1 Em̧ool, āindein Irooj ej ba n̄an eok rikarejera Josep, kōnke kwaar kajjitōk jān Peiū n̄an jeļā im meļeļe ekōjkan N̄a, Irooj, Iaar kajim̧we ro karejera Ebream, Aisak, im Jekab, āinwōt barāinwōt Moses, Devid im Solomon, ro karejera, āinwōt an jelōt unleplep im katak in aer kar lōn̄ kōrā pāleer im aer konkubain—

2 Lo, im lo, N̄aij Irooj am̧ Anij, im naaj uwaake eok āinwōt an jelōte men in.

3 Kōn menin, kōpooje būruōm̧ n̄an bōk im pokaki naan in tōl ko me Ij itōn liwōj n̄an eok; bwe aolep ro kar kwaļo̧ke kien in n̄an er reaikuj pokake ejja in wōt.

4 Bwe lo, Ij kwaļo̧k n̄an eok juon bujen ekāāl im ejjeļo̧k jem̧ļo̧kin; im eļan̄n̄e kwōj jab pād wōt ilo bujen in, innām kwe kwo jako; bwe ejjeļo̧k juon emaron̄ kajejtokjān bujen in im kōmālim e n̄an deļo̧n̄tok ilo aiboojoj eo Aō.

5 Bwe aolep ro rekōņaan juon aer kōjeraam̧m̧an jān Peiū renaaj pād wōt ilo kien eo me kar jitōn̄e n̄an kōjeraam̧m̧an en, im kōmlet ko an, āinwōt kar ejaak m̧okta jān foundasōn eo an laļ.

6 Im āinwōt ej ekkejelļo̧k n̄an bujen eo ekāāl im ejjeļo̧k jem̧ļo̧kin, kar kajutak e n̄an tarlep in aiboojoj eo Aō; im eo ej bōke tarlep in eaikuj im enaaj ļoore kien eo, ak e enaaj jako, Irooj Anij ej ba.

7 Im em̧ool Ij ba n̄an kom̧, bwe kōmlet ko an kien in rej erkein: Aolep bujen ko, kooņtōreak ko, koņ ko, eddo ko, kallim̧ur ko, kanejnej ko, m̧akūtkūt ko, kōtaan ko, iiaio ko, ak kōtmāne ko, im rej jab kōm̧m̧an im deļo̧n̄i im sili jān Jetōb Kwōjarjar in kallim̧ur, jān m̧aan eo kapiti, jim̧or barāinwōt n̄an iien im n̄an aolep indeeo, im men eo ebarāinwōt ekwōjarjar tata, jān revelesōn im kien kōn eo ej ekkapitū, eo Iaar jitōn̄ e ioon laļ n̄an kabwijer kajoor in (im em̧ōj Aō kar jitōn̄e n̄an karejera Josep n̄an kabwijer kajoor in ilo raan ko āliktata, im ejjāmin bar wōr elōn̄ļo̧k jān juon ioon laļ ilo juon iien eo ioon kajoor in im ki ko an priesthood eo kar likūt ioon), rej itok kōn ejjeļo̧k kajoor, eddo, ak an̄ier ilo im ālikin jerkakpeje eo jān ro remej; bwe aolep kooņtōreak ko im rej jab kōm̧m̧ani n̄an jem̧ļo̧k in ewōr jem̧ļo̧kier n̄e armej rej mej.

8 Lo, m̧weo Im̧ō ej juon im̧ōn koņ, Irooj Anij ej ba, im jab juon im̧ōn pok.

9 I naaj ke bōk juon joortak, Irooj ej ba, eo ej jab kōm̧m̧an ilo Eta?

10 Ak I naaj ke bōk jān peimi men eo Iaar jab kōmālimi?

11 Im I naaj ke jitōn̄ kom̧, Irooj ej ba, ijello̧kun n̄e ej jān kien, em̧ool āinwōt N̄a im Jema kōm ar kapit n̄an kom̧, m̧okta jān kar laļ?

12 N̄aij Irooj ami Anij; im Ij lewōj n̄an kom̧ kien in—bwe ejjeļo̧k armej enaaj itok n̄an Jemān ijello̧kun n̄e ej jān Eō ak jān Aō innaan, eo ej Aō kien, Irooj ej ba.

13 Im men otemjej eo ej pād ilo laļ, men̄e e kar kapit in armej raņ, jān tūroon ko, ak tōln̄an ko, ak kajoor ko, ak men ko rebun̄bun̄, jabdewōt iaer, im rej jab jān Eō ak jān Aō innaan, Irooj ej ba, naaj jolaļļo̧k, im eban pād ālikin an armej raņ mej, im jab ilo im jab ālikin jerkakpeje eo, Irooj ami Anij ej ba.

14 Bwe jabdewōt men ko rej pād wōt rej jān Eō; im jabdewōt men ko rej jab jān Eō renaaj iddiki im ko̧kkuri.

15 Kōn menin, eļan̄n̄e juon em̧m̧aan ej m̧areik n̄an e juon kōrā pāleen ilo laļ in, im ej m̧areik liin jab jān Eō ak jān Aō innaan, im ej kōm̧m̧an bujen ippān kōrā eo toun wōt an pād ioon laļ in im lio ej pād ippān, bujen eo im m̧are eo aerro ej jab wōr an̄in n̄e erro ej mej, im n̄e rej jako jān laļ in; kōn menin, rej jab lokjak jān jabdewōt kien n̄e rej jako jān laļ in.

16 Kōn menin, n̄e rej jako jān laļ in reban m̧are im jab leļo̧k ilo m̧are; a rej jitōn̄ er enjeļ ro ilo lan̄, enjeļ ro me rej rijerbale bōktok ennaan, n̄an jipan̄ ro rej tōllo̧ke eļapļo̧k, im juon ekanooj ļap, im juon aiboojoj eddo im n̄an indeeo.

17 Bwe enjeļ rein rekar jab pād ilo kien eo Aō; kōn menin, rej jab maron̄ ļapļo̧k, a juon ejepel im make ian, im jab mour āinwōt Anij, ilo tam̧m̧weer em̧ōj lo̧mo̧o̧ren, n̄an aolep indeeo; im jān iien eo m̧aanļo̧k rej jab anij raņ, a rej enjeļ raņ an Anij indeeo im indeeo.

18 Im bar juon alen, em̧ool Ij ba n̄an kom̧, eļan̄n̄e juon em̧m̧aan ej m̧areik juon kōrā pālele, im kōm̧m̧ane juon bujen ippān liin n̄an iien im n̄an aolep indeeo, eļan̄n̄e bujen en ej jab jān Eō ak jān Aō innaan, eo me ej Aō kien, im ej jab sil jān Jetōb Kwōjarjar in kallim̧ur, kōn e eo em̧ōj kar Aō kapiti im jitōn̄e n̄an kajoor in, innām ej jab pen im jab wōr an̄in n̄e rej jako jān laļ, kōnke rej jab kar koba jān Eō, Irooj ej ba, im jab jān Aō innaan; n̄e rej jako jān laļ ej jab maron̄ bōk e ijeņ, kōnke enjeļ raņ im anij raņ rej jitōn̄e er ijeņ, jān er ro im reban eļļā; reban, kōn menin, jolōte aiboojoj eo Aō; bwe m̧weo Im̧ō ej juon im̧ōn koņ; Irooj Anij ej ba.

19 Im bar juon alen, em̧ool Ij ba n̄an kom̧, eļan̄n̄e juon em̧m̧aan ej m̧areik juon kōrā pālele jān Aō innaan, eo me ej Aō kien, im jān bujen eo ekāāl im ejjeļo̧k jem̧ļo̧kin, im e ej sil n̄an er jān Jetōb Kwōjarjar in kallim̧ur, kōn e eo em̧ōj kar Aō kapiti, im n̄an eo Iaar jitōn̄e n̄an e kajoor in im ki ko an priesthoodin; im naaj ba n̄an er—Kom̧ro naaj jerkaktok ilo jerkakpeje eo m̧oktata; im eļan̄n̄e ej ālikin jerkakpeje eo m̧oktata, ilo jerkakpeje eo tokālikin; im naaj jolōte tūroon ko, aelōn̄ in kiin̄ ko, tōln̄an ko, im kajoor ko, mo̧jen ko, aolepān utiej ko im m̧wilaļ ko—innām enaaj jeje ilo Bok in Mour an Lamb eo, bwe eban uror im kōn mennin kōto̧o̧rļo̧k bōtōktōk eo ejjeļo̧k ruōn, im eļan̄n̄e erro ej ļoore bujen in Aō, im jab uror im ban kōto̧o̧rļo̧k bōtōktōk eo ejjeļo̧k ruōn, e naaj waļo̧k n̄an erro ilo aolep men ko otemjeļo̧k eo rikarejera eaar likūt ioer, ilo iien, im ilo aolep indeeo; im enaaj lukkuun pen n̄e erro ej jako jān laļ in; im renaaj eļļāļo̧k jān enjeļ raņ, im anij raņ, ro kar likūt er ijeņ, n̄an aerro mour āinwōt Anij im aiboojoj ilo aolep men otemjeļo̧k, āinwōt ke em̧ōj kar sili ioon bōraer, aiboojoj eo me enaaj dipiio im ej wōnm̧aanļo̧k wōt in ine ko ineero indeeo im indeeo.

20 Innām renaaj erom anij raņ, kōnke ejjeļo̧k jem̧ļo̧kier; kōn menin renaaj jān indeeo n̄an indeeo, kōnke rej wōnm̧aanļo̧k wōt; innām renaaj ilōn̄in aolep, kōnke aolep men otemjeļo̧k rej aer pepe. Innām renaaj erom anij raņ, kōnke aolep kajoor naaj aer, im renaaj peeke enjeļ raņ.

21 Em̧ool, em̧ool, Ij ba n̄an kom̧, eļan̄n̄e kom̧ij jab pād wōt ilo kien eo Aō kom̧ ban maron̄ tōpare aiboojoj in.

22 Bwe erānin̄ aor eo, im eaidik iaļ eo ej tōlļo̧k n̄an mour āinwōt Anij im wōnm̧aanļo̧k wōt in mour ko, im eiiet ro renaaj lo e, kōnke kom̧ij jab bōk Eō ilo laļ im kom̧ij jab jeļā N̄a.

23 A eļan̄n̄e kom̧ij bōk Eō ilo laļ, innām kom̧ naaj jeļā N̄a, im naaj bōk ami mour āinwōt Anij; bwe ijo Ij pād ie kom̧ naaj pād ie barāinwōt.

24 En̄in ej mour indeeo ko—n̄an jeļā Anij eo wōt emālōtlōt im m̧ool, im Jisōs Kraist, eo Eaar jilkintok. N̄aij E. Kom̧in bōke, kōn menin, kien eo Aō.

25 Eļap kōjām eo, im depakpak iaļ eo ej tōlļo̧k n̄an mej ko; im elōn̄ ro rej deļo̧n̄ ijo, kōnke rej jab bōk Eō, im jab pād wōt ilo kien eo Aō.

26 Em̧ool, em̧ool, Ij ba n̄an kom̧, eļan̄n̄e juon em̧m̧aan ej m̧areik juon kōrā pālele ekkar n̄an Aō innaan, im erro ej sil jān Jetōb Kwōjarjar in kallim̧ur, ekkar n̄an Aō ijjitōn̄, im ļeo ak lio enaaj kōm̧m̧an jabdewōt jero̧wiwi ak bōd ņae bujen eo ekāāl im ejjeļo̧k jem̧ļo̧kin ilo jabdewōt jekjek otemjeļo̧k, im aolep wāween blaspim ko, im eļan̄n̄e rej jab kōm̧m̧an jabdewōt uror im rej jab kōto̧o̧rļo̧k bōtōktōk eo ejjeļo̧k ruōn, mekarta renaaj jerkaktok ilo jerkakpeje eo m̧oktata, im deļo̧n̄ļo̧k ilo aer āinwōt Anij; a naaj ko̧kkure er ilo kanniōk, im naaj leļo̧k er n̄an aujiid ko an Setan m̧ae raan in lo̧mo̧o̧r, Irooj Anij ej ba.

27 Blaspim eo ņae Jetōb Kwōjarjar, eo naaj jab jeorļo̧k bōd ņae ilo laļ im jab ilikin laļ, ej ilo ami uror im kom̧ij kōto̧o̧rļo̧k bōtōktōk eo ejjeļo̧k ruōn, im rie mej eo Aō, ālikin ami kar bōk bujen eo ekāāl im ejjeļo̧k jem̧ļo̧kin Aō, Irooj Anij ej ba; im eo ej jab pād wōt ilo kien in ejja āinwōt in eban deļo̧n̄ļo̧k ilo aiboojoj eo Aō, a enaaj jako, Irooj ej ba.

28 N̄aij Irooj ami Anij, im naaj lewōj n̄an kom̧ kien eo an Priesthood eo Ekwōjarjar Aō, āinwōt kar kōmālimi jān Eō im Jema m̧okta jān kar laļ.

29 Ebream eaar bōk aolep men otemjej, jabdewōt men eaar bōke, jān revelesōn im kien, jān Aō innaan, Irooj ej ba, im eaar deļo̧n̄ļo̧k ilo an mour āinwōt Anij im ej jijet ioon tūroon eo an.

30 Ebream eaar bōki kallim̧ur ko kōn ro ineen, im kōn leen lo̧jeen—eo kwe kwōj jān lo̧jeen, eo meļeļein karejera Josep—ro renaaj kar wōnm̧aanļo̧k wōt toun wōt aer pād ilo laļ in; im ikijjien Ebream im ineen, ilikin laļ in renaaj wōnm̧aanļo̧k wōt; jim̧or ilo laļ in im ilikin laļ in ren wōnm̧aanļo̧k im kanooj jab maron̄ bwini āinwōt iju ko; ak, eļan̄n̄e kom̧ ar bwine bok in parijet kom̧ ban kar maron̄ bwine er.

31 Kallim̧ur in ej ami barāinwōt, kōnke kom̧ij jān Ebream, im kallim̧ur eo ekar kōm̧m̧an n̄an Ebream; im jān kien in ej wōnm̧aanļo̧k wōt eo an jerbal ko an Jema, ko kaki E ej kaiboojoj E make.

32 Kom̧in ilo̧k, kōn menin, im kōm̧m̧ani jerbal ko an Ebream; kom̧in deļo̧n̄ļo̧k ilo kien eo Aō im kom̧ naaj mour.

33 A eļan̄n̄e kom̧ij jab deļo̧n̄ļo̧k ilo kien eo Aō kom̧ij jab maron̄ bōk kallim̧ur eo an Jema, eo Eaar kōm̧m̧ane n̄an Ebream.

34 Anij eaar jiron̄ Ebream, im Sera eaar leļo̧k Hegar n̄an Ebream bwe en lio pāleen. Im etke liin eaar kōm̧m̧ane? Kōnke en̄in ekar kien eo; im jān Hegar eaar jebar elōn̄ armej. Men in, āindein, ekar kūrm̧ool, ilubwiljin elōn̄ men, kallim̧ur ko.

35 Ebream eaar ke, kōn menin, pād ium̧win liaakeļo̧k? Em̧ool Ij ba n̄an kom̧, Jaab; bwe N̄a, Irooj, Iaar jiron̄ e.

36 Ebream kar jiron̄ e n̄an katok kōn ļeo nejin Aisak; mekarta, em̧ōj kar jeje men in: Kwōn jab uror. Ebream, ijoke, eaar jab abōb, im men in n̄an e kar watōke bwe ekar jim̧we.

37 Ebream eaar bōk konkubain ro, im rekar keotak n̄an e ajri ro; im men in n̄an e kar watōke bwe ekar jim̧we, kōnke kar leļo̧k er n̄an e, im eaar pād wōt ilo kien eo Aō; āinwōt Aisak barāinwōt im Jekab rekar kōm̧m̧an ebar ejjeļo̧k men ko reirļo̧k jān men eo kar jiron̄ er; im kōnke rekar kōm̧m̧an ebar ejjeļo̧k men ko reirļo̧k jān men eo kar jiron̄ er, rekar deļo̧n̄ļo̧k ilo aer mour āinwōt Anij, ekkar n̄an kallim̧ur ko, im jijet ioon tūroon ko, im rej jab enjeļ a rej anij ro.

38 Devid barāinwōt ekar bōk elōn̄ kōrā pāleen im konkubain ro, im barāinwōt Solomon im Moses ro karejera, āinwōt barāinwōt elōn̄ ro jet ian ro karejera, jān jinoin kōm̧anm̧an m̧ae iien in; im ilo ejjeļo̧k men rekar jero̧wiwi ijello̧kun wōt ilo men ko me rekar jab bōki jān Eō.

39 Kōrā ro pāleen im konkubain ro an Devid kar liļo̧k n̄an e jān N̄a, jān pein Netan, eo karejera, im rikanaan ro jet im eaar wōr ippāer ki ko an kajoor in; im ilo ejjeļo̧k ian men kein eaar jero̧wiwi ņae Eō ijello̧kun wōt wāween eo ar jelōt Uraia im kōrā eo pāleen; im, kōn menin eaar wōtlo̧k jān an mour āinwōt Anij, im bōk ijo an; im eban jolōti ilikin laļ in, bwe Iaar leļo̧k er n̄an bar juon, Irooj ej ba.

40 N̄aij Irooj am̧ Anij, im Iaar lewōj n̄an eok, karejera Josep, juon kūr, im kōjepļaaktok aolep men ko otemjeļo̧k. Kajjitōk ta kwo kōņaan, im naaj lewōj e n̄an eok ekkar n̄an Aō innaan.

41 Im āinwōt am̧ kar kajjitōk kōn ļōn̄, em̧ool, em̧ool, Ij ba n̄an eok, eļan̄n̄e juon em̧m̧aan ej bōk juon kōrā pāleen ilo bujen eo ekāāl im ejjeļo̧k jem̧ļo̧kin, im eļan̄n̄e lio ej pād ippān bar juon em̧m̧aan, im Iaar jab kōmālimi n̄an lio jān ekkapit ekwōjarjar eo, kōrā eo eaar ļōn̄ im enaaj jako.

42 Eļan̄n̄e kōrā eo ej jab pād ilo bujen eo ekāāl im ejjeļo̧k jem̧ļo̧kin, im kōrā eo ej pād ippān bar juon em̧m̧aan, kōrā eo eaar ļōn̄.

43 Im eļan̄n̄e ļeo pāleen lio ej pād ippān bar juon kōrā, im ļeo ekar pād ium̧win juon kanejnej, eaar rupe kanejnej eo an im eaar ļōn̄.

44 Im eļan̄n̄e lio ekar jab ļōn̄, a ejjeļo̧k ruōn im eaar jab rupe kanejnej eo an, im lio ejeļā men in, im Ij kwaļo̧k e n̄an eok, karejera Josep, innām enaaj wōr am̧ kajoor, jān kajoor eo an Priesthood Ekwōjarjar eo Aō, n̄an bōk lio im leļo̧k lio n̄an ļeo eo im eaar jab ļōn̄ a eaar m̧ool; bwe e naaj kairooj e ioon elōn̄.

45 Bwe em̧ōj Aō kar likūt ioom̧ ki ko im kajoor eo an priesthood eo, eo kake Ij kōjepļaaktok aolep men otemjeļo̧k, im kwaļo̧ki n̄an eok aolep men otemjeļo̧k ilo iien eo ekkar.

46 Im em̧ool, em̧ool, Ij ba n̄an eok, bwe jabdewōt kwōj sili ioon laļ enaaj sil ilo lan̄; im jabdewōt kwōj lukwōje ioon laļ, ilo Eta im jān Aō innaan, Irooj ej ba, E enaaj lukwōje indeeo ilo lan̄ ko; im jabdewōt eo im jero̧wiwi ko an kwōj juļo̧k ioon laļ naaj juļo̧ki indeeo ilo lan̄ ko; im jabdewōt eo im jero̧wiwi ko an kwōj dāpij ioon laļ naaj dāpiji ilo lan̄.

47 Im bar juon alen, em̧ool Ij ba, jabdewōt eo kwōj kōjeraam̧m̧ane I naaj kōjeraam̧m̧ane, im jabdewōt kwōj kaliaiki I naaj kaliaiki, Irooj ej ba; bwe N̄a, Irooj, Ij ami Anij.

48 Im bar juon alen, em̧ool Ij ba n̄an eok, karejera Josep, bwe jabdewōt kwōj leļo̧k ioon laļ, im n̄an jabdewōt armej eo kwōj leļo̧k n̄an bar juon ioon laļ, jān Aō innaan im ekkar n̄an kien eo Aō, e naaj loļo̧k kōn kōjeraam̧m̧an ko im jab kalia ko, im kōn Aō kajoor, Irooj ej ba, im naaj ejjeļo̧k liaakeļo̧k e ioon laļ im ilo lan̄.

49 Bwe N̄aij Irooj am̧ Anij, im naaj pād ippam̧ em̧ool n̄an jem̧ļo̧kin laļ, im ilo aolep indeeo; bwe em̧ool Ij sili ioom am̧ mour āinwōt Anij, im kōpooje juon tūroon n̄an eok ilo aelōn̄ eo an Jema, ippān Ebream jemam̧.

50 Lo, em̧ōj Aō kar loi katok ko am, im naaj jeorļo̧k aolep jero̧wiwi ko am; em̧ōj Aō kar loi katok ko am̧ ilo am̧ pokake men eo Iaar jiron̄ eok. Kwōn ilo̧k, kōn menin, im Ij kōm̧m̧ane iaļ eo n̄an am̧ ko, āinwōt Iaar bōke katok eo an Ebream kōn ļeo nejin Aisak.

51 Em̧ool, Ij ba n̄an eok: Juon kien Ij leļo̧k n̄an rikarejera kōrā, Emma Smith, kōrā eo pāleem̧, eo Iaar lewōj n̄an eok, bwe e en bōjrak im jab bōk m̧ōttan men eo me Iaar jiron̄ eok n̄an leļo̧k n̄an e; bwe Iaar kōm̧m̧an e, Irooj ej ba, n̄an mālejjon̄e kom̧ro jim̧or, āinwōt Iaar kōm̧m̧an n̄an Ebream, im bwe In maron̄ bōke juon joortak jān peimiro, jān bujen im katok.

52 Im rikarejera kōrā, Emma Smith, en bōk aolep ro em̧ōj kar liļo̧k n̄an karejera Josep, im ro rejim̧we im erreo Im̧aō; im ro rej jab erreo, im rekar ba rerreo, naaj ko̧kkure er, Irooj Anij ej ba.

53 Bwe N̄aij Irooj am̧ Anij, im kom̧ro naaj pokake Ainikiō; im Ij lewōj n̄an karejera Josep bwe en irooj ioon elōn̄ men ko; bwe e eaar tiljek ioon jet men ko, im jān iien in m̧aanļo̧k I naaj kōkajoor e.

54 Im ij jiron̄ rikarejera kōrā, Emma Smith, n̄an pād wōt im eddāp n̄an karejera Josep, im n̄an ejjeļo̧k bar juon. A eļan̄n̄e liin naaj ban pād wōt ilo kien in naaj ko̧kkure e, Irooj ej ba; bwe N̄aij Irooj am̧ Anij, im naaj ko̧kkure e eļan̄n̄e ej jab pād wōt ilo kien eo Aō.

55 A eļan̄n̄e liin eban pād wōt ilo kien in, innām karejera Josep enaaj kōm̧m̧an aolep men ko otemjeļo̧k n̄an e, em̧ool āinwōt eaar ba; im I naaj kōjeraam̧m̧an e im koorļo̧k e im leļo̧k jān e bukwi alen ilo laļ in, in ro jemān im ro jinen, ro jein im jatin m̧aan im kōrā, m̧ōko im bwidej ko, kōrā pālele ro im ro nejin, im kūrawūn ko in mour indeeo ko ilo laļ ko ejjeļo̧k jem̧ļo̧kier.

56 Im bar juon alen, em̧ool Ij ba, rikarejera kōrā en jeoriļo̧k bōd ko an karejera Josep; innām naaj jeorļo̧k bōd ko an kōrā in, ko me e ekar bōd ņae Eō; im N̄a, Irooj am̧ Anij, I naaj kōjeraam̧m̧an e, im koorļo̧k e, im kōm̧m̧an bwe būruōn en m̧ōņōņō.

57 Im bar juon alen, Ij ba, karejera Josep en jab likūt ļo̧k ijo jikin jān pein, n̄e rikōjdat eo an ab itok im ko̧kkure e; bwe Setan ej kappukot n̄an ko̧kkure; bwe N̄aij Irooj am̧ Anij, im e ej karejera; im lo, im lo, Ij pād ippān, āinwōt Iaar pād ippān Ebream, jemam̧, em̧ool n̄an m̧ae an deļo̧n̄ļo̧k ilo an mour āinwōt Anij im aiboojoj eo an.

58 Kiiō, āinwōt ikijjien kien eo an priesthood eo, ekanooj lōn̄ men ko rej kitbuuji.

59 Em̧ool, eļan̄n̄e juon em̧m̧aan ej kūr jān Jema, āinwōt kar Aron, jān Ainikiō make, im jān ainikien E eo eaar jilkintok Eō, im Iaar kōjeraam̧m̧an e kōn ki ko an kajoor eo an priesthoodin, eļan̄n̄e ej kōm̧m̧an jabdewōt ilo Eta, im ekkar n̄an kien eo Aō im jān Aō innaan, e ban kōm̧m̧an jero̧wiwi, im I naaj rejetake e.

60 Ejjeļo̧k juon, kōn menin, en ņa ruōn Josep; bwe I naaj rejetake e; bwe enaaj kōm̧m̧ane katok eo Ij aikuji jān pein kōn bōd ko an, Irooj ami Anij ej ba.

61 Im bar juon alen, āinwōt ikijjien priesthood eo—eļan̄n̄e jabdewōt em̧m̧aan ej m̧areik juon virgin, im ekōņaan pāleek bar juon, im eo m̧okta ej leļo̧k an errā, im eļan̄n̄e ļeo ej m̧areik eo kein karuo, im rej virgin ro, im rekar jab kanejnej n̄an bar ejjeļo̧k em̧m̧aan, innām e ejim̧we; ej jab maron̄ kōm̧m̧an ļōn̄ kōnke kar leļo̧k er n̄an e; bwe ļeo ej jab maron̄ kōm̧m̧an ļōn̄ kōn men eo ej an im ej jab an bar juon.

62 Im eļan̄n̄e ļeo ewōr jon̄oul an virgin ro leļo̧k n̄an e jān kien in, ej jab maron̄ kōm̧m̧an ļōn̄, bwe er rej an, im kar leļo̧k er n̄an e; kōn menin e ejim̧we.

63 A eļan̄n̄e juon ak jabdewōt ian jon̄oul virgin ro, ālikin an kar pālele, enaaj pād ippān bar juon em̧m̧aan, lio eaar ļōn̄, im naaj ko̧kkure e; bwe kar leļo̧k er n̄an ļeo n̄an wōrļo̧k im koobrak laļ, ekkar n̄an kien eo Aō, im n̄an kakūrm̧ool kallim̧ur eo me kar leļo̧k jān Jema m̧okta jān foundasōn an laļ, im kōn aer mour āinwōt Anij ilo laļ ko ejjeļo̧k jem̧ļo̧kier, bwe ren maron̄ keotak jetōb ko an armej raņ; bwe ilo men in jerbal eo an Jema ej wōnm̧aanļo̧k, bwe E en maron̄ aiboojoj.

64 Im bar juon alen, em̧ool, em̧ool, Ij ba n̄an kom̧, eļan̄n̄e jabdewōt em̧m̧aan ewōr juon kōrā pāleen, eo ej kabwijer ki ko an kajoor in, im e ej katakin lio kien eo an priesthood eo Aō, āinwōt an kitbuuji men kein, innām lio enaaj tōmak im rejetake ļeo, n̄e jaab naaj ko̧kkure lio, Irooj ami Anij ej ba; bwe I naaj ko̧kkure lio; bwe I naaj kōļapļo̧k Eta ioon aolep ro rej bōk im pād wōt ilo kien eo Aō.

65 Kōn menin, e naaj ekkar n̄an kien ilo N̄a, eļan̄n̄e lio ej jab bōke kien in, n̄an an ļeo bōk aolep men ko otemjeļo̧k N̄a, Irooj an Anij, I naaj leļo̧k n̄an e, kōnke lio eaar jab tōmak im rejetake ļeo ekkar n̄an Aō innaan; innām lio ej erom riruprup kien; im ļeo epād ilikin kien eo an Sera, eo eaar rejetake Ebream ekkar n̄an kien eo ke Iaar jiron̄ Ebream n̄an bōk Hegar n̄an pāleen kōrā.

66 Im kiiō, āinwōt ikijjien kien in, em̧ool, em̧ool, Ij ba n̄an eok, I naaj kwaļo̧k eļapļo̧k n̄an eok, tok ālik; kōn menin, en bwe men in n̄an tōre in. Lo, N̄aij Alpa im Omega. Amen.