ພາກທີ 115
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງຟາແວັດ, ລັດມີເຊີຣີ, ວັນທີ 26 ເດືອນເມສາ, 1838, ໂດຍການເຮັດໃຫ້ຮູ້ຈັກພຣະປະສົງຂອງພຣະເຈົ້າກ່ຽວກັບການສ້າງສາສະຖານທີ່ ແລະ ບ້ານຂອງພຣະຜູ້ເປັນເຈົ້າ. ການເປີດເຜີຍນີ້ແມ່ນເຖິງເຈົ້າໜ້າທີ່ຄວບຄຸມ ແລະ ສະມາຊິກຂອງສາດສະໜາຈັກ.
1–4, ພຣະຜູ້ເປັນເຈົ້າໄດ້ຕັ້ງຊື່ສາດສະໜາຈັກຂອງພຣະອົງວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ; 5–6, ຊີໂອນ ແລະ ສະເຕກຂອງນາງເປັນສະຖານທີ່ປົກປ້ອງ ແລະ ເປັນບ່ອນຫລົບໄພສຳລັບໄພ່ພົນຂອງພຣະເຈົ້າ; 7–16, ໄພ່ພົນຂອງພຣະເຈົ້າຖືກບັນຊາໃຫ້ສ້າງບ້ານຂອງພຣະຜູ້ເປັນເຈົ້າຢູ່ເມືອງຟາແວັດ; 17–19, ໂຈເຊັບ ສະມິດ ຖືຂໍກະແຈຂອງອານາຈັກຂອງພຣະເຈົ້າຢູ່ເທິງແຜ່ນດິນໂລກ.
1 ຕາມຄວາມຈິງແລ້ວ ພຣະຜູ້ເປັນເຈົ້າໄດ້ກ່າວດັ່ງນີ້ກັບພວກເຈົ້າ, ຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ, ແລະ ຜູ້ຮັບໃຊ້ຂອງເຮົາ ຊິດນີ ຣິກດອນ ນຳອີກ, ແລະ ຜູ້ຮັບໃຊ້ຂອງເຮົາ ໄຮຣຳ ສະມິດ ນຳອີກ, ແລະ ທີ່ປຶກສາຂອງພວກເຈົ້າຜູ້ໄດ້ຖືກກຳນົດ ແລະ ຈະຖືກກຳນົດໃນພາຍຫລັງ.
2 ແລະ ກັບເຈົ້າຄືກັນ, ຜູ້ຮັບໃຊ້ຂອງເຮົາ ເອດເວີດ ພາດທຣິດ, ແລະ ທີ່ປຶກສາຂອງລາວ;
3 ແລະ ກັບຜູ້ຮັບໃຊ້ທີ່ຊື່ສັດຂອງເຮົານຳອີກ ຜູ້ເປັນຂອງສະພາສູງຂອງສາດສະໜາຈັກຂອງເຮົາໃນຊີໂອນ, ເພາະມັນຈະຖືກເອີ້ນເຊັ່ນນັ້ນ, ແລະ ກັບແອວເດີ ແລະ ຜູ້ຄົນທັງຫລາຍຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍຂອງເຮົາ, ທີ່ກະຈັດຈະກາຍກັນຢູ່ທົ່ວໂລກ;
4 ເພາະ ສາດສະໜາຈັກຂອງເຮົາຈະຖືກເອີ້ນດັ່ງນັ້ນໃນຍຸກສຸດທ້າຍ, ວ່າ ສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
5 ຕາມຄວາມຈິງແລ້ວ ເຮົາກ່າວກັບພວກເຈົ້າທັງຫລາຍວ່າ: ຈົ່ງ ລຸກຂຶ້ນ ແລະ ສ່ອງແສງອອກໄປ, ເພື່ອວ່າຄວາມສະຫວ່າງຂອງພວກເຈົ້າຈະເປັນ ທຸງສັນຍານໃຫ້ປະຊາຊາດ;
6 ແລະ ເພື່ອວ່າ ການເຕົ້າໂຮມຢູ່ເທິງແຜ່ນດິນ ຊີໂອນ, ແລະ ເທິງ ສະເຕກຂອງນາງ, ຈະເກີດຂຶ້ນເພື່ອການປົກປ້ອງ, ແລະ ເພື່ອເປັນ ບ່ອນຫລົບໄພຈາກພະຍຸ, ແລະ ຈາກພຣະພິໂລດເມື່ອມັນຈະ ຖອກເທລົງມາໂດຍສຸດພະລັງເທິງທັງແຜ່ນດິນໂລກ.
7 ໃຫ້ເມືອງ, ຟາແວັດ, ເປັນແຜ່ນດິນ ສັກສິດ ແລະ ອຸທິດຖວາຍແກ່ເຮົາ; ແລະ ມັນຈະຖືກເອີ້ນວ່າ ສັກສິດທີ່ສຸດ, ເພາະສະຖານທີ່ ທີ່ພວກເຈົ້າຢືນຢູ່ນັ້ນເປັນບ່ອນສັກສິດ.
8 ສະນັ້ນ, ເຮົາບັນຊາພວກເຈົ້າໃຫ້ ສ້າງບ້ານຫລັງໜຶ່ງໃຫ້ແກ່ເຮົາ, ສຳລັບເປັນການເຕົ້າໂຮມຂອງໄພ່ພົນຂອງເຮົາ, ເພື່ອວ່າພວກເຂົາຈະໄດ້ ນະມັດສະການເຮົາ.
9 ແລະ ໃຫ້ມີການເລີ່ມຕົ້ນວຽກງານນີ້, ແລະ ພື້ນຖານ, ແລະ ການຕຽມວຽກງານ, ໃນລະດູຮ້ອນທີ່ຈະມາເຖິງນີ້;
10 ແລະ ໃຫ້ເລີ່ມຕົ້ນການສ້າງໃນວັນທີສີ່ຂອງເດືອນກໍລະກົດທີ່ຈະມາເຖິງນີ້; ແລະ ຈາກເວລານັ້ນ ໃຫ້ຜູ້ຄົນຂອງເຮົາທຳງານຢ່າງພາກພຽນເພື່ອສ້າງບ້ານແດ່ນາມຂອງເຮົາ;
11 ແລະ ປີ ໜຶ່ງຈາກວັນນັ້ນ ໃຫ້ພວກເຂົາເລີ່ມຕົ້ນການວາງພື້ນຖານ ບ້ານຂອງເຮົາອີກ.
12 ດັ່ງນັ້ນ ນັບແຕ່ເວລານີ້ໄປ ໃຫ້ພວກເຂົາທຳງານຢ່າງພາກພຽນຈົນກວ່າມັນຈະສຳເລັດ, ຈາກຫີນເສົາເອກນັ້ນຈົນເຖິງຈອມຂອງມັນ, ຈົນວ່າບໍ່ມີບ່ອນໃດເຫລືອຢູ່ທີ່ຍັງບໍ່ສຳເລັດ.
13 ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ບໍ່ໃຫ້ຜູ້ຮັບໃຊ້ຂອງເຮົາ ໂຈເຊັບ, ທັງບໍ່ໃຫ້ຜູ້ຮັບໃຊ້ຂອງເຮົາ ຊິດນີ, ທັງບໍ່ໃຫ້ຜູ້ຮັບໃຊ້ຂອງເຮົາ ໄຮຣຳ, ເປັນໜີ້ອີກໃນການສ້າງບ້ານແດ່ນາມຂອງເຮົາ;
14 ແຕ່ໃຫ້ບ້ານຖືກສ້າງຂຶ້ນແດ່ນາມຂອງເຮົາ ຕາມ ແບບແຜນຊຶ່ງເຮົາຈະສະແດງແກ່ເຂົາເຈົ້າ.
15 ແລະ ຖ້າຫາກຜູ້ຄົນຂອງເຮົາບໍ່ສ້າງມັນຕາມແບບແຜນທີ່ເຮົາໄດ້ສະແດງແກ່ຝ່າຍປະທານຂອງພວກເຂົາ, ເຮົາຈະບໍ່ຍອມຮັບເອົາມັນຈາກມືຂອງພວກເຂົາ.
16 ແຕ່ຖ້າຫາກຜູ້ຄົນຂອງເຮົາສ້າງມັນຕາມແບບແຜນທີ່ເຮົາຈະສະແດງແກ່ຝ່າຍປະທານຂອງພວກເຂົາ, ແມ່ນແຕ່ຜູ້ຮັບໃຊ້ຂອງເຮົາ ໂຈເຊັບ ແລະ ທີ່ປຶກສາຂອງລາວ, ເມື່ອນັ້ນເຮົາຈະຍອມຮັບເອົາມັນຈາກມືຂອງຜູ້ຄົນຂອງເຮົາ.
17 ແລະ ອີກເທື່ອໜຶ່ງ, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ມັນເປັນຄວາມປະສົງຂອງເຮົາວ່າເມືອງຟາແວັດຄວນຖືກສ້າງສາຂຶ້ນຢ່າງໄວໂດຍການເຕົ້າໂຮມຂອງໄພ່ພົນຂອງເຮົາ;
18 ແລະ ວ່າ ບ່ອນອື່ນຄວນຖືກກຳນົດໃຫ້ເປັນ ສະເຕກໃນພາກພື້ນຕ່າງໆທີ່ອ້ອມຮອບ, ດັ່ງທີ່ມັນຈະຖືກສະແດງໃຫ້ປະຈັກແກ່ຜູ້ຮັບໃຊ້ຂອງເຮົາ, ໂຈເຊັບ, ເປັນບາງຄັ້ງ.
19 ເພາະຈົ່ງເບິ່ງ, ເຮົາຈະຢູ່ກັບລາວ, ແລະ ເຮົາຈະຊຳລະລາວໃຫ້ບໍລິສຸດຕໍ່ໜ້າຜູ້ຄົນ; ເພາະເຮົາໄດ້ມອບ ຂໍກະແຈຂອງອານາຈັກ ແລະ ການປະຕິບັດສາດສະໜາກິດນີ້ໃຫ້ລາວ. ແມ່ນເປັນດັ່ງນັ້ນ. ອາແມນ.