Ko hono fa oe Tohi a Mosese oku ui koe Lau Moe Fealuaki i He Toafa, be ko Nomiba

¶ 1 BEA nae fololola a Jihova kia Mosese i he toafa o Sainai, i he fale fehikitaki oe kakai, i he uluaki aho o hono ua oe mahina, i hono ua ta‘u oe nau ha‘u mei he fonua ko Ijibite, o behe,

2 Mou lau ae kakai kotoabe oe fānau a Isileli, i ho nau gaahi faahiga o fakatatau moe fale oe nau gaahi tamai, o lau kotoabe i ho nau higoa, ae kakai tagata kotoabe taki taha;

3 Mei ho nau ta‘u e uofulu tubu, akinautolu kotoabe oku malohi ke alu atu ke tau i Isileli: ko koe mo Elone ke mo lau akinautolu i he e nau gaahi matatau.

4 Bea e fakataha mo kimoua ha tagata e toko taha mei he faahiga kotoabe; koia taki taha oku eiki i he fale o ene gaahi tamai.

¶ 5 Bea koe gaahi higoa eni oe kau tagata e tuu mo kimoua; ko Ilisua, koe foha o Setiua i he faahiga o Lubeni:

6 Ko Selumieli, koe foha o Sulisatai i he faahiga o Simione.

7 Ko Nasoni, koe foha o Aminitabi i he faahiga o Juta.

8 Ko Netanili, koe foha o Sua i he faahiga o Isaka.

9 Ko Iliabi, koe foha o Heloni i he faahiga o Sebuloni.

10 I he fānau a Josefa: ko Ilisama, koe foha o Amihuti i he faahiga o Ifalemi; ko Kamelieli, koe foha o Betasuli i he faahiga o Manase:

11 Ko Ebitani, koe foha o Kitione i he faahiga o Benijimani.

12 Ko Ehiesa, koe foha o Amisatai i he faahiga o Tani.

13 Ko Bakieli, koe foha o Okilani i he faahiga o Aseli.

14 Ko Iliasafi, koe foha o Teuili i he faahiga o Kata.

15 Ko Heila, koe foha o Enani i he faahiga o Nafitali.

16 Ko kinautolu ni naa nau ogoogo lahi i he kakai, koe houeiki i he gaahi faahiga oe nau gaahi tamai, koe eiki oe gaahi toko afe i Isileli.

¶ 17 Bea nae ave e Mosese mo Elone ae kau tagata ni kuo fakaha ho nau higoa:

18 Bea naa nau fakataha ae kakai kotoabe i he uluaki  aho o hono ua oe mahina, bea naa nau fakaha ho nau hokohoko i ho nau gaahi faahiga, i he fale oe nau gaahi tamai, o fakatatau moe lau oe gaahi higoa taki taha, mei hono uofulu tubu oe ta‘u o fai hake.

¶ 19 O hage koe fekau a Jihova kia Mosese, nae behe a ene lau akinautolu i he toafa o Sainai.

¶ 20 Bea koe fānau a Lubeni, koe uluaki foha o Isileli, i ho nau gaahi toutagata, mo ho nau faahiga, i he fale oe nau gaahi tamai, o fakatatau ki he lau oe gaahi higoa taki taha, ae tagata kotoabe, mei hono ta‘u e uofulu o fai hake, akinautolu kotoabe nae malohi ke alu atu ke tau;

21 Ko kinautolu nae lau iate kinautolu, io, i he faahiga o Lubeni, koe toko fa mano moe toko ono afe ma nimageau.

¶ 22 Koe fānau a Simione, i ho nau gaahi toutagata, mo ho nau gaahi faahiga, i he fale oe nau gaahi tamai, akinautolu nae lau iate kinautolu, o fakatatau ki he lau oe gaahi higoa taki taha, ae tagata kotoabe mei hono ta‘u e uofulu o fai hake, akinautolu kotoabe nae malohi ke alu atu ke tau;

23 Ko kinautolu nae lau iate kinautolu, io, i he faahiga o Simione, koe toko nima mano moe toko hiva afe ma tolugeau.

¶ 24 Koe fānau a Kata, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa, mei hono ta‘u e uofulu o fai hake, akinautolu kotoabe nae malohi ke alu atu ke tau;

25 Ko kinautolu nae lau iate kinautolu, io, i he faahiga o Kata, koe toko fa mano moe toko nima afe moe toko onogeau ma nimagofulu.

¶ 26 Koe fānau a Juta, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa, mei hono ta‘u e uofulu o fai hake, akinautolu kotoabe nae malohi ke alu atu ke tau;

27 Ko kinautolu nae lau iate kinautolu, io, i he faahiga o Juta koe toko fitu mano moe toko fa afe ma onogeau.

¶ 28 Koe fānau a Isaka, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa mei hono ta‘u e uofulu o fai hake, akinautolu kotoabe nae malohi ke alu atu ke tau;

29 Ko kinautolu, nae lau iate kinautolu, io, i he faahiga o Isaka koe toko nima mano moe toko fa afe ma fageau.

¶ 30 Koe fānau a Sebuloni, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa mei hono ta‘u e uofulu o fai hake, akinautolu kotoabe nae malohi ke alu atu ke tau;

31 Ko kinautolu nae lau iate kinautolu, io, i he faahiga o Sebuloni koe toko nima mano moe toko fitu afe ma fageau.

¶ 32 Koe fānau a Josefa, io, ae fānau a Ifalemi i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa mei hono ta‘u e uofulu o fai hake, akinautolu kotoabe nae malohi ke alu atu ke tau;

33 Ko kinautolu nae lau iate kinautolu, io, i he faahiga a Ifalemi, koe toko fa mano ma toko nimageau.

¶ 34 Koe fānau a Manase, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa, mei hono ta‘u e uofulu o fai hake, akinautolu kotoabe nae malohi ke alu atu ke tau;

35 Ko kinautolu nae lau iate kinautolu, io, i he faahiga o Manase, koe toko tolu mano, moe toko ua afe ma uageau.

¶ 36 Koe fānau a Benijimani, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa, mei hono ta‘u e uofulu o fai hake, akinautolu kotoabe nae malohi ke alu atu ke tau;

37 Ko kinautolu nae lau iate kinautolu, io, i he faahiga o Benijimani, koe toko tolu mano, moe toko nima afe, ma fageau.

¶ 38 Koe fānau a Tani, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa, mei hono ta‘u e uofulu o fai hake, akinautolu kotoabe nae malohi ke alu atu ke tau;

39 Ko kinautolu nae lau iate kinautolu, io, i he faahiga o Tani, koe toko ono mano, moe toko ua afe ma fitugeau.

¶ 40 Koe fānau a Aseli, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa, mei hono ta‘u e uofulu, o fai hake, akinautolu kotoabe nae malohi ke alu atu ke tau;

41 Bea ko kinautolu nae lau iate kinautolu, io, i he faahiga o Aseli, koe toko fa mano, moe toko taha afe ma nimageau.

¶ 42 Koe fānau a Nafitali, i ho nau gaahi toutagata, mo ho nau gaahi faahiga, i he fale oe nau gaahi tamai, o fakatatau ki he lau oe gaahi higoa, mei hono ta‘u e uofulu o fai hake, akinautolu kotoabe nae malohi ke alu atu ke tau;

43 Ko kinautolu nae lau iate kinautolu, io, i he faahiga o Nafitali, koe toko nima mano, moe toko tolu afe ma fageau.

44 Ko kinautolu eni nae lau, aia nae lau e Mosese mo Elone, moe houeiki o Isileli, koe kau tagata e toko hogofulu ma toko ua: nae taki taha tuu ma ae fale o ene gaahi tamai.

45 Nae behe akinautolu kotoabe nae lau i he fānau a Isileli, i he fale oe nau gaahi tamai, mei hono ta‘u e uofulu o fai hake, akinautolu kotoabe nae malohi ke alu atu ke tau i Isileli;

46 Io, ko kinautolu kotoabe nae lau koe toko ono kilu, moe toko tolu afe, moe toko nimageau ma nimagofulu.

¶ 47 Ka nae ikai lau iate kinautolu ae kau Livai i he faahiga oe nau gaahi tamai.

48 He kuo folofola a Jihova kia Mosese, o behe,

49 E ikai te ke lau ae faahiga o Livai, bea oua naa ke lau akinautolu fakataha moe fānau a Isileli:

50 Ka ke fakanofo ae kau Livai ke bule ki he fale fehikitaki oe fakamooni, bea moe gaahi nāunāu kotoabe i ai, bea moe gaahi mea kotoabe i ai, bea te nau fua ae fale fehikitaki, bea mo hono gaahi nāunāu kotoabe; bea te nau gaue ki ai, o nofo takatakai ki he fale fehikitaki.

51 Bea oka alu atu ae fale fehikitaki, e vete hifo ia e he kau Livai; bea oka nofo ae fale fehikitaki, e fokotuu ia e he kau Livai: bea koe muli oku ha‘u ke ofi  ki ai e tamate‘i ia.

52 Bea koe fānau a Isileli te nau fokotuu a ho nau gaahi fale fehikitaki, ae tagata taki taha ki hono abitaga, bea moe tagata taki taha ki hono fuka, i ho nau gaahi faahiga.

53 Ka e nofo ae kau Livai o takatakai i he fale fehikitaki oe fakamooni, koeuhi ke oua naa ai ha houhau ki he fakataha oe fānau a Isileli: bea e tokaga ae kau Livai ki he tauhi oe fale fehikitaki oe fakamooni.

54 Bea nae fai e he fānau a Isileli o fakatatau ki he mea kotoabe kuo fekau mai e Jihova kia Mosese; nae behe be e nau fai.