1 O se faaaliga a Iesu Keriso i lana auauna o Iosefa Samita, Le Itiiti, ma toeaina e toaono, a’o latou tuufaatasi o latou loto ma siitia a’e o latou leo i lugā.

2 Ioe, o le afioga a le Alii e faatatau i lana ekalesia, ua faatuina i aso e gata ai mo le toefuataiga o ona tagata, e pei ona sa ia fetalaia e ala mai i fofoga o ana perofeta, ma mo le faapotopotoina o lana au paia e tutulai i luga o le Mauga o Siona, lea o le a avea ma aai o Ierusalema Fou.

3 O le aai lea o le a fausia, e amata mai i le fanua o le malumalu, lea ua tofia e le tamatama’iaao o le Alii, i tuaoi i sisifo o le Setete o Misuri, ma ua faapaiaina e le lima o Iosefa Samita, Le Itiiti, ma isi o e na fiafia tele i ai le Alii.

4 E moni o le afioga lenei a le Alii, ia fausia le aai o Ierusalema Fou i le faapotopotoina o le au paia, e amata atu i le nofoaga lenei, le nofoaga lea o le malumalu, le malumalu lea o le a faatuina i le tupulaga lenei.

5 Auā e moni e lē mavae uma atu le tupulaga lenei seia fausia se maota mo le Alii, ma o le a faamalumalu ai se ao i ona luga, le ao lea o le mamalu lava o le Alii, lea o le a faatumulia ai le maota.

6 Ma atalii o Mose, e tusa ma le Perisitua Paia na ia maua i lalo o le lima o Ietero le tamā-o-lana-avā.

7 Ma na maua e Ietero i lalo o le lima o Kalepo;

8 Ma na maua e Kalepo i lalo o le lima o Eliu;

9 Ma na maua e Eliu i lalo o le lima o Ieremai;

10 Ma Ieremai i lalo o le lima o Kato;

11 Ma Kato i lalo o le lima o Esaia;

12 Ma na maua e Esaia i lalo o le aao o le Atua.

13 Na ola foi Esaia i aso o Aperaamo, ma sa faamanuiaina e ia—

14 O Aperaamo lea na ia maua le perisitua mai ia Mekisateko, o lē na mauaina le perisitua e ala i le gafa o ona tamā, seia oo lava ia Noa;

15 Ma mai ia Noa seia oo ia Enoka, e ala i le gafa o o la’ua tamā;

16 Ma mai ia Enoka ia Apelu, o lē na fasiotia i le taupulepulega faalilolilo a lona uso, o lē na mauaina le perisitua i poloaiga a le Atua, i le lima o lona tamā, o Atamu, o lē o le uluai tagata—

17 O le perisitua lea sa i ai pea i le ekalesia a le Atua i tupulaga uma, ma ua aunoa ma se amataga o aso po o se iuga o tausaga.

18 Ma sa faamau foi e le Alii se perisitua i luga o Arona ma ana fanau, i a latou tupulaga uma, le perisitua lea ua i ai pea lava foi ma tumau e faavavau faatasi ma le perisitua lea ua tusa ma le faatulagaga sili ona paia a le Atua.

19 Ma o le perisitua tele lea e pulea le talalelei ma umia le ki o mealilo o le malo, o le ki lava lea o le malamalama e uiga i le Atua.

20 O lea, o ona sauniga, ua faaalia ai le mana o le faale-atua.

21 Ma a aunoa ma ona sauniga, ma le pule o le perisitua, e lē faaalia mai le mana o le faale-atua i tagata i la le tino;

22 Auā a aunoa ma lea, e leai se tagata e mafai ona vaai i fofoga o le Atua, le Tamā lava, ma ola.

23 O lenei, o lenei mea sa aoao manino atu e Mose i le fanauga a Isaraelu i le vao, ma saili ma le filiga e faapaia lona nuu ina ia mafai ona latou vaai i fofoga o le Atua;

24 Peitai sa latou faamaaa o latou loto ma lē mafai ai ona latou tumau i ona luma; o lea, o le Alii i lona toasa, ona sa sasao a’e lona toatamai e faasaga ia te i latou, na tauto ai e lē tatau ona latou ulu atu i lona malologa, o le malologa lea o le atoatoaga o lona mamalu, a’o latou i ai i le vao.

25 O lea, na ave ai e ia Mose i fafo mai totonu o i latou, ma le Perisitua Paia foi;

26 Ae sa i ai pea le perisitua maualalo, le perisitua lea ua umia le ki o le ’auaunaga a agelu ma le talalelei sauniuni;

27 O le talalelei lea o le talalelei o le salamo ma le papatisoga, ma le faamagaloina o agasala, ma le tulafono o poloaiga faaletino, ia na faia e le Alii i lona toasa ia tumau pea i le aiga o Arona i totonu o le fanauga a Isaraelu seia oo mai ia Ioane, o lē na saunia e le Atua, ua faatumuina i le Agaga Paia mai le manava o lona tinā.

28 Auā sa papatisoina o ia a’o i ai lava o ia i lona tamaitiiti, ma sa faauuina e le agelu a le Atua i lenei mana i le taimi na valu ai aso o lona matua, e faatoilalo le malo o Iutaia, ma fai faasa’osa’o le ala o le Alii i luma o mata o lona nuu, e saunia ai i latou mo le afio mai o le Alii, o lē ua tuu atu i ona lima le mana uma.

29 O lenei foi, o tofi o le toeaina ma le epikopo, o ni faaopoopoga tatau ai i le perisitua maualuga.

30 O lenei foi, o tofi o le a’oa’o ma le tiakono, o ni faaopoopoga tatau e a le perisitua maualalo, o le perisitua lea na faamauina i luga o Arona ma ona atalii.

31 O lea, e pei ona Ou fai atu e uiga i atalii o Mose—ona o atalii o Mose ma atalii foi o Arona o le a osia se taulaga mu ma se taulaga e taliaina i le maota o le Alii, le maota lea o le a fausia mo le Alii i le tupulaga lenei, i luga o le fasifanua faapaiaina e pei ona Ou tofia—

32 Ma o atalii o Mose ma Arona o le a faatumulia i le mamalu o le Alii i luga o le Mauga o Siona, i le maota o le Alii, o e o o la’ua atalii o outou ia; ma le toatele foi o e ua ou valaaulia ma auina atu e atia’e la’u ekalesia.

33 Auā ’ai se tasi e faamaoni i le mauaina o ia perisitua e lua ua Ou tautala atu ai, ma le faalauteleina o o latou valaauga, e faapaiaina e le Agaga i le faafouina o o latou tino.

34 E avea i latou ma atalii o Mose ma Arona ma fanau a Aperaamo, ma le ekalesia ma le malo, ma le ’au filifilia a le Atua.

35 O lenei foi o i latou uma o e e talia lenei perisitua ua latou talia a’u, ua fetalai mai ai le Alii;

36 Auā o ia o lē e talia a’u auauna ua ia talia a’u;

37 Ma o ia o lē e talia a’u ua ia talia lo’u Tamā;

38 Ma o ia o lē e talia lo’u Tamā e maua e ia le malo o lo’u Tamā; o lea, o mea uma ua i ai i lo’u Tamā o le a tuu atu ia te ia.

39 Ma o lenei mea ua tusa ai ma le tautoga ma le feagaiga e a le perisitua ia.

40 O le mea lea, o i latou uma o e e mauaina le perisitua, e mauaina lenei tautoga ma le feagaiga a lo’u Tamā, e lē mafai ona solia e ia, pe mafai ona aveesea.

41 Peitai ’ai se e solia lenei feagaiga ina ua uma ona maua e ia, ma liliu ese atoa mai ai, o le a lē maua e ia se faamagaloga o agasala i le lalolagi lenei po o le lalolagi a sau.

42 Ma oi talofa ia te i latou uma o e e lē o mai i lenei perisitua ua outou maua, lea ua Ou faamauina nei i luga o outou o e ua auai i lenei aso, i lo’u lava leo mai le lagi; ma ua ’Ou tuu atu foi i ’au o le lagi ma a’u agelu le tiute e faatatau ia te outou.

43 Ma Ou te tuu atu nei ia te outou se poloaiga ia outou faaeteete e faatatau ia te outou lava, ia outou gaua’i ma le filiga i upu o le ola e faavavau.

44 Ona ia outou ola i afioga uma e tulei mai le fofoga o le Atua.

45 Auā o le afioga a le Alii o le upumoni lea, ma o soo se mea ua moni, o le malamalama lea, ma o soo se mea ua malamalama, o le Agaga lea, o le Agaga lava lea o Iesu Keriso.

46 Ma o le Agaga na te tuuina mai le malamalama i tagata taitoatasi e sau i le lalolagi; ma o le Agaga e faamalamalamaina tagata taitoatasi i le lalolagi atoa, o e e faalogo i le siufofoga o le Agaga.

47 Ma o tagata uma taitoatasi o e e faalogo i le siufofoga o le Agaga, e o mai i le Atua, le Tamā lava.

48 Ma e a’oa’o o ia e le Tamā e uiga i le feagaiga ua faafouina ma faamauina e ia i luga o outou, lea ua faamauina i luga o outou i le manatu ia te outou, ma ua lē mo na’o outou, ae mo le lalolagi atoa.

49 Ma ua taoto le lalolagi atoa i le agasala, ma ua ōi i lalo o le pouliuli ma lalo o le pologa o le agasala.

50 Ma o lenei mea o le a mafai ona outou iloa ai ua i ai i latou i lalo o le pologa o le agasala, ona ua latou lē o mai ia te a’u.

51 Auā ’ai se tasi e lē sau ia te a’u, ua i ai i lalo o le pologa o le agasala.

52 Ma ’ai se tasi e lē taliaina lo’u leo, ua lē masani i lo’u leo, ma ua lē a a’u ia.

53 Ma o lenei mea o le a mafai ai ona outou iloa o le amiotonu mai le amioleaga, ma ua ōi le lalolagi atoa i lalo o le agasala ma le pouliuli i le taimi nei lava.

54 Ma sa faapouliuligia o outou mafaufau i taimi ua mavae ona o le lē talitonu, ma ona sa outou manatu māmā i mea ua outou maua—

55 O le faafiasili lea ma le lē talitonu ua aumai ai le ekalesia atoa i lalo o le tausalaga.

56 Ma o lenei ta’usalaga ua tauaveina i luga o le fanauga a Siona, i latou uma lava.

57 Ma o le a latou tumau pea i lalo o lenei ta’usalaga, seia latou salamo ma manatua le feagaiga fou, o le Tusi a Mamona lava lea ma poloaiga muamua ia na Ou tuuina atu ia te i latou, ia lē na’o le fai atu, ae ia faia e tusa ai ma mea ua Ou tusia—

58 Ina ia mafai ona latou aumai o ni fua e tatau ai mo le malo o lo latou Tamā; a lē o lea o le a tumau pea le sasa ma le faamasinoga e liligi mai i luga o le fanauga a Siona.

59 Auā pe faaeleelea ea e fanau o le malo lo’u laueleele paia? E moni, Ou te fai atu ia te outou, e Leai.

60 E moni, e moni, Ou te fai atu ia te outou o e o faalogo mai nei i a’u upu, o lo’u leo lea, amuia outou e tusa ai ma lo outou taliaina o nei mea;

61 Auā o le a Ou faamagaloina outou ia outou agasala e ala i le poloaiga lenei—ia outou tutumau-mausalī i o outou mafaufau i le mamalu ma le agaga o le tatalo, i le tuuina atu o le molimau i le lalolagi atoa e uiga i mea ia ua ta’u atu ia te outou.

62 O lea, ia outou o atu i le lalolagi atoa; ma i soo se mea e lē mafai ona outou o atu i ai, ia outou auina atu i ai, ina ia mafai ona alu atu o le molimau mai ia te outou i le lalolagi atoa i tagata uma.

63 Ma e pei ona sa Ou fai atu i a’u aposetolo, e faapea lava ona Ou fai atu ia te outou, ona o outou o a’u aposetolo, o faitaulaga sili lava a le Atua; o outou ia o i latou o e na tuuina mai e lo’u Tamā ia te a’u; o outou o a’u uo;

64 O lea, e pei ona Ou fai atu i a’u aposetolo Ou te toe fai atu ia te outou, o tagata uma taitoatasi o e e talitonu ia outou upu, ma papatiso i le vai mo le faamagaloina o agasala, o le a mauaina le Agaga Paia.

65 Ma o faailoga nei e mulimuli ia te i latou o e e talitonu—

66 O lo’u igoa o le a latou faia ai galuega ofoofogia e tele;

67 O lo’u igoa o le a latou tutuli ese ai tiapolo;

68 O lo’u igoa o le a latou faamalolo ai e mama’i;

69 O lo’u igoa o le a latou faapupula ai mata o e tauaso, ma tatala ai taliga o e tutuli;

70 Ma o le a faatautatala ai laulaufaiva o e ua gūgū;

71 Ma afai e tuu atu e se tagata ia te i latou se mea ’oona o le a lē afaina ai i latou;

72 Ma o le a leai se malosi o le ’ona o se gata e afaina ai i latou.

73 Ae Ou te tuu atu ia te i latou se poloaiga, ia aua ne’i mitamitavale i latou lava i nei mea, pe tautala atu ai i luma o le lalolagi; auā o nei mea ua tuuina atu ia te outou mo lo outou manuia ma lo outou faaolataga.

74 E moni, e moni, Ou te fai atu ia te outou, o i latou o e e lē talitonu ia outou upu, ma lē papatisoina i le vai i lo’u igoa, mo le faamagaloina o a latou agasala, ina ia mafai ona latou maua o le Agaga Paia, o le a ta’usalaina, ma o le a lē o mai i le malo o lo’u Tamā, i le mea o i ai lo’u Tamā ma A’u.

75 Ma o lenei faaaliga, ma le poloaiga, ia te outou, ua faamamaluina nei mai lenei lava itula i luga o le lalolagi atoa, ma ua i ai le talalelei ia oo atu i tagata uma o e latou te le’i mauaina.

76 Peitai, e moni Ou te fai atu ia te i latou uma o e ua tuuina atu i ai le malo—e ao ina tala’i atu mai ia te outou ia te i latou, ina ia latou salamo ia latou galuega leaga muamua; aua e tatau ona a’oa’iina i latou i o latou loto leaga o le lē talitonu, ma o outou uso i Siona ona o lo latou fouvale faasaga mai ia te outou i le taimi na Ou auina atu ai outou.

77 Ma Ou te toe fai atu ia te outou, a’u uo e, auā o le a amata atu nei ma le agai i luma ona Ou ta’ua outou o uo, ua tatau ai ona Ou tuu atu ia te outou le poloaiga lenei, ia avea outou ma a’u uo e pei lava i aso na Ou faatasi ai ma i latou, i le malaga atu e tala’i atu le talalelei i lo’u mana;

78 Auā sa Ou lē tuuina atu ia te i latou ia i ai ni a latou atotupe po o ni ato malaga, po o ni peleue se lua.

79 Faauta, Ou te auina atu outou e tofotofo le lalolagi, ma e agavaa lē e galue i lona taui.

80 Ma o soo se tagata e alu atu ma tala’i atu lenei talalelei o le malo, ma lē vaivai e tumau pea i le faamaoni i mea uma, o le a lē vaivai i le mafaufau, pe faapouliuligia, pe i le tino, itutino, po o soogaivi; ma o le a lē pa’ū se lauulu o lona ulu i le eleele e aunoa ma le lē iloa. Ma o le a latou lē fia aai, pe fia feinu.

81 O lea, ia outou lē mafaufau mo a taeao, mo mea o le a outou ’ai, po o mea o le a outou inu, po o mea o le a outou oofu ai.

82 Auā, ia mafaufau i lili o le fanua, i le ala ua latou tutupu a’e ai, latou te lē galulue, pe latou te milo foi; ae o malo o le lalolagi, i o latou mamalu atoa, ua lē faala’eiina e pei o se tasi o i latou nei.

83 Auā o lo outou Tamā, o lē o i le lagi, ua silafia e ia ua outou manaomia nei mea uma.

84 O lea, ia tuu taeao e manatu i ona lava mea.

85 Pe tou te mafaufau muamua foi po o a tou te fai atu ai; ae ia teu i o outou mafaufau e lē aunoa afioga o le ola, ma o le a tuuina atu ia te outou i lea lava itula le vaega lena o le a fuaina atu i tagata taitoatasi.

86 O lea, ia lē tuu atu i se tagata e i totonu o outou, ona o le poloaiga lenei ua mo tagata faamaoni uma o e ua valaaulia e le Atua i le ekalesia mo le auaunaga, e o atu e folafola atu le talalelei lenei o le malo, e ave, mai le itula lenei, se atotupe po o se ato malaga.

87 Faauta, ua Ou auina atu outou e a’oa’i le lalolagi i a latou galuega amioletonu uma, ma a’oa’o atu ia te i latou e uiga i se faamasinoga o le a oo mai.

88 Ma ai se na te talia outou, o iina o le a Ou i ai foi, ona o le a Ou alu muamua atu i o outou luma. O le a Ou i ai i lo outou lima taumatau ma lo outou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga.

89 Ai se na te talia outou ua ia talia a’u; ma o ia lava lea o le a fafagaina outou, ma faalavalava outou, ma avatu tupe ia te outou.

90 Ma o ia o lē e fafaga ia te outou, pe faalavalava outou, pe avatu ia te outou tupe, o le a leai se ala o le a lē maua ai lona taui.

91 Ma o ia o lē na te lē faia ia mea ua lē o so’u soo o ia; o le mea lenei e mafai ona outou iloa ai o’u soo.

92 O ia o lē na te lē talia outou, o ese mai ia te ia na’o outou lava, ma mulumulu o outou vae i vai, vai mamā ia, pe vevela pe malulu, ma molimau atu lena mea i lo outou Tamā o i le lagi, ma ia outou lē toe foi atu i lena tagata.

93 Ma i soo se nuu po o se aai tou te ulu atu i ai, ia faapena lava ona outou faia.

94 Ae ui i lea, ia outou saili ma le filigā ma ia lē taofia; ma oi talofa i lena fale, po o lena nuu po o le aai e teena outou, po o a outou upu, po o a outou molimau e uiga ia te a’u.

95 Ou te toe fai atu, oi talofa i lena fale, po o lena nuu po o lena aai e teena outou, po o a outou upu, po o a outou molimau e uiga ia te a’u;

96 Aua o A’u, o lē Malosi Aoao, ua faaee atu o’u lima i luga o atunuu e sasa ia te i latou ona o a latou amioleaga.

97 Ma o le a oo atu mala ma o le a lē aveeseina ia mala mai le lalolagi se’ia uma la’u galuega, lea o le a faapuupuuina i le amiotonu—

98 Se’ia oo ina iloa A’u e tagata uma, o e e totoe, mai lava i lē ua aupito itiiti e oo atu i lē aupito sili, ma o le a faatumulia i le malamalama o le Alii, ma o le a vaai mata i le mata, ma o le a siitia a’e o latou leo, ma o le a latou pepese faatasi ma le leo le pese fou lenei, fai mai:

99 Ua toe aumai e le Alii Siona;Ua togiolaina e le Alii lona nuu, o Isaraelu,E tusa ma le filifiliga o le alofa tunoa,Lea na faataunuuina i le faatuatuaMa le feagaiga a o latou tamā.

100 Ua togiola e le Alii lona nuu;Ma ua noatia Satani ma ua lē toe i ai se taimi.Ua faapotopoto e le Alii mea uma i le tasi.Ua aumai Siona e le Aliii lalo mai lugā.Ua ava’e i luga Siona e le Alii mai lalō.

101 Ua mapuitiga le lalolagi ma ua aumai lona malosi;Ma ua faatuina le upumoni i lona loto;Ma ua fiafia mai le lagi i ona luga;Ma ua faaofuina o ia i le mamalu o lona Atua;Ona ua tulai o ia i totonu o ona tagata.

102 O le mamalu, ma le viiga, ma le mana, ma le malosi,Ia tuu atu i lo tatou Atua; ona ua tumu o ia i le alofa mutimutivale,Amiotonu, alofa tunoa ma le faamaoni, ma le filemu,E faavavau, faavavau lava, Amene.

103 O lenei foi, e moni, e moni, Ou te fai atu ia te outou, e tatau i tagata taitoatasi o e e o atu e folafola atu la’u talalelei tumau e faavavau, e tusa ai ma le ia i o ni o latou aiga, ma latou maua ni tupe e ala i meaalofa, e tatau ona latou auina atu ia tupe ia te i latou pe faaaoga mo lo latou lelei, e pei ona faatonuina ai i latou e le Alii, ona ua faapea ona foliga lelei lena mea ia te a’u.

104 Ma ia tuu atu ia te i latou uma o e ua leai ni aiga, o e e maua tupe, e auina atu ia tupe i le epikopo i Siona, po o le epikopo i Ohaio, ina ia faapaiaina mo le aumaia o faaaliga ma lo latou lomiga, ma mo le faatuina o Siona.

105 Ma afai e tuu atu e se tagata i soo se tasi o outou se peleue, po o se suti, ia ave ofu tuai ma tuu atu i e matitiva, ma o i o outou ala ma le olioli.

106 Ma afai e i ai se tagata i totonu o outou ua malosi i le Agaga, ia tuu atu ia te ia na te ave faatasi ma ia lē ua vaivai, ina ia faagaeetiaina o ia i le agamalu atoa, ina ia faamalosia foi o ia.

107 O lea, ia outou ave faatasi ma outou e ua faauuina i le perisitua maualalo, ma auina atu i latou e muamua atu ia te outou e fai tuutuuga, ma saunia le ala, ma faataunuu tuutuuga ua lē mafai e outou lava ona faataunuu.

108 Faauta, o le ala lenei na ati a’e ai e a’u aposetolo, i aso anamua, la’u ekalesia ia te a’u.

109 O lea, ia tuu atu i tagata taitoatasi ia tu i lona lava tofi, ma galue i lona lava valaaulia, ma ia lē tuu atu i le ulu e fai atu i vae ua lē manaomia e ia vae; aua a aunoa ma vae o le a mafai faapefea e le tino ona tu?

110 E faapea foi le manaomia e le tino ia itutino taitasi uma, ina ia mafai ona faagaeetia uma faatasi, ina ia mafai ona tausi i le atoatoa le faatulagaga.

111 Ma faauta, e tatau i faitaulaga sili ona malaga, ma toeaina foi, ma ositaulaga maualalo foi; ae o tiakono ma a’oa’o e tatau ona tofia e leoleo i luga o le ekalesia, e avea ma auauna nonofo mau mo le ekalesia.

112 Ma e tatau foi i le epikopo, o Newel K. Whitney, ona malaga faataamilo ma i totonu o aulotu uma, e saili e matitiva e fesoasoani i o latou manaoga i le faalotomaualaloina o e mau’oa ma e faamaualuluga.

113 E tatau foi ia te ia ona fai sona sui e galue totogi e pulea ma faia lana pisinisi faaletino e pei ona o le a faatonu ai e ia.

114 Ae ui i lea, ia tuu atu i le epikopo e alu i le aai o Niu Ioka, ma i le aai foi o Albany, ma i le aai foi o Boston, ma lapatai atu i tagata o aai na i le leo o le talalelei, ma se leo tele, e uiga i le faatafunaga ma le faafanoga atoa ua faatalitali mai ia te i latou pe afai latou te teena nei mea.

115 Auā afai latou te teena nei mea, ua lata mai lava le itula o lo latou faamasinoga, ma o lo latou fale o le a tuua tuufua ia te i latou.

116 Ia tuu atu ia te ia e faalagolago mai ia te a’u ma o le a lē faafememea’iina ai o ia; ma o le a lē pa’ū se lauulu o lona ao i le eleele e aunoa ma le iloa.

117 Ma e moni Ou te fai atu ia te outou, a’u auauna o totoe, ia outou o atu pe a mafai ai e tusa ma tulaga ua outou i ai, i o outou valaauga eseese, i aai ma nuu tetele ma ta’uta’ua, ma a’oa’i i le amiotonu le lalolagi e uiga ia latou amioletonu ma galuega uma e lē faale-atua, ma faamatala manino atu ma le malamalama lelei le faatafunaga o mea inosia i aso e gata ai.

118 Auā, o le a ala atu ia te outou, ua fetalai mai ai le Alii Malosi Aoao, ona Ou saeia o latou malo; o le a lē gata ina Ou luluina le lalolagi, ae o le a gatete le lagi ua tumu i fetu.

119 Auā o A’u, o le Alii, ua tuu atu lo’u lima e faagaoioi mana o le lagi; e lē mafai ona outou vaai nei i ai, ae ua toeitiiti ona outou vaai lea i ai, ma iloa ai ua Ou i ai, ma o le a Ou alu atu ma nonofotupu faatasi ma lo’u nuu.

120 O A’u o le Alefa ma le Omeka, o le amataga ma le gataaga. Amene.