ພາກທີ 57
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ໃນຊີໂອນ, ເຂດແຈ໊ກສັນ, ລັດມີເຊີຣີ, ວັນທີ 20 ເດືອນກໍລະກົດ, 1831. ເພື່ອເຮັດໃຫ້ເປັນໄປຕາມພຣະບັນຊາຂອງພຣະຜູ້ເປັນເຈົ້າ ເພື່ອໃຫ້ເດີນທາງໄປຫາລັດມີເຊີຣີ ບ່ອນທີ່ພຣະອົງຈະເປີດເຜີຍ “ແຜ່ນດິນມູນມໍລະດົກຂອງພວກເຈົ້າ” (ພາກທີ 52), ພວກແອວເດີຈຶ່ງໄດ້ເດີນທາງຈາກລັດໂອໄຮໂອ ໄປຫາຊາຍແດນພາກຕາເວັນຕົກຂອງລັດມີເຊີຣີ. ໂຈເຊັບ ສະມິດ ໄດ້ ໄຕ່ຕອງກ່ຽວກັບສະພາບການຂອງຊາວເລມັນ ແລະ ສົງໄສວ່າ: “ເມື່ອໃດນໍຖິ່ນແຫ້ງແລ້ງກັນດານຈະບານສະພັ່ງເໝືອນດັ່ງດອກກຸຫລາບ? ເມື່ອໃດນໍຊີໂອນຈຶ່ງຈະຖືກສ້າງຂຶ້ນໃນລັດສະໝີພາບຂອງມັນ, ແລະ ບ່ອນໃດນໍພຣະວິຫານຂອງພຣະອົງຈະຕັ້ງຢູ່ ຊຶ່ງປະຊາຊາດທັງປວງຈະມາຫາໃນຍຸກສຸດທ້າຍ?” ໃນເວລາຕໍ່ມາເພິ່ນໄດ້ຮັບການເປີດເຜີຍນີ້.
1–3, ເມືອງອິນດີເພັນເດັນສ໌, ລັດມີເຊີຣີ, ເປັນສະຖານທີ່ສຳລັບເມືອງຊີໂອນ ແລະ ພຣະວິຫານ; 4–7, ໄພ່ພົນຂອງພຣະເຈົ້າຕ້ອງຊື້ທີ່ດິນ ແລະ ຮັບມູນມໍລະດົກໃນເຂດນັ້ນ; 8–16, ຊິດນີ ກຽວເບີດ ຕ້ອງຈັດຕັ້ງຮ້ານຄ້າ, ວິວລຽມ ດັບເບິນຢູ ແຟ້ວສ໌ ຕ້ອງເປັນຜູ້ພິມ, ແລະ ອໍລີເວີ ຄາວເດີຣີ ຕ້ອງແກ້ໄຂຕົ້ນສະບັບເພື່ອພິມ.
1 ຈົ່ງເຊື່ອຟັງ, ໂອ້ ພວກເຈົ້າແອວເດີຂອງສາດສະໜາຈັກຂອງເຮົາ, ພຣະຜູ້ເປັນເຈົ້າອົງເປັນພຣະເຈົ້າຂອງພວກເຈົ້າໄດ້ກ່າວ, ຜູ້ໄດ້ມາຮ່ວມຊຸມນຸມນຳກັນ, ຕາມບັນຍັດຂອງເຮົາ, ໃນແຜ່ນດິນນີ້, ຊຶ່ງເປັນແຜ່ນດິນ ມີເຊີຣີ, ຊຶ່ງເປັນ ແຜ່ນດິນທີ່ເຮົາໄດ້ກຳນົດ ແລະ ອຸທິດໄວ້ສຳລັບ ການເຕົ້າໂຮມຂອງໄພ່ພົນຂອງພຣະເຈົ້າ.
2 ດັ່ງນັ້ນ, ນີ້ຄືແຜ່ນດິນແຫ່ງຄຳສັນຍາ, ແລະ ສະຖານທີ່ສຳລັບເມືອງ ຊີໂອນ.
3 ແລະ ພຣະຜູ້ເປັນເຈົ້າອົງເປັນພຣະເຈົ້າຂອງພວກເຈົ້າໄດ້ກ່າວດັ່ງນີ້, ຖ້າຫາກພວກເຈົ້າຈະໄດ້ຮັບປັນຍາ ນີ້ຄືປັນຍາ. ຈົ່ງເບິ່ງ, ບ່ອນຊຶ່ງຕອນນີ້ເອີ້ນວ່າເມືອງອິນດີເພັນເດັນສ໌ ຄືສະຖານທີ່ສູນກາງ; ແລະ ບ່ອນສຳລັບ ພຣະວິຫານທີ່ຈະຕັ້ງຢູ່ ແມ່ນຢູ່ທາງຕາເວັນຕົກ, ຊຶ່ງເປັນດິນຕອນທີ່ບໍ່ຢູ່ໄກຈາກຕຶກສານ.
4 ດັ່ງນັ້ນ, ມັນເປັນຄວາມສະຫລຽວສະຫລາດທີ່ຈະໃຫ້ໄພ່ພົນຂອງພຣະເຈົ້າ ຊື້ທີ່ດິນ, ແລະ ທີ່ດິນທຸກຕອນຢູ່ທາງຕາເວັນຕົກນຳອີກ, ແມ່ນແຕ່ຈົນເຖິງເສັ້ນແບ່ງເຂດລະຫວ່າງ ຊາວຢິວ ແລະ ຄົນຕ່າງຊາດ;
5 ແລະ ທີ່ດິນທຸກຕອນທີ່ຢູ່ໃກ້ທົ່ງຫຍ້ານຳອີກ, ຕາບໃດທີ່ສານຸສິດຂອງເຮົາສາມາດ ຊື້ທີ່ດິນເຫລົ່ານັ້ນ. ຈົ່ງເບິ່ງ, ນີ້ຄືປັນຍາ, ເພື່ອພວກເຂົາຈະ ໄດ້ຮັບມັນເປັນມູນມໍລະດົກອັນເປັນນິດ.
6 ແລະ ໃຫ້ຜູ້ຮັບໃຊ້ຂອງເຮົາ ຊິດນີ ກຽວເບີດ ຢູ່ໃນຕຳແໜ່ງຊຶ່ງເຮົາໄດ້ກຳນົດໃຫ້ລາວ, ເພື່ອຮັບເງິນ, ເພື່ອ ເປັນຕົວແທນໃຫ້ແກ່ສາດສະໜາຈັກ, ເພື່ອຊື້ທີ່ດິນໃນພາກພື້ນຕ່າງໆທີ່ອ້ອມຮອບນັ້ນ, ຕາບໃດທີ່ສາມາດເຮັດໄດ້ໃນຄວາມຊອບທຳ, ແລະ ຕາມທີ່ປັນຍາຈະຊັກນຳ.
7 ແລະ ໃຫ້ຜູ້ຮັບໃຊ້ຂອງເຮົາ ເອດເວີດ ພາດທຣິດ ຢູ່ໃນຕຳແໜ່ງຊຶ່ງເຮົາໄດ້ກຳນົດໃຫ້ລາວ, ແລະ ແບ່ງປັນ ມູນມໍລະດົກໃຫ້ແກ່ໄພ່ພົນຂອງພຣະເຈົ້າ, ແມ່ນແຕ່ຕາມທີ່ເຮົາໄດ້ບັນຊາ; ແລະ ຄົນເຫລົ່ານັ້ນຜູ້ຊຶ່ງລາວໄດ້ກຳນົດໃຫ້ຊ່ວຍເຫລືອລາວນຳອີກ.
8 ແລະ ອີກເທື່ອໜຶ່ງ, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ໃຫ້ຜູ້ຮັບໃຊ້ຂອງເຮົາ ຊິດນີ ກຽວເບີດ ຕັ້ງຖິ່ນຖານຢູ່ບ່ອນນີ້, ແລະ ຕັ້ງຮ້ານຄ້າ, ເພື່ອວ່າລາວຈະໄດ້ຂາຍສິນຄ້າໂດຍບໍ່ມີການສໍ້ໂກງ, ເພື່ອວ່າລາວ ຈະໄດ້ເງິນໄປຊື້ທີ່ດິນເພື່ອຜົນປະໂຫຍດຂອງໄພ່ພົນຂອງພຣະເຈົ້າ, ແລະ ເພື່ອວ່າລາວຈະໄດ້ສິ່ງໃດກໍຕາມທີ່ສານຸສິດອາດຕ້ອງການເພື່ອຊ່ວຍເຫລືອພວກເຂົາຕັ້ງຖິ່ນຖານຢູ່ໃນບ່ອນທີ່ເປັນມູນມໍລະດົກຂອງພວກເຂົາ.
9 ແລະ ໃຫ້ຜູ້ຮັບໃຊ້ຂອງເຮົາ ຊິດນີ ກຽວເບີດ ຂໍເອົາໃບອະນຸຍາດນຳອີກ—ຈົ່ງເບິ່ງ ນີ້ຄືປັນຍາ, ແລະ ຜູ້ໃດກໍຕາມທີ່ອ່ານ ກໍໃຫ້ເຂົາເຂົ້າໃຈ—ເພື່ອລາວຈະສົ່ງສິນຄ້າໃຫ້ຜູ້ຄົນນຳອີກ, ແມ່ນແຕ່ໂດຍຜູ້ທີ່ລາວປະສົງ ຊຶ່ງເປັນພະນັກງານທີ່ຈ້າງໃຫ້ມາຊ່ວຍເຫລືອລາວ;
10 ແລະ ຈັດຫາໃຫ້ໄພ່ພົນຂອງເຮົາດັ່ງນັ້ນ, ເພື່ອວ່າພຣະກິດຕິຄຸນຂອງເຮົາຈະຖືກສັ່ງສອນໃຫ້ແກ່ຄົນເຫລົ່ານັ້ນທີ່ນັ່ງຢູ່ໃນ ຄວາມມືດ ແລະ ໃນພາກພື້ນ ແລະ ເງົາແຫ່ງຄວາມຕາຍ.
11 ແລະ ອີກເທື່ອໜຶ່ງ, ຕາມຄວາມຈິງແລ້ວ ເຮົາກ່າວກັບພວກເຈົ້າວ່າ ໃຫ້ຜູ້ຮັບໃຊ້ຂອງເຮົາ ວິວລຽມ ດັບເບິນຢູ ແຟ້ວສ໌ ຕັ້ງຖິ່ນຖານຢູ່ໃນບ່ອນນີ້, ແລະ ຕັ້ງໃຫ້ເປັນ ຜູ້ພິມໃຫ້ສາດສະໜາຈັກ.
12 ແລະ ເບິ່ງແມ, ຖ້າຫາກໂລກຮັບເອົາການຂຽນຂອງລາວ—ຈົ່ງເບິ່ງ ນີ້ຄືປັນຍາ—ໃຫ້ລາວໄດ້ສິ່ງໃດກໍຕາມທີ່ລາວສາມາດໄດ້ມາໃນຄວາມຊອບທຳ, ເພື່ອຜົນປະໂຫຍດຂອງໄພ່ພົນຂອງພຣະເຈົ້າ.
13 ແລະ ໃຫ້ຜູ້ຮັບໃຊ້ຂອງເຮົາ ອໍລີເວີ ຄາວເດີຣີ ຊ່ວຍເຫລືອລາວ, ແມ່ນແຕ່ຕາມທີ່ເຮົາໄດ້ບັນຊາ, ໃນບ່ອນໃດກໍຕາມທີ່ເຮົາຈະກຳນົດໃຫ້ລາວ, ທີ່ຈະອັດສຳເນົາ, ແລະ ທີ່ຈະແກ້ໄຂ, ແລະ ເລືອກ, ເພື່ອວ່າທຸກສິ່ງຈະຖືກຕ້ອງຢູ່ຕໍ່ໜ້າເຮົາ, ຕາມທີ່ພຣະວິນຍານຈະພິສູດຜ່ານລາວ.
14 ແລະ ດັ່ງນັ້ນ ໃຫ້ຄົນເຫລົ່ານັ້ນທີ່ເຮົາກ່າວເຖິງຕັ້ງຖິ່ນຖານຢູ່ໃນແຜ່ນດິນຊີໂອນ, ໃຫ້ໄວເທົ່າທີ່ຈະສາມາດເຮັດໄດ້, ນຳຄອບຄົວຂອງພວກເຂົາ, ເພື່ອເຮັດສິ່ງເຫລົ່ານັ້ນແມ່ນແຕ່ເໝືອນດັ່ງທີ່ເຮົາໄດ້ກ່າວໄວ້.
15 ແລະ ບັດນີ້ ກ່ຽວກັບການເຕົ້າໂຮມ—ໃຫ້ອະທິການ ແລະ ຕົວແທນຕຽມພ້ອມສຳລັບຄອບຄົວເຫລົ່ານັ້ນ ຊຶ່ງຖືກບັນຊາໃຫ້ມາຫາແຜ່ນດິນນີ້, ໃຫ້ໄວເທົ່າທີ່ຈະສາມາດເຮັດໄດ້, ແລະ ຕັ້ງຖິ່ນຖານຢູ່ໃນບ່ອນທີ່ເປັນມູນມໍລະດົກຂອງພວກເຂົາ.
16 ແລະ ສຳລັບຜູ້ທີ່ເຫລືອຢູ່ທັງແອວເດີ ແລະ ສະມາຊິກ ຈະໄດ້ຮັບຄຳແນະນຳເພີ່ມເຕີມໃນພາຍລັງ. ແມ່ນເປັນດັ່ງນັ້ນ. ອາແມນ.