¶ 1 BEA nae toki alu ai kitua ae fānau a Isileli, bea katoa fakataha ae kakai o loto taha, mei Tani o a‘u ki Beasiba, moe fonua ko Kiliati, kia Jihova i Misiba.

2 Bea nae ha‘u foki ae kakai malohi kotoabe, i he gaahi faahiga kotoabe o Isileli ki he fakataha oe kakai oe Otua, koe kau tagata tau e toko fa kilu nae too heleta.

3 (Bea nae fanogo ae fānau a Benijimani kuo alu hake ki Misiba ae fānau a Isileli.) Bea nae behe e he fānau a Isileli, Tala kiate kimautolu, nae fefe‘i ae agakovi ni?

4 Bea nae lea ae tagata Livai, aia koe unoho oe fefine nae fakabogi, o ne behe, Naaku hoko ki Kibea aia oku kau mo Benijimani, ko au mo hoku unoho, ke mau mohe.

5 Bea nae tuu hake ae kau tagata Kibea kiate au, o nau ohofi mo kabui ae fale i he bouli, o nau tokaga ke tamate‘i au: bea naa nau tohotoho a hoku unoho, bea ne mate ia.

6 Bea naaku too hoku unoho o tafatafa‘i, bea ave ia ki he fonua kotoabe oe tofia o Isileli: he kuo nau fai ae agahala moe mea kovi lahi i Isileli.

7 Vakai, koe fānau a Isileli akimoutolu kotoabe; mou fakaha i heni ho mou loto, mo hoo mou fakakaukau.

¶ 8 Bea nae tuu hake loto taha be ae kakai kotoabe, o behe, E ikai alu ha tau niihi ki fale, bea e ikai ha tau taha e afe ki hono fale.

9 Ka ko eni ae mea te tau fai ki Kibea; te tau fai ae talotalo o alu hake ki ai;

10 Bea te tau fili ae kau tagata e toko hogofulu mei he toko teau i he gaahi faahiga kotoabe o Isileli, moe toko teau i he toko afe, moe toko afe mei he toko mano kotoabe, koeuhi ke nau tokonaki meakai ki he kakai, koeuhi ka nau ka hoko ki Kibea o Benijimani, ke nau fai o fakatatau ki he agakovi kuo nau fai i Isileli.

11 Koia nae katoa ae kau tagata kotoabe o Isileli o tuu hake ki he kolo, o nau kau loto taha o hage koe tagata be taha.

¶ 12 Bea nae fekau e he gaahi faahiga o Isileli ae kau tagata ki he faahiga katoa o Benijimani, o behe, Koeha ae agakovi ni aia kuo fai iate kimoutolu?

13 Bea koeni, tuku mai kiate kimautolu ae kau tagata, ae fānau oe kovi, aia oku i Kibea, koeuhi ke mau tamate‘i akinautolu, kae fakagata ae kovi mei Isileli. Ka nae ikai tokaga e he fānau a Benijimani ki he lea a ho nau kaiga koe fānau a Isileli.

14 Ka nae fakakatoa fakataha akinautolu e he fānau a Benijimani mei he gaahi kolo ki Kibea, ke nau alu o tau‘i ae fānau a Isileli.

15 Bea nae lau ae fānau a Benijimani i he kuoga koia mei he gaahi kolo, koe toko ua mano moe toko ono afe, koe kau tagata nae too heleta, ka nae kehe ae kakai o Kibea, aia ko ho nau toko lahi koe kau tagata e toko fitugeau kuo fili.

16 Bea i he kakai ni kotoabe nae i ai ae kau tagata ogoogo e toko fitugeau nae nima hema; nae boto kotoabe akinautolu i he makata, bea naa moe laulahi o ha foi louulu e taha, nae ikai ke hala ai.

17 Bea nae lau hono toe oe kakai Isileli, kae tuku kehe a Benijimani, koe kau tagata e toko fa kilu nae faa too ae heleta; ko kinautolu ni kotoabe koe kau tagata tau.

¶ 18 Bea nae tuu hake ae fānau a Isileli, bea alu hake ki he fale oe Otua, o nau kole ae boto i he Otua, o behe, Kohai iate kimautolu e alu a muomua hake ki he tau o tuu hake ki he fānau a Benijimani? Bea behe e Jihova, Ke alu muomua a Juta.

19 Bea nae tuu hake ae fānau a Isileli i he abogibogi, bea teu tau ki Kibea.

20 Bea alu kitua ae kau tagata o Isileli ke tau‘i a Benijimani; bea nae fakanofo ae tau ae fānau a Isileli ke tau‘i akinautolu i Kibea.

21 Bea nae ha‘u kituaa ae fānau a Benijimani mei Kibea, o nau ta hifo ki he kelekele i he kau Isileli i he aho koia ae toko ua mano moe toko ua afe.

22 Bea nae fakaaiai akinautolu e he kau tagata Isileli, o toe fakalaga ae tau i he botu koia naa nau tali teuteu ai i he uluaki aho.

23 (Bea nae alu hake ae fānau a Isileli o tagi i he ao o Jihova o a‘u ki he efiafi, bea kole ae fakakaukau ia Jihova, o behe, Teu toe alu ke tau‘i a Benijimani ko hoku tokoua? Bea behe e Jihova, Alu hake o tau‘i ia.)

24 Bea nae unuunu atu ae fānau a Isileli ke tau‘i ae fānau a Benijimani i hono ua oe aho.

25 Bea nae alu kitua a Benijimani mei Kibea ke tau‘i akinautolu i hono ua oe aho, bea toe ta hifo ki he kelekele i he fānau a Isileli ae toko taha mano moe toko ua afe; koe kau too heleta akinautolu kotoabe.

¶ 26 Bea nae toki alu hake ae fānau kotoabe a Isileli, moe kakai kotoabe, o hoko ki he fale oe Otua, o tagi, o nau nofo i ai i he ao o Jihova, o aukai i he aho koia o a‘u ki he efiafi, bea nae atu ae gaahi feilaulau tutu moe gaahi feilaulau fakalelei i he ao o Jihova.

27 Bea nae fehui ae fānau a Isileli kia Jihova, (he nae i ai ae buha oe fuakava oe Otua i he gaahi aho koia.

28 Bea nae tuu i hono haohaoga o ia a Finiasi, koe foha o Eliesa, koe foha o Elone, i he gaahi aho koia,) o behe, Teu toe alu kitua ke tau‘i ae fānau a Benijimani ko hoku tokoua, be teu tukuā? Bea behe e Jihova, Alu hake; he teu tukuage akinautolu ki ho nima abogibogi.

29 Bea nae fakatoka ae malumu e Isileli ke takatakai a Kibea.

30 Bea nae alu hake ae fānau a Isileli ke tau‘i ae fānau a Benijimani i hono tolu oe aho, o nau fokotuu teuteu be akinautolu ki Kibea, o hage koia naa nau fai.

31 Bea nae alu kitua ae fānau a Benijimani ke tau‘i ae kakai, bea kuo matoho akinautolu mei he kolo: bea naa nau kamata teia ae kakai, o tamate‘i, o hage koe nau fuofua fai, i he gaahi hala lahi, (aia koe hala e taha ki he fale oe Otua, moe taha ki Kibea i he goue,) koe kau tagata Isileli e toko tolugofulu nai.

32 Bea behe e he fānau a Benijimani, Kuo ta hifo akinautolu i ho tau ao, o hage ko hono fuofua fai. Ka nae behe e he fānau a Isileli, Tau hola, bea toho aki akinautolu mei he kolo ki he gaahi hala lahi.

33 Bea nae tuu hake ae kau tagata kotoabe mei ho nau botu, bea tali tau be akinautolu i Beali‐tama: bea nae hiki ae malumu mei ho nau gaahi botu, io mei he gaahi goue mohuku o Kibea.

34 Bea naa nau ha‘u ke tau‘i a Kibea ae kau tagata fili e toko taha mano mei Isileli kotoabe, bea nae fakamanavahe ae tau: ka nae ikai te nau ilo kuo ofi ae kovi kiate kinautolu.

35 Bea nae teia a Benijimani e Jihova i he ao o Isileli: bea tamate‘i e he fānau a Isileli i he aho koia ae toko ua mano moe toko nima afe moe toko teau i he kakai Benijamani: nae too heleta akinautolu kotoabe.

36 Bea kuo mamata ae fānau a Benijimani kuo teia akinautolu: he nae matamata hola ae kau tagata Isileli i he ao oe kau Benijimani, koeuhi naa nau falala ki he malumu nae toka aia naa nau tuku o ofi ki Kibea.

37 Bea nae fai fakatootoo e he malumu, o oho atu ki Kibea; bea alu atu be ae malumu, o teia ae kolo kotoabe aki ae mata oe heleta.

38 Bea koeni, nae ai ae fakailoga nae fokotuu e he kau tagata Isileli moe malumu, koeuhi ke nau tutu ae afi ke ulo lahi moe ohuafi ke alu hake mei he kolo.

39 Bea i he kamata hola a Isileli i he tau, bea kamata ta‘i akinautolu e Benijimani, bea tamate‘i i he kau tagata Isileli ae kau tagata e toko tolugofulu nai: he naa nau behe, Koe mooni kuo ta hifo akinautolu i ho tau ao, o hage koe uluaki tau.

40 Bea i he kamata alu hake ae ulo afi mei he kolo moe gaahi bou ohuafi, bea tagaki kimui ae kau Benijimani o jio kimui iate kinautolu, bea vakai, kuo alu hake ki lagi ae ulo oe kolo.

41 Bea i he tafoki ae kakai Isileli, nae ofo ae kau Benijimani: he naa nau vakai kuo hoko ae kovi kiate kinautolu.

42 Koia naa nau fulitua ki he kau tagata Isileli i he hala ki he toafa; ka nae lava‘i akinautolu e he tau; bea mo kinautolu nae hola kitua mei he gaahi kolo naa nau tamate‘i i ho nau lotolotoga.

43 Nae behe e nau akilotoa ae kau Benijimani o takatakai, bea tuli akinautolu, o malakaki faigofua hifo akinautolu o hagatonu ki Kibea o haga ki he hoboagalaa.

44 Bea nae to ai ae kau tagata Benijimani koe toko taha mano moe toko valu afe; koe kau tagata to‘a akinautolu kotoabe.

45 Bea naa nau tafoki o hola atu ki he toafa ki he maka ko Limoni: bea naa nau tamate‘i i he gaahi hala lahi ae kau tagata e toko nima afe; bea nae tuli malohi akinautolu o a‘u ki Kitomi, bea nae tamate‘i ae toko ua afe o kinautolu.

46 Koia ko kinautolu kotoabe nae to i he kakai Benijimani i he aho koia koe kau tagata e toko ua mano, moe toko nima afe aia nae too heleta: koe kau tagata to‘a akinautolu kotoabe.

47 Ka nae tafoki ae kau tagata e toko onogeau o hola ki he toafa o a‘u ki he maka ko Limoni, bea ne nau nofo i he maka ko Limoni i he mahina e fa.

48 Bea nae toe tafoki kimui ae kau tagata o Isileli ki he fānau a Benijimani, o teia akinautolu aki ae mata oe heleta, ae kau tagata oe kolo kotoabe, moe faga manu, moe mea kotoabe naa nau ilo: bea naa nau tutu foki ae kolo kotoabe naa nau hoko ki ai aki ae afi.