboa ntweɔn nyikyerɛ a ɔbɛba no, na sɛ woyi nkataenyim a ɔkata me temple enyim wɔ me ntamadan mu no, dza ɔkata asaase enyim no, fi hɔ a, honam nyina bɔbɔ mu ehu me.

24 Na biribiara a ɔprɔw, nyimpa, anaa hamu mbowa, anaa sor ntumbowa, anaa nam a wɔwɔ pomu, dza ɔwɔ asaase enyi do nyina bɛhyew;

25 Na abɔdze-dze nyina so dze ɔhyew a ɔyɛ dzen bɛnan; na ndzɛmba nyina bɛyɛ fofor ama me nyimdzee na m’enyimnyam atsena asaase nyina do.

26 Na da no mu ɔtan a ɔda nyimpa mu na ɔtan a ɔda mbowa mu, nyew, honam nyina mu ɔtan, bɔbɔ adze wɔ m’enyim.

27 Na da no mu biribiara a nyimpa biara bebisa no, wɔdze bɛma no.

28 Na da no mu, Satan rinnya tum nnsɔ nyimpa biara nnhwɛ.

29 Na awerɛhow biara nnyi hɔ osiandɛ owu nnyi hɔ.

30 Da no abofra biara runnwu kɛpem dɛ obenyin ayɛ akɔdaa; na obenyin akyɛr dɛ dua;

31 Na sɛ owu a ɔrennda, ɔkyerɛ dɛ ɔrennka adakamaa mu, mbom ɔbɛsakyer ntsɛmara, na wobohwim no akɔ sor, na n’ahomgye bɛyɛ enyimnyam dze.

32 Nyew, nokwar, mese hom dɛ, dɛm da no a Ewuradze bɛba no, ɔbɛda ndzɛmba nyina edzi—

33 Ndzɛmba a etwa mu kɔ, na nsumaamu ndzɛmba a nyimpa biara nnyim, asaase do ndzɛmba, dza wɔnam do yɛe, na ne siantsir na ne nkrabea—

34 Ndzɛmba a ɔsom bo mapã, ndzɛmba a ɔwɔ wimu, na ndzɛmba a ɔwɔ asaase ase, na ndzɛmba a ɔwɔ asaase do nye sor.

35 Na hɔn a wɔtseetsee hɔn wɔ me dzin ntsi, na wotsim wɔ gyedzi mu no, ɔwɔ mu dɛ wɔma wɔdze hɔn nkwa to hɔ wɔ emi ntsi, naaso wobenya enyimnyam yi nyina mu kyɛfa.

36 Dɛm ntsi, sɛ owu mu mpo a mma hom nnsuro; osiandɛ wiadze yi mu no, hom enyigye nnhyɛ mã, mbom emi mo mu na hom enyigye hyɛ mã.

37 Dɛm ntsi, mma hom nndwendwen hom nyimpadua ho, na nyimpadua no n’asetsena ho; mbom hom ndwendwen ɔkra no nye n’asetsena ho.

38 Na hom mper nhwehwɛ Ewuradze n’enyim daa, ama hom nsa aakã hom akra abotar mu, na hom benya onnyiewiei nkwa.

39 Sɛ wɔfrɛ nyimpa ma wɔba m’asɛmpa a ɔwɔ hɔ daapem ho, na wodzi ahyɛmu a ɔwɔ hɔ daapem no a, wɔfa hɔn dɛ asaase do nkyen na nyimpa ne dɛw;

40 Wɔfrɛ hɔn dɛ wɔmbɛyɛ nyimpa ne dɛw; dɛm ntsi, sɛ nkyen no yew ne dɛw a, hwɛ, onnye mma hwee bio na mbom wɔtow gu ma nyimpa dze hɔn ananadze tsiatsia do.

41 Hwɛ, iyi nye nyansadze a ɔfa Zionmba ho, hɔn mu dodowara, mbom nnyɛ hɔn nyina; wohun hɔn dɛ wɔyɛ mbratofo, dɛm ntsi, ɔsɛ dɛ wɔtsẽa hɔn—

42 Nyia ɔma noho do no, wɔbrɛ no adze, na nyia ɔbrɛ noho adze no, wɔbɛma no do.

43 Na afei, mebɛkã hom abɛbusɛm bi, ama hom eehu me pɛ wɔ Zion no mponee ho.

44 Ɔdzefo bi wɔ asaase bi, a ɔyɛ asaaseber; na ɔsee no nkowaa dɛ: Hom nkɔ mo wenyin ture no mu, na asaaseber potsee no mpo do na hom ndua olive ndua duebien wɔ hɔ;

45 Na hom mfa aweɔmfo ma wɔmbɔ ho aprɔw, na hom nsi abantsentsen, ama hom mu kor aakɔ do akɔweɔn, ama oeetum ehu asaase a ɔabɔ ho aprɔw nyina, amma atamfo aammba emmbobubu m’olive ndua no enngu famu ammbɛsɛɛ adze, na wɔaammfa mo wenyin ture mu nduadzewa no annkɔ.

46 Na ɔdzefo no no nkowaa no kɔree kɛyɛɛ dza hɔn wura hyɛɛ hɔn no, na woduaa olive ndua no, na wɔgyee ho ban hyiae, na wɔfaa aweɔmfo guu mu, na wɔhyɛɛ ase dɛ worisi abantsentsen no.

47 Na ber a wogu do rotow abantsentsen ne fapem no, wɔhyɛɛ ase dɛ wɔrekã kyerɛ hɔnho dɛ: Na ebɛnadze na hɛn wura hia wɔ dɛm abantsentsen yi ho?

48 Na wɔdwendween dɛm asɛm yi ho mber pii, na wɔsee hɔnho dɛ: Ebɛnadze na hɛn wura dze dɛm abantsentsen yi rebɛyɛ, wɔ ber a onyim dɛ aber yi yɛ asomdweeber?

49 Ana onnkotum dze sika yi akɛma sikasesafo? Osiandɛ dɛm ndzɛmba yinom ho nnhia.

50 Na ber a wɔregye kyim wɔ hɔn mu no, wɔyɛɛ akwadwefo, na woenndzi hɔn wura ne mbrasɛm do.

51 Na ɔtamfo no baa anafua, na obobubuu ban no; na ɔdzefo no nkowaa no soɛree na wosuroi, na woguanee; na ɔtamfo no sɛɛ hɔn ndwuma no, na obubuu olive ndua no guu famu.

52 Afei, hwɛ, ɔdzefo no a ɔyɛ wenyinture wura no frɛɛ no nkowaa no, na ɔsee hɔn dɛ, Dɛn ntsi a! emumuyɛdze kɛse yi ase nye dɛn?

53 Ana ɔnnsɛ dɛ nkyɛ hom yɛ dza mehyɛɛ hom no, dɛ—sɛ hom dua wenyin no wie a, hom ngye ban wɔ ho, na hom mfa aweɔmfo ma wɔnweɔn—na hom nsi abantsentsen so, na hom mfa aweɔmfo nsi afasu no do—ma ɔnweɔn wɔ abantsentsen no do mfa nhwɛ mo wenyin ture no do, na mma hom nndeda, amma ɔtamfo ammba hom do?

54 Na hwɛ, nkyɛ ɔweɔmfo no a ɔwɔ abantsentsen no do no eehu ɔtamfo no wɔ ekyirekyir; na nkyɛ hom aayɛ krado na hom eesiw ɔtamfo no kwan amma oeemmbobubu ban no, na hom aagye mo wenyin ture no efi ɔsɛɛfo no nsa.

55 Na wenyin ture no wura no see no nkowaa no mu kor dɛ: Kɔ na kɔboaboa mo nkowaa a wɔaka no ano, na fa hɔn a wɔwɔ me fie mu dɔm nyina, hɔn a wɔyɛ mo nsordaafo no, me mberantsɛ na hɔn a woenyin kakra so a wɔwɔ mo nkowaa nyina mu no a hɔn ho yɛ dzen wɔ me fie no, ma ɔnka hɔn a meyi hɔn dɛ wɔnweɔn no;

56 Na hom nkɔ mo wenyin ture no mu ntsɛmara na hom nkɔpon mo wenyin ture no; osiandɛ ɔyɛ medze; medze sika tɔe.

57 Dɛm ntsi hom nkɔ m’asaase no do ntsɛmara; hom mbubu m’atamfo hɔn ban no ngu famu; hom mbubu hɔn abantsentsen no ngu famu, na hom mbɔ hɔn aweɔmfo no mpetse.

58 Na susuampaara a wɔbɔboa hɔn ano etsia hom no, hom ndzi m’atamfo no wer mma me, aama aber bi menye me fifo a wɔaka no aaba abɛfa asaase no.

59 Na akowaa no see no wura dɛ: Dabɛn na dɛm ndzɛmba yinom besi?

60 Na ɔsee n’akowaa no dɛ: Ber a mepɛ; kɔ seseiara, na kɛyɛ ndzɛmba a mahyɛ wo no nyina;

61 Na iyi bɛyɛ mo nsɔwano nye nhyira ama wo—ɔwo nokwafo, onyansafo paafo a ewɔ me fie, m’ahenman mu ɔhwɛdofo.

62 Na n’akowaa no kɔr ntsɛmara, na ɔkɛyɛɛ ndzɛmba nyinara a no wura ahyɛ no, na nda pii ekyir no ndzɛmba nyina hyɛɛ mã.

63 Na bio, nokwar, mese hom dɛ, mebɛkyerɛ hom nyansa a ɔwɔ mo mu a ɔfa nsɔr nyinara ho, mber dodow biara a wobenya pɛ dɛ wɔnkyerɛ hɔn nokwar kwan a oye ma hɔn nkwagye no—

64 Ama dwuma a woridzi dze aboa m’ahotseweefo hɔn ano no aakɔ do no, ma medze hɔn esi mbea krɔnkrɔn do ama me dzin; osiandɛ otwaber no asõ, na ɔwɔ dɛ m’asɛm no hyɛ mã.

65 Dɛm ntsi, ɔwɔ dɛ moboaboa mo nkorɔfo ano, dɛ mbrɛ mbɛbusɛm a ɔfa ewifua na nworahaban ho kyerɛ no, ama wɔdze ewifua no eekesie yie ma woenya onnyiewiei nkwa, na wɔdze celestial enyimnyam no abɔ hɔn abɔtsir, ber a mebɛba m’Egya n’ahenman no mu ebotua obiara kaw dɛ mbrɛ no ndwuma tse no;

66 Ber a wɔbɛkyekyer nworahaban no efi-efi, na woemia ne nkyehoma mu dzendzenndzen na wɔdze ogya a onndum da ahyew no.

67 Dɛm ntsi, mbrasɛm a medze ma nsɔr nyina nye dɛ wɔnkɔ do mboaboa hɔn ano nkɔ bea a makyerɛ hɔn no do.

68 Eso, dɛ mbrɛ mahyɛ hom dada no, mma hom mmboaboa homho ɔhardo, nna mma hom nntu enguan so; mbom hom mma wonsiesie ndzɛmba nyina wɔ hom enyim.

69 Na mbrɛ ɔbɛyɛ a wobesiesie ndzɛmba nyina wɔ hom enyim no, hom ndzi mbrasɛm a medze ama hom a ɔfa dɛm ndzɛmba yinom ho no do—

70 Dza ɔkã anaa ɔkyerɛ dɛ hom mfa sika ntɔ asaase nyina a wobotum dze sika atɔ a ɔbɔ dɛm mantɔw yi ho aprɔw no, bea a makyerɛ dɛ ɔnyɛ Zion asaase no, ama wɔaahyɛ ase aboaboa m’ahotseweefo ano wɔ hɔ;

71 Asaase nyina a wobotum atɔ wɔ Jackson mansin mu, nye amansin a etwa ho ehyia no, na hom ngyaa dza ɔaka no nhyɛ me nsa.

72 Afei, nokwar, mese hom dɛ, hom mma nsɔr nyina nkã hɔn sika nyina mbɔ mu, hom nyɛ dɛm ndzɛmba nyina wɔ hɔn mber mu, mbom mma wɔnnyɛ no ɔhardo; na hom nhwɛ ma wonsiesie ndzɛmba nyina wɔ hom enyim.

73 Na hom nyi enyimdzefo anaa enyansafo, na wɔnsoma hɔn ma wɔnkɔtɔ dɛm nsaase no.

74 Na nsɔr a ɔwɔ boka aman do no, ber a wɔbɛkyekyer no, sɛ wobetsie dɛm afotu yi a, wobotum atɔ nsaase na wɔaboa hɔn ano wɔ do, na dɛm kwan yi na wɔnam do botum akyekyer Zion.

75 Seseiara mpo foto a oye wɔ hɔ, nyew, dza ɔdɔɔ sõ a wobotum dze apon Zion, na woesiesie ne mbea a ɔayɛ afõ nyina, na sɛ nsɔr a wɔdze me dzin ato do no nya pɛ dɛ wɔbɛyɛ aso ama me ndze a, worummbubu nngu famu bio.

76 Na bio, mese hom dɛ, hɔn a hɔn atamfo abɔ hɔn apetse no, ɔyɛ me pɛ dɛ wɔbɔkɔ do aper ma woetsie hɔn nsɛm na hɔn a wɔhwɛ hɔn do na wɔwɔ tum wɔ hɔn do no apon hɔn—

77 Dɛ mbrɛ nkorɔfo no hɔn mbra na amambusɛm tse no, dza mafona ho ahyehyɛ no, ɔwɔ dɛ wokura mu yie ma honam nyina kyɛfa na banbɔ, dɛ mbrɛ fapem a ɔyɛ pɛrpɛr na ɔyɛ krɔnkrɔn no tse;

78 Ama nyimpa biara abɔ bra wɔ nkyerɛkyerɛ na fapem pa kwan do dze ama ne ndaamba, dɛ mbrɛ medze ne pɛ su ama no no, ama nyimpa biara eebu ne bɔn ho nkontaa wɔ atsɛmbu da no mu.

79 Dɛm ntsi, ɔnnsɛ dɛ nyimpa biara bɔkɔ nkowaasom ase ama obi.

80 Na botae iyi ho ntsi na mayɛ Amambusɛm wɔ dɛm asaase yi ho, menam enyansafo a meyi hɔn wɔ botae iyi ankasa ho do yɛɛ dɛm adze yi, nna menam bɔgyagu do poon asaase no.

81 Na ebɛnadze na medze bɔto Zionmba ho? Medze hɔn bɔto abɛbusɛm a ɔfa ɔbaa no nye ɔtsɛmbuafo sisifo no ho, na ɔwɔ dɛ nyimpa bɔ mpaa aber nyina amma wɔaanntɔ bitsi, dza ɔse—

82 Ɔtsɛmbuafo bi wɔ kurow bi mu a onnsuro Nyame na ommbu ɔdasanyi biara.

83 Na okunafo bi wɔ dɛm kurow no mu, na ɔbaa ne nkyɛn bɛsee no dɛ: Dzi me otsiafo no wer ma me.

84 Na ɔannkasa no ho mber kakra, mbom ekyir no, ɔkãe wɔ nankasa ne tsirmu dɛ: Ɔwɔ mu dɛ munnsuro Nyame, nna mummbu ɔdasanyi biara, naaso, osiandɛ okunafo yi haw me dodow ntsi, mibedzi n’asɛm ama no, mma ɔaammfa ne ba a ɔba daa no amma moho ennguan me.

85 Dɛm asɛm yi na medze bɔto Zionmba ho.

86 Wɔmma wɔnkɔ do ntwa nhwe ɔtsɛmbuafo no n’ananadze;

87 Na sɛ ɔannkasa hɔn ho a, wɔmma wontwa nhwe ambrado no n’ananadze;

88 Na sɛ ambrado no annkasa hɔn ho a, wɔmma wontwa nhwe president no n’ananadze;

89 Na sɛ president no annkasa hɔnho a, afei Ewuradze bɔsoɛr efi no sumabew hɔ, na ɔahaw aman no wɔ n’ebufuhyew mu;

90 Na n’ebufuhyew dzendzen mu, na n’akomahyew do wɔ ne mber mu na obotwa emumuyɛfo, na hɔn a wonndzi nokwar, nye ndwumayɛfo atorfo no akyen, na ɔakyerɛ hɔn hɔn kyɛfa wɔ enyisomakyerɛfo na ekyingyefo mu.

91 Wɔ ekyirekyir sum mu mpo, bea a osũ na kwadwomtwa na asetwɛr wɔ no.

92 Dɛm ntsi, hom mbɔ mpaa, ama woeebue hɔn aso etsie hɔn sũ, ama meehu hɔn mbɔbɔr, amma dɛm ndzɛmba yinom ammba hɔn do.

93 Ohia dɛ mekã dɛm nsɛm yi kyerɛ hom, amma nyimpa nyina ennya asɛm annkã ammfa anngye hɔnho;

94 Ama enyansafo nye ahemfo aatse na woeehu dza wɔnndween ho da no;

95 Ama maaba abɛyɛ m’adze, m’anwanwadze no, na mayɛ edwuma, m’anwanwadwuma no, ama adasa eehu soronko a ɔda atseneneefo nye emumuyɛfo mu, hom Nyankopɔn na ɔse.

96 Na bio, mese hom dɛ, ɔnnyɛ me pɛ, nna ɔnnyɛ me mbrasɛm dɛ m’akowaa Sidney Gilbert bɔtɔn m’adzekorabea no, dza mahyɛ ama mo nkorɔfo, ma ekedzi m’atamfo nsamu.

97 Mma hom mma dza mahyehyɛ esi hɔ no, hɔn a wɔdze me dzin ato hɔn do no mma kwan mma atamfo nngu ho fĩ.

98 Na iyi yɛ bɔn yaayaw a ɔyɛ dzen tsia me, nye mo nkorɔfo, na iyi yɛ ndzɛmba a mahyɛ ho ɔmom dɛ ɔnnkɛkyɛr na ɔaba aman do no no nsunsuando.

99 Dɛm ntsi, sɛ wɔremma mo nkorɔfo kwan ma wɔnntsena dza medze ama hɔn no mu mpo a, ɔyɛ me pɛ dɛ mo nkorɔfo bɛgye ho ndzinoa no ma wɔabɛyɛ hɔn dze.

100 Eso, mennkã dɛ wɔnnkɛtsena do; susuampaara dɛ wɔsow eduaba na wodzi dwuma a ɔsɛ m’ahenman no, wɔbɛtsena do.

101 Wobesi, na obi so remmfa nndzi; wobodua wenyin ndua na woedzi no do eduaba. Ɔnyɛ hɔ dɛm. Amen.