¶ 1 I HE gaahi aho koia nae ikai ha tu‘i i Isileli: bea i he gaahi aho koia nae kumi e he faahiga o Tani ha nau tofia ke nau nofo ai; koeuhi nae teeki ai ke to ho nau tofia kiate kiuautolu i he gaahi faahiga o Isileli, o a‘u ki he kuoga koia.

2 Bea nae fekau e he fānau a Tani ae kau tagata e toko nima i ho nau faahiga mei ho nau fonua, ae kau tagata to‘a, mei Sola bea mei Esitaoli, ke nau vakai ae fonua, bea ke mataki‘i ia; bea naa nau behe kiate kinautolu, Alu, bea mataki‘i ae fonua: bea i he e nau hoko ki he mouga o Ifalemi, ki he fale o Maika, naa nau mohe i ai.

3 Bea i he e nau ofi ki he fale o Maika, naa nau ilo ae le‘o oe tagata talavou koe Livai: bea naa nau afe ki ai, o nau behe kiate ia, Kohai naa ne omi koe ki heni? bea koeha oku ke fai i heni?

4 Bea nae behe eia kiate kinautolu, Oku behe be, mo behe be e Maika kiate au, bea kuo ne no au kiate ia aki ae totogi, bea ko hono taulaeiki au.

5 Bea naa nau behe kiate ia, Ko eni oku mau kole kiate koe, ke ke kole ki he Otua ae boto, koeuhi ke mau ilo be e monuia ho mau hala aia oku mau alu ai.

6 Bea nae behe e he taulaeiki, Mou alu fiemalie be: oku afio e Jihova a ho mou hala aia oku mou alu ai.

¶ 7 Bea nae toki alu ai ae kau tagata e toko nima o nau hoko ki Leisi, o mamata ki he kakai nae i ai, moe nau nofo noa ai be, o hage koe kau Saitoni, o fakafiemalie be mo hamumunoa; bea nae ikai ha fakamāu i he fonua ke fakama akinautolu i ha mea e taha; bea naa nau mamao mei he kau Saitoni; bea nae ikai te nau feogoogo‘i mo ha kakai.

8 Bea naa nau ha‘u ki ho nau kiega ki Sola mo Esitaoli: bea behe e ho nau kiega kiate kinautolu, Koeha hoo mou lea?

9 Bea naa nau behe, Tuu hake koeuhi ke tau alu hake kiate kinautolu: he kuo mau mamata ki he fonua, bea, vakai, oku lelei aubito ia: bea oku mou taegau‘e? oua naa mou fakabikobiko ke alu, bea ke hoko atu bea ma‘u ae fonua.

10 Ka mou ka alu, te mou hoko ki he kakai oku nofo noa be, bea ki he fonua lahi: he kuo foaki ia e he Otua ki ho mou nima; koe botu oku ikai majiva i ha mea e taha oku i mamani.

¶ 11 Bea nae alu mei ai i he fānau oe faahiga o Tani, mei Sola bea mei Esitaoli, ae kau tagata e toko onogeau nae too mahafu tau.

12 Bea naa nau alu hake, o abitaga i Keajajialimi, i Juta: koia naa nau ui ai ae botu koia ko Mahane‐tani o a‘u ki he aho ni: vakai, oku tuu ia itua Keaja‐jialimi.

13 Bea naa nau alu mei ai ki he mouga ko Ifalemi, o hoko atu ki he fale o Maika.

¶ 14 Bea nae lea ae kau tagata e toko nima nae alu ke mataki‘i ae fonua ko Leisi, o nau behe ki ho nau kaiga, Oku mou ilo oku i he gaahi fale ni ae efoti, moe tamabua, moe mea fakatātā kuo ta moe fakatātā kuo haka? bea ko eni mou fakakaukau be koeha te mou fai.

15 Bea naa nau afe ki ai, bea hoko ki he fale oe talavou koe Livai, io ki he fale o Maika o nau fetaba kiate ia.

16 Bea koe kau tagata e toko onogeau nae too mahafu tau aia nae i he fānau a Tani, naa nau tuu i he huaga oe mataba.

17 Bea nae alu hake o hu ki ai, ae kau tagata e toko nima, nae alu ke mataki‘i ae fonua, o  nau too ae mea fakatātā kuo ta moe efoti, moe tamabua, moe fakatātā kuo haka; bea nae tuu ae taulaeiki i he huaga oe mataba fakataha moe kau tagata e toko onogeau aia nae too mahafu tau.

18 Bea nae alu akinautolu ki he fale o Maika, bea omi mei ai ae mea fakatātā kuo ta, moe efoti, moe tamabua, moe fakatātā kuo haka. Bea behe e he taulaeiki kiate kinautolu, Koeha oku mou fai?

19 Bea naa nau behe kiate ia, Ke ke logo be koe; ai ho nima ki ho gutu, bea ke ha‘u ke tau o, bea ke hoko kiate kimautolu koe tamai moe taulaeiki: he oku lelei kiate koe ke nofo koe taulaeiki ki he fale oe tagata be taha, be ko hoo hoko koe taulaeiki ki he faahiga moe fale o Isileli?

20 Bea nae fiefia ae loto oe taulaeiki, bea nae too eia ae efoti, moe tamabua, moe mea fakatātā kuo ta, bea alu ia i he lotolotoga oe kakai.

21 Koia naa nau tafoki o alu ai, bea nae fakaheka ae fānau jii ki he gaahi saliote moe faga manu ke muomua iate kinautolu.

¶ 22 Bea i he e nau mamao atu mei he fale o Maika, nae katoa ae kau tagata nae i he gaahi fale ofi ki he fale o Maika, o nau tuli o hoko atu ki he fānau a Tani.

23 Bea naa nau tagi ki he fānau a Tani. Bea naa nau tagaki kimui, o behe kia Maika, Koeha aau, oku ke ha‘u ai moe kakai behe?

24 Bea nae behe eia, Kuo mou too o ave hoku gaahi otua naaku gaohi, bea moe taulaeiki, bea kuo mou alu: bea koeha oku toe iate au? bea koeha ia oku mou lea ai kiate au, Koeha aau?

25 Bea nae behe e he fānau a Tani kiate ia, Oua naa ogona ho le‘o iate kimautolu telia naa oho atu kiate koe ae kau jiana loto ita, bea e mole iate koe hoo moui, fakataha moe moui a ho kau nofoaga.

26 Bea nae alu ae fānau a Tani i ho nau hala: bea i he mamata a Maika ki he e nau fai malohi lahi kiate ia, nae tafoki ia o alu ki hono fale.

27 Bea naa nau ave ae gaahi mea nae gaohi e Maika, moe taulaeiki naa ne ma‘u, o nau hoko ki Leisi, ki he kakai nae nofo fiemalie be mo hamumunoa: bea naa nau teia akinautolu aki ae mata oe heleta, bea nae tutu e nau kolo aki ae afi.

28 Bea nae ikai ha fakamoui, he nae mamao ia mei Saitoni, bea nae ikai te nau kau mo ha kakai; bea nae tuu ia i he telea aia oku ofi ki Bete‐lehobi. Bea naa nau laga ae kolo o nofo i ai.

29 Bea naa nau ui ae higoa oe kolo ko Tani, o hage koe higoa o Tani koe nau tamai, aia nae fanau kia Isileli: ka koe mooni nae fuofua ui ae kolo koia ko Leisi.

¶ 30 Bea nae fokotuu hake e he fānau a Tani ae tamabua fakatātā: bea ko Jonatani, koe foha o Kesomi, koe foha o Manase, koia mo hono gaahi foha nae hoko koe kau taulaeiki ki he faahiga o Tani o a‘u ki he aho oe fakabobula‘i ae fonua.

31 Bea naa nau fokotuu hake ae tamabua nae ta e Maika, aia naa ne gaohi, i he kuoga kotoabe nae nofo ai ae fale oe Otua i Soulo.