¶ 1 BEA nae tuu hegihegi hake a Jelubeali, aia ko Kitione, moe kakai kotoabe nae iate ia, o nau abitaga fakataha i he vee vai o Haloti: bea nae i he botu tokelau ae tau lahi oe kakai Mitiane, o ofi ki he tafugofuga o Mole, i he telea

2 Bea nae behe e Jihova kia Kitione, Koe kakai oku iate koe kuo toko lahi fau, ke tuku ki ho nau nima ae kakai Mitiane, telia naa vikiviki ai a Isileli kiate au, o behe, Ko hoku nima be ooku kuo ne fakamoui au.

3 Bea koeni, ke ke alu, bea kalaga i he teliga oe kakai, o behe, Koia fulibe oku vaivai mo manavahe, ke foki ia o alu vave mei he mouga ko Kiliati. Bea nae foki o alu ae toko ua mano moe toko ua afe oe kakai; bea nae toe ae toko mano.

4 Bea nae folofola a Jihova kia Kitione, Oku kei toko lahi fau ae kakai: ke ke omi akinautolu ki he vai, bea teu ahiahi‘i akinautolu i ai maau: bea e behe, koia oku ou behe ai kiate koe, Ko eni ia e alu mo koe, koia ia te mo o: bea koia fulibe oku ou behe ai kiate koe, Ko eni ia e ikai alu mo koe, koia ia e ikai te mo o.

5 Koia ne ave ae kakai ki he vai: bea nae folofola a Jihova kia Kitione, Koia fulibe oku emo ae vai aki hono elelo, o hage koe emo ae kuli, te ke tuku kehe ia: bea e behe mo ia fulibe oku bunou o tuulutui ki hono tui ke inu.

6 Bea ko hono lau o kinautolu nae emo, o ai ho nau nima ki ho nau gutu, koe kau tagata e toko tolugeau: ka ko hono toe oe kakai kotoabe nae bunou hifo ki ho nau tui ke inu ae vai.

7 Bea nae behe e Jihova kia Kitione, I he kau tagata e toko tolugeau aia nae emo teu fakamoui akimoutolu, bea teu tukuage ae kakai Mitiane ki ho nima: bea tuku ae kakai kehe kotoabe ke nau alu taki taha ki hono botu.

8 Koia nae too ai e he kakai ae mea kai i ho nau nima, moe nau mealea: bea ne fekau hono toe o Isileli ae tagata taki taha ki hono fale fehikitiaki, kae taofi ae kau tagata e toko tolugeau koia: bea nae i lalo iate ia ae tau lahi o Mitiane i he telea.

¶ 9 Bea nae hoko o behe i he bo koia, nae folofola a Jihova kiate ia, Tuu hake, bea ke alu hifo ki  ho nau matatau; he kuou tukuage ia ki ho nima.

10 Bea kabau oku ke manavahe ke alu hifo, mo o mo Fiula ko ho tauhi ki he tau lahi:

11 Bea ke fanogo ki he mea oku nau lau: bea hili ia e malohi ho nima ke ke alu hifo ai ki he tau. Bea nae alu hifo ia mo Fiula ko hono tauhi ki he botu itua i he kau tagata too mahafu tau nae i he tau.

12 Bea nae mafola atu i he telea ae kakai Mitiane, moe kakai Amaleki, moe fānau kotoabe oe botu hahake o hage koe faga hee hono toko lahi: bea koe nau faga kameli nae taefaalaua, o hage ko hono lahi oe oneone i he matātahi.

13 Bea i he hoko ki ai a Kitione, vakai, nae i ai ae tagata nae fakaha ene miji ki hono tokoua, o ne behe, Vakai, Neu miji ae miji, bea vakai, nae to mai ha foi ma baale ki he tau lahi o Mitiane, bea nae lave ia ki ha fale fehikitaki, bea holo ai, o fulihi, bea nae holo ki lalo ae fale.

14 Bea nae lea hono tokoua, o behe, Oku ikai ha mea kehe eni, ka koe heleta a Kitione koe foha o Joasi, koe tagata Isileli: he kuo tuku ki hono nima e he Otua a Mitiane, moe tau kotoabe.

¶ 15 Bea i he fanogo a Kitione ki he fakaha ae miji, mo hono uhiga o ia, bea behe, nae hu ia, bea toe liu atu ki he tau a Isileli, o ne behe, Tuu hake he kuo tuku e Jihova ki ho mou nima ae tau lahi o Mitiane.

16 Bea naa ne vahe tolu ae kau tagata e tolugeau ki he vahega kogakau e tolu, o ne ai ae mealea i he nima oe tagata kotoabe, moe geeji ibu, moe māma i he loto ibu.

17 Bea nae behe eia kiate kinautolu, Jio mai kiate au, bea faifaitaki mai: bea vakai, o kau ka hoko ki he botu itua oe abitaga, bea e behe, koia teu fai e au, e behe be hoo mou fai.

18 O kau ka ifi e au ae mealea, e au mo kinautolu kotoabe oku iate au, mou ifi mealea akimoutolu foki i he botu kotoabe oe abitaga kotoabe, o lea behe,  Koe heleta a Jihova, bea mo Kitione.

¶ 19 Koia nae hoko a Kitione moe kau tagata e toko teau nae iate ia, ki he tua abitaga i he kāmataga oe lakaga leo tuuabo: bea kuo nau toki fakanofo ae kau leo: bea naa nau ifi ae gaahi mealea, bea maumau ae gaahi ibu nae i ho nau nima.

20 Bea nae ifi mealea e he kogakau e tolu, bea maumau e nau gaahi ibu, kae buke ae gaahi māma i ho nau nima, moe mealea i ho nau nima toomatau ke ifi aki: bea naa nau kalaga, Koe heleta a Jihova, bea mo Kitione.

21 Bea naa nau tuu ae tagata taki taha i hono botu o takatakai i he abitaga: bea nae felele‘i ae tau kotoabe, bea tagi, mo hola.

22 Bea nae ifi aki ae mealea e he toko tolugeau, bea nae fakafai e Jihova ke ai e he tagata kotoabe ene heleta ki hono tokoua i he tau kotoabe: bea nae hola ae tau ki Betesita i Selelati, bea ki he botu o Ebeli‐mihola, o a‘u ki Tabati.

23 Bea nae fakataha ae kau tagata o Isileli mei Nafitali, bea mei Aseli, bea mei Manase kotoabe, o nau tuli ki he kakai Mitiane.

¶ 24 Bea nae fekau e Kitione ae kau talafekau ki he gaahi botu kotoabe oe mouga ko Ifalemi, o behe, Mou alu hifo o tau‘i ae kakai Mitiane bea muomua atu ke ma‘u iate kinautolu ae gaahi vai o a‘u ki Betebala mo Joatani.

25 Bea naa nau fakabobula ae houeiki e toko ua oe kakai Mitiane, ko Olebi mo Siibi; bea nau tamate‘i a Olebi i he fugamaka ko Olebi, bea nau tamatei a Siibi i he tataoaga uaine o Siibi, o nau tuli a Mitiane, bea naa nau omi ae ulu o Olebi mo Siibi kia Kitione, i he kau vai e taha o Joatani.