¶ 1 BEA nae behe e he kau tagata o Ifalemi kiate ia, Koeha ae mea ni kuo ke fai, nae ikai te ke ui akimautolu, i hoo alu ke tau‘i ae kakai Mitiane? bea naa nau lea malohi kiate ia.

2 Bea behe eia kiate kinautolu, Koeha ia kuo fai e au, ke fakatatau ki he mea kuo fai ekimoutolu? Ikai kuo lelei lahi hake ae tufi oe toega kalebi o Ifalemi i he ututa‘u katoa a Abiesa?

3 Kuo tukuage e he Otua ki ho mou nima ae ogo eiki o Mitiane ko Olebi mo Siibi: bea koeha ia teu mafai e au, ke fakatatau mo kimoutolu? Bea hili ene lea ko ia kiate kinautolu, nae oji leva e nau ita kiate ia.

¶ 4 Bea nae ha‘u a Kitione ki Joatani, bea alu ki he kau vai e taha, aia, moe kau tagata e toko tolugeau nae iate ia, nae vaivai kae tuli be.

5 Bea behe eia ki he kau tagata o Sukote, Oku ou kole kiate kimoutolu, tuku mai ae gaahi foi ma ki he kakai oku muimui iate au, he oku nau vaivai, bea oku ou tuli kia Siba mo Salimuna, koe ogo tu‘i o Mitiane.

¶ 6 Bea nae behe e he houeiki o Sukote, He oku i ho nima oou ae nima o Siba mo Salimuna koeuhi ke mau atu ae ma ki hoo kau tau?

7 Bea nae behe e Kitione, Koia i he tuku e Jihova ki hoku nima a Siba mo Salimuna, teu toki haha ho mou kakano aki ae gaahi akau talatala oe toafa moe talatalaamoa.

¶ 8 Bea nae alu hake mei ai ia ki Benieli, o ne lea tatau be kiate kinautolu: bea nae tali ia e he kau tagata o Benieli o hage ko hono tali ia e he kau tagata a Sukote.

9 Bea nae lea ia ki he kau tagata o Benieli, o behe, I he eku toe ha‘u i he melino, teu holoki hifo ae fale maoluga ni.

¶ 10 Bea nae i Kalikoa a Siba mo Salimuna, mo ho nau gaahi tau, koe kau tagata e toko taha mano moe toko nima afe nai, ko hono katoa ia nae toe i he gaahi tau oe fānau kotoabe oe botu hahake: he nae to ae toko taha kilu moe toko ua mano i he kau tagata nae unuhi ae heleta.

¶ 11 Be nae alu hake a Kitione i he hala o kinautolu nae nofo i he gaahi fale fehikitaki i he botu hahake ki Noba mo Jokiba, o ne teia ae tau: he nae nofo fiemalie be ae tau.

12 Bea i he hola a Siba mo Salimuna, nae tuli eia akinaua, o ne ma‘u ae ogo tu‘i o Mitiane, ko Siba mo Salimuna, o ne veuveuki ae tau kotoa.

¶ 13 Bea nae liu mai a Kitione koe foha o Joasi mei he tau oku teeki ai hobo hake ae laa.

14 Bea naa ne buke ae talavou i he kakai o Sukote, o ne fehui iate ia: bea naa ne fakaha kiate ia ae houeiki o Sukote, moe kau mātua o ia, io ae kau tagata e toko fitugofulu ma toko fitu.

15 Bea nae ha‘u ia ki he kau tagata o Sukote, o ne behe, Vakai kia Siba mo Salimuna, aia naa mou manuki ai kiate au, o behe, Ko eni, he oku i ho nima ae nima o Siba mo Salimuna, koeuhi ke mau atu ai ha ma ki ho kau tagata oku vaivai?

16 Bea naa ne ave ae kau mātua oe kolo, moe gaahi akau talatala oe toafa, moe talatalaamoa, bea ne ako aki ia ae kau tagata oe kolo.

17 Bea naa ne ta o holoki hifo ae fale maoluga o Benieli, o ne tamate‘i ae kau tagata oe kolo.

¶ 18 Bea nae behe eia kia Siba mo Salimuna, Koe kau tagata fe akinautolu naa mou tamate‘i i Teboa? Bea naa na beheage, Hage ko koe, nae behe be akinautolu: nae galigali tu‘i akinautolu taki taha kotoabe.

19 Bea behe eia, Ko hoku gaahi kaiga akinautolu, io koe gaahi fānau a eku fa‘e: oku moui a Jihova, ka ne mo fakamoui akinautolu, behe e ikai teu tamate‘i akimoua.

20 Bea behe eia kia Jesa ko hono uluaki tubu, Tuu hake, o tamate‘i akinaua, Ka nae ikai unuhi ene heleta e he tamajii: he nae manavahe ia, koeuhi nae kei jii ia.

21 Bea nae behe e Siba mo Salimuna, Tuu akoe, o ta‘i akimaua: he oku hage koe tagata oku behe ene malohi. Bea nae tuu a Kitione o ne tamate‘i a Siba mo Salimuna; o ne too o ave ae gaahi teuga nae i he kia o ena ogo kameli.

¶ 22 Bea nae behe ai e he kau tagata o Isileli kia Kitione, Ke ke bule koe kiate kimautolu, akoe mo ho foha, moe foha o ho foha: he kuo ke fakamoui akimautolu mei he nima o Mitiane.

23 Bea nae behe e Kitione kiate kinautolu, E ikai teu bule kiate kimoutolu, bea e ikai bule a hoku foha kiate kimoutolu: ko Jihova koia ia e bule kiate kimoutolu.

¶ 24 Bea nae behe e Kitione kiate kinautolu, Oku ou fie fai atu eku kole kiate kimoutolu, koeuhi ke mou tuku mai kiate au ae gaahi mama, kuo mou ma‘u i he vete. (He naa nau ai ae hau koula, he koe kau Isimeli akinautolu.)

25 Bea nae beheage ekinautolu, Te mau atu fiemalie be ia. Bea naa nau folahi ae kofu bea nae ji ki ai taki taha e he tagata ae gaahi hau mei he ene mea.

26 Bea ko hono mamafa oe gaahi hau koula aia naa ne kole, koe  sikeli koula e taha afe moe fitugeau: ka oku lau kehe ae gaahi teuga, moe gaahi kahoa, moe gaahi kofu lanumoana nae i he ogo tu‘i o Mitiane, bea moe gaahi kahoa nae i he kia oe nau faga kameli.

27 Bea nae gaohi aki ia e Kitione ae efoti bea nae tuku ia ki he kolo, aia ko Ofila: bea nae alu ki ai a Isileli kotoabe o fai agahala: bea nae hoko ae mea koia koe tauhele kia Kitione, bea ki hono fale.

¶ 28 Nae behe ae fakamoulaloa o Mitiane i he ao oe fānau a Isileli, koia nae ikai te nau toe hiki hake ho nau ulu. Bea nae nofo fiemalie be ae fonua i he ta‘u e fagofulu i he gaahi aho o Kitione.

¶ 29 Bea nae alu a Jelubeali koe foha o Joasi o nofo i hono fale oona.

30 Bea nae ia Kitione ae foha e toko fitugofulu nae tubu iate ia: he nae toko lahi hono unoho.

31 Bea nae fanau kiate ia e he kaunaga nae i Sikemi ae tama, aia naa ne ui ko Abimileki.

32 Bea nae bekia a Kitione koe foha o Joasi kuo a‘u a hono ta‘u, bea nae tanu ia i he faitoka o ene tamai ko Joasi, i Ofila oe kakai Abiesa.

33 Bea kuo bekia leva a Kitione nae hoko o behe, nae toe tafoki ae fānau a Isileli, o nau muimui holi kovi kia Beali, o nau otua aki a Beali‐biliti.

34 Bea nae ikai manatu‘i e he fānau a Isileli kia Jihova ko ho nau Otua, aia naa ne fakamoui akinautolu mei he nima o ho nau gaahi fili i he botu kotoabe.

35 Bea nae ikai te nau fakaha ae ofa ki he fale o Jelubeali, aia ko Kitione, o hage koe gaue lelei aia nae fakaha eia ki Isileli.