¶ 1 BEA nae folofola a Jihova kia Mosese bea mo Elone, o behe,

2 Ko eni ae talatuku oe fono aia kuo fekau e Jihova, o behe, Ke ke lea ki he fānau a Isileli, ka nau omi kiate koe ha bulu fefine mui kulokula tae hano ila, bea tae hano mele, bea teeki hoko ki ai ae haamoga:

3 Bea te mou foaki ia kia Eliesa koe taulaeiki, koeuhi ke ne omi ia ki he tua abitaga, bea e tamate‘i ia e ha toko taha i hono ao:

4 Bea ko Eliesa koe taulaeiki te ne ave ae toto i hono tuhu, o ne luluku aki ae toto i he mata fale fehikitaki oe kakai ke liuga fitu:

5 Bea e tutu e ha toko taha ae bulu fefine mui i hono ao; te ne tutu hono kili mo hono kakano, mo hono toto, fakataha mo hono tae:

6 Bea e ave e he taulaeiki ae akau koe sita, moe isobe, moe kulaahoaho, o li ia ki he loto afi oku tutu ai ae bulu fefine.

7 Bea e toki fo e he taulaeiki a hono gaahi kofu, bea te ne kaukau‘i hono jino i he vai, bea te ne toki ha‘u ki he abitaga, ka e taemaa ae taulaeiki o a‘u ki he efiafi.

8 Bea koia oku ne tutu ia e fo eia a hono gaahi kofu i he vai, bea e kaukau‘i hono jino i he vai, ka e tae maa ia o a‘u ki he efiafi.

9 Bea e tanaki e ha tagata oku maa ae efu oe bulu fefine, o tuku ia ki he tuaa abitaga i ha botu maa, bea e tuku ia ki he kakai oe fānau a Isileli, koe vai fakamavae; koe fakamaa ia oe agahala.

10 Bea koia oku ne tanaki ae efu oe bulu fefine e fo eia a hono gaahi kofu, ka e taemaa ia o a‘u ki he efiafi: bea koe fekau ia ki he fānau a Isileli, bea moe muli oku aunofo iate kinautolu o lauikuoga.

¶ 11 Koia oku ala ki ha jino mate o ha tagata e taemaa ia i he aho e fitu.

12 Bea te ne fakamaa aki ia i hono aho tolu, ka e toki maa ia i hono aho fitu: bea kabau e ikai te ne fakamaa ia i hono aho tolu, e ikai maa ia i hono aho fitu.

13 Bea koia oku ala ki ha jino mate o ha tagata mate, bea e ikai fakamaa ia, oku ne fakauli‘i ae tale fehikitaki o Jihova; bea e tuuji ae laumalie koia mei Isileli: koeuhi nae ikai luluku aki ia ae vai fakamavae, bea e uli ia, bea oku kei iate ia e ene tae maa.

14 Koe fono eni, oka mate ha tagata i ha fale fehikitaki: akinautolu kotoabe oku ha‘u ki he fale fehikitaki, bea moe mea kotoabe oku i he fale fehikitaki, e tae maa ia i he aho e fitu.

15 Bea moe ibu kotoabe oku ava be, aia oku ikai hano tabuni ke fakamau, e uli ia.

16 Bea koia oku ala ki ha taha, kuo ta‘i aki ae heleta i he ataatā oe fonua, be ha jino mate, be ki ha hui o ha tagata, be ki ha faitoka, e tae maa ia i he aho e fitu.

17 Bea te nau ave maana oku tae maa ae efu oe bulu fefine kuo tutu, koe mea fakamaa ia oe agahala, bea te nau liligi ae vaitafe ki ai ki ha ibu:

18 Bea e ave e ha tagata oku maa ae isobe, o ne fuifui ki he vai, o luluku aki ae fale fehikitaki, bea moe gaahi ibu kotoabe, bea moe kakai nae i ai, bea mo ia nae ala ki ha hui, be ki ha taha kuo tamate‘i, be ki ha taha kuo mate, be ki ha faitoka:

19 Bea e luluku e he tagata oku maa ae tagata oku tae maa i hono aho tolu, bea mo hono aho fitu, bea ko hono aho fitu te ne fakamaa ai ia, o fo hono gaahi kofu, bea kaukau‘i ia i he vai, bea e maa ia i he efiafi.

20 Ka koe tagata oku tae maa, bea oku ikai te ne fakamaa ia, e tuuji ae laumalie koia mei he kakai, koeuhi kuo ne fakauli‘i eia ae fale tabu o Jihova: nae ikai luluku aki ia ae vai oe fakamavae; oku taemaa ia.

21 Bea koe fekau fai mau ai be ia kiate kinautolu, o behe, Koia oku ne luluku aki ae vai oe fakamavae e fo eia hono gaahi kofu; bea moia oku ala ki he vai oe fakamavae e tae maa ia o a‘u ki he efiafi.

22 Bea koe mea kotoabe oku ala ki ai aia oku taemaa e uli ia; bea koe toko taha oku ala ki ai e tae maa ia o a‘u ki he efiafi.