Ɔfã 137
Enyido-adzehu a wɔdze maa Nkɔnhyɛnyi Joseph Smith, wɔ temple no mu wɔ Kirtland, Ohio, Sanda 21, 1836. Dɛm aber no, nna wɔreyɛ ayɛdze dɛ ahosiesie a wɔdze botu temple no ahyɛ Nyame nsa.
1–6, Nkɔnhyɛnyi no hu no nuabanyin Alvin wɔ celestial ahenman no mu; 7–9, Wɔda ewufo hɔn nkwagye ho nkyerɛkyerɛ edzi kyerɛ; 10, Wɔgye mbofra nyina nkwa wɔ celestial ahenman no mu.
1 Wobuee ɔsorsor kyerɛɛ hɛn, na muhun Nyankopɔn ne celestial ahenman no, nye enyimnyam a ɔwɔ mu no, na dɛ, nna mowɔ honandua mu anaa minnyi mu no, munnkotum akyerɛ.
2 Muhun abow fɛɛfɛw mapã no a dɛm ahenman no mu adzedzifo no bɛhɛn mu no, dza ɔtse dɛ ogyaframee a otwa no ho no;
3 Na Nyankopɔn n’ogyaframee ahengua no so, dza Egya no na Ɔba no tse do no.
4 Muhun ahenman no mu akwan fɛɛfɛw no, dza ɔyɛ dɛ wɔdze sika asam do no.
5 Muhun Egya Adam na Abraham; nye m’egya na me nã; na mo nuabanyin Alvin a nna oewu dadaada no;
6 Na ɔyɛɛ me ahobow dɛ oenya dɛm ahenman no mu bi ayɛ hɔndze, osiandɛ minyim dɛ, ofii wiadze yi mu dadaada ansaana Ewuradze rema ne nsa do dɛ ɔdze roboaboa Israel hɔn ano mber a otsĩa ebien no, na woennuma no so amma bɔnfakyɛ.
7 Dɛm na Ewuradze ne ndze baa mo hɔ dɛ: Hɔn a woewuwu nyina a woennya asɛmpa yi ho nyimdzee no, a sɛ wɔmaa wɔtsenaa ase a, nkyɛ wɔbɛgye no nyina bɛyɛ Nyankopɔn ne celestial ahenman no mu adzedzifo;
8 Hɔn so a wobowu fi ndɛ dze kɔ no, a woennya ho nyimdzee no, a sɛ wonyae a, nkyɛ wɔdze hɔn akoma nyina bɛgye no, bɛyɛ dɛm ahenman no mu adzedzifo;
9 Na Emi, Ewuradze mubobu nyimpa nyina atsɛn dɛ mbrɛ hɔn ndwuma tse, dɛ mbrɛ hɔn akoma ne pɛ tse.
10 Na muhunii so dɛ mbofra nyina a wowu ansaana woedu nkontaabu mfe mu no nya nkwagye wɔ celestial ahenman no mu.