¶ 1 BEA nae ha‘u ae fānau a Isileli, io ae kakai kotoabe, ki he toafa o Sini i he uluaki mahina: bea nae nofo ae kakai i Ketesi; bea nae bekia i ai a Miliame, bea nae tanu ia i ai.

2 Bea nae ikai ha vai ki he kakai: bea naa nau fakataha fakaagatuu kia Mosese bea mo Elone.

3 Bea nae lāuga ae kakai kia Mosese, o nau lea behe, Amujiaage ekimautolu ki he Otua naa mau mate fakataha mo ho mau kaiga nae mate i he ao o Jihova!

4 Bea koeha kuo mo omi ai ae kakai a Jihova ki he toafa ni ke mau mate i heni moe mau faga manu?

5 Bea koeha kuo mo omi ai akimautolu mei Ijibite, ke omi akimautolu ki he botu kovi ni? oku ikai ha tega i he botu ni, be ha fiki, be ha vaine, be ha bomikaniti; bea oku ikai ha vai i ai ke mau inu.

6 Bea nae alu a Mosese mo Elone i he ao oe fakataha ki he mataba oe fale fehikitaki oe kakai, bea naa na to ki ho na mata, bea nae ha mai ae nāunāu o Jihova kiate kinaua.

7 Bea nae folofola a Jihova kia Mosese, o behe,

8 Ke ke too ae tokotoko, bea tanaki ae kakai ke nau fakataha, akoe mo Elone ko ho taokete, bea mo lea ki he maka i ho nau ao, bea e foaki mai eia a hono vai, bea te ke omi ae vai mei he maka kiate kinautolu, bea te ke foaki behe ae vai ki he kakai moe nau faga manu ke nau inu.

9 Bea nae ave e Mosese ae tokotoko mei he ao o Jihova o hage ko ene fekau kiate ia.

10 Bea nae fakataha e Mosese mo Elone ae kakai ki he ao oe maka, bea naa ne behe kiate kinautolu, Mou fanogo mai ae kau agatuu; oku lelei ke ma omi ae vai mei he maka ni kiate kimoutolu?

11 Bea nae hiki hake e Mosese a hono nima, bea naa ne ta‘i ae maka o liuga ua aki a hono tokotoko, bea nae ba mai ae vai o lahi, bea nae inu ai ae kakai moe nau faga manu foki.

¶ 12 Bea nae folofola a Jihova kia Mosese mo Elone, o behe, Koe mea i hoo mo tae tui kiate au, ke fakaogolelei au i he ao oe fānau a Isileli, ko ia e ikai ai te mo omi ae kakai ni ki he fonua, aia kuou foaki kiate kinautolu.

13 Koe vai eni o Meliba, koeuhi nae fakakē ae fānau a Isileli kia Jihova, bea nae ogolelei ia iate kinautolu.

¶ 14 Bea nae fekau e Mosese ae kau talafekau mei Ketesi ki he tu‘i o Itomi, Oku behe e ho tokoua ko Isileli, Kuo ke ilo e koe ae fonoga kotoabe kuo to mai kiate kimautolu:

15 Moe alu hifo e mau gaahi tamai ki Ijibite, bea moe mau nofo fuoloa i Ijibite, bea nae fakafiu‘i e he kakai Ijibite akimautolu moe mau gaahi tamai.

16 Bea i he e mau tagi kia Jihova naa ne ogo‘i a ho mau le‘o, bea naa ne fekau ki he ene agelo, bea kuo ne omi akimautolu mei Ijibite, bea koeni, oku mau i Ketesi, koe kolo ia oku tuu i he gataaga mooni o ho fonua.

17 Oku ou kole kiate koe, tuku ke mau alu atu i ho fonua: e ikai te mau alu atu i he gaahi goue, be i he gaahi goue vaine, bea e ikai te mau inu ae vai oe gaahi vai keli: te mau alu i he hala motua oe tu‘i, e ikai te mau afe ki he nima toomatau be ki he toohema, kae oua ke tuku ki mui ae gataaga o ho fonua.

18 Bea nae behe e Itomi kiate ia, E ikai te ke alu ofi kiate au, telia naaku alu atu moe heleta kiate koe.

19 Bea nae behe ehe fānau a Isileli kiate ia, Te mau alu i he hala motua, bea kabau teu inu a ho vai be  inu e he eku faga manu, teu totogi kiate koe: e laka atu be a hoku va‘e, ka e ikai teu fai ha mea kehe.

20 Bea naa ne behe, E ikai aubito te ke laka atu. Bea nae ha‘u kiate ia a Itomi moe kakai toko lahi, bea moe nima malohi.

21 Nae behe ae taofi e Itomi ae alu a Isileli i hono mata fonua: koia nae foki atu ai a Isileli meiate ia.

¶ 22 Bea nae alu ae fānau a Isileli, io, ae kakai kotoabe, mei Ketesi, bea nau ha‘u ki he mouga ko Hoa.

23 Bea nae folofola a Jihova kia Mosese mo Elone i he mouga ko Hoa, i he mata fonua o Itomi, o behe,

24 E tanaki a Elone ki hono kakai: koeuhi e ikai hoko ia ki he fonua aia neu foaki ki he fānau a Isileli, he naa mo talagataa ki he eku lea i he vai o Meliba.

25 Ke ke ave a Elone mo Eliesa ko hono foha, bea omi akinaua ki he mouga ko Hoa.

26 Bea ke vete ae gaahi kofu o Elone, o fakakofu aki ia a Eliesa ko hono foha: bea e tanaki a Elone ki hono kakai, bea e bekia ia i ai.

27 Bea nae fai e Mosese o hage koe fekau a Jihova: bea naa nau alu hake ki he mouga ko Hoa i he ao oe kakai kotoabe.

28 Bea nae vete e Mosese ae gaahi kofu o Elone, bea ne fakakofu aki a Eliesa ko hono foha; bea nae bekia a Elone i he tumutumu oe mouga: bea nae alu hifo a Mosese mo Eliesa mei he mouga.

29 Bea i he mamata ae kakai kotoabe kuo bekia a Elone, naa nau loto mamahi koeuhi ko Elone i he aho e tolugofulu, io ae fale kotoabe o Isileli.