1 Kakauongo, O ngkami karawa, ao anga taningami, O aonaba, ao kimwareirei ngkami kaaina, bwa te Uea bon te Atua, ao akea riki te Tia Kamaiu i rarikina.

2 E korakora wanawanana, a kamimi ana kawai, ao akea ae kona n ataa korakoran ana mwakuri.

3 A aki bwaka ana baire, ao akea te aomata temanna ae kona ni katoka baina.

4 Man akea tokina nakon akea tokina bon titebo ngaia, ao akea tokin ana ririki.

5 Bwa e taku te Uea—Ngai, te Uea, I nanoanga ao n akoi nakoia naake a makai, ao ni kukurei ni karineia naake a beku irou n te raoiroi ao n te koaua ni karokoa te toki.

6 E na korakora kanuangaia ao e na akea tokin mimitongiia.

7 Ao nakoia N na kaoti ni kabane mwakuri aika raba, eng, ni kabane taian mwakuri aika raba n abanueau man boong ake ngkoa, ao ibukin ririki aika a na roko, N na kaoti nakoia oin nanou are atataiaomata ni kaineti ma bwaai ni kabane aika kaineti nakon abanueau.

8 Eng, a na atai naba kamiimi aika akea tokina, ao N na kaoti nakoia bwaai aika a na roko, bwaai naba ibukin roro aika mwaiti.

9 Ao e na korakora wanawanaia, ao e roota karawa ootaia; ao a na mauna wanawanaia ake a wanawana i mataia, ao e na akea bonganan ootaia ake a wanawana.

10 Bwa man Tamneiu N na kaotaia, ao N na kaota nakoia au kantaninga aika raba man mwaakau—eng, bwaai naba akekei are e tuai nooria te mata, ke n ongo te taninga, ao ake a tuai n rin i nanon te aomata.

11 Ngaira, Iotebwa Timiti te Ataei ao Sidney Rigdon, i aan ana kairiiri te Tamnei n te katebwii ma onoua ni bong ni Beberuare, n ana ririki ara Uea ae teuana te ngaa wanibubua ao tenibwi ma uoua—

12 Man mwaakan te Tamnei a kaureaki matara ao a kaotaaki ootara, bwa ti aonga ni kona n noora ao n oota n ana bwai nako te Atua—

13 Ae bwaai akekei naba ake man te moan i mwaain rikin te aonaba, ake a baireaki iroun te Tama, rinanon Natina ae te Rikitemanna, are e mena ni banibanin te Tama, man te moan;

14 Ae ngaia ae ti kaota koauana; ao te rongorongo ae ti kaotia bon bwaninin ana euangkerio Iesu Kristo, are bon te Nati, are ti nooria ao ti maroro ma ngaia n te mii ni burabeti mai karawa.

15 Bwa ngke ti karaoa te mwakuri n rairairi, are e a tia n rineira te Uea nako iai, ti roko n te kauabwi ma ruaia ni kibu n te kanimaua ni mwakoro ni Ioane, are e kaotaki nakoira n aron aei—

16 Are e taekina mangautiia maate, ni kaineti nakoia naake a na ongo bwanaan Natin te Aomata:

17 Ao a na oti nako; naake a tia ni karaoa ae raoiroi, ni mangautiia naake a raoiroi; ao naake a tia ni karaoa ae buakaka, n aia mangauti naake aki raoiroi.

18 Ngkai aio ae e karikiira bwa ti na mimi iai, bwa e kaotaki nakoira iroun te Tamnei.

19 Ao ngke ti iangoi raoi bwaai aikai, e ringa matan ootara te Uea ao a kaukaki, ao e oota nako mimitongin te Uea i rarikira.

20 Ao ti noora mimitongin te Nati, i angatain te Tama, ao ni karekea bwanininna ao mimitongina;

21 Ao n nooriia anera aika tabu, ao naake a itiaki i matan ana kaintokanuea, n taromauria te Atua, ao te Tiibu te Teei, ake a tauromauria n aki tootoki.

22 Ao ngkai, i mwin taian kakoaua aika mwaiti ake a kaotaki ibukina, aio te kabanea ni kakoaua ngkai, ae ti kaotia ibukina: Bwa e maiu!

23 Bwa ti nooria, n angatain te Atua; ao ti ongo te bwana ae kaota koauana bwa ngaia te Rikitemanna iroun te Tama—

24 Bwa mai irouna, ao rinanona, ao irouna, iai aonaba ao a karikaki, ao kaaina bon naati mwaane ao aine aika a manga bungiaki nakon te Atua.

25 Ao ti noora naba aei, ao ni kaota koauana, bwa ana anera te Atua are iai irouna te kariaiakaki i matan te Atua, are e kaitara te Nati ae te Rikitemanna ae e tangiraki iroun te Tama ao are e mena ni banibanin te Tama, e teweaki nako mai matan te Atua ao te Nati,

26 Ao e aranaki bwa Betetion, bwa e tang karawa i aona—bon Rutibero, ae natin te ingabong.

27 Ao ti nooria, ao taraia, e a bwaka! e a bwaka, ae natin te ingabong!

28 Ao ngke ti bon mena naba i aan ana kairiri te Tamnei, e tuangiira te Uea bwa ti na korea te mii ni burabeti aei; bwa ti noora Tatan, te naeta ni kawai, are te riaboro, are e kaitara te Atua, ao n ukoukora anakin abanuean Atuara ao ana Kristo—

29 Ngaia are, e karaoa te buaka ma ana aomata te Atua aika itiaki, ao n otabwaninia.

30 Ao ti noora te mii ni burabeti ae karawawatakakiia naake e buakaniia ao n tokanikai i aoia, bwa e roko bwanaan te Uea nakoira:

31 E taku te Uea ni kaineti ma ni kabane naake a ata mwakau, ao n tia ni katoongnga, ao a kariaira rinanon mwaakan te riaboro bwa e na tokanikai i aoia, ao ni kakewea te koaua ao ni kaitara mwaakau—

32 Ngaiia bon naake natin betetion, are I taekinna bwa e raoiroi riki ibukiia ngke a aki bungiaki;

33 Bwa ngaiia nnen te un, ake a katuaeaki bwa a na karawawataki n unin te Atua, ma te riaboro ao ana anera n te tai are akea tokina.

34 Ni kaineti ma ngaiia are I a tia n taekinna bwa akea kabwaraan aia bure n te aonaba aei ke n te aonaba ae e na roko—

35 Ibukin ae a kaakea te Tamnei ae Tabu i mwin are a tia ni karekea, ao ibukin ae a kaakea te Nati ae te Rikitemanna iroun te Tama, ibukin ae a tia n tauria i bon irouia ao ni kamaemaea i mataia aomata.

36 Aikai naake a na nako nakon te nei n ai ao te burimton, ma te riaboro ao ana anera—

37 Ao tii ngaiia ae e na roko mwaakan te kauoua ni mate i aoia;

38 Eng, e koaua, tii ngaiia ake a na aki kabooaki n oin ana tai te Uea, i mwin karawawatakiia n unna.

39 Bwa ni kabane nikiraia a na kautaki ni mangautiia maate, rinanon tokanikain ao mimitongin te Tiibu te Teei, are e kamateaki, are e mena ni bwanibwanin te Tama i mwain karikan te aonaba.

40 Ao bon aio te euangkerio, rongorongo aika kakukurei, are te bwana mai karawa e kaota koauana nakoira—

41 Bwa e roko nakon te aonaba, ae Iesu, bwa e na tauraki ibukin te aonaba, ao ni uoti buren te aonaba, ao ni katabua te aonaba, ao ni kaitiakia man taian buakaka ni kabane;

42 Bwa rinanona a na kamaiuaki ni kabane ake e katukuia te Tama i aan mwaakana ao a karikaki irouna;

43 Are e kamimitonga te Tama, ao ni kamaiui ni kabane ana mwakuri baina, ma tii naake natin betetion ake a kaakea te Nati i mwin are e kaotia te Tama.

44 Mangaia are, e kamaiuiia ni kabane ma tiaki ngaiia—a na nakon te katuaeaki ae aki totoki, are te katuaeaki ae e aki kona n toki, ae te katuaeaki ae akea tokina, n tautaeka ma te riaboro ao ana anera n te tai are akea tokina, ike e aki mate inoia iai, ao te ai ae e aki mamate, are bon kammarakakiia—

45 Ao tokiia, ke aia tabo, ke kammarakakiia, akea te aomata ae e ataia;

46 E aki kaotaki ngkoa, ke ni kaotaki ngkai, ke e na bon aki kaotaki nakoia aomata, ma tii nakoia ake a riki bwa taan katoongnga;

47 E ngae n anne, Ngai, te Uea, I kaotia n te mii ni burabeti nakoia aika mwaiti, ma ni waekoa ni manga katokia;

48 Mangaia are, tokina, rababana, rietana, nanona, ao te karawaawata are iai, a aki oota iai, akea naba te aomata ma tii naake a rineaki nakon te kabuakakaaki aei.

49 Ao ti ongo te bwana, ae kangai: Korea te mii ni burabeti, bwa taraia, aio tokin te mii ni burabeti ibukin karawawatakia ake a buakaka.

50 Ao ti manga kaota koauana riki—bwa ti nooria ao ti ongo, ao aio bon te kakoaua ibukin ana euangkerio Kristo ibukiia ake a na roko ni mangautiia ake a raoiroi—

51 Ngaiia ake a karekea te koaua ibukin Iesu, ao ni kakoauaa arana ao ni bwabetitoaki ni katootongan taunakina, n taunaki n te ran n arana, ao aio ni kaineti ma te tua are e a tia n anga—

52 Bwa man kawakinan tuua a na kona n tebokaki ao ni kaitiakaki man aia bure ni kabane, ao ni karekea te Tamnei ae Tabu man te katoka bai iroun are e katabuaki ao ni kabaeaki nakon te mwaaka aei;

53 Ao naake a tokanikai n te onimaki, ao ni kabaeaki iroun te Tamnei ae Tabu n te berita, are e kanakoa te Tama nako aoia ni kabane ake a raoiroi ao a koaua.

54 Ngaiia ake ana ekaretia te Karimoa n Nati.

55 Ngaiia ake e anga nako nanoni baia te Tama bwaai ni kabane—

56 Ngaiia ake tenaan ibonga ao uea, ake a tia ni karekea bwanininna, ao mimitongina;

57 Ao ngaiia ana ibonga Teuare Moan te Rietata, n aron ana karinan Merekitereka, n aron ana karinan Enoka, are bon aron ana karinan te Nati ae te Rikitemanna.

58 Mangaia are, n aron ae e koreaki, bon ngaiia tenaan atua, aika natin te Atua—

59 Mangaia are, bon aia bwai bwaai ni kabane, n te maiu ke n te mate, ke bwaai aika ngkai naba, ke bwaai aika a na roko, ni kabane bon aia bwai ao bon ngaia ana bwai Kristo, ao Kristo bon ana bwai te Atua.

60 Ao a na tokanikai i aon bwaai ni kabane.

61 Mangaia are, akea te aomata temanna ae e na kamoamoa iroun te aomata, ma e na riai ni kamoamoa iroun te Atua, are e na kaaki ana kairiribai ni kabane i aani waena.

62 Aikai a na maeka imatan te Atua ao ana Kristo n aki tootoki.

63 Aikai naake e na uotiia ma ngaia, ngkana e roko n nangin karawa n tautaeka i aon te aonaba i aoia ana aomata.

64 Aikai naake a na iai nneia n te moan mangauti.

65 Aikai naake a na roko ni mangautiia ake a raoiroi.

66 Aikai naake a na roko nakon te Maunga are Tion, ao nakon ana kaawa te Atua ae maiu, te tabo i karawa, ae moanibaan te tabu.

67 Aikai naake a tia n roko n te koraki n anera ae e aki kona ni warekaki mwaitia, nakon te botaki ae tabangaki ao ana ekaretia Enoka, ao te Karimoa n Nati.

68 Aikai naake a koreaki araia i karawa, ike te Atua ao Kristo bon taan motiki taekaia ni kabane.

69 Aikai naake bon aomata aika raoiroi ake a karaoaki bwa a na kakororaoaki rinanon Iesu te tia raoi n te berita ae boou, are e kakoroa bukin te mwakuri ni kamaiu ae kororaoi aei rinanon waanakon oin raraana.

70 Aikai naake rabwataia e tiretio, are mimitongiia ai aron taai, ae mimitongin te Atua, te kabanea n rietata i buakoia, are e koreaki bwa mimitongina aekan ootan taai i annang.

71 Ao ti a manga noora te aonaba ae te teretirio, ao nooria ao taraia, aikai naake kaain te teretirio, are mimitongiia e kaokoro ma are mimitongin ana ekaretia te Karimoa n Nati are a tia ni karekea bwaninin te Tama, n aron ae namwakaina e kaokoro ma taai i annang.

72 Nooria, aikai naake a mate n akea te tua;

73 Ao ngaiia naba are tamneia aomata ake a kawakinaki n te umwa ni kaikain, are a kawaraki iroun te Nati, ao e tataekina te euangkerio nakoia, bwa a aonga ni kona ni motikaki taekaia n ai aroia aomata n rabwataia;

74 Are a aki karekea te koaua ibukin Iesu n te rabwata, ma a karekea i mwina.

75 Aikai naake bon aomata aika kakannato n te aonaba, ake a kamatakiiaki n aia kamwamwane aomata.

76 Aikai naake a karekea mimitongina, ma tiaki bwaninina.

77 Aikai naake a kawaraki iroun te Nati, ma tiaki bwaninin te Tama.

78 Mangaia are, ngaiia rabwata aika teretirio, ao tiaki rabwata aika tiretio, ao a kaokoro mimitongiia n aron namwakaina ae e kaokoro ma taai.

79 Aika naake aki kakaonimaki n te koaua ibukin Iesu; ngaia are, a aki karekea te baunuea i aon abanuean Atuara.

80 Ao ngkai aio tokin te mii ni burabeti are ti nooria ibukin te aonaba ae te teretirio, bwa e tuangiira te Uea bwa ti na koreia ngkai ti mena i aan ana kairiiri te Tamnei.

81 Ao ti a manga noora mimitongin te teretio, are mimitongina ae e uarereke riki, n aron mimitongin itoi a kaokoro ma mimitongin namwakaina i annang.

82 Aikai naake a aki butimwaea ana euangkerio Kristo, ke te koaua ibukin Iesu.

83 Aikai naake aki kaakea te Tamnei ae Tabu.

84 Aikai naake a karenakoaki nako moone.

85 Aikai naake a na aki kabooaki mai iroun te riaboro ni karokoa te kabanea ni mangauti, ni karokoa e tia ana mwakuri te Uea, ae Kristo ae te Tiibu te Teei.

86 Aikai naake a na aki karekea bwanininna n te aonaba ae akea tokina, ma te Tamnei ae Tabu rinanon te mwakuri ni ibuobuoki n te teretirio;

87 Ao te teretirio rinanon te mwakuri ni ibuobuoki n te tiretio.

88 Ao te teretio naba e karekea man aia mwakuri ni ibuobuoki anera ake a rineaki bwa a na ibuobuoki ibukiia, ke a rineaki bwa tamnei ni ibuobuoki ibukiia; bwa a na karekea te kamaiuaki.

89 Ao ti nooria, n te mi ni burabeti mai karawa, mimitongin te teretio, are e riaon aia atatai aomata;

90 Ao akea te aomata ae e ataia ma tii teuare e tia ni kaotia nakoina te Atua.

91 Ao ti noora mimitongin te teretirio ae riao ni bwaai ni kabane nakon mimitongin te teretio, n te mimitong, ao n te mwaaka, ao n te korakora, ao n ueana.

92 Ao ti noora mimitongin te tiretio, ae rianako ni bwaai ni kabane—ike te Atua, are te Tama, e tautaeka i aon ana kaintokanuea n aki tootoki;

93 I matan ana kaintokanuea bwaai ni kabane a boobaraaki ma te karinerine ae mangori, ao n anganna te mimitong n aki tootoki.

94 Naake a maeka imatana bon ana ekaretia te Karimoa n Nati; ao a nooria n aron ae a nooria, ao n ataia n aron ae a ataia, n tia ni karekea bwanininna ao ana akoi;

95 Ao e katitebooia n te mwaaka, ao n te korakora, ao n ueaia.

96 Ao mimitongin te tiretio bon tii teuana, n aron mimitongin taai ae tii teuana.

97 Ao mimitongin te teretirio bon tii teuana, n aron mimitongin namwakaina ae tii teuana.

98 Ao mimitongin te teretio bon tii teuana, n aron mimitongin itoi ae tii teuana; bwa teuana te itoi e kaokoro ma te itoi teuana ni mimitongiia, n aron ae e kaokoro temanna ma are temanna ni mimitongiia n te aonaba ae teretio;

99 Bwa aikai naake mai iroun Bauro, ao mai iroun Aboro, ao mai iroun Keba.

100 Aikai naake a taku bwa tabeman mai iroun temanna ao tabeman iroun are temanna—tabeman mai iroun Kristo ao tabeman mai iroun Ioane, ao tabeman mai iroun Mote, ao tabeman mai iroun Eriati, ao tabeman mai iroun Etaiati, ao tabeman mai iroun Itaia, ao tabeman mai iroun Enoka;

101 Ma a aki karekea te euangkerio, ke te koaua ibukin Iesu, ke taian burabeti, ke te berita ae tabu ae akea tokina.

102 Te kabanea, aikai naake a na aki ikotaki ma aomata aika itiaki, ni uotaki rake nakon ana ekaretia te Karimoa n Nati, ao ni butimwaeaki n te nang.

103 Aikai naake taan kewe, ao taan tabunea, ao taan wenenibure, ao kabekaau, ao ane e tangira ao e karaoa te kewe.

104 Aikai naake a karawawataaki n unin te Atua i aon te aonaba.

105 Aikai naake a rinanon te rekenikai n te ai ae akea tokina.

106 Aikai naake a teweakinako nako moone ao n rinanon unin te Atua ae Moan te Mwaaka, ni karokoa koron bongina, ngkana Kristo e na kaaki ana kairiribai ni kabane i aani waena, ao ni kakororaoa ana mwakuri;

107 Ngkana e na anga te abanuea ae akea barekana, ao n angan te Tama, ni kangai: I a tia n tokanikai ao n toutoua nnen kamantan kurebe n tii Ngai, ae nnen kamantan kurebe ae kakamakun unin te Atua ae Moan te Mwaaka.

108 Ngkanne e na baunaki ni baunuean mimitongina, n tekateka i aon kaintokanuean mwaakana n tautaeka n aki tootoki.

109 Ma nooria, ao taraia, ti noora mimitongin ao kaain te aonaba ae teretio, bwa e aki kona ni warekaki n aron itoi i annang i karawa, ke n aron te tano i mataniwin te aba;

110 Ao n ongo bwanaan te Uea ae kangai: Aikai a na bane ni katorobubua bubuaniwaeia, ao ni kabane neewe a na kaota aia bure nakon teuare e tekateka i aon te kaintokanuea n aki tootoki;

111 Bwa a na motikaki taekaia n aron aia mwakuri, ao ni kabane aomata a na karekea n aron oin ana mwakuri, oin ana tautaeka, n taian nne ni maeka are a katauraoaki;

112 Ao a na riki bwa ana toro are Moan te Rietata; ma a aki kona n roko n te tabo are a maeka iai te Atua ao Kristo, n aonaba ae akea tokiia.

113 Aio tokin te mii ni burabeti are ti nooria, are ti tuangaki bwa ti na koreia ngke ti mena i aan ana kairiiri te Tamnei.

114 Ma a korakora ma ni kamimi ana mwakuri te Uea, ao mwakuri aika raba n abanueana are e kaotia nakoira, are e riaon atatai ni kabane n te mimitong, ao n te korakora, ao n te tautaeka;

115 Are e tuangiira bwa ti na aki koreia ngke ti mena i aan ana kairiiri te Tamnei, ao aki kairiaiakaki aomata n taekinii;

116 Akea naba te aomata ae kona ni kaotii, bwa a na tii nooraki ao n ataaki man mwaakan te Tamnei ae Tabu, are e kaaki te Atua i aoia naake a tangiria, ao a kaitiakiia i matana;

117 Nakoia ake e anganiia te tibwanga aei n nooria ao n ataia i bon irouia;

118 Bwa rinanon te mwaaka ao ana kaotioti te Tamnei, ngkai a maiu n rabwata, a na kona n tei imatana n te aonaba ae mimitong.

119 Ao nakon te Atua ao te Tiibu te Teei te mimitong, ao te karineaki, ao te tautaeka n aki tootoki. Amen.