¶ 1 BEA ko Jefita koe tagata Kiliati, koe tagata to‘a lahi, bea koe tama ia ae fefine agahala: bea koe foha o Kiliati a Jefita.

2 Bea nae fanau‘i e he unoho o Kiliati ae gaahi tama; bea nae tubu hake ae gaahi tama a hono unoho, bea naa nau kabuji a Jefita, o nau behe kiate ia, E ikai te ke hoko koe ki ha mea i he fale oe tau tamai: he koe tama koe ae fefine kehe.

3 Bea nae hola ai a Jefita mei hono gaahi kaiga, bea nofo ia i he fonua ko Tobi: bea nae katoa kia Jefita ae kau tagata launoa, o nau alu fano mo ia.

4 Bea fuoloage mo ene hoko o behe, nae teu tau ae fānau a Amoni ki Isileli.

5 Bea i he teu tau ae fānau a Amoni ki Isileli, bea behe, nae alu ae kau mātua o Kiliati ke omi a Jefita mei he fonua ko Tobi:

6 Bea naa nau behe kia Jefita, Ha‘u koe, o hoko ko ho mau eiki tau, koeuhi ke tau tau‘i ae fānau a Amoni.

7 Bea nae behe e Jefita ki he kau mātua o Kiliati, Ikai naa mou fehia kiate au, bea kabuji au mei he fale o eku tamai? bea koeha kuo mou ha‘u ai kiate au i hoo mou tuutamaki?

8 Bea behe e he kau mātua o Kiliati kia Jefita, Koia oku mau toe kumi ni kiate koe, koeuhi ke tau o, bea tau‘i ae fānau a Amoni, bea ke hoko ko ho mau eiki i he kakai kotoabe o Kiliati.

9 Bea nae behe e Jefita ki he kau mātua o Kiliati, Kabau oku mou ave au ki hoku fonua keu tau‘i ae fānau a Amoni, bea tukuage akinautolu e Jihova i hoku ao, teu hoko mooni ai ko ho mou eiki?

10 Bea behe e he kau mātua o Kiliati kia Jefita, Ke afio e Jihova kiate kitaua, o kabau e ikai te mau fai o hage ko hoo lea.

11 Bea nae toki alu a Jefita moe kau mātua o Kiliati, bea fakanofo ia e he kakai koe bule moe eiki tau kiate kinautolu: bea nae fai e Jefita ene gaahi lea kotoabe i he ao o Jihova i Misiba.

¶ 12 Bea nae fekau e Jefita ae kau talafekau ki he tu‘i oe fānau a Amoni, o behe, Koeha hao kau kiate au koeuhi kuo ke ha‘u ai ke tau‘i au i hoku fonua?

13 Bea nae lea ae tu‘i oe fānau a Amoni ki he kau talafekau a Jefita, o behe, Koe mea i he faaoa e Isileli hoku fonua, i he e nau ha‘u mei Ijibite, mei Alanoni o a‘u ki Jaboki, bea hoko ki Joatani: koia ke ke toe tuku mai fiemalie be ae gaahi fonua koia.

14 Bea nae toe fekau e Jefita ae kau talafekau ki he tu‘i oe fānau a Amoni:

15 Bea ne behe kiate ia, Oku behe e Jefita, Nae ikai faaoa e Isileli ae fonua o Moabe, be koe fonua oe fānau a Amoni:

16 Ka i he alu hake a Isileli mei Ijibite, bea fonoga o aji i he toafa moe tahi Kulokula, bea hoko ki Ketesi;

17 Nae fekau ai e Isileli ki he tu‘i o Itomi, o behe, Oku ou kole kiate koe, tuku keu alu i ho fonua: ka nae ikai tokaga ki ai ae tu‘i o Itomi. Bea nae behe be e nau fekau ki he tu‘i o Moabe: ka nae ikai loto ia ki ai: bea nae nofo be a Isileli i Ketesi.

18 Naa nau alu ai be i he toafa, bea foliaki ae fonua ko Itomi, bea moe fonua o Moabe, o nau hoko o ofi ki he fonua o Moabe i he botu hoboagalaa, bea abitaga i he botu e taha o Alanoni, ka nae ikai hoko ki loto i he vee fonua o Moabe: he koe gataaga o Moabe a Alanoni.

19 Bea nae fekau e Isileli ae kau talafekau kia Sihoni koe tu‘i oe kau Amoli, koe tu‘i o Hesiboni: bea nae behe e Isileli kiate ia, Oku mau kole kiate koe, ke ke tuku ke mau alu atu i ho fonua ki hoku botu.

20 Ka nae ikai tui a Sihoni ke tuku a Isileli ke alu i hono fonua: ka nae tanaki e Sihoni hono kakai kotoabe o abitaga i Jehasi, ke tau‘i a Isileli.

21 Bea nae tukuage e Jihova koe Otua o Isileli, a Sihoni mo hono kakai kotoabe ki he nima o Isileli, bea naa nau ta‘i akinautolu: bea nae ma‘u e Isileli ae fonua kotoabe oe kau Amoli, koe kakai oe fonua.

22 Bea naa nau ma‘u ae gaahi fonua kotoabe oe kau Amoli, mei Alanoni o a‘u atu ki Jaboki, bea mei he toafa o hoko ki Joatani.

23 Koia ko Jihova koe Otua o Isileli kuo ne kabuji ae kakai Amoni, mei he ao o hono kakai ko Isileli, bea oku lelei ke ke ma‘u ia ekoe?

24 Ikai te ke ma‘u aia oku foaki e Kimosi ko ho otua kiate koe? Koia ko kinautolu kotoabe e kabuji e Jihova ko ho mau Otua mei ho mau ao, ko kinautolu te mau ma‘u.

25 Bea koeni, oku ke lelei hake koe ia Belaki koe foha e Siboa koe tu‘i o Moabe? nae fekuki ia mo Isileli be ikai? be naa ne tau‘i a Isileli?

26 Nae nofo a Isileli i Hesiboni mo hono gaahi kolo, bea i Aloeli mo hono gaahi kolo, bea i he gaahi kolo oku tuu i hono gaahi gataaga oe fonua o Alanoni, i he ta‘u e tolugeau? koeha nae ikai te mou toe ma‘u akinautolu i he gaahi kuoga koia?

27 Koia nae ikai teu fai agahala kiate koe, ka oku ke fai kovi kiate au i hoo fie tau‘i au: ko Jihova koe fakamāu, ke fakamāu eia he aho ni koeuhi koe fānau a Isileli moe fānau a Amoni.

28 Ka nae ikai tokaga ae tu‘i oe fānau a Amoni ki he gaahi lea a Jefita aia naa ne fekau kiate ia.

¶ 29 Bea nae hoko ae Laumalie o Jihova kia Jefita, bea nae alu atu ia i Kiliati, mo Manase, bea alu atu i Misiba o Kiliati, bea alu i Misiba o Kiliati o hoko atu ki he fānau a Amoni.

30 Bea nae lea a Jefita aki ae fuakava kia Jihova, o ne behe, Kabau te ke tukuage mooni ae fānau a Amoni ki hoku nima,

31 Bea e behe, koia e hu kitua mei he mataba o hoku fale ke fakafetaulaki kiate au i he eku liu mai i he fiemalie mei he fānau a Amoni, e a Jihova mooni ia, bea teu atu ia koe feilaulau tutu.

¶ 32 Bea nae alu ai a Jefita ki he fānau a Amoni ke tau‘i akinautolu: bea nae tukuage akinautolu e Jihova ki hono nima.

33 Bea ne ta‘i akinautolu mei Aloeli, o hoko atu ki Minite, koe kolo e uofulu, o a‘u atu ki he toafa oe goue vaine, i he ta lahi aubito. Bea nae behe hono fakavaivai oe fānau a Amoni i he ao oe fānau a Isileli.

¶ 34 Bea nae ha‘u a Jefita ki hono fale i Misibi, bea, vakai, nae ha‘u kitua hono ofefine moe gaahi kihi‘i lali tatagi moe mee ke fakafetaulaki kiate ia: bea ko hono ofefine be taha ia; nae ikai hano foha be ofefine ka koia be.

35 Bea i he ene mamata kiate ia, naa ne haehae hono kofu, o ne behe, Oiaue, hoku ofefine! kuo ke fakavaivai aubito au, koe toko taha koe o kinautolu oku fakamamahi kiate au: he kuo faai hoku gutu kia Jihova, bea oku ikai teu faa foki kimui.

36 Bea nae behe eia kiate ia, A eku tamai, kabau kuo ke lea aki ho gutu kia Jihova, ke ke fai kiate au o hage koia kuo ha‘u mei ho gutu; he kuo fai e Jihova ae totogi maau ki ho gaahi fili, io, ae fānau a Amoni.

37 Bea behe eia ki he ene tamai, Tuku ke fai ae mea ni koeuhi ko au: tuku au i he mahina e ua, keu fealuaki i he gaahi mouga o tegihia hoku tāuboou, eau mo hoku kau fefine.

38 Bea nae behe eia, Alu. Bea naa ne fekau ia ke alu i he mahina e ua: bea alu ia mo hono kau fefine, o tegihia hono tāuboou i he gaahi mouga.

39 Bea i he gataaga oe mahina e ua, nae behe, nae liu mai ia ki he ene tamai, bea naa ne fai kiate ia o fakatatau ki he ene fuakava naa ne fai: bea nae ikai te ne ilo ha tagata.

40 Bea nae fai mau ae aga koia i Isileli, i he alu ae gaahi ofefine i Isileli i he aho e fa i he ta‘u kotoabe tuku fakaholo ke tegihia ae ofefine o Jefita koe tagata Kiliati.