ພາກທີ 127
ສານຈາກໂຈເຊັບ ສະມິດ ຜູ້ເປັນສາດສະດາເຖິງໄພ່ພົນຍຸກສຸດທ້າຍ ທີ່ເມືອງນາວູ, ລັດອິລິນອຍ, ໂດຍບັນຈຸຄຳແນະນຳເລື່ອງການບັບຕິສະມາແທນຄົນຕາຍ, ລົງວັນທີທີ່ເມືອງນາວູ, ວັນທີ 1 ເດືອນກັນຍາ, 1842.
1–4, ໂຈເຊັບ ສະມິດ ຊົມຊື່ນຍິນດີໃນການຂົ່ມເຫັງ ແລະ ຄວາມທຸກຍາກລຳບາກ; 5–12, ຕ້ອງມີການບັນທຶກກ່ຽວກັບການບັບຕິສະມາແທນຄົນຕາຍໄວ້.
1 ໂດຍທີ່ພຣະຜູ້ເປັນເຈົ້າໄດ້ເປີດເຜີຍແກ່ຂ້າພະເຈົ້າວ່າ ສັດຕູຂອງຂ້າພະເຈົ້າ, ທັງໃນລັດມີເຊີຣີ ແລະ ລັດນີ້, ໄດ້ໄລ່ຕາມຂ້າພະເຈົ້າອີກ; ແລະ ຕາບໃດທີ່ພວກເຂົາໄລ່ຕາມຂ້າພະເຈົ້າໂດຍບໍ່ມີ ສາເຫດ, ແລະ ບໍ່ມີແມ່ນແຕ່ເງົາ ຫລື ສີຂອງຄວາມຍຸດຕິທຳ ຫລື ຄວາມຖືກຕ້ອງທາງຝ່າຍພວກເຂົາ ໃນການຍຸຍົງໃຫ້ດຳເນີນຄະດີຕໍ່ຕ້ານຂ້າພະເຈົ້າ; ແລະ ຕາບໃດທີ່ຂໍ້ກ່າວຫາທັງໝົດຂອງພວກເຂົາມີມູນຖານເປັນຄວາມເທັດ ທີ່ຍ້ອມດ້ວຍສີດຳທີ່ສຸດ, ຂ້າພະເຈົ້າໄດ້ຄິດວ່າເປັນການສົມຄວນ ແລະ ເປັນຄວາມສະຫລຽວສະຫລາດຂອງຂ້າພະເຈົ້າທີ່ຈະຈາກສະຖານທີ່ແຫ່ງນີ້ໄປຊົ່ວໄລຍະໜຶ່ງ, ເພື່ອຄວາມປອດໄພຂອງຂ້າພະເຈົ້າເອງ ແລະ ຄວາມປອດໄພຂອງຜູ້ຄົນພວກນີ້. ຂ້າພະເຈົ້າຢາກກ່າວກັບທຸກຄົນ ທີ່ຂ້າພະເຈົ້າໄດ້ເຮັດທຸລະກິດດ້ວຍ, ວ່າຂ້າພະເຈົ້າໄດ້ຝາກທຸລະຂອງຂ້າພະເຈົ້າໄວ້ກັບຕົວແທນ ແລະ ສະໝຽນ ຜູ້ຈະຈັດການກັບທຸລະກິດທັງໝົດໃນວິທີທີ່ວ່ອງໄວ ແລະ ຖືກຕ້ອງ, ແລະ ຈະເບິ່ງໜີ້ສິນທັງໝົດຂອງຂ້າພະເຈົ້າຖືກຊຳລະໃນເວລາອັນເໝາະສົມ, ໂດຍການຈຳໜ່າຍຊັບສົມບັດອອກໄປ, ຫລື ບໍ່ສະນັ້ນ, ຕາມຄວາມຈຳເປັນຂອງເລື່ອງ, ຫລື ຕາມສະພາບການຈະອຳນວຍ. ເມື່ອໃດຂ້າພະເຈົ້າຮູ້ວ່າພະຍຸໄດ້ຜ່ານພົ້ນໄປແລ້ວ, ເມື່ອນັ້ນຂ້າພະເຈົ້າຈະກັບມາຫາພວກທ່ານອີກ.
2 ແລະ ກ່ຽວກັບ ໄພອັນຕະລາຍ ຊຶ່ງຂ້າພະເຈົ້າຖືກເອີ້ນໃຫ້ຜ່ານພົ້ນມາ, ເບິ່ງຄືວ່າມັນເປັນເລື່ອງເລັກໜ້ອຍຕໍ່ຂ້າພະເຈົ້າ, ເພາະ ຄວາມອິດສາ ແລະ ຄວາມໂມໂຫຮ້າຍຂອງມະນຸດເປັນໂຊກຊາຕາປົກກະຕິຂອງຂ້າພະເຈົ້າຕະຫລອດວັນເວລາຂອງຊີວິດຂອງຂ້າພະເຈົ້າ; ແລະ ເພາະດ້ວຍເຫດໃດກໍບໍ່ຮູ້ ມັນເບິ່ງຄືວ່າເປັນສິ່ງລຶກລັບ, ເວັ້ນເສຍແຕ່ຂ້າພະເຈົ້າໄດ້ຖືກ ແຕ່ງຕັ້ງນັບແຕ່ກ່ອນການວາງຮາກຖານຂອງໂລກເພື່ອຈຸດປະສົງບາງຢ່າງທີ່ດີ, ຫລື ຊົ່ວ, ຕາມທີ່ພວກທ່ານຈະເລືອກເອີ້ນກັນ. ພວກທ່ານຈົ່ງຕັດສິນເອົາເອງ. ພຣະເຈົ້າຮູ້ຈັກທຸກສິ່ງທັງປວງເຫລົ່ານີ້, ບໍ່ວ່າມັນຈະເປັນເລື່ອງດີ ຫລື ຊົ່ວ. ແຕ່ເຖິງຢ່າງໃດກໍຕາມ, ນ້ຳເລິກເປັນສິ່ງທີ່ຂ້າພະເຈົ້າເຄີຍລອຍມາແລ້ວຈົນລຶ້ງ. ທຸກສິ່ງທັງປວງກາຍເປັນເລື່ອງທຳມະດາສຳລັບຂ້າພະເຈົ້າ. ແລະ ຂ້າພະເຈົ້າຮູ້ສຶກເໝືອນໂປໂລ, ທີ່ຈະຊົມຊື່ນຍິນດີໃນ ຄວາມທຸກຍາກລຳບາກ; ເພາະວ່າຈົນເຖິງວັນນີ້ ພຣະເຈົ້າຂອງບັນພະບຸລຸດຂອງຂ້າພະເຈົ້າໄດ້ປົດປ່ອຍຂ້າພະເຈົ້າອອກຈາກທຸກສິ່ງເຫລົ່ານີ້ທັງໝົດ ແລະ ຈະປົດປ່ອຍຂ້າພະເຈົ້ານັບແຕ່ນີ້ເປັນຕົ້ນໄປ; ເພາະຈົ່ງເບິ່ງ, ແລະ ເບິ່ງແມ, ຂ້າພະເຈົ້າຈະມີໄຊຊະນະເໜືອສັດຕູທັງປວງຂອງຂ້າພະເຈົ້າ, ເພາະອົງພຣະຜູ້ເປັນເຈົ້າໄດ້ກ່າວໄວ້ດັ່ງນີ້.
3 ສະນັ້ນ ໃຫ້ໄພ່ພົນຂອງພຣະເຈົ້າປິຕິຍິນດີເຖີດ, ແລະ ດີໃຈຢ່າງຍິ່ງ; ເພາະວ່າ ພຣະເຈົ້າຂອງອິດສະຣາເອນເປັນພຣະເຈົ້າຂອງພວກເຂົາ, ແລະ ພຣະອົງຈະແບ່ງການຊົດເຊີຍທີ່ທ່ຽງທຳໃຫ້ເປັນລາງວັນຢູ່ເທິງຫົວຂອງຜູ້ກົດຂີ່ທັງປວງຂອງພວກເຂົາ.
4 ແລະ ອີກເທື່ອໜຶ່ງ, ຕາມຄວາມຈິງແລ້ວ ພຣະຜູ້ເປັນເຈົ້າໄດ້ກ່າວດັ່ງນີ້: ໃຫ້ວຽກງານຂອງ ພຣະວິຫານຂອງເຮົາ, ແລະ ວຽກງານທັງໝົດທີ່ເຮົາໄດ້ກຳນົດໃຫ້ພວກເຈົ້າດຳເນີນຕໍ່ໄປ ແລະ ບໍ່ໃຫ້ຢຸດ; ແລະ ໃຫ້ ຄວາມພາກພຽນ, ແລະ ຄວາມບາກບັ່ນ, ແລະ ຄວາມອົດທົນ, ແລະ ວຽກງານຂອງພວກເຈົ້າທະວີຄູນສອງເທົ່າ, ແລະ ພວກເຈົ້າຈະບໍ່ມີທາງສູນເສຍລາງວັນຂອງພວກເຈົ້າເລີຍ, ຈອມໂຍທາໄດ້ກ່າວ. ແລະ ຖ້າຫາກພວກເຂົາ ຂົ່ມເຫັງພວກເຈົ້າ, ສາດສະດາ ແລະ ຄົນທີ່ຊອບທຳທີ່ເຄີຍມີຊີວິດກ່ອນພວກເຈົ້າກໍເຄີຍຖືກມາແລ້ວຄືກັນ. ສຳລັບທຸກສິ່ງທຸກຢ່າງນີ້ ມັນມີລາງວັນຢູ່ໃນສະຫວັນ.
5 ແລະ ອີກເທື່ອໜຶ່ງ, ຂ້າພະເຈົ້າໃຫ້ຄຳແກ່ພວກທ່ານກ່ຽວກັບ ການບັບຕິສະມາແທນຄົນ ຕາຍຂອງພວກທ່ານ.
6 ຕາມຄວາມຈິງແລ້ວ, ພຣະຜູ້ເປັນເຈົ້າໄດ້ກ່າວດັ່ງນີ້ກັບພວກທ່ານກ່ຽວກັບຄົນຕາຍຂອງພວກທ່ານ: ເມື່ອຄົນໃດກໍຕາມໃນບັນດາພວກເຈົ້າຮັບ ບັບຕິສະມາແທນຄົນຕາຍຂອງພວກເຈົ້າ, ໃຫ້ມີ ຜູ້ບັນທຶກ, ແລະ ໃຫ້ເຂົາເປັນພະຍານທີ່ເຫັນກັບຕາເຖິງການຮັບບັບຕິສະມາຂອງພວກເຈົ້າ; ໃຫ້ເຂົາໄດ້ຍິນກັບຫູຂອງເຂົາ, ເພື່ອວ່າເຂົາຈະເປັນພະຍານເຖິງຄວາມຈິງ, ພຣະຜູ້ເປັນເຈົ້າໄດ້ກ່າວ;
7 ເພື່ອວ່າໃນການເຮັດບັນທຶກທັງໝົດຂອງພວກເຈົ້າ ມັນຈະຖືກ ບັນທຶກໄວ້ໃນສະຫວັນ; ເພື່ອວ່າສິ່ງໃດກໍຕາມທີ່ພວກເຈົ້າຈະ ຜູກມັດເທິງແຜ່ນດິນໂລກ ສິ່ງນັ້ນຈະຖືກຜູກມັດໃນສະຫວັນ; ແລະ ສິ່ງໃດກໍຕາມທີ່ພວກເຈົ້າຈະແກ້ໃຫ້ຫລຸດເທິງແຜ່ນດິນໂລກ ສິ່ງນັ້ນຈະຖືກແກ້ໃຫ້ຫລຸດໃນສະຫວັນ;
8 ເພາະ ເຮົາກຳລັງຈະ ຟື້ນຟູຫລາຍສິ່ງໃຫ້ແຜ່ນດິນໂລກ, ກ່ຽວກັບ ຖານະປະໂລຫິດ, ຈອມໂຍທາໄດ້ກ່າວ.
9 ແລະ ອີກເທື່ອໜຶ່ງ, ໃຫ້ ບັນທຶກທັງໝົດມີຢູ່ຢ່າງເປັນລະບຽບຮຽບຮ້ອຍ, ເພື່ອວ່າມັນຈະຖືກເກັບມ້ຽນໄວ້ໃນທີ່ເກັບເອກະສານຂອງພຣະວິຫານສັກສິດຂອງເຮົາ, ເພື່ອວ່າຈະຮັກສາມັນໄວ້ໃນຄວາມຊົງຈຳຈາກລຸ້ນສູ່ລຸ້ນ, ຈອມໂຍທາໄດ້ກ່າວ.
10 ຂ້າພະເຈົ້າຈະກ່າວກັບໄພ່ພົນທັງໝົດວ່າ ຂ້າພະເຈົ້າມີຄວາມປາດຖະໜາ, ດ້ວຍຄວາມປາດຖະໜາອັນແຮງກ້າ, ທີ່ຈະກ່າວກັບພວກເຂົາຈາກແທ່ນປາໄສກ່ຽວກັບເລື່ອງການບັບຕິສະມາແທນຄົນຕາຍ, ໃນວັນຊະບາໂຕໜ້າ. ແຕ່ເນື່ອງຈາກວ່າຂ້າພະເຈົ້າບໍ່ມີອຳນາດທີ່ຈະເຮັດເຊັ່ນນັ້ນ, ຂ້າພະເຈົ້າຈະຂຽນພຣະຄຳຂອງພຣະຜູ້ເປັນເຈົ້າເປັນບາງຄັ້ງ, ກ່ຽວກັບເລື່ອງນີ້, ແລະ ສົ່ງມັນມາໃຫ້ພວກທ່ານທາງໄປສະນີ, ເຊັ່ນດຽວກັບເລື່ອງອື່ນໆຫລາຍເລື່ອງ.
11 ບັດນີ້ ຂ້າພະເຈົ້າຂໍຢຸດຕິຈົດໝາຍຂອງຂ້າພະເຈົ້າສຳລັບຕອນນີ້, ເພາະບໍ່ມີເວລາອີກ; ເພາະສັດຕູຕື່ນຕົວ, ແລະ ດັ່ງທີ່ພຣະຜູ້ຊ່ວຍໃຫ້ລອດໄດ້ກ່າວໄວ້, ເຈົ້າຊາຍຂອງໂລກນີ້ກຳລັງມາ, ແຕ່ມັນບໍ່ມີອຳນາດຕໍ່ຂ້າພະເຈົ້າເລີຍ.
12 ຈົ່ງເບິ່ງ, ຄຳອະທິຖານຂອງຂ້າພະເຈົ້າຕໍ່ພຣະເຈົ້າ ຄືວ່າທ່ານທຸກຄົນຈະລອດ. ແລະ ຂ້າພະເຈົ້າລົງນາມເປັນຜູ້ຮັບໃຊ້ຂອງພວກທ່ານໃນພຣະຜູ້ເປັນເຈົ້າ, ເປັນສາດສະດາ ແລະ ຜູ້ພະຍາກອນຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ.
ໂຈເຊັບ ສະມິດ.