¶ 1 BEA nae toe fakalahi ae fai kovi e he fānau a Isileli i he ao o Jihova; bea nae tuku akinautolu e Jihova ki he nima oe kakai Filisitia i he ta‘u e fagofulu.

¶ 2 Bea nae ai ae tagata o Sola, i he faahiga o Tani ko Manoa hono higoa; bea nae baa a hono unoho, o ikai fanau.

3 Bea nae fakahāhā ae agelo a Jihova ki he fefine, o ne behe kiate ia, Koeni, vakai, oku ke baa, oku ikai te ke fanau: ka te ke feitama, bea fanau‘i ae tama.

4 Bea koeni, oku ou kole kiate koe, ke ke vakai, bea oua naa ke inu uaine be ha inu malohi, bea oua naa ke kai ha mea taemaa:

5 Vakai, te ke feitama koe, bea fanau‘i ae tama; bea oua naa ai ha tele ki hono ulu: koeuhi ke hoko ia koe taha fakamavahe ia ki he Otua mei he manāva: bea e kamata eia ke fakamoui a Isileli mei he nima oe kau Filisitia.

¶ 6 Bea nae ha‘u ai ae fefine o tala ki hono unoho, o behe, Nae ha‘u ae tagata ae Otua kiate au, bea nae tatau hono mata moe mata oe agelo ae Otua, nae fakamanavahe: ka nae ikai teu fehui be ne ha‘u meife ia, bea nae ikai te ne tala mai hono higoa:

7 Ka nae behe eia kiate au, Vakai, te ke feitama, bea fanau‘i ae tama; bea koeni, oua naa ke inu uaine be ha inu malohi, bea oua naa ke kai ha mea taemaa: koeuhi e fakamavahe ae tama ki he Otua mei he manāva o a‘u ki he aho o ene bekia.

¶ 8 Bea nae toki kole fakamatoato e Manoa kia Jihova, o behe, E hoku Eiki, ke ke tuku ke toe ha‘u ae tagata ae Otua aia naa ke fekau kiate kimaua, bea ako kiate kimaua aia te ma fai ki he tamajii aia e fanau‘i.

9 Bea nae ogo‘i e he Otua ae le‘o o Manoa; bea nae toe ha‘u ae agelo ae Otua ki he fefine i he ene nofo i he goue: ka nae ikai iate ia a Manoa.

10 Bea nae fakatootoo e he fefine bea lele o fakaha ki hono unoho, o ne behe kiate ia, Vakai, kuo fakaha kiate au ae tagata, aia nae ha‘u kiate au i he aho e taha.

11 Bea nae tuu hake a Manoa, bea alu mo hono unoho, o na hoko atu ki he tagata, bea ne behe kiate ia, Ko koe ae tagata nae lea ki he fefine? Bea behe eia, Ko au.

12 Bea nae behe e Manoa, Koeni ke fakatonutonu hoo gaahi lea. E fefe e ma gaohi ae tamajii, bea koeha te ma fai kiate ia?

13 Bea nae behe e he agelo a Jihova kia Manoa, Ke tokaga ae fefine ki he gaahi mea kotoabe naaku tala kiate ia.

14 Ke oua naa kai eia ha mea e taha oku tubu i he vaine, bea oua naa tuku ia ke inu uaine, be ha inu malohi, be kai ha mea e taha oku taemaa: ke tokaga ia ki he mea kotoabe naaku fekau kiate ia.

¶ 15 Bea nae behe e Manoa ki he agelo a Jihova, Oku ou kole kiate koe, tuku ke ma taofi koe, kae oua ke ma teu maau ha uhiki‘i manu.

16 Bea behe e he agelo a Jihova kia Manoa, Ne ogo a hoo taofi au, ka e ikai teu kai i hoo ma: bea kabau oku ke fie atu ha feilaulau tutu, oku totonu ke ke atu ia kia Jihova. He nae ikai ilo e Manoa koe agelo ia a Jihova.

17 Bea nae behe e Manoa ki he agelo a Jihova, Kohai ho higoa, koeuhi oka hoko hono fakamooni o hoo gaahi lea ke mau fakaogolelei koe?

18 Bea nae behe e he agelo a Jihova kiate ia, Koeha oku ke fehui ai ki hoku higoa, kae oji oku fufu ia?

19 Bea nae omi e Manoa ae uhiki‘i manu moe feilaulau meakai, bea ne atu ia kia Jihova i he fuga maka: bea nae fai mea fakaofo e he agelo: bea nae mamata ki ai a Manoa mo hono unoho.

20 Bea nae hoko o behe, i he alu hake ki lagi ae ulo afi mei he fuga feilaulauaga, nae haele hake ae agelo a Jihova i he ulo afi mei he fuga feilaulauaga. Bea nae mamata ki ai a Manoa mo hono unoho, bea naa na to ki ho na mata ki he kelekele.

21 Ka nae ikai toe fakahāhā ae agelo a Jihova kia Manoa be ki hono unoho. Bea nae toki ilo ai e Manoa koe agelo ia a Jihova.

22 Bea nae behe e Manoa ki hono unoho, Koe mooni te ta mate, koeuhi kuo ta mamata ki he Otua.

23 Ka nae lea hono unoho kiate ia, Ka ne finagalo a Jihova ke tamate‘i akitaua, behe ne ikai ma‘u eia ae feilaulau tutu, moe feilaulau meakai i ho ta nima, bea e ikai foki te ne fakaha ae gaahi mea ni kiate kitaua, bea e ikai foki te ne fai ha gaahi tala behe kiate kitaua i he kuoga behe.

¶ 24 Bea nae fanau e he fefine ae tama, bea nae ui hono higoa ko Samisone: bea nae tubu be ae tama, bea tabuaki‘i ia e Jihova.

25 Bea nae kamata ue‘i ia e he Laumalie o Jihova i he kuoga niihi i he abitaga o Tani i he vahaa o Sola mo Esitaoli.