¶ 1 BEA nae fuakava ae kau tagata Isileli i Misiba, o behe, Oua naa ai ha toko taha iate kitautolu e atu hono ofefine kia Benijimani ke nau unoho.

2 Bea nae ha‘u ae kakai ki he fale oe Otua, bea nofo i ai o a‘u ki he efiafi, bea nae hiki ho nau le‘o, o tagi mamahi;

3 Bea naa nau behe, E Jihova koe Otua o Isileli, koeha kuo hoko ai ae mea ni i Isileli, koeuhi ke mole ai he aho ni ha faahiga i Isileli?

4 Bea nae hoko o behe i he bogibogi hake, nae tuu ai ae kakai, bea fokotuu i ai ae feilaulauaga, bea nae atu ai ae gaahi feilaulau tutu moe gaahi feilaulau fakalelei.

5 Bea behe e he fānau a Isileli, Kohai ia i he gaahi faahiga o Isileli nae ikai alu hake moe fakataha lahi kia Jihova? He naa nau fai ae fuakava lahi koeuhi koia nae ikai alu hake kia Jihova ki Misiba, o behe, Koe mooni e tamate‘i ia.

6 Bea nae fakatomala e he fānau a Isileli koeuhi ko Benijimani ko ho nau tokoua, o nau behe, Kuo motuhi ha faahiga e taha mei Isileli he aho ni.

7 Koeha te tau fai koeuhi ke ma‘u ho nau unoho ekinautolu oku toe, he kuo tau fuakava ia Jihova e ikai te tau foaki ke nau unoho mo ho tau gaahi ofefine?

¶ 8 Bea naa nau behe, Kohai ha toko taha oe faahiga o Isileli nae ikai alu hake ki Misiba kia Jihova? Bea, vakai, nae ikai ha‘u ha toko taha ki he abitaga mei Jebesi‐kiliati ki he fakataha lahi.

9 He nae lau ae kakai, bea, vakai, nae ikai i ai ha taha mei he kakai o Jebesi‐kiliati.

10 Bea nae fekau ki ai e he fakataha lahi ae kau tagata e toko taha mano nae malohi lahi, bea nae fekau behe kiate kinautolu, Alu, o ta‘i ae kakai o Jebesi‐kiliati aki ae mata oe heleta, ae kau fefine moe fānau.

11 Bea koe mea ni ke mou fai, Te mou fakaauha aubito ae tagata kotoabe, moe fefine kotoabe kuo mohe moe tagata.

12 Bea naa nau ilo i he kakai o Jebesi‐kiliati ae kau taahine tāuboou e toko fageau, nae ikai te nau ilo ae tagata i he mohe moe tagata: bea naa nau omi akinautolu ki he abitaga ki Sailo, aia oku i he fonua ko Kenani.

13 Bea nae ave ae lea mei he fakataha lahi ki he fānau a Benijimani, nae  nofo i he maka ko Limoni, bea koe lea fakamelino ia kiate kinautolu.

14 Bea nae toe ha‘u a Benijimani i he kuoga koia; bea naa nau atu ho nau gaahi unoho aia kuo nau fakamoui i he kau fefine o Jebesi‐kiliati: ka nae ikai te nau totofu.

15 Bea nae fakatomala ae kakai ia Benijimani, koeuhi kuo fai e Jihova ha tautea i he gaahi faahiga o Isileli.

¶ 16 Bea nae toki behe e he kau mātua oe fakataha, Koeha ha mea te tau fai koeuhi ke ma‘u unoho akinautolu oku toe, koeuhi kuo auha ae kau fefine mei a Benijimani?

17 Bea naa nau behe, Ke ai ha tofia moo nautolu kuo hao ia Benijimani, koeuhi ke oua naa auha ha faahiga e taha i Isileli.

18 Ka oku mooni oku ikai gofua ke tau atu ho nau unoho i ho tau gaahi ofefine: he kuo fuakava ae fānau a Isileli, o behe, Ke malaia ia aia oku ne foaki ha unoho kia Benijimani.

19 Bea naa nau behe, Vakai, oku ai ae katoaga a Jihova oku fai i he ta‘u kotoabe i Sailo, i he botu fakatokelau o Beteli, i he botu hahake i he hala lahi oku alu hake mei Beteli ki Sikemi, bea i he botu toga o Lebona.

20 Koia naa nau fekau ai ki he fānau a Benijimani, o behe, Alu o toitoi o tatali i he gaahi goue vaine;

21 Bea jio, bea vakai, kabau oku ha‘u ae gaahi ofefine o Sailo ke mee i he gaahi mee, mou ha‘u ai mei he gaahi goue vaine, o buke ke taki taha ho mou unoho i he gaahi ofefine o Sailo, bea mou alu ki he fonua o Benijimani.

22 Bea ka ha‘u e nau gaahi tamai, be ko ho nau gaahi tuogaane ke eke ia kiate kimautolu, te mau behe kiate kinautolu, Mou fai ofa kiate kinautolu koeuhi ko kimautolu: koeuhi nae ikai te mau fakatoe kiate kinautolu taki taha hono unoho i he tau: bea nae ikai te mou foaki akinautolu i he kuoga ni, ke mou halaia ai.

23 Bea nae fai behe e he fānau a Benijimani, o fili ho nau unoho o fakatatau ki ho nau lau, meiate kinautolu nae mee, akinautolu naa nau buke: bea naa nau alu o toe hoko ki ho nau tofia, o toe teuteu e nau gaahi, kolo, bea nofo ki ai.

24 Bea nae alu mei ai ae fānau a Isileli i he kuoga koia, ae tagata taki taha ki hono faahiga bea ki hono kaiga, bea nae alu mei ai ae tagata taki taha ki hono tofia.

25 I he gaahi aho koia nae ikai ha tu‘i i Isileli: ka nae fai e he tagata kotoabe aia nae lelei i hono mata oona.