¶ 1 BEA i he ene mamata e Belami kuo lelei kia Jihova ke fakamonuia a Isileli, nae ikai alu ia, o hage ko ene fuofua fai, ke kumi ae kikite, ka naa ne haga hono mata ki he toafa.

2 Bea nae haga hake ae mata o Belami, bea naa ne mamata ki Isileli kuo nau nofo, o fakatatau ki ho nau gaahi faahiga; bea nae to ae laumalie oe Otua kiate ia.

3 Bea naa ne fai atu a ene lea fakatātā, o behe, Ko Belami koe foha o Beoli kuo ne behe, bea kuo behe e he tagata kuo a hono mata:

4 Kuo ne behe, eia nae fanogo ki he folofola a Jihova, mo ne mamata ki he ha mai oe Mafimafi, mo ne to hifo, kae a be hono mata:

5 Hono ikai lelei lahi a ho gaahi fale fehikitaki, E Jekobe, bea mo ho gaahi nofoaga, E Isileli!

6 Oku nau mafola atu o hage koe fonua tokalelei, o hage koe gaahi goue i he vee vaitafe, bea hage koe gaahi akau koe alosi aia kuo to e Jihova, bea oku tatau moe gaahi akau koe sita i he vee vai.

7 Bea e liligi eia ae vai mei ne ene gaahi ibu vai, bea ko hono tega e tubu ia i he vai lahi, bea e maoluga a hono tu‘i ia Ekaki, bea e hakeaki‘i a hono buleaga.

8 Kuo omi ia e he Otua mei Ijibite; oku iate ia ae malohi o hage koe iunikoni: bea te ne kai ke oji ae gaahi buleaga o hono gaahi fili, bea te ne feji‘i ho nau gaahi hui, bea ne hoka‘i ke aji iate kinautolu a ene gaahi gahau.

9 Nae tokoto ia, o toitoi o hage koe laione, bea tatau moe laione lahi: bea kohai te ne faa ue‘i hake ia? Oku monuia ia aia oku ne tabuaki‘i koe, bea e malaia ia oku ne fakamalaia‘i koe.

¶ 10 Bea nae tubu ae ita a Belaki kia Belami, bea naa ne bajibaji a hono nima: bea behe e Belaki kia Belami. Naaku ui mai koe ke ke tukitala‘i hoku gaahi fili, bea vakai, kuo ke tabuaki‘i tofu be akinautolu ni o liuga tolu.

11 Bea koia ke ke buna ki hoo botu: neu amanaki keu hakeaki‘i koe ke ke ogoogo lahi, bea vakai, kuo taofi koe e Jihova mei he ogoogolelei.

12 Bea nae behe e Belami kia Belaki, Ikai naaku lea ki hoo kau talafekau aia naa ke fekau mai kiate au, o behe,

13 Kabau e foaki e Belaki kiate au a hono fale oku bito i he siliva moe koula, e ikai teu fakakehe‘i ae fekau a Jihova, ke fai ae lelei be koe kovi i hoku loto ooku; ka koia e folofola mai e Jihova, koia be teu lea aki?

14 Bea koeni, vakai, teu alu au ki hoku kakai: ka teu fakaha kiate koe aia e fai e he kakai ni ki ho kakai i he gaahi aho amui.

¶ 15 Bea naa ne fai atu a ene lea fakatātā, o behe, Ko Belami koe foha o Beoli kuo ne behe, bea koe tagata kuo a hono mata kuo behe eia:

16 Kuo behe eia, nae fanogo ki he folofola ae Otua, bea ma‘u ae ilo oe fugani Maoluga, aia kuo mamata ki he ha mai oe Mafimafi, mo ne to hifo, kae a hono mata:

17 Teu mamata kiate ia, ka e ikai vave: teu jio kiate ia, ka e ikai ofi: e ha‘u ae Fetuu mei a Jekobe, bea e tuu hake ae Tokotoko ae tu‘i i Isileli, bea e ta‘i eia ae gaahi tuliki o Moabe, bea e fakaauha ae fānau kotoabe oku fiefielahi.

18 Bea e hoko a Itomi koe tofia, e hoko foki a Seia koe tofia ki hono gaahi Eli; bea e fai malohi a Isileli.

19 E ha‘u mei a Jekobe aia te ne ma‘u ae bule, bea te ne fakaauha ia oku toe i he kolo

¶ 20 Bea i he ene jio ki Amaleki, naa ne fai atu a ene lea fakatātā, o behe, Ko Amaleki koe uluaki ia oe gaahi buleaga; ka e behe a hono ikuaga, e auha ia o lauikuoga.

21 Bea naa ne jio ki he kau Kenai bea naa ne fai atu a ene lea fakatātā, o ne behe, Oku malohi a ho botu nofoaga, bea kuo ke tuku a ho bunuga i he maka.

22 Ka e fakaaau ke oji ae kau Kenai kae oua ke ave koe e he kakai Asilia o fakabobula‘i.

23 Bea naa ne fai atu a ene lea fakatātā, o behe, Oiaue, kohai e moui oka fai ehe Otua ae mea ni!

24 Bea  e ha‘u ae gaahi vaka mei he mata fonua o Kitime, bea e fakamamahi eia a Asilia, bea e fakamamahi mo Ibeli, bea e auha foki mo ia o lauikuoga.

25 Bea nae tuu hake a Belami, bea ne alu o foki ki hono botu: bea ko Belaki foki nae toe alu ia i hono hala.