¶ 1 BEA nae alu hifo a Samisone ki Timinate, o ne mamata i Timinate ki ha fefine i he gaahi ofefine oe kau Filisitia.

2 Bea nae ha‘u ia, o tala ki he ene tamai mo ene fa‘e, o ne behe, Kuou mamata i Timinate ki he fefine i he gaahi ofefine oe kau Filisitia: bea koeni, ke mo ma‘u ia mooku ke ma unoho.

3 Bea nae behe ai e he ene tamai mo ene fa‘e kiate ia, Oku ikai koa ha fefine i he gaahi ofefine o ho kaiga, be i hoku kakai kotoabe, kuo ke alu ai ke fili ha unoho mei he kakai Filisitia taekamu? Bea nae behe e Samisone ki he ene tamai, Ke ke ma‘u ia mooku; he oku lelei ia kiate au.

4 Ka nae ikai ilo e he ene tamai mo ene fa‘e nae ue‘i ia e Jihova, koeuhi ke ne ilo ai ha mea ke tauhele‘i ae kau Filisitia: he nae bule ae kau Filisitia i he kuoga koia ki Isileli.

¶ 5 Bea nae alu hifo a Samisone, mo ene tamai mo ene fa‘e, ki Timinate, bea nau hoko ki he gaahi goue vaine i Timinate: bea, vakai, naa ne fetaulaki moe laione mui aia nae oho gugulu age kiate ia.

6 Bea nae hoko malohi lahi ae Laumalie o Jihova kiate ia, bea ne haehae  ae laione o hage ko ene haehae ae uhiki‘i koji, bea nae ikai ha mea i hono nima: ka nae ikai te ne fakaha ki he ene tamai be ko ene fa‘e, aia kuo ne fai.

7 Bea nae alu hifo ia, bea alea ia moe fefine: bea nae fiemalie lahi a Samisone iate ia.

¶ 8 Bea hili ae gaahi aho niihi, nae toe liu mai ia ke ne ma‘u ia, bea afe ia mei he hala ke mamata ki he agaaga oe laione: bea, vakai, nae i ai ae fuifui bi moe honi i he agaaga oe laione.

9 Bea nae too eia mei ai ki hono nima, bea alu be mo kai, be ha‘u ia ki he ene tamai mo ene fa‘e, bea ne atu kiate kinaua, bea ne na kai: ka nae ikai te ne tala kiate kinaua kuo ne too ae honi mei he agaaga oe laione.

¶ 10 Bea nae alu hifo ene tamai ki he fefine: bea nae fai i ai e Samisone ae katoaga: he nae behe be ae aga oe kau talavou.

11 Bea i he e nau mamata kiate ia, bea behe, naa nau omi ae kau tagata e toko tolugofulu ko ene kaumea.

¶ 12 Bea nae behe e Samisone kiate kinautolu, Koeni, teu tuku atu ae lea oku fufu hono uhiga kiate kimoutolu: kabau te mou fakaha mooni ia kiate au i hono aho fitu oe katoaga, o ilo ia, teu atu kiate kimoutolu ae kofu loto e tolugofulu moe kofu ki he jino kotoa e tolugofulu.

13 Bea kabau e ikai te mou faa fakana ia kiate au, te mou tuku mai kiate au ae kofu loto e tolugofulu, moe kofu kotoa e tolugofulu. Bea naa nau behe kiate ia, Tuku mai hoo lea oku uhiga fufu, koeuhi ke mau fanogo ki ai.

14 Bea behe eia kiate kinautolu, Nae tubu ae mea kai mei he uakai, bea nae tubu mei he malohi ae mea melie. Bea nae oji ae aho e tolu moe ikai te nau faa fakauhiga‘i ae lea.

15 Bea i hono fitu oe aho, nae behe, naa nau tala ki he unoho o Samisone, o behe, Fakakolekole ki ho unoho, koeuhi ke ne fakaha kiate kimautolu ae lea, telia naa mau tutu koe moe fale o hoo tamai aki ae afi: he kuo mou talia akimautolu ke toe too be e mau mea? ikai oku behe?

16 Bea nae tagi ae unoho o Samisone i hono ao, o ne behe, Oku ke fehia be kiate au, bea oku ikai te ke ofa kiate au: kuo ke tuku atu ae lea ki he fānau a hoku kakai, bea oku teeki ai te ke tala ia kiate au. Bea behe eia kiate ia, Vakai, nae ikai teu tala ia ki he eku tamai mo eku fa‘e, bea e lelei eku tala ia kiate koe?

17 Bea nae tagi be ia i hono ao, i hono toega aho oe nau katoaga: bea hoko ki hono fitu oe aho, bea behe, naa ne tala ia kiate ia, he nae fakafiu fakamamahi ia kiate ia: bea nae fakaha eia ae lea mo hono uhiga fufu ki he fānau a hono kakai.

18 Bea lea kiate ia e he kau tagata oe kolo i hono fitu oe aho, i he teeki ai to ae laa, o behe, Koeha oku melie lahi i he honi? bea koeha oku malohi hake i he laione? Bea behe eia kiate kinautolu, Ka ne taeoua hoo mou keli mo eku bulu fefine, behe ne ikai te mou ilo eku lea mo hono uhiga fufu.

¶ 19 Bea nae hoko malohi ae Laumalie o Jihova kiate ia, bea alu hifo ia ki Asikeloni, o ne tamate‘i ae kau tagata iate kinautolu e toko tolugofulu, bea nae too eia ho nau gaahi kofu, o atu ae gaahi kofu kiate kinautolu nae fakaha ene lea fufu. Bea nae tubu ai ene ita, bea alu hake ai ia ki he fale e ene tamai.

20 Ka nae atu ae unoho o Samisone ki he ene kaumea, aia naa ne faaki ki ai ko hono kaiga.