ພາກທີ 81
ການເປີດເຜີຍທີ່ມອບໃຫ້ຜ່ານໂຈເຊັບ ສະມິດ ຜູ້ເປັນສາດສະດາ, ທີ່ເມືອງໄຮຣຳ, ລັດໂອໄຮໂອ, ວັນທີ 15 ເດືອນມີນາ, 1832. ເຟຣ໌ເດຣິກ ຈີ ວິວລຽມສ໌ ຖືກເອີ້ນໃຫ້ເປັນມະຫາປະໂລຫິດ ແລະ ທີ່ປຶກສາໃນຝ່າຍປະທານຂອງຖານະປະໂລຫິດສູງ. ບັນທຶກປະຫວັດສາດນີ້ສະແດງໃຫ້ເຫັນວ່າ ເມື່ອໄດ້ຮັບການເປີດເຜີຍນີ້ໃນເດືອນມີນາ 1832, ແຈຊີ ກໍສ໌ ໄດ້ຖືກເອີ້ນສືບຕໍ່ຕຳແໜ່ງເປັນທີ່ປຶກສາຂອງໂຈເຊັບ ສະມິດ ໃນຝ່າຍປະທານ. ເຖິງຢ່າງໃດກໍຕາມ, ເມື່ອ ລາວບໍ່ສາມາດປະຕິບັດໜ້າທີ່ຢ່າງສະໝ່ຳສະເໝີ, ການເອີ້ນນັ້ນຈຶ່ງຖືກໂອນໃຫ້ເຟຣ໌ເດຣິກ ຈີ ວິວລຽມສ໌ ຮັບວຽກຕໍ່. ການເປີດເຜີຍ (ໃນເດືອນມີນາ 1832) ຄວນຖືວ່າເປັນບາດກ້າວໜຶ່ງໄປສູ່ການຈັດຕັ້ງຂອງຝ່າຍປະທານສູງສຸດ ຢ່າງເປັນທາງການ, ຊຶ່ງເນັ້ນເຖິງການເອີ້ນສະເພາະສຳລັບຕຳແໜ່ງທີ່ປຶກສາໃນກຸ່ມນັ້ນ ແລະ ອະທິບາຍເຖິງກຽດສັກສີຂອງວຽກງານມອບໝາຍ. ບຣະເດີ ກໍສ໌ ໄດ້ຮັບໃຊ້ຊົ່ວໄລຍະໜຶ່ງ, ແຕ່ໄດ້ຖືກຕັດອອກຈາກສາດສະໜາຈັກໃນເດືອນທັນວາ ປີ 1832. ບຣະເດີ ວິວລຽມສ໌ ໄດ້ຮັບການແຕ່ງຕັ້ງສູ່ຕຳແໜ່ງທີ່ກ່າວມານັ້ນ ໃນວັນທີ 18 ເດືອນມີນາ, 1833.
1–2, ຝ່າຍປະທານສູງສຸດເປັນຜູ້ຖືຂໍກະແຈຂອງອານາຈັກສະເໝີໄປ; 3–7, ຖ້າຫາກ ເຟຣ໌ເດຣິກ ຈີ ວິວລຽມສ໌ ຊື່ສັດໃນການປະຕິບັດສາດສະໜາກິດຂອງລາວ, ແລ້ວລາວຈະມີຊີວິດນິລັນດອນ.
1 ຕາມຈິງ, ຕາມຈິງແລ້ວ, ເຮົາກ່າວກັບເຈົ້າ ຜູ້ຮັບໃຊ້ຂອງເຮົາ ເຟຣ໌ເດຣິກ ຈີ ວິວລຽມສ໌: ຈົ່ງຟັງສຸລະສຽງຂອງພຣະອົງຜູ້ທີ່ກ່າວ, ຟັງພຣະຄຳຂອງພຣະຜູ້ເປັນເຈົ້າອົງເປັນພຣະເຈົ້າຂອງເຈົ້າ, ແລະ ຈົ່ງເຊື່ອຟັງຕໍ່ການເອີ້ນຊຶ່ງເຈົ້າຖືກມອບໝາຍໃຫ້ເຮັດ, ແມ່ນແຕ່ໃຫ້ເປັນ ມະຫາປະໂລຫິດໃນສາດສະໜາຈັກຂອງເຮົາ, ແລະ ເປັນທີ່ປຶກສາແກ່ຜູ້ຮັບໃຊ້ຂອງເຮົາ ໂຈເຊັບ ສະມິດ, ຜູ້ລູກ;
2 ຜູ້ຊຶ່ງເຮົາໄດ້ມອບ ຂໍກະແຈຂອງອານາຈັກໃຫ້, ຊຶ່ງເປັນຂອງ ຝ່າຍປະທານຂອງຖານະປະໂລຫິດສູງສະເໝີໄປ:
3 ສະນັ້ນ, ຕາມຄວາມຈິງແລ້ວ ເຮົາຈະຮັບຮູ້ລາວ ແລະ ຈະອວຍພອນລາວ, ແລະ ເຈົ້ານຳອີກ, ຕາບໃດທີ່ເຈົ້າຍັງຊື່ສັດໃນການປຶກສາ, ໃນຕຳແໜ່ງຊຶ່ງເຮົາໄດ້ກຳນົດໃຫ້ແກ່ເຈົ້າ, ໃນການອະທິຖານສະເໝີໄປ, ໂດຍອອກສຽງ ແລະ ໃນໃຈຂອງເຈົ້າ, ໃນສາທາລະນະ ແລະ ໃນບ່ອນເປັນສ່ວນຕົວ, ທັງໃນການປະຕິບັດສາດສະໜາກິດຂອງເຈົ້ານຳອີກ ໃນການປະກາດພຣະກິດຕິຄຸນໃນແຜ່ນດິນຂອງຄົນເປັນ, ແລະ ໃນບັນດາພີ່ນ້ອງຂອງເຈົ້າ.
4 ແລະ ໃນການເຮັດສິ່ງເຫລົ່ານີ້ ເຈົ້າຈະເຮັດຄວາມດີອັນຍິ່ງໃຫຍ່ທີ່ສຸດແກ່ເພື່ອນມະນຸດຂອງເຈົ້າ, ແລະ ຈະສົ່ງເສີມ ລັດສະໝີພາບຂອງພຣະອົງ ຜູ້ຊຶ່ງເປັນພຣະຜູ້ເປັນເຈົ້າຂອງເຈົ້າ.
5 ດັ່ງນັ້ນ, ຈົ່ງຊື່ສັດ; ຈົ່ງຍຶດໝັ້ນໃນຕຳແໜ່ງຊຶ່ງເຮົາໄດ້ກຳນົດໃຫ້ເຈົ້າ; ຈົ່ງ ຊ່ວຍເຫລືອຄົນທີ່ອ່ອນແອ, ຍົກມືທີ່ເມື່ອຍລ້າ, ແລະ ໃຫ້ກຳລັງ ຫົວເຂົ່າທີ່ອ່ອນເພຍ.
6 ແລະ ຖ້າຫາກເຈົ້າຊື່ສັດຈົນເຖິງທີ່ສຸດ, ແລ້ວເຈົ້າຈະໄດ້ຮັບມົງກຸດແຫ່ງ ຄວາມເປັນອະມະຕະ, ແລະ ຊີວິດນິລັນດອນໃນ ຜາສາດ ຊຶ່ງເຮົາໄດ້ຕຽມໄວ້ໃນບ້ານຂອງພຣະບິດາຂອງເຮົາ.
7 ຈົ່ງເບິ່ງ, ແລະ ເບິ່ງແມ, ນີ້ຄືຖ້ອຍຄຳຂອງອາລະຟາ ແລະ ໂອເມຄາ, ແມ່ນແຕ່ພຣະເຢຊູຄຣິດ. ອາແມນ.