¶ 1 BEA nae folofola a Jihova kia Mosese, o behe,

2 Ke ke fekau ha kau tagata, ke nau alu o vakai ki he fonua ko Kenani, aia teu foaki ki he fānau a Isileli: i he faahiga taki taha oe nau gaahi tamai ke mo fekau ha tagata, oku taki taha matābule iate kinautolu.

3 Bea nae fekau e Mosese kiate kinautolu i he fekau a Jihova, mei he toafa ko Balani: ae kau tagata kotoabe nae matābule i he fānau a Isileli.

4 Bea ko ho nau higoa eni: ko Samua koe foha o Sakuli, i he faahiga o Lubeni.

5 Bea mo Safati koe foha o Holi, i he faahiga o Simione.

6 Bea mo Kelebi koe foha o Jifune, i he faahiga o Juta.

7 Bea mo Ikali koe foha o Josefa, i he faahiga o Isaka.

8 Bea mo Osea koe foha o Nuni, i he faahiga o Ifalemi.

9 Bea mo Baleti koe foha o Lafu, i he faahiga o Benijimani.

10 Bea mo Katieli koe foha o Soti, i he faahiga o Sebuloni.

11 Bea mo Kati koe foha o Susi, i he faahiga o Manase, koe faahiga o Josefa.

12 Bea mo Amieli koe foha o Kimali, i he faahiga o Tani.

13 Bea mo Situli koe foha o Mikaeli, i he faahiga o Aseli.

14 Bea mo Nabi koe foha o Vofisi, i he faahiga o Nafitali.

15 Bea mo Kineli koe foha o Maki, i he faahiga o Kata.

16 Koe higoa eni oe kau tagata nae fekau e Mosese ke nau o o mataki‘i ae fonua. Bea nae ui ai e Mosese a Osea koe foha o Nuni ko Josiua.

¶ 17 Bea nae fekau e Mosese akinautolu ke nau mataki‘i ae fonua ko Kenani, o ne behe kiate kinautolu. Mou alu hake  i he hala ki he botu toga, bea te mou hake ki he mouga:

18 O mamata ki he fonua, be oku fefe ia; bea moe kakai oku nofo ai, be oku nau malohi be oku nau vaivai, be oku nau toko lahi be oku nau toko jii;

19 Bea oku fefe ae fonua oku nau nofo ai, be oku lelei be oku kovi; be oku fefe ho nau gaahi kolo oku nau nofo ai, be oku nau nofo i he gaahi fale fehikitaki, be i he gaahi kolo malohi;

20 Bea moe fonua, be oku mahu be oku majiva, be oku akauia, be ikai: bea mou loto to‘a, o omi ae fua oe fonua. Bea koe kuoga koia koe gaahi aho ia oe fua oe uluaki kalebi.

¶ 21 Bea naa nau alu hake, o vakai ki he fonua, mei he toafa o Sini ki Lehobi, i he hala oku ha‘u ai ae fonoga ki Hemati.

22 Bea naa nau alu i he botu toga, o nau ha‘u ki Hebeloni; nae i ai ae fānau a Anaki, ko Ehimani, mo Sesei, mo Talimi. (Vakai, nae laga a Hebeloni i he ta‘u e fitu ki mu‘aage i he fokotuu a Soani i Ijibite.)

23 Bea naa nau ha‘u ki he vaitafe o Esikoli, bea naa nau tuuji i ai ae vaa mo hono fuhiga kalebi, bea naa nau haamo toko ua ia i he akau; bea naa nau omi ae bomikaniti, moe fiki.

24 Bea nae ui ae botu koia, koe vaitafe o Esikoli, koeuhi koe fuhiga kalebi nae tuuji ai e he fānau a Isileli.

25 Bea hili ae aho e fagofulu, naa nau liliu mai mei he e nau vakai ae fonua.

¶ 26 Bea naa nau o bea ha‘u kia Mosese, mo Elone, bea moe kakai kotoabe oe fānau a Isileli, ki he toafa o Balani, ki Ketesi; bea nae omi ae ogoogo kiate kinautolu, bea moe kakai kotoabe, bea naa nau fakaha ae fua oe fonua kiate kinautolu.

27 Bea naa nau lea kiate ia, o behe, Naa mau o ki he fonua naa ke fekau akimautolu ki ai, bea koe mooni oku bito ia i he hua huhu moe honi; bea ko hono fua eni.

28 Ka oku malohi ae kakai oku nofo i he fonua, bea kuo a maka ae gaahi kolo, o lahi aubito: bea naa mau mamata i ai ki he fānau a Anaki.

29 Oku nofo i he botu fakatoga oe fonua ae kau Amaleki: bea koe kau Heti, moe kau Jebusi, moe kau Amoli, oku nau nofo i he gaahi mouga: bea koe kau Kenani oku nofo akinautolu o ofi ki he tahi, bea moe mata fonua o Joatani.

30 Bea nae lolomi e Kelebi ae kakai i he ao o Mosese, o ne behe, Ke tau alu hake ke vave, o ma‘u ia; he oku tau malohi lahi ke ikuna ia.

31 Ka nae behe e he kau tagata naa nau alu hake mo ia, E ikai te tau malohi ke alu hake ki he kakai; he oku nau malohi iate kitautolu.

32 Bea naa nau omi ki he fānau a Isileli ae ogoogo kovi oe fonua naa nau alu o vakai, o behe, Koe fonua naa mau alu atu ke vakai ki ai, koe fonua ia oku ne keina ke oji hono kakai; bea koe kakai kotoabe naa mau mamata i ai koe kau tagata lalahi aubito.

33 Bea naa mau mamata i ai ki he kau tagata lalahi fakamanavahe, koe gaahi foha o Anaki aia oku tubu i he faahiga lalahi: bea naa mau tatau i ho mau mata omautolu moe faga hee, bea naa mau behe mooni i ho nau ao onautolu.