¶ 1 BEA nae folofola a Jihova kia Mosese, o behe,

2 Ke ke lea ki he fānau a Isileli, mo ke behe kiate kinautolu, Oka mou ka hoko ki he fonua te mou nofo ai, aia teu foaki kiate kimoutolu,

3 Bea mou loto ke fai ae feilaulau i he afi kia Jihova, koe feilaulau tutu, be ko ha feilaulau e fai i he fuakava, be i he feilaulau faiteliha, be i hoo mou gaahi katoaga mamalu, ke atu ae mea namu kakala kia Jihova, i he faga manu lalahi, be i he faga sibi:

4 E toki omi eia oku ne age ene feilaulau kia Jihova ae feilaulau meakai, ko hono hogofulu oe vahe oe efa oe mahoaa kuo fefiofi mo hono fa oe vahe oe hini oe lolo.

5 Bea te ke teuteu hono fa oe vahe oe hini oe uaine, ki he feilaulaulau inu ke fakataha moe feilaulau tutu be ko ha feilaulau, ki he lami e taha.

6 Bea ka ko ha sibi tagata, te ke teuteu ki he feilaulau meakai ae oma e ua oe mahoaa kuo fefiofi mo hono tolu oe vahe oe hini oe lolo.

7 Bea koe feilaulau inu te ke age ai hono tolu oe vahe oe hini oe uaine, koe mea namu kakala ia kia Jihova.

8 Bea i hoo teuteu ha bulu ki he feilaulau tutu, be ki he feilaulau oku fai i he fuakava, be ki he feilaulau fakamelino kia Jihova:

9 Te ne toki omi fakataha moe bulu ae feilaulau meakai koe oma e tolu oe mahoaa kuo fefiofi mo hono vaeua oe hini oe lolo.

10 Bea te ke omi ki he feilaulau inu hono vaeua oe hini oe uaine, koe feilaulau ia kuo gaohi aki ae afi, koe mea namu kakala kia Jihova.

11 E behe hono gaohi oe bulu e taha, be koe sibi tagata e taha, be koe lami e taha, be koe uhiki koji.

12 E fakatatau mo hono fiha oia te mou teuteu, e behe hoo mou fai ke ai taki taha o fakatatau ki hono lahi.

13 Ko kinautolu kotoabe kuo fanau‘i i he fonua te nau fai ae gaahi mea ni i hono aga ni, i he atu ae feilaulau kuo gaohi aki ae afi, koe mea namu kakala kia Jihova.

14 Bea kabau e aunofo ae muli iate kimoutolu, bea koia kotoabe e iate kimoutolu i ho mou gaahi toutagata oku fie atu ae feilaulau kuo gaohi aki ae afi, koe mea namu lelei kia Jihova; e behe ene fai o hage ko hoo mou fai.

15 Koe fekau be taha ia kiate kimoutolu oe fakataha, bea moe muli foki oku aunofo iate kimoutolu, bea koe fekau ia ki ho mou gaahi toutagata o lauikuoga; he oku tatau ae muli mo kimoutolu i he ao o Jihova.

16 Koe fono be taha moe aga be taha kiate kimoutolu, bea moe muli oku aunofo iate kimoutolu.

¶ 17 Bea nae folofola a Jihova kia Mosese, o behe,

18 Ke ke lea ki be fānau a Isileli, o ke behe kiate kinautolu, Oka mou ka hoko ki he fonua aia teu ave akimoutolu ki ai,

19 E toki hoko o behe, i hoo mou kai ae ma oe fonua, te mou atu ae feilaulau hiki hake kia Jihova.

20 Te mou age ha foi ma jii i hoo mou uluaki takaoga ma koe feilaulau hiki hake ia: o hage ko hoo mou fai ae feilaulau hiki hake oe botu hahaaga koane, e behe hoo mou hiki hake ia.

21 Mei he uluaki o hoo mou takaoga ma te mou age ae feilaulau hiki hake kia Jihova, i ho mou gaahi toutagata.

¶ 22 Bea kabau kuo mou he, o ikai to mou tokaga ki he gaahi fekau ni kotoabe, aia kuo folofola aki e Jihova kia Mosese,

23 I he mea kotoabe kuo fekau e Jihova kiate kimoutolu i he nima o Mosese, talu mei he aho nae fekau ai e Jihova kia Mosese, ke fai nau i ho mou gaahi toutagata;

24 E hoko o behe, o kabau e fai ha mea i he tae ilo bea oku ikai ilo ia e he kakai, e atu ai e he kakai kotoabe ae bulu mui e taha koe feilaulau tutu, koe mea namu kakala kia Jihova, fakataha mo ene feilaulau meakai, mo ene feilaulau inu, o fakatatau ki hono aga, bea moe uhiki oe koji koe feilaulau ma ae agahala.

25 Bea e fai e he taulaeiki ae fakalelei ma ae kakai kotoabe oe fānau a Isileli bea e fakamolemole ia kiate kinautolu; he koe mea fai noa ia: bea te nau omi e nau feilaulau, koe feilaulau kuo gaohi aki ae afi kia Jihova, bea moe nau feilaulau ma ae agahala ki he ao o Jihova, koeuhi koe nau tae ilo:

26 Bea e fakamolemole ae kakai kotoabe oe fānau a Isileli bea moe muli oku aunofo iate kinautolu; koeuhi nae tae ilo ae kakai kotoabe.

¶ 27 Bea kabau e agahala ha toko taha i he tae ilo, te ne omi ae koji fefine i hono uluaki ta‘u koe feilaulau ma ae agahala.

28 Bea e fai e he taulaeiki ae fakalelei koeuhi koe laumalie nae agahala i he tae ilo, i he ene agahala i he tae ilo, i he ao o Jihova, ke fai ae fakalelei koeuhi koia; bea e fakamolemole ai ia.

29 Koe fono be taha te mou ma‘u kiate ia oku agahala i he taeilo, kiate ia kuo fanau‘i i he fānau a Isileli, bea moe muli oku aunofo kiate kinautolu.

¶ 30 Ka ka ai ha toko taha oku fai ha mea i he fielahi, be oku fanau‘i ia i he fonua, be koe muli, oku manuki ia kia Jihova; bea e tuuji ae laumalie koia mei hono kakai.

31 Koeuhi kuo manuki‘i eia ae folofola a Jihova, bea kuo maumau‘i eia a ene fekau, e tuuji aubito ae laumalie koia, e hoko kiate ia a ene agahala.

¶ 32 Bea lolotoga ae i he toafa ae fānau a Isileli, naa nau ilo ha tagata nae okooko i he aho sabate.

33 Bea ko kinautolu nae ilo‘i ia i he ene tanaki fefie, naa nau omi ia kia Mosese mo Elone, bea moe kakai kotoabe.

34 Bea naa nau tuku ia ki he fale fakabobula, koeuhi nae ikai fakaha be koeha e fai kiate ia.

35 Bea nae behe e Jihova kia Mosese, Koe mooni e tamate‘i ae tagata ko ia: e lijigi aki ia ae maka e he kakai kotoabe i he tua abitaga.

36 Bea nae omi ia ki tua mei he abitaga e he kakai kotoabe, o nau lijigi ia aki ae maka, bea nae mate ia; o hage koe fekau e Jihova kia Mosese.

¶ 37 Bea nae folofola a Jihova kia Mosese, o behe,

38 Ke ke lea ki he fānau a Isileli, o fekau ke nau gaohi moo nautolu ae bao i he kaba o ho nau gaahi kofu, i ho nau gaahi toutagata, bea te nau ai ha loufau lanumoana ki he bao oe gaahi kaba:

39 Bea e tuku ia koe bao kiate kinautolu, koeuhi te mou jio ki ai, o manatu ki he gaahi fekau kotoabe a Jihova, o fai ki ai; kae oua te mou muimui ki ho mou loto, bea mo ho mou mata, aia naa mou muimui ki ai o feauaki:

40 Koeuhi ke mou manatu, o fai ki he eku gaahi fekau kotoabe, bea mou maonioni ai ki ho mou Otua.

41 Ko au ko Jihova ko ho mou Otua, nae omi akimoutolu mei he fonua ko Ijibite, ke hoko ai ko ho mou Otua: ko Jihova au ko ho mou Otua.