Ɔfã 27
Nyikyerɛ a wɔdze maa Joseph Smith Nkɔnhyɛnyi no wɔ Harmony, Pennsylvania, Dzifuu 1830. Ber a wɔreyɛ ahoboa akɛyɛ Nyamesom nhyiamu no, a wobehyira sacrament paanoo na wenyin na wɔdze akɔ aporɔw no, Joseph sii mu dɛ ɔrokɔtɔ wenyin no. Ɔsomafo bi a ofi sor hyiaa no na onyaa dɛm nyikyerɛ yi, a no mu bi wɔkyerɛɛw no aber no mu na nkaa no so wɔkyerɛɛw no wɔ Fankwa bosoom a ɔtoa do no mu. Seseiara nsu na wɔdze ahyɛ wenyin ananmu dze yɛ sacrament som wɔ Asɔr no mu.
1–4, Wɔkyerɛ ndzɛmba a wɔmfa ndzi sacrament no; 5–14, Christ na No nkowaa a wofi mberano to mberano nyina no bedzi sacrament no; 15–18, Hom nhyɛ Nyame N’akodze no nyina.
1 Hom ntsie Jesus Christ ne ndze, hom Ewuradze, hom Nyankopɔn, na hom Pomfo no, m’asɛm a nkwa na tum wɔ mu.
2 Na, hwɛ, mese hom dɛ, dza hom bedzi anaa dza hom bɔnom ber a hom redzi sacrament no nnhia, sɛ hom dze enyiwa kor wɔ m’enyimnyam nko ho dzi a—na wɔdze kaa Egya no wɔ mo nyimpadua a wɔdze too hɔ maa hom, nye mo bɔgyaa a wokyii wɔ hom bɔnfakyɛ ntsi.
3 Dɛm ntsi, me ma hom mbrasɛm dɛ, mma hom nntɔ hom atamfo hɔn wenyin anaa hɔn nsãdzen biara.
4 Dɛm ntsi, mma hom nnnom bi, gyedɛ dza wɔayɛ no fofor wɔ hom mu; nyew, iyi mu na wɔdze bɛkyekyer m’Egya n’ahenman wɔ asaase yi do.
5 Hwɛ, ɔyɛ nyansadze ma me; dɛm ntsi, mma ɔnnyɛ hom nwanwa, osiandɛ mber no reba a menye hom nye Moroni bɔnom wenyin eduaba wɔ asaase do, mekyerɛ nyia mosomaa no wɔ hom hɔ dɛ ombeyi Mormon Nwoma no a asɛmpa ne mãhyɛ a ɔwɔ hɔ daapem no wɔ mu no nkyerɛ, nyia medze Ephraim no poma ho abakɔsɛm nsaafee ahyɛ ne nsa no;
6 Nye Elias so, a medze ndzɛmba nyinara a nkɔnhyɛfo krɔnkrɔn nyina dze hɔn ano kãe fi wiadze ahyɛse ne nsanananmu a ɔbɛba no ne nsaafee ahyɛ ne nsa no a ɔfa nda a odzi ekyir no;
7 Nye John a ɔyɛ Zacharias ne babanyin no so, dɛm Zacharias nye nyia ɔno (Elias) kɛseraa no na ɔbɔɔ no anohoba dɛ obenya babanyin, na ne dzin wɔ dɛ ɔyɛ no John, na Elias no sunsum bɛhyɛ no mã;
8 Dɛm John no na mosomaa no wɔ hom mo nkowaa, Joseph Smith, Kakraba, nye Oliver Cowdery, hɔ no dɛ ɔmbɛhyɛ hom asɔfo, wɔ asɔfodzi a odzi kan no a hom nsa akã no, ama woeetum afrɛ hom ahyɛ hom asɔfo tse dɛ Aaron mpo;
9 Nye Elijah so a medze tum ho nsaafee no a ɔbɛdan egyanom hɔn akoma aba mba do, na mba so hɔn akoma aba egyanom do no ahyɛ ne nsa no, amma wɔammfa ndom ammbɔbɔ asaase nyina;
10 Nye hom egyanom Joseph, na Jacob, na Isaac, na Abraham so, hɔn na anohoba no gyina hɔn do;
11 Nye Michael, anaa Adam so, nyimpa nyina hɔn egya, adasa nyina hɔn henbabanyin, a ne nda fir tsetse no;
12 Nye Peter, na James, na John so, hɔn na masoma wɔ hom nkyɛn no, menam hɔn do hyɛɛ hom asɔfo na misii hom pi dɛ hom mbɛyɛ asomafo, na me dzin ho adasefo soronko, na hom nsuo hom somdwuma ho nsaafee nye ndzɛmba kor noara a meyi akyerɛ hɔn no mu;
13 Hom a medze m’ahenman ho nsaafee nye asɛmpa ne mberano no ho dwumadzi wɔ mber a odzi ekyir yi mu ahyɛ hom nsa; na mber ne mãhyɛ mu a mobɔboa ndzɛmba nyinara ano kor dza ɔwɔ sor nye asaase do no;
14 Nye hɔn nyinara so a m’Egya eyi hɔn efi wiadze ama me no.
15 Dɛm ntsi, hom mma hom akoma do na hom ndzi dɛw, na hom mbɔ hom asen do, na hom mfa m’akodze nyina, ama hom eetum egyina wɔ da bɔn no mu, na sɛ hom wie ne nyina yɛ a, hom eetum egyina.
16 Dɛm ntsi, hom nsoɛr ngyina, hom mfa nokwar no mbɔ hom asen, na hom nhyɛ tsenenee akatabo no, na hom mfa asomdwee asɛmpa no ho ahosiesie nhyehyɛ hom anan a masoma m’abɔfoe dɛ wɔmfa nhyɛ hom nsa no;
17 Hom nkura gyedzi akokyɛm no na ɔno na hom botum dze edum emumuyɛfo hɔn ogya egyen-menaba nyina;
18 Hom mfa nkwagye dadzekyɛw, nye mo Sunsum nkrantsee no a mubohue egu hom do no, nye m’asɛm a mibeyi akyerɛ hom no, na hom nyɛ adwen kor wɔ ndzɛmba nyina a hom bebisa me no ho, na hom ndzi nokwar nkesi dɛ mebɛba, na wobohwim hom akɔ sor, na bea a metse no, hom so hom bɛtsena hɔ. Amen.