Koe Tohi oe Kau Fakamau

¶ 1 BEA hili ae bekia a Josiua nae hoko o behe, nae fehui e he fānau a Isileli kia Jihova, o behe, Kohai iate kimautolu e alu muomua hake ki he kau Kenani ke tau‘i akinautolu?

2 Bea nae folofola a Jihova, Ke alu hake a Juta: vakai, kuou tukuage ae fonua ki hono nima.

3 Bea nae lea a Juta ki hono tokoua ko Simione, o behe, Ha‘u ke ta o mo koe ki hoku tofia, koeuhi ke ta tau‘i ae kau Kenani; bea teu alu mo koe foki ki ho tofia. Bea nae alu a Simione mo ia.

4 Bea nae alu hake a Juta: bea nae tukuage e Jihova ae kau Kenani moe kau Belesi ki ho nau nima: bea naa nau tamate‘i iate kinautolu i Biseki koe kau tagata e toko taha mano.

5 Bea naa nau ilo a Atoni‐biseki i Biseki: bea naa nau tau‘i ia, bea naa nau tamate‘i ae kau Kenani moe kau Belesi.

6 Ka nae hola a Atoni‐biseki; bea naa nau tuli o ma‘u ia, o nau tutuu hono ogo motua nima mo hono motua va‘e.

7 Bea nae behe e Atoni‐biseki, Koe tu‘i e toko fitugofulu, nae tutuu ho nau gaahi motua nima moe motua va‘e, nae tufi e nau meakai i lalo i hoku keinagaaga: hage koia naaku fai, kuo totogi behe kiate au e he Otua. Bea naa nau omi ia ki Jelusalema, bea nae bekia ia i ai.

8 Bea koeni, nae tau‘i a Jelusalema e he fānau a Juta, bea nae lava‘i ia, bea nae ta‘i aki ia ae mata oe heleta, bea tutu ae kolo aki ae afi.

¶ 9 Bea hili ia nae toki alu ae fānau a Juta ke tau‘i ae kau Kenani, aia nae nofo i he mouga, bea i he botu toga, bea moe toafa.

10 Bea nae alu a Juta ke tau‘i ae kau Kenani aia nae nofo i Hebeloni: (bea koe higoa o Hebeloni i mu‘a ko Keja‐aliba:) bea naa nau tamate‘i a Sesei, mo Ehimani, mo Talimi.

11 Bea nae alu mei ai ia ke tau‘i ae kakai o Tiba: bea ko hono higoa mu‘a o Tiba, ko Keja‐sefa:

12 Bea nae behe e Kelebi, Koia oku ne ta‘i a Keja‐sefa, o lava‘i ia, teu foaki atu kiate ia hoku ofefine ko Akesa ke na unoho.

13 Bea nae kabaji ia e Otinili koe foha o Kenasi koe tehina o Kelebi: bea ne atu kiate ia hono ofefine ko Akesa ke na unoho.

14 Bea nae hoko o behe, i he ene ha‘u kiate ia, naa ne ue‘i ia ke ne kole ae goue mei he ene tamai: bea nae alu hifo ia mei he ene asi; bea nae behe e Kelebi kiate ia, Koeha ho loto?

15 Bea behe eia kiate ia, Tuku mai ha tabuaki: he kuo ke foaki kiate au ha fonua i he feituu toga; ke ke foaki mai ae gaahi matavai foki. Bea nae foaki e Kelebi kiate ia ae gaahi matavai i oluga moe gaahi matavai i lalo.

¶ 16 Bea koe fānau a Kena koe tamai i he fono kia Mosese, ne nau alu hake fakataha moe fānau a Juta mei he kolo oe akau koe boga ki he toafa o Juta, aia oku tuu ki he botu toga o Alati; bea naa nau alu o nonofo moe kakai.

17 Bea nae alu a Juta mo hono tokoua ko Simione, bea naa na tamate‘i ae kau Kenani nae nofo i Sefati, o nau fakaauha aubito ia. Bea nae ui hono higoa oe kolo ko Hoama.

18 Bea nae ma‘u e Juta a Kesa foki mo hono gaahi botu o ia, mo Asikiloni mo hono gaahi botu o ia, mo Ekiloni mo hono gaahi botu o ia.

19 Bea nae ia Juta a Jihova: bea naa ne kabuji ae kakai oe mouga: ka nae ikai faa kabuji eia ae kakai oe telea, koeuhi naa nau ma‘u ae gaahi saliote aione.

20 Bea naa nau foaki a Hebeloni kia Kelebi, o hage koe lea a Mosese: bea naa ne kabuji mei ai ae foha e toko tolu o Anaki.

21 Bea nae ikai kabuji e he fānau a Benijimani ae kau Jebusi nae nofo i Jelusalema; ka kuo nofo ae kau Jebusi moe fānau a Benijimani i Jelusalema o a‘u ki he aho ni.

¶ 22 Bea koe fale o Josefa, nae alu hake foki akinautolu ke tau‘i a Beteli: bea nae iate kinautolu a Jihova.

23 Bea nae fekau e he fale o Josefa ke vakai‘i a Beteli: (Bea ko hono higoa i mu‘a oe kolo ko Lusa.)

24 Bea nae mamata e he kau mataki ki he tagata oku ha‘u kitua mei he kolo, bea naa nau behe kiate ia, Oku mau kole kiate koe ke fakaha kiate kimautolu ae huaga ki he kolo, bea te mau fai ofa kiate koe.

25 Bea i he ene fakaha kiate kinautolu ae huaga ki he kolo, naa nau ta‘i ae kolo aki ae mata oe heleta; ka naa nau tukuage ae tagata ke alu mo hono fale kotoabe.

26 Bea nae alu ae tagata ki he fonua oe kau Heti, bea nae laga eia ae kolo, bea nae ui hono higoa o ia ko Lusa: aia ko hono higoa ia o a‘u ki he aho ni.

¶ 27 Bea nae ikai kabuji foki e Manase ae kakai mei Bete‐seani mo hono gaahi botu kakai, mo Tenaki mo hono gaahi kolo, be koe kakai o Toa mo hono gaahi kolo, be koe kakai o Ibiliami mo hono gaahi kolo, be koe kakai o Mekito mo hono gaahi kolo: ka nae ma‘u be ae loto oe kau Kenani ke nau nofo i he fonua.

28 Bea nae behe, i he hoko o malohi a Isileli, naa nau fekau ke tukuhau ae kau Kenani, bea nae ikai te nau kabuji aubito akinautolu kituaa.

¶ 29 Bea nae ikai kabuji foki e Ifalemi ae kau Kenani aia nae nofo i Kesa; ka nae nofo i Kesa ae kau Kenani mo kinautolu.

¶ 30 Bea nae ikai kabuji e Sebuloni ae kakai o Kitiloni, be koe kakai o Nehaloli; ka nae nofo ae kau Kenani mo kinautolu, o nau hoko o tukuhau.

¶ 31 Bea nae ikai kabuji e Aseli ae kakai o Ako, be koe kakai o Saitoni, be koe kakai o Alabi, be ko Ekisibi, be ko Eliba, be ko Afiki, be ko Lehobi:

32 Ka nae nofo ae kakai Aseli moe kau Kenani, aia koe kakai oe fonua: he nae ikai te nau kabuji akinautolu kituaa.

¶ 33 Bea nae ikai kabuji e Nafitali ae kakai o Bete‐semesi, be koe kakai o Bete‐anati; ka nae nofo ia moe kau Kenani, koe kakai oe fonua: ka nae hoko o tukuhau kiate kinautolu ae kakai o Bete‐semesi, bea mo Bete‐anati.

34 Bea nae kabuji e he kau Amoli ae fānau a Tani ki he mouga: he nae ikai te nau tuku akinautolu ke alu hifo ki he telea.

35 Ka nae mau be ae loto oe kau Amoli ke nau nofo i he mouga ko Elesi i Ajaloni, mo Seelibimi: ka nae malohi ae nima oe fale o Josefa, koia ne nau hoko o tukuhau ai.

36 Bea ko hono gataaga oe fonua oe kau Amoli nae fai mei he alu hake ki Akilabime, mei he makatuu, o mole hake.