¶ 1 BEA nae lāuga ae kakai, bea houhau ai a Jihova; bea nae fanogo ki ai a Jihova; bea nae tutu hono houhau, bea nae vela ae afi a Jihova iate kinautolu, bea nae ai ae fakaauha i he botu kotoabe oe abitaga.

2 Bea nae tagi ae kakai kia Mosese; bea i he lotu a Mosese kia Jihova, ne mate ai ae afi.

3 Bea naa ne fakahigoa ae botu koia ko Tabela: koeuhi nae vela ai ae afi a Jihova iate kinautolu.

¶ 4 Bea koe kakai iate kinautolu mei he botu kehekehe naa nau to ki he holi fakajino: bea nae toe tagi foki ae fānau a Isileli, o behe, Kohai te ne foaki kiate kitautolu ha kakano ke tau kai?

5 Oku tau manatu ki he ika, aia naa tau kai faiteliha be i Ijibite; moe kukomiba, moe meleni, bea moe liki, moe onioni, bea moe kaliki:

6 Ka ko eni kuo fakamahamaha e tau moui ke oji; oku ikai ha mea e taha i ho tau ao, ka koe mana ni.

7 Bea nae hage koe tega‘i kolianita ae mana, bea ko hono lanu nae hage koe lanu oe mataitofe.

8 Bea nae alu ae kakai, o tanaki ia, bea naa nau momoji ia i he gaahi mea momoji, be tuki ia i ha ibu, bea nae tunu ia i he gaahi ibu kaba, bea nae gaohi aki ia ae gaahi foi ma: bea ko hono ifo nae tatau moe ifo oe lolo foou.

9 Bea i he ene to ae hahau i he bouli ki he abitaga, nae to ae mana ki ai.

¶ 10 Bea nae toki fanogo a Mosese ki he tagi ae kakai i ho nau gaahi faahiga, ae tagata taki taha i he mataba o hono fale fehikitaki: bea nae vela ae houhau o Jihova o lahi; bea nae ita foki a Mosese.

11 Bea nae behe e Mosese kia Jihova, Koeha kuo ke fakamamahi‘i ai a hoo tamaioeiki? bea koeha kuo ikai teu iloa ai ae ofa i ho ao, koeuhi kuo ke tuku ae kavega ae kakai ni kotoabe kiate au?

12 He ko au koa nae tuituie i he kakai ni kotoabe? be ko au naaku fakatubu akinautolu? he kuo ke folofola mai kiate au, Ke ke fua akinautolu i ho fatafata, o hage koe tamai oku ne tauhi o fua ae tamajii oku huhu, ki he fonua aia naa ke fuakava aki ki he e nau gaahi tamai?

13 Bea teu ma‘u meife eau ha kakano ke foaki ki he kakai ni kotoabe? he oku nau tagi kiate au, o nau behe, Foaki mai ha kakano maa mautolu koeuhi ke mau kai.

14 Oku ikai teu malohi keu fua toko taha be ae kakai ni, koeuhi oku nau mamafa fau kiate au.

15 Bea kabau te ke fai behe kiate au, oku ou kole atu ki hoo afio ke ke tamate‘i leva au mei ho nima, o kabau oku ou iloa ae ofa i ho ao; kae oua e tuku au keu mamata ki hoku mamahi.

¶ 16 Bea nae behe e Jihova kia Mosese, Tanaki mai kiate au ae kau tagata e toko fitugofulu i he kau mātua o Isileli, akinautolu oku ke ilo koe kau mātua i he kakai, bea moe kau matābule iate kinautolu; bea ke omi akinautolu ki he fale fehikitaki oe kakai, koeuhi ke nau tuu fakataha i ai mo koe.

17 Bea teu alu hifo o ta alea i ai mo koe: bea teu too ae laumalie oku iate koe, o tuku ia kiate kinautolu; bea te nau fua fakataha mo koe ae kavega ae kakai, e ikai te ke fua toko taha be ia.

18 Bea te ke behe ki he kakai, Fakamaa akimoutolu ki he abogibogi, bea te mou kai kakano: he kuo mou tagi ki he fofoga o Jihova, o behe, Kohai te ne foaki kiate kimautolu ha kakano ke mau kai; he naa mau lelei i Ijibite: bea koia e foaki ai e Jihova ae kakano kiate kimoutolu, bea te mou kai.

19 E ikai te mou kai ia i he aho be taha, be i he aho e ua, be i he aho e nima, be i he aho e hogofulu, be i he aho e uofulu;

20 Ka koe mahina katoa, ke oua ke ha‘u ia i ho mou ava‘i ihu, bea e fakalielia ia kiate kimoutolu: koeuhi naa mou fehia kia Jihova aia oku iate kimoutolu, bea kuo mou tagi i hono ao, o behe, Koeha ne mau ha‘u ai mei Ijibite?

21 Bea nae behe e Mosese, Koe kakai oku ou nofo i ai, oku nau toko ono kilu ae kau tagata fonoga; bea kuo ke behe, Teu foaki ae kakano kiate kinautolu, ke nau kai ai i he mahina e taha.

22 E tamate‘i ae faga sibi, bea moe faga manu lalahi maa nautolu, ke nau makona ai? be tanaki fakataha ae ika kotoabe i he tahi maa nautolu, ke nau makona ai?

23 Bea nae behe e Jihova kia Mosese, He kuo fakanounou ae nima o Jihova? ko eni te ke mamata, be hoko eku lea kiate koe be ikai.

¶ 24 Bea nae alu kitua a Mosese, o ne fakaha ki he kakai ae folofola a Jihova, bea naa ne tanaki ae kau tagata e toko fitugofulu i he kau mātua oe kakai, bea naa ne tuku akinautolu ke tuu takatakai i he fale fehikitaki.

25 Bea nae haele hifo a Jihova i he ao, o ne folofola kiate ia, bea ne too ae laumalie nae iate ia, o ne foaki ia ki he kau mātua e toko fitugofulu: bea nae behe, i he hoko ae laumalie kiate kinautolu, naa nau kikite, bea nae ikai tuku.

26 Ka nae nofo ae ogo tagata e toko ua i he abitaga, koe higoa oe toko taha ko Elitati, bea koe higoa oe toko taha ko Metati: bea nae hoko ae laumalie kiate kinaua; bea naa na iate kinautolu kuo tohi, ka nae ikai te na o ki he fale fehikitaki: ka naa na kikite i he abitaga.

27 Bea nae lele ae tagata talavou, o ne behe kia Mosese, Oku kikite a Elitati mo Metati i he abitaga.

28 Bea nae lea a Josiua koe foha o Nuni, koe tamaioeiki a Mosese, koe toko taha i he ene kau tagata talavou, o behe, Ko eku eiki ko Mosese ke ke taofi akinaua.

29 Bea nae behe e Mosese kiate ia, Oku ke meheka koeuhi ko au? oku amujiaage e au ki he Otua ke kikite ae kakai kotoabe a Jihova, bea ke tuku e Jihova a hono laumalie kiate kinautolu.

30 Bea nae alu a Mosese ki he abitaga, aia moe kau mātua o Isileli.

¶ 31 Bea nae alu atu ae matagi mei a Jihova, o ne omi ae faga kueili mei he tahi, bea nae tuku ia ke to o ofi ki he abitaga, o hage koe gataaga oe fonoga i he aho e taha ki he botu toomatau, bea hage koe gataaga oe fonoga i he aho e taha ki he botu toohema, o takatakai ae abitaga, bea nae hage koe haga e fa hono maoluga mei he fuga kelekele.

32 Bea nae tuu hake ae kakai i he aho kotoabe koia, bea moe bo kotoabe ko ia, bea moe aho kotoa nae feholoi, bea naa nau tanaki ae faga kueili: ko ia nae jii ene tanaki naa ne tanaki ae oma e hogofulu: bea naa nau fakamafola akinautolu o takatakai i he abitaga.

33 Bea i he kei i ho nau nifo ae kakano i he teeki ai ke lamu, nae vela ae houhau o Jihova ki he kakai, bea nae ta‘i e Jihova ae kakai aki ae mahaki fakaauha lahi aubito.

34 Bea naa ne fakahigoa ae botu ko ia ko Kibiloti‐hateva: koeuhi naa nau tanu i ai ae kakai aia nae holi kovi.

35 Bea nae fonoga atu ae kakai mei Kibiloti‐hateva ki Heseloti; bea naa nau nofo i Heseloti.